“Mayo 16–22. Deuteronomio 6–8; 15; 18; 29–30; 34: “Agaluadka Ngarud Di La Ket Ta Malipatam ni Jehova’” Umaykayo, Sumurot Kaniak—Para iti Primary: Daan a Tulag 2022 (2021)
“Mayo 16–22. Deuteronomio 6–8; 15; 18; 29–30; 34,” Umaykayo, Sumurot Kaniak—Para iti Primary: 2022
Ladawan ni Moises iti Bantay Nebo, © Providence Collection/licensed from goodsalt.com
Mayo 16–22
Deuteronomio 6–8; 15; 18; 29–30; 34
“Agaluadka Ngarud Di La Ket Ta Malipatam ni Jehova”
Utobem no kasano a mabalinmo nga ibagay dagiti aktibidad iti daytoy a balabala kadagiti kasapulan dagiti ubbing a sursuruam. Kas pagarigan, no mangisuroka kadagiti babassit nga ubbing, matulongam ida nga agsagana para iti panagbuniag babaen iti panangibagay kadagiti aktibidad iti babaen ti “Ti panagtungpal kadagiti katulagan ti mangyeg kadagiti naindaklan a bendision” iti benneg a para kadagiti in-inauna nga ubbing.
Isuratmo dagiti Impresionmo
Yawis ti Panagbibinninglay
Awisem dagiti ubbing a mangibinglay kadagiti banag a nasursuroda maipapan ken ni Moises iti Primary wenno iti pagtaengan kadagiti napalabas a sumagmamano a lawas. No kasapulan, ipakitam dagiti ladawan dagiti pasamak manipud iti biag ni Moises a makatulong kadakuada a manglagip. Ibagam kadakuada nga ita nga aldaw isaritam ti maipapan kadagiti banag nga insuro ni Moises iti gibus ti biagna iti daga.
Isuro ti Doktrina: In-inaudi nga Ubbing
Maayatko ti Apo iti amin a pusok.
Insuro ni Moises kadagiti annak ti Israel a nasken nga ayatenda ti Apo iti amin a puso, kararua, ken kabaelanda. Mangpanunot kadagiti wagas a mabalin a pakatulongam kadagiti ubbing a sursuruam a mangpadakkel iti ayatda para iti Nailangitan nga Ama ken ti Mangisalakan.
Dagiti Mabalin nga Aktibidad
-
Mangidrowing iti pisarra ti maysa a puso, maysa a balabala ti bagi, ken maysa a napigsa a takiag. Basaem ti Deuteronomio 6:5, ken itudom dagiti ladawan bayat ti panangbasam kadagiti balikas a “puso,” “kararua,” ken “kabaelan.” Awisem dagiti ubbing nga agsisinnublat a mangitudo kadagiti ladawan bayat ti panangulit ti klase iti binatog ti nasantuan a kasuratan a kagiddandaka.
-
Agkanta maipapan iti ayat ti Nailangitan nga Ama, kas iti “My Heavenly Father Loves Me” (Children’s Songbook, 228–29). Tulongam dagiti ubbing a mangsapul kadagiti balikas iti kanta a mangipakita nga ay-ayatennatayo ti Nailangitan nga Ama. Tulongam ida a mangpanunot kadagiti wagas a pakaipakitaantayo Kenkuana nga ay-ayatentayo met Isuna.
Dagiti nasantuan a kasuratan ti balikas ti Dios.
Naipangpangruna a nairanta ti balakad iti Deuteronomio 6:6–9 a mangtulong kadagiti Israelita tapno “agaluad[da] ngarud di la ket ta malipatan[da] ni Jehova ken ti balikasna (bersikulo 12). Kasano a matulongam dagiti ubbing nga aramidenda dagiti nasantuan a kasuratan nga agtultuloy a paset ti biagda?
