Panangiladawan ni Moises iti Bantay Nebo, © Providence Collection/licensed from goodsalt.com

Mayo 16–22

Deuteronomio 6–8; 15; 18; 29–30; 34

“Agaluadka Ngarud Di La ket Ta Malipatam ni Jehova”

Binilin ni Moises dagiti annak ti Israel a mangisuro iti balikas ti Apo kadagiti annakda (kitaen iti Deuteronomio 6:7). Bayat ti panagadalmo iti Deuteronomio iti daytoy a lawas, mangsapul kadagiti wagas a pangibinglayam no ania ti masursurom kadagiti miembro ti pamiliam.

Isuratmo dagiti Impresionmo

Nangrugi ti panagministro iti daga ni Moises iti maysa a bantay, idi nagsao kenkuana ti Dios manipud iti maur-uram a bassit a kayo (kitaen iti Exodo 3:1–10). Daytoy ket aggibus met iti maysa a bantay, kalpasan ti nasurok a 40 a tawen, idi nangted ti Dios ken ni Moises iti panangtaldiap iti naikari a daga manipud iti tuktok ti Bantay Nebo (kitaen iti Deuteronomio 34:1–4). Binubos ni Moises ti biagna a nangisagsagana kadagiti annak ti Israel a sumrek iti naikari a daga, ken naisurat iti libro ti Deuteronomio ti maudi a pangiturong, palagip, panangigunamgunam, ken pakaasina kadagiti Israelita. Ti panagbasa kadagiti balikasna ti mangilawlawag a ti pudno a panggep ti panagministro ni Moises—ti panagsagana a kasapulan dagiti tao—saan a maipapan iti panagbiag iti let-ang, panangrebbek kadagiti pagilian, wenno panangbangon iti maysa a komunidad. Maipapan daytoy iti panagsursuro a mangipateg iti Dios, agtungpal Kenkuana, ken agtalinaed a napudno Kenkuana. Dayta ti panagsagana a kasapulantayo amin tapno makastrek iti naikari a daga ti agnanayon a biag. Idinto a di pay pulos nakastrek ni Mosies iti “maysa a daga a pagayusan ti gatas ken diro” (Exodo 3:8), gapu iti pammati ken kinapudnona, simrek isuna iti naikari a daga nga insagana ti Dios kadagiti amin a sumurot Kenkuana.

Para iti pakagupgopan ti Deuteronomio, kitaen iti “Deuteronomio” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

Deuteronomio 6:4–7; 8:2–5, 11–17; 29:18–20; 30:6–10, 15–20

Kayat ti Apo nga agayatak Kenkuana iti amin a pusok.

Iti maudi a pannursurona, impalagip ni Moises kadagiti annak ti Israel, “Kadagitoy uppat-a-pulo a tawen ni Jehova a Diosmo adda idi kenka; sika awan nagkurangam,” uray bayat ti kaaddada iti let-ang (Deuteronomio 2:7). Ita a sumsumrek dagiti Israelita iti naikari a daga, iti “il-ili a [dida] pinatakder, ken dagiti balbalay a napno kadagiti nasayaat a bambanag, a [dida] indulin” (Deuteronomio 6:10–11), nagbuteng ni Moises amangan ta patangkenenda ti puspusoda ken lipatenda ti Apo.

Ibilangmo ti kasasaad ti bukodmo a puso bayat ti panangbasam iti balakad ni Moises. Mabalin a kayatmo nga ipokus dagiti sumaganad a bersikulo ket isuratmo dagiti impresionmo:

• Deuteronomio 6:4–7:

• Deuteronomio 8:2–5:

• Deuteronomio 8:11–17:

• Deuteronomio 29:18–20:

• Deuteronomio 30:6–10:

• Deuteronomio 30:15–20:

Ania ti maaramidmo a manglapped iti pusom iti panagpatangken ken ayatem ti Apo iti amin a pusom? Ania ti pagnaigan a makitam iti Deuteronomio 6:5–6 ken Mateo 22:35–40? (kitaen met iti Levitico 19:18).

Kitaen met iti Dieter F. Uchtdorf, “A Yearning for Home,” Liahona, Nob. 2017, 21–24.

Deuteronomio 6:4–12, 20–25

“Agaluadka ngarud di la ket ta malipatam ni Jehova.”

Kaaduan ti kaputotan dagiti Israelita a sumrek iti naikari a daga ti saan pay a nagsaksi kadagiti angol iti Egipto wenno nangballasiw iti Nalabaga a Baybay. Ammo ni Moises nga isuda—ken dagiti masakbayan a kaputotan—nasken a laglagipenda dagiti milagro ti Dios ken dagiti linteg ti Dios no nasken nga agtalinaedda a tattao ti Dios.

Ania a balakad ti ited ni Moises iti Deuteronomio 6:4–12, 20–25 a makatulong kenka a manglaglagip kadagiti naindaklan a banag nga inaramid ti Dios para kenka? Ania dagiti makaparegta nga aramidem tapno ti balikas ti Apo “agyanto iti pusom” iti inaldaw? (bersikulo 6).

Kasanonto ti panangipasam iti pammatim kadagiti masakbayan a kaputotan?

