“Mayo 9–15. Numeros 11–14; 20–24: ‘Dikayo Koma Kumaniwas ken Jehova, Wenno Dikayo Agbuteng’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Mayo 9–15. Numeros 11–14; 20–24,” Umaykayo, Sumurot Kaniak—Para kadagiti Indibidual ken Pamilia: 2022
Mayo 9–15
Numeros 11–14; 20–24
“Dikayo Koma Kumaniwas ken Jehova, Wenno Dikayo Agbuteng”
Daytoy a balabala ti mangitampok iti sumagmamano kadagiti adu a napapateg a pagbatayan iti libro ti Numeros. Agbalinka pay a nakasagana iti dadduma a mabalin a pakatulongan ti Espiritu kenka a kumita.
Isuratmo dagiti Impresionmo
Uray no magmagna, di gagangay nga umabot iti 40 a tawen ti panagdaliasat manipud iti let-ang ti Sinai agingga iti naikari a daga iti Canaan. Ngem kasta ti kapaut a kinasapulan dagiti annak ti Israel, a saan a mangsakup iti distansia ti heograpia ngem mangsakup iti naespirituan a distansia: ti distansia ti nagbaetan ti no asinoda ken no asino ti kasapulan ti Apo a pagbalinanda kas natulagan a tattaona.
Iladawan ti libro ti Numeros ti sumagmamano ti no ania ti napasamak kabayatan dagita a 40 a tawen, agraman dagiti leksion a kasapulan a sursuruen dagiti annak ti Israel sakbay ti iseserrek iti naikari a daga. Nasursuroda maipapan iti panagbalin a napudno kadagiti napili a katulongan ti Apo (kitaen iti Numeros 12). Nasursuroda maipapan iti panagtalek iti bileg ti Apo, uray no kasla awan namnama ti masakbayan (kitaen iti Numeros 13–14). Ket nasursuroda a ti kinaawan panamati wenno kinaawan panagtalek ket mangyeg iti naespirituan a pannakadangran, ngem mabalinda ti agbabawi ken kumita iti Mangisalakan para iti pannakapaimbag (kitaen iti Numeros 21:4–9).
Maipadatayo amin kadagiti Israelita iti sumagmamano a wagas. Ammotayo amin no ania ti kayarigan ti adda iti maysa a naespirituan a let-ang, ken dagita met laeng a leksion a nasursuroda ti makatulong kadatayo nga agsagana a sumrek iti bukodtayo a naikari a daga: agnanayon a biag iti denna ti Nailangitan nga Amatayo.
Para iti pakagupgopan ti libro ti Numeros, kitaen iti “Numeros” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Ti paltiing sidadaan a magun-od ti amin, ngem iwanwan ti Dios ti Simbaanna babaen ti propetana.
Iti Numeros 11:11–17, 24–29, kitaen ti problema a nakaipasanguan ni Moises ken ti pangrisut nga insingasing ti Dios. Ania iti panagkunam a kayat a sawen ni Moises idi kinunana, a tinarigagayanna nga “amin a tattao ni Jehova mammadtoda”? (bersikulo 29). Bayat ti panangutobmo kadagitoy a bersikulo, ibilangmo dagitoy a balikas ni Presidente Russell M. Nelson: “Talaga kadi a kayat ti Dios a makasaritanakayo? Wen! … O, nakaad-adu pay ti kayat ti Amayo sadi Langit a maammuanyo” (“Revelation for the Church, Revelation for Our Lives,” Liahona, Mayo 2018, 95).
Nupay kasta, ti panagkunana a makapagbalin a maysa a propeta ti tunggal maysa saanna a kayat a sawen a mabalinda amin nga iturong dagiti tao ti Dios iti wagas nga inaramid ni Moises. Ti pasamak a naisurat iti Numeros 12 ti mangilawlawag iti daytoy. Bayat ti panangbasam iti daytoy a kapitulo, ania dagiti pammallaag a masarakam? Ania ti mariknam a kayat ti Apo a maawatam maipapan iti bukod a paltiing ken panangsurot iti propeta?
Kitaen met iti 1 Nephi 10:17; Doktrina ken Katulagan 28: 1–7; Dallin H. Oaks, “Two Lines of Communication,” Liahona, Nob. 2010, 83–86.
Addaan iti pammati iti Apo, maaddaanak iti namnama para iti masakbayan.
Bayat ti panangbasam iti Numeros 13–14, padasem nga ikabil ti bagim iti lugar dagiti Israelita. Apay iti panagkunam a kayatda nga “agsubli idiay Egipto”? (Numeros14:3). Maipadaka kadi kadagiti mangnamnama a mapasamak ti kadadaksan (pessimistic) maipapan iti iseserrek iti naikari a daga? Kasano ti panangiladawanmo ti sabali nga “espiritu” nga adda ken ni Caleb? (Numeros 14:24). Ania ti makaawis iti riknam maipapan iti pammati da Caleb ken Josue, ken kasano a mayaplikarmo dagiti pagwadanda kadagiti kasasaad a pakaipasanguam?
