“Mayo 23–29. Josue 1–8; 23–24: ‘Bumilegka ken Umingelka,’” Umaykayo, Sumurot Kaniak—Para iti Primary: Daan a Tulag 2022 (2021)
“Mayo 23–29. Josue 1–8; 23–24,” Umaykayo, Sumurot Kaniak—Para iti Primary: 2022
Ladawan ni Moises a mangor-orden ken ni Josue, ni Darrell Thomas
Mayo 23–29
Josue 1–8; 23–24
“Bumilegka ken Umingelka”
Bayat ti panangbasam iti Josue 1–8 ken 23–24, isuratmo dagiti naespirituan nga impresion a maawatmo. Anianto ti aramidem tapno matakuatan no ania ti kasapulan dagiti ubbing a sursuruam nga agsursuro manipud kadagitoy a kapitulo?
Isuratmo dagiti Impresionmo
Yawis ti Panagbibinninglay
Idrowingmo iti pisarra ti ladawan ti maysa a banag manipud iti maysa kadagiti estoria iti Josue 1–8; 23–24, ket kitaem no mapugtuan dagiti ubbing ti estoria a naggapuanna. Kas pagarigan, mabalinmo ti mangidrowing iti maysa a karayan wenno bakud ti maysa a siudad.
Isuro ti Doktrina: In-inaudi nga Ubbing
Makapagpanunotak maipapan kadagiti nasantuan a kasuratan iti aldaw ken rabii.
Imbaga ti Apo ken ni Josue a no nagutob kadagiti nasantuan a kasuratan ken sinurotna ti balakad kadagitoy, nagballigi koma iti panangiturongna kadagiti Israelita iti naikari a daga. Ania ti maaramidmo a mangisuro kadagiti ubbing kadagiti naindaklan a bendision a sumangbay manipud kadagiti nasantuan a kasuratan?
Dagiti Mabalin nga Aktibidad
-
Ikkam ti tunggal ubing iti maysa a ladawan wenno drowing ti init ken ti bulan. Ibasam kadakuada manipud iti Josue 1:8: “Agutob [kadagiti nasantuan a kasuratan] iti aldaw ken rabii.” Ilawlawag a ti agutob kaipapananna ti agpanunot iti nauneg maipapan iti maysa a banag. Uliten ti ragup ti balikas iti sumagmamano a gundaway, ket awisem dagiti ubbing a mangitag-ay iti init no isaom ti “aldaw” ken ti bulan no isaom ti “rabii.” Tulongam dagiti ubbing a mangulit kadagiti ragup ti balikas a kagiddandaka.
-
Kiddawen kadagiti ubbing a manginagan kadagiti banag nga aramidenda kabayatan ti aldaw ken banag nga aramidenda iti rabii. Ibagam kadakuada a naibaga ken ni Josue a mangpanunot maipapan kadagiti nasantuan a kasuratan iti aldaw ken rabii. Tulongam ida a mangpanunot kadagiti estoria wenno pannursuro iti manipud kadagiti nasantuan a kasuratan a makapagpanunotda maipapan iti aldaw ken rabii. Awisem ida a mangidrowing iti ladawan ti bagbagida wenno ti pamiliada nga agad-adal kadagiti nasantuan a kasuratan. Apay a kayatda ti agad-adal kadagiti nasantuan a kasuratan? Kasano a mabendisionanda no aramidenda?
Masapul a mabuniaganak tapno sumrek iti pagarian ti langit.
Ti estoria ni Josue a mangidadaulo kadagiti Israelita babaen iti Karayan Jordan nga agturong iti naikari a daga ket mangipaay iti gundaway a mangisuro kadagiti ubbing a nasken a mabuniagantayo tapno makastrek iti pagarian ti langit.
Dagiti Mabalin nga Aktibidad
-
Irebyum ti sumagmamano a detalye ti estoria mapapan kadagiti annak ti Israel nga agbalballasiw iti Karayan Jordan a sumrek iti naikari a daga (kitaen iti “Ni Josue a Propeta” iti Dagiti Estoria iti Daan a Tulag). Kalpasanna ipakitam ti ladawan ni Jesus a mabumbuniagan ken ibagam kadagiti ubbing a nabuniagan ni Jesus iti dayta met la a karayan. Awisem dagiti ubbing a mangibinglay iti dadduma pay a banag nga ammoda maipapan iti panagbuniag ni Jesus.
