ladawan ti daga ken ti bulan

Enero 3–9

Genesis 1–2; Moises 2–3; Abraham 4–5

“Idi Punganay Pinarsua ti Dios ti Langit ken ti Daga”

Nupay nabasamon maipapan iti Panagparsua idi, kanayon nga adu pay ti masursuro manipud kadagiti nasantuan a kasuratan. Ikararagan ti pannarabay manipud iti Espiritu Santo tapno matulonganka a mangsarak iti baro a pannakaawat.

Isuratmo dagiti Impresionmo

Gapu ta nangayed ken napintas ti lubong iti aglawlawtayo, narigat nga arapaapen a ti daga idi ket “adda idi a gosogoso,” “awan nagyan” (Genesis 1:2; Abraham 4:2). Maysa a banag nga isuro kadatayo ti estoria ti Panagparsua ket ti Dios makaaramid iti maysa a banag a nakaskasdaaw manipud iti maysa a banag a saan pay a nabukel. Makatulong dayta iti pananglagip no kasla natikaw ti biag. Namarsua ti Nailangitan nga Ama ken ni Jesucristo, ket saan pay a nalpas ti aramidda iti panagparsua. Makaaramidda iti silaw nga agraniag kadagiti nalidem a kanito iti biagtayo. Matulongandatayo a mangsarak iti kinatibker iti baet ti panagduadua iti rigat. Mabilinda a bilinen dagiti elemento, ken no agtungpaltayo iti balikasda kas iti inaramid dagiti elemento, mabaliwandatayo nga agbalin a napipintas a pinarsua a nakairantaantayo. Paset dayta ti kaipapanan ti pannakaparsua iti ladawan ti Dios, a kaaspingna (kitaen iti Genesis 1:26). Addaantayo iti potensial nga agbalin a kas Kenkuana: naitan-ok, nagloriaan, celestial a tao.

Para iti pakagupgopan ti libro ti Genesis, kitaen iti “Genesis” iti Pangiwanwan iti Nasantuan a Kasuratan.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Genesis 1:1–25; Moises 2:1–25; Abraham 4:1–25

Iti babaen ti panangiturong ti Nailangitan nga Ama, pinarsua ni Jesucristo ti daga.

Kinuna ni Elder D. Todd Christofferson, “Ania man dagiti detalye ti proseso ti panangparsua ammotayo a saan nga aksidente daytoy ngem inturong daytoy ti Dios nga Ama ken iimpatungpal ni Jesucristo” (“Why Marriage, Why Family,” Liahona, Mayo 2015, 51). Idinto nga adu ti saantayo nga ammo no kasano ti eksakto a pannakaparsua ti lubong, utobenyo no ania ti masursuroyo maipapan iti Panagparsua manipud iti no ania ti impalgak ti Dios iti Genesis 1:1–25; Moises 2:1–25; ken Abraham 4:1–25. Ania ti madlawmo a pagpapadaan dagitoy a pakaammuan? Ania ti madlawmo nga agduduma? Ania dagiti kapanunotam maipapan iti Nailangitan nga Ama ken ni Jesucristo bayat ti panangbasam maipapan iti Panagparsua?

Kitaen met iti Doktrina ken Katulagan 101:32–34.

kobrekama a mangiladawan iti nadumaduma nga addang ti panagparsua

Panagparsua, ni Joan Hibbert Durtschi

Genesis 1:27–28; 2:18–25; Moises 3:18, 21–25; Abraham 5:14–19

Ti kallaysa ti lalaki ken babai ket inordenan ti Dios.

“Nagtipon da Adan ken Eve iti kallaysa para iti daytoy a panawen ken para iti kinaagnanayon babaen ti bileg ti agnanayon a priesthood” (Russell M. Nelson, “Lessons from Eve,” Ensign, Nob. 1987, 87). Apay a napateg a maammuan daytoy a kinapudno? Utrobem daytoy bayat ti panangbasam iti Genesis 1:27–28; 2:18–25; Moises 3:18, 21–25; ken Abraham 5:14–19. No kayatmo a sursuruen ti ad-adu pay maipapan iti kallaysa iti uneg ti plano ti Dios, basaen ken utobem dagiti resources a nakalista iti baba. Ania ti pangparegta dagitoy a resources nga aramidem a mangpasayaat iti panagasawam wenno mangisagana iti panagkallaysam iti masakbayan?

Kitaen met iti Mateo 19:4–6; 1 Taga Corinto 11:11; Linda K. Burton, “We’ll Ascend Together,” Liahona, Mayo 2015, 29–32; “The Family: A Proclamation to the World,” ChurchofJesusChrist.org.

Genesis 2:2–3; Moises 3:2–3; Abraham 5:2–3

Binendisionan ken pinasanto ti Dios ti aldaw ti Sabbath.