Dagiti Mabalin nga Aktibidad
-
Awisem ti maysa nga ubing a mangilemmeng iti maysa a kopia dagiti nasantuan a kasuratan iti siled idinto nga agkidem dagiti dadduma pay nga ubbing. Kalpasanna awisem dagiti ubbing nga agmulagat ken mangpadas a mangsapul kadagiti nasantuan a kasuratan. Iti panangusarmo kadagiti kangrunaan a ragup ti balikas manipud iti Deuteronomio 6:6–9, isaritam kadagiti ubbing nga imbaga ni Moises kadagiti Israelita a mangipan kadagiti binatog iti nasantuan a kasuratan iti lugar a makitada dagitoy ket agsursuro kadagitoy iti inaldaw. Tulongam dagiti ubbing nga agpanunot kadagiti lugar iti pagtaenganda a pangikabilanda iti nasantuan a kasuratan tapno makitada dagitoy iti inaldaw.
-
Agkansion iti maysa a kanta maipapan iti nasantuan a kasuratan, kas iti “Search, Ponder, and Pray” (Children’s Songbook,109). Ibinglaymo ti pammaneknekmo a dagiti balikas ti Dios dagiti nasantuan a kasuratan, ket ibagam kadagiti ubbing no kasano ti panangparaburda iti biagmo.
Ni Jesucristo isu ti propeta a kas ken ni Moises.
Isuronatayo dagiti propeta ti maipapan ken ni Jesucristo.
Impadto ni Moises nga umayto ni Jesucristo ken nasken a dumngegtayo kadagiti balikas nga insuro ni Jesus.
Dagiti Mabalin nga Aktibidad
-
Tulongam ti maysa kadagiti ubbing a mangbasa iti Deuteronomio 18:18, ket ibagam kadagiti ubbing a ti Propeta a kas ken ni Moises a patanorento ti Dios ket ni Jesucristo. Tapno matulongan dagiti ubbing a mangkita kadagiti wagas a pagpadaan da Moises ken Jesus, mangitugotka kadagiti ladawan dagiti banag nga inaramid ni Moises ken dagiti banag nga inaramid ni Jesucristo, ket bay-an a pagparisen dagiti ubbing dagitoy. Kas pagarigan, mabalinmo ti mangitugot kadagiti ladawan da Moises ken Jesus a mangor-orden kadagiti dadduma ken mangisursuro (kitaen iti Libro ti Arte ti Ebanghelio, dagiti num. 15, 16, 38,39).
-
Ipakitam kadagiti ubbing ti maysa a ladawan ti propetatayo iti agdama, ken mangibinglay iti maysa a banag nga insurona maipapan iti Mangisalakan. Awisem dagiti ubbing a mangidrowing iti ladawan ti propeta nga ibinglayda kadagiti pamiliada.
Isuro ti Doktrina: In-inauna nga Ubbing
Matungpalko ti balikas ti Dios iti pusok.
Insuro ni Moises a nasken a pagtalinaedentayo ti balikas ti Dios iti puspusotayo, ket intedna kadagiti Israelita ti balakad maipapan no kasano a pagtalinaeden ti balikas ti Dios a kanayon iti sangoda. Kasano a maparegtamto dagiti ubbing nga agsursuro manipud iti balikas ti Dios iti inaldaw?
Dagiti Mabalin nga Aktibidad
-
Iti pisarra, isurat dagiti balikas ken ragup ti balikas manipud iti Deuteronomio 6:6–9 a mangipakita no kaano ken kasano a lagipen dagiti Israelita ti balikas ti Dios (kas situtugawka, magmagnaka, agiddaka, imam ken balaymo). Awisem dagiti ubbing a mangsapul kadagitoy a balikas kadagiti bersikulo. Ania ti isuro dagitoy a balikas maipapan iti no kasano nga aramiden a paset ti inaldaw a panagbiagtayo dagiti nasantuan a kasuratan? Kiddawen kadagiti ubbing no ania ti maaramidda a manglaglagip iti balikas ti Dios iti inaldaw a panagbiagda.
-
Ikkam ti tunggal ubing iti maysa a papel, ket awisem ida a mangisurat iti ragup ti balikas manipud iti Deuteronomio 6 a napateg kadakuada. Idawatmo kadakuada a mangibinglay no apay a pinilida ti ragup ti balikasda. Isingasing nga arkosanda ti papelda ket i-display daytoy iti pagtaenganda tapno malagipda daytoy. Allukoyem dagiti ubbing a mangisurat ken i-display dagiti dadduma pay a ragup ti balikas a masarakanda iti nasantuan a kasuratan.