-
Makipagkanta kadagiti ubbing maipapan iti panagbuniag, a kas iti “Baptism” (Children’s Songbook, 100–101). Tulongam ida a mangilasin no ania ti isuro daytoy a kanta kadatayo maipapan iti no apay a nabuniagan ni Jesus ken no apay a nasken a surotentayo ti pagwadanna. Paibinglaymo kadagiti ubbing ti riknada maipapan iti pannakabuniag. Isaritam maipapan iti no ania ti mabalin nga aramiden dagiti ubbing ita tapno agsagana nga agpabuniag inton agtawenda iti walo.
Ladawanubing a babai a nakatakder iti puente ti pagbuniaganMasapul a mabuniagantayo tapno makastrek iti pagarian ti langit.
Mapilik ti agserbi ken ni Jesucristo.
Ti maudi a mensahe ni Josue kadagiti taona ket naaddaanda iti pili a mangituloy nga agserbi iti Apo wenno umadayo Kenkuana. Addaan iti kasta met laeng nga ayat nga adda ken ni Josue para kadagiti taona, maallukoymo dagiti ubbing a sursuruam a mangpili nga agserbi iti Apo iti “daytoy nga aldaw.”
Dagiti Mabalin nga Aktibidad
-
Kiddawen kadagiti ubbing nga agsarita maipapan iti sumagmamano kadagiti pili nga inaramidda ita nga aldaw. Ibasam kadagiti ubbing manipud iti Josue 24:15: “Agpilikayo ita nga aldaw no siasino ti pagserbianyonto; … ngem siak ken ti balayko, agserbikamto ken ni Jehova.” Kasano a pinili dagiti ubbing nga agserbi iti Apo ita nga aldaw? Ania dagiti sumagmamano a wagas a pakapagpiliantayo nga agserbi Kenkuana iti inaldaw?
-
Agkansion iti maysa a kanta maipapan iti panagaramid kadagiti nasayaat a pili, kas iti “Choose the Right Way” (Children’s Songbook, 160–61). Kasano ti riknatayo no pilientayo ti agserbi ken ni Jesucristo? Awisem dagiti ubbing a mangidrowing iti ladawan ti bagbagida nga agar-aramid iti maysa a banag tapno agserbi iti Apo. Ibinglay ti estoria manipud iti biagmo wenno manipud iti maysa a magasin ti Simbaan maipapan iti panagpili nga agserbi iti Apo.
Isuro ti Doktrina: In-inauna nga Ubbing
“Bumilegka ken umingelka.”
Kalpasan a nagbalin a lider dagiti Israelita ni Josue, inallukoy ti Apo isuna babaen ti panagkunana, “Bumilegka ken umingelka” (Josue 1:6). Ania ti masursuro dagiti ubbing manipud ken ni Josue maipapan iti no kasano nga agbalin a natibker ken natured para ken ni Cristo?
Dagiti Mabalin nga Aktibidad
-
Awisem dagiti ubbing a mangsapul iti ragup ti balikas a maulit iti Josue 1:6, 9, ken 18, ket isurat daytoy iti pisarra (kitaen met iti bersikulo 7). Tulongam dagiti ubbing a mangpanunot kadagiti gapu no apay a mabalin a kasapulantayo daytoy a mensahe, kas iti inaramid ni Josue. Irebyu kas maysa a klase ti sumagmamano kadagiti estoria iti Josue 1–4; 6 (kitaen met iti “Ni Josue a Propeta” ken “Ni Rahab ken dagiti Espia” iti Dagiti Estoria iti Daan a Tulag), ket kiddawem kadagiti ubbing a mangilasin no kasano a nangipakita dagiti tao kadagitoy nga estoria iti tured ken pigsa.