Inaramid ti Dios a nasantuan ti aldaw ti Sabbath, ken indawatna a pagtalinaedentayo a nasantuan daytoy. Insuro ni Elder David A. Bednar, “Oras ti Dios ti Sabbath, maysa a sagrado nga oras naipangpangruna a nailatang para iti panagdaydayaw Kenkuana ken para iti panangawat ken pananglaglagip kadagiti naindaklan ken napapateg a karina” (“Exceeding Great and Precious Promises,” Liahona, Nob. 2017, 92). Kasano a mausarmo daytoy a palawag ken ti Genesis 2:2–3; Moises 3:2–3; wenno Abraham 5:2–3 a pangilawlawag iti maysa a tao no apay a pilenna ti agdaydayaw iti aldaw ti Sabbath? Kasano a binendisionannaka ti Apo iti panangpatalinaedmo a nasantuan iti aldawna?

Kitaen met iti Isaias 58:13–14; Doktrina ken Katulagan 59:9–13; “The Sabbath Is a Delight” (video), ChurchofJesusChrist.org.

family study icon

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Genesis 1:1–25; Moises 2:1–25; Abraham 4:1–25.Kasano a maaramidmo a makaay-ayo para iti pamiliam ti panagsursuro maipapan iti Panagparsua? Mabalinmo a kuyogen ti pamiliam iti panagsukisok iti ruar para kadagiti kita ti bambanag a naaramid kabayatan ti tunggal panawen ti estoria iti Panagparsua, kas kadagiti bituen, kaykayo, ken ayup. Mabalinmo pay nga ipakita dagiti ladawan ti bambanag a naparsua iti tunggal panawen ket awisem dagiti miembro ti pamilia a mangyurnos kadagiti ladawan kalpasan ti aggigiddan a panangbasa iti maysa kadagiti pakaammuan maipapan iti Panagparsua. Ania ti isuro dagitoy a pinarsua kadatayo maipapan iti Nailangitan nga Ama ken ni Jesucristo?

Genesis 1; Moises 2; Abraham 4.Maysa a wagas a pangirugi iti estoria iti Panagparsua ket awisem ti pamiliam a mangsapul no namin-ano iti Genesis 1 wenno Moises 2 nga inawagan ti Dios dagiti banag nga inaramidna iti “nasayaat.” Ania ti isingasing daytoy maipapan iti no kasano ti nasken a panangtratotayo kadagiti pinarsua ti Dios—agraman dagiti bagitayo? Ania ti masursurom manipud iti wagas a pannakaibalikas dagitoy a pasamak iti Abraham 4?

Genesis 1:26–27; Moises 2:26–27; Abraham 4:26–27.Apay a napateg a maammuan naparsuatayo iti ladawan ti Dios? Kasano nga apektuan daytoy ti wagas a panagriknatayo iti bagitayo, iti dadduma ken iti Dios?

No adda babassit nga annakyo, mabalin a kayatyo a basaen nga aggigiddan ti Moises 2:27 ket agay-ayam iti simple a game: Mangipakita iti maysa a ladawan a mangipakita iti Nailangitan nga Ama ken ni Jesucristo, kas iti ladawan 90 iti Libro ti Arte ti Ebanghelio (2009), ket idawat kadagiti miembro ti klase nga agsisinnublat iti panangitudo iti paset ti bagi ti nailangitan nga Ama wenno ni Jesus. Kalpasanna mabalin nga itudo ti dadduma pay a miembro ti pamilia iti dayta isu met la a paset dagiti bagida.

Genesis 1:28; Moises 2:28; Abraham 4:28.“Maipatpatungpal pay laeng ti bilin ti Dios para kadagiti annakna nga agpaadu ken mangpunno iti daga” (“Ti Kaamaan: Maysa a Waragawag iti Lubong,” ChurchofJesusChrist.org). Mabalin a yakem dagiti miembro ti pamilia no kasano ti mangilawlawag kadagiti pammatitayo maipapan iti daytoy a bilin kadagiti saan a makaammo iti daytoy a kinapudno wenno sabali ti pammatina.

Genesis 1:28; Moises 2:28; Abraham 4:28.Ania ti kayat a sawen ti “iturayanyo … amin a parsua a sibibiag nga aggaraw iti rabaw ti daga”? (kitaen met iti Doktrina Ken Katulagan 59:16–21). Kasano a maipatungpal ti pamiliatayo ti pagrebbengantayo ti mangaywan iti daga?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “My Heavenly Father Loves Me,” Children’s Songbook, 228–29.

Panangpadur-as iti Panangisurotayo

Aramatentayo dagiti nasantuan a kasuratan iti biagtayo. Kalpasan ti panangbasam iti maysa a binatog ti nasantuan a kasuratan, awisem dagiti miembro ti pamilia a mangaramat iti daytoy iti biagda. Kas pagarigan, kasano a maaramat ti Moises 3:1–3 iti panangngilintayo iti Sabbath iti tunggal lawas? (Kitaen iti Panangisuro iti Wagas ti Mangisalakan,21.)

Ni Jesucristo a nakatakder kadagiti ulep

Ti Panagparsua, ni Annie Henrie Nader