Sirarag-o a makapagserbiak kadagiti agkasapulan.
Makatulong dagiti pannursuro iti Deuteronomio 15:7–11 kadagiti ubbing a sursuruam a makaawat a ti panangtulong kadagiti dadduma ket mangiraman iti ad-adda pay ngem iti nalinteg nga aramid. Nasken a maaramid daytoy nga addaan iti natallugod a puso.
Dagiti Mabalin nga Aktibidad
-
Isurat ti asino, apay, ken kasano, iti pisarra. Awisem dagiti ubbing a mangbasa iti Deuteronomio 15:7–11 tapno ammuen no asino ti nasken a tulongantayo, apay a nasken a tulongantayo ida, ken no kasano ti nasken a marikna ti puspusotayo maipapan iti panangtulong. Awisem ida a mangisurat iti pisarra no ania ti masarakanda. Agkansion iti kanta a mangpatibker iti mensahe kadagitoy a bersikulo, kas iti “Have I Done Any Good?” (Hymns, no. 223).
-
Kiddawen kadagiti ubbing a mangpanunot iti maysa a tao a mabalinda a tulongan—nangnangruna iti bukodda a pamilia. Mangted iti oras a maisuratda no anianto ti aramidenda itoy a lawas a mangtulong iti dayta a tao. No mabalin, agaramid kadagiti plano a tumulong kas maysa a klase iti maysa a tao nga agkasapulan.
Ti panagtungpal kadagiti katulagan ket mangyeg kadagiti naindaklan a bendision.
Kas kadagiti annak ti Israel, kasapulantayo dagiti kanayon a palagip nga agbiag kadagiti katulagantayo. Ti panagbasa iti Deuteronomio 30:8–10 ket makatulong kadagiti ubbing a makaawat a nasaysayaat no ania ti katulagan ken mangparegta kadakuada a mangtungpal kadagiti katulaganda.
Dagiti Mabalin nga Aktibidad
-
Saludsodem kadagiti ubbing no ania ti katulagan (no kasapulanda ti tulong, isingasingmo a sapulenda ti depinision iti “Katulagan” iti Pangiwanwan iti Nasantuan a Kasuratan [scriptures.ChurchofJesusChrist.org]). Idrowingmo ti maysa a tsart a dua ti kolumna iti pisarra nga addaan kadagitoy a paulo: dagiti kari dagiti Israelita ken dagiti kari ti Dios. Awisem dagiti ubbing a mangsukisok iti Deuteronomio 30:8–10 ket punnuenda ti tsart. (No kasapulan, tulongam dagiti ubbing a makaawat iti kaipapanan dagiti ragup ti balikas iti bersikulo 9.) Paneknekam maipapan kadagiti bendision a simmangbay kenka manipud iti panagtungpalmo kadagiti katulagam.
-
Awisem dagiti ubbing a mangilista iti pisarra dagiti kari nga inaramidtayo idi nabuniagantayo ken dagiti kari nga inaramid ti Nailangitan nga Ama kadatayo (kitaen iti Doktrina ken Katulagan 20:37, 77). Ania ti maaramidtayo a kanayon a manglaglagip iti Mangisalakan ken agtungpal kadagiti katulagantayo?
Yallukoy ti Panagsursuro iti Pagtaengan
Awisem dagiti ubbing nga agpammarang a maysaka a miembro ti pamiliada, ken kiddawem kadakuada a mangibaga kenka iti maysa a banag a nasursuroda iti klase ita nga aldaw. Allukoyem ida a mangibinglay no ania ti imbagada kenka iti maysa a miembro ti pamiliada inton makaawidda iti pagtaengan.
Panangpadur-as iti Panangisurotayo
Agdamag kadagiti naparegta a saludsod. Agdamag kadagiti saludsod a mangawis kadagiti ubbing saan laeng a mangipadamag iti kinapudno ngem mangibinglayda pay iti pammaneknekda maipapan kadagiti kinapudno ti ebanghelio. Kas pagarigan, no paglilinnawaganyo dagiti bilin, mabalinmo a paibinglay kadagiti ubbing no kasano a nabendisionanda gapu iti panagtungpalda kadagiti bilin.