Kitaen met iti Teachings of Presidents of the Church: Gordon B. Hinckley (2016), 75–76.
No kitaek ni Jesucristo a sipapammati, mapaimbagnak a naespirituan.
Ammo dagiti propeta iti libro ni Mormon ti estoria a nairekord iti Numeros 21:4–9 ken naawatanda ti naespirituan a kinapateg daytoy. Ania ti inayon ti 1 Nephi 17:40–41; Alma 33:18–22; ken Helaman 8:13–15 iti pannakaawatmo iti daytoy nga estoria? Bayat ti panagadalmo kadagitoy a binatog, panunotem maipapan iti naespirituan a pannakapaimbag a namnamaem. Nasken kadagiti Israelita a “[kumita] idi iti sinan-uleg a suer” (Numeros 21:9) tapno maimbaganda. Ania ti mariknam a makaparegta nga aramidem tapno ad-adda a naan-anay a “kumita ti Anak ti Dios nga addaan pammati”Helaman 8:15).
Kitaen met iti Juan 3:14–15; Doktrina ken Katulagan 6:36; Dale G. Renlund, “Abound with Blessings,” Liahona, Mayo 2019, 70–73.
Naimbagan dagiti Israelita babaen ti ikikitada iti gambang nga uleg.
Masurotko ti pagayatan ti Dios, uray pay no padasen dagiti dadduma a mangallukoy kaniak a diak suroten.
Idi naammuan ni Balak, ti ari ti Moab, ti yaasideg dagiti Israelita, inawaganna ni Balaam, ti lalaki a maam-ammo iti panangisao kadagiti bendision ken lunod. Tinarigagayan ni Balak a mangpakapsut kadagiti Israelita babaen ti panangilunod kadakuada. Kitaen no kasano a pinadas nga inallukoy ni Balak ni Balaam (kitaen iti Numeros 22:5–7, 15–17), ket panunotem maipapan kadagiti pannulisog a pakaipasanguam a mangsupiat iti pagayatan ti Dios. Ania ti makaawis iti riknam maipapan kadagiti sungbat ni Balaam iti Numeros 22:18, 38; 23:8, 12, 26; 24:13?
Nakalidliday, ta kasla simmuko ni Balaam ti kamaudiananna ken liniputanna ti Israel (kitaen iti Numeros 31:16; Judas 1:11). Utobem no kasano a makapagtalinaedka a napudno iti Apo iti baet ti pammilit manipud kadagiti dadduma.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Numeros 11:4–6.Maipada kadi ti galadtayo iti galad dagiti Israelita a naipeksa iti Numeros 11:4–6? Kasano a makatulong ti balakad iti Doktrina ken Katulagan 59:15–21 ?
-
Numeros 12:3.Kasano nga impakita ni Moises ait “napakumbaba unay” iti Numeros 12 wenno iti dadduma pay a binatog iti nasantuan a kasuratan a nabasamon? Mabalinmo nga irebyu ti palawag ni Elder David A. Bednar iti kinapakumbaba iti mensahena a “Meek and Lowly of Heart” (Liahona, Mayo 2018, 30–33) wenno iti “Napakumbaba, Kinapakumbaba” iti (scriptures.ChurchofJesusChrist.org). Ania ti masursurotayo maipapan no kasano a makapagbalintayo a napakpakumbaba? Ania dagiti bendision a mabalin a sumangbay no aramidentayo daytoy?
-
Numeros 13–14.Dua (wenno ad-adu pay) a miembro ti pamiliam ti mabalin nga agpammarang a “simisimanda” ti (Numeros 13:17) sabali pay a paset ti pagtaenganyo a kasla daytoy ti naikari a daga. Kalpasanna mabalin ti tunggal maysa a mangted iti report a maibatay iti Numeros 13:27–33 wenno Numeros 14:6–9. Ania ti masursurotayo maipapan iti pammati manipud iti dua nga aggiddiat a report kadagitoy a bersikulo? Kasano a makapagbalintayo nga ad-adda a kas kada Caleb ken Josue?
-
Numeros 21:4–9. Kalpasan ti panangbasam iti Numeros 21:4–9, karagpin ti 1 Nephi 17:40–41; Alma 33:18–22; ken Helaman 8:13–15, mabalin nga agaramid iti sinan-uleg a papel wenno pitak ket isurat ditoy wenno iti papel ti sumagmamano a simple a banag a mabalinmo nga aramiden tapno “kumita iti Anak ti Dios nga addaan pammati” (Helaman 8:15).
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “Jesus, the Very Thought of Thee,” Hymns, no. 141.
Panangpadur-as iti Panangisurotayo
Tulongam ti pamiliam a mangpadur-as iti naespirituan a panagpannuray iti bagi. “Imbes a mangiburay laeng iti impormasion, tulongam [dagiti miembro ti pamiliam] ti mangtakuat kadagiti kinapudno ti ebanghelio para iti bagbagida iti nasantuan a kasuratan ken balikas dagiti propeta” (Panangisuro iti Wagas ti Mangisalakan, 28).
Ni Moises ken ti Gambang nga Uleg, ni Judith A. Mehr