-
Awisem dagiti ubbing nga agsarita maipapan iti maysa a tao nga am-ammoda a napigsa ken natured para ken ni Jesucristo. Allukoyem ida a mangisurat iti maysa a banag a kayatda nga aramiden tapno agbalin a napigpigsa ken naturtured para ken ni Cristo.
Mabalinko ti agutob kadagiti nasantuan a kasuratan iti aldaw ken rabii.
Maysa a wagas a nangtulongan ti Apo ken ni Josue nga agsagana para kadagiti karit a sinangona ket babaen iti panangallukoy kenkuana nga “agutob” kadagiti nasantuan a kasuratan iti “aldaw ken rabii.” Kasano a mabalin a mangbendision daytoy a balakad kadagiti ubbing a sursuruam?
Dagiti Mabalin nga Aktibidad
-
Awisem dagiti ubbing a mangisurat no mano nga oras ti bubosenda iti maysa nga aldaw iti nadumaduma nga aktibidad. Kalpasanna awisem ida a mangbasa iti Josue 1:8, nga agsapsapul iti maysa a banag a nasken nga aramidentayo amin iti tunggal aldaw ken rabii. Kiddawem kadakuada a mangsapul kadagiti balikas ken ragup ti balikas iti daytoy a bersikulo a mangisuro kadatayo maipapan kadagiti bendision ti panagadal kadagiti nasantuan a kasuratan. Kasano a ti panagutob kadagiti nasantuan a kasuratan ket makatulong kadatayo nga agballigi iti dadduma pay a banag nga aramidentayo iti tunggal aldaw?
-
Awisem dagiti ubbing nga aggigiddan a mangbasa kadagiti sumaganad a nasantuan a kasuratan: Josue 1:8; 1 Nephi 15:23–24; 2 Nephi 31:20; 32:3; Jacob 4:6; Helaman 3:29–30. Kiddawen kadagiti ubbing a mangsapul iti maysa a balikas wenno ragup ti balikas iti tunggal binatog a mangisuro kadakuada maipapan iti bileg ti panagadal kadagiti nasantuan a kasuratan. Ania dagiti panggep a tun-oyen a maitudingda para iti bukodda a panagadal iti nasantuan a kasuratan?
Mapilik ti agserbi ken ni Jesucristo.
Maibilang kadagiti maudi a balikas ni Josue kadagiti Israelita ket ti maysa a pakaasi nga “agpilikayo ita nga aldaw no siasino ti pagserbianyonto.” Utobem no kasano a makabendision daytoy a balakad kadagiti ubbing a sursuruam.
Dagiti Mabalin nga Aktibidad
-
Awisem dagiti ubbing a mangaramid iti maysa a poster nga usarenda ti sumagmamano kadagiti kangrunaan a balikas ken ragup ti balikas iti Josue 24:15. Paibinglaymo kadakuada dagiti posterda ken pailawlawagmo no apay a pinilida dagita a balikas. Kasano a maipakitatayo iti Dios a pinilitayo ti agserbi Kenkuana?
-
Awisem dagiti ubbing a mangisingasing kadagiti kasasaad a nasken a makaikeddengda ti mangpili iti Dios ngem iti dadduma pay a banag. Idawat kadakuada a mangpanunot no ania ti aramidenda. Apay a napateg nga “agpili ita nga aldaw” mbes a mangur-uray a rumsua ti kasasaad? Kasano a mabendisionantayto no agaramidtayo iti umno a pili?
Yallukoy ti Panagsursuro iti Pagtaengan
Awisem dagiti ubbing a pumili iti maysa a banag a napagsasaritaanyo a kayatda nga ibinglay iti pamiliada. Allukoyem ida a mangpanunot iti maysa a wagas a mabalinda nga ibinglay daytoy iti daytoy umay a lawas.
Panangpadur-as iti Panangisurotayo
Tulongam dagiti ubbing nga agbalin a nalalaing nga agad-adal. Ti panggepmo iti panangisurom kadagiti ubbing ket saan laeng a mangibinglay iti kinapudno kadakuada. Nasken a tulongam pay ida a mapadur-asda nga agsapsapul iti kinapudno babaen ti panagpannuray iti bukodda a kabaelan.