Kitaen met iti Deuteronomio 11:18–21; Gerrit W. Gong, “Always Remember Him,” Liahona, Mayo 2016, 108–11; Bible Dictionary, “Frontlets or phylacteries.”

Deuteronomio 15:1–15

Ti panangtulong kadagiti agkasapulan iramanna dagiti managparabur nga ima ken natallugod a puspuso.

Mangted tiDeuteronomio 15:1–15 iti balakad maipapan iti panangtulong kadagiti nakurapay ken agkasapulan, agraman dagiti masinunuo a kannawidan a saanen a masursurot iti agdama Ngem kitaem no ania ti isuro dagitoy a bersikulo maipapan iti no apay a nasken a tulongantayo dagiti nakurapay ken no kasano ti kinapateg iti Apo dagiti galadtayo maipapan iti panangtulong kadakuada. Ania ti mariknam a kayat ti Apo a masursurom manipud kadagitoy a bersikulo maipapan iti panagserbi iti dadduma?

Kitaen met iti Russell M. Nelson,“The Second Great Commandment,” Liahona, Nob. 2019, 96–100.

Deuteronomio 18:15–19

Ni Jesucristo isu ti Propeta a mapatanorto kas ken ni Moises.

Amin da Pedro, Nephi, Moroni, ken ti Mangisalakan Mismo ti nangted iti masao iti padto iti Deuteronomio 18:15–19 (kitaen iti Dagiti Aramid 3:20–23; 1 Nephi 22:20–21; Joseph Smith—Pakasaritaan 1:40; 3 Nephi 20:23). Ania ti masursurom maipapan iti Mangisalakan manipud kadagitoy a bersikulo? Kasano a maipada ti Mangisalakan a “kas” ken ni Moises? (Deuteronomio 18:15).

Ni Jesus isu ti propeta a kas ken ni Moises.

Deuteronomio 34:5–8

Ania ti napasamak ken ni Moises?

Nupay kuna ti Deuteronomio 34:5–8 a natay ni Moises, ilawlawag ti pannakaawat iti ud-udina nga aldaw nga isu ket nabaliwan, wenno nagbalbaliw tapno dina sagabaen ti saem wenno ipapatay agingga iti panagungarna (kitaen iti Alma 45:18–19; Bible Dictionary, “Moises”; Pangiwanwan iti Nasantuan a Kasuratan, “Nabaliwan a Parsua,” scriptures.ChurchofJesusChrist.org). Kasapulan ken ni Moises a mabaliwan gapu ta kasapulanna ti maaddaan iti pisikal a bagi tapno mangted kadagiti tulbek ti priesthood kada Pedro, Santiago, ken Juan iti Bantay ti Panagbalbaliw-Langa (kitaen iti Mateo 17:1–13).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Deuteronomio 6:10–15.Mabalin a dagitoy a bersikulo ti mangguyugoy kadagiti miembro ti pamiliam a mangpanunot kadagiti wagas a pakabendisionan ti pamiliam. Kasano a masurottayo ti balakad nga “agaluadka ngarud di la ket ta malipatam ni Jehova”? (Deuteronomio 6:12). Mabalin a kayatmo nga isurat dagiti panagriknam maipapan kadagiti paraburmo, nalabit iti maysa a diurnal wenno iti FamilySearch.

Deuteronomio 6:13, 16; 8:3.Nakatulong dagitoy a bersikulo iti Mangisalakan kabayatan ti napateg a kanito iti biagna; tapno makita no kasano, aggigiddan a mangbasa iti Mateo 4:1–10. Ania a binatog ti nasantuan a kasuratan ti nakatulong kadatayo iti panawen ti panagkasapulan?

Deuteronomio 5:6–9.Aramidem ti maysa a banag a makatulong kadagiti miembro ti pamilia a makarikna iti naisangsangayan, kas panangisagana iti paggugustoda a taraon. Kalpasanna mabalinmo a basaen iti Deuteronomio 7:6–9 ket ilawlawag no ania ti mariknayo a kaipapanan ti “ipangpangruna” (bersikulo 6) iti Apo.

Deuteronomio 29:12–13.Ti panangisarita maipapan iti Deuteronomio 29:12–13 ket mangipaay iti maysa a gundaway a paglilinnawagan dagiti miembro ti pamiliam ti katulagan nga aramidendanto wenno inaramiddan iti Nailangitan nga Ama. Ania ti kayat a sawen ti agbalin a tattao ti Dios? Kasano a dagiti katulagantayo “bangonenna[tayo] … para kadagiti umili iti [Dios]“? (bersikulo 13).

Para kadagiti dadduma pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Want to Live the Gospel,” Children’s Songbook,148.

Panangpadur-as iti Bukod a Panagadal

Kalikagumam a gun-oden dagiti bukodmo a naespirituan a pannakammo ken pannakaawat. Isingasing daytoy a balabala dagiti binatog ken pagbatayan nga ipamaysa, ngem saan koma a dayta ti manglimiitar iti panagadalmo. Bayat ti panagadalmo, mabalinmo a sursuruen maipapan iti maysa a pagbatayan a saan a nadakamat ditoy. Bay-an a ti Espiritu a mangtarabay kenka iti no ania ti nasken a masursurom.

Impakita ti Apo Kenkuana ti Amin a Daga, ni Walter Rane