Stap Mitim Nid blong Ol Smol Pikinini

Ol pikinini oli rere mo oli wantem tumas blong lanem gospel sapos oli presentem long wan wei we oli save andastanem. Speseli sapos yu stap tijim ol smol pikinini, tingting blong yusum ol kaen aktiviti ia we bae i helpem olgeta blong lanem samting.

• Singsing. Ol hym mo ol singsing insaed Children’s Songbook mo Singsing Tabu mo Singsing blong Ol Pikinini, oli tijim doktrin wetem paoa. Yusum indeks blong ol topik long en blong buk ia, Children’s Songbook blong faenem ol singsing we oli go wetem ol prinsipol blong gospel we yu stap tijim. Helpem ol pikinini blong luk olsem wanem ol singsing ia oli go wetem wanem i stap hapen insaed long laef blong olgeta. Eksampol. Yu save askem abaot ol toktok, o ol sentens insaed long ol toktok blong singsing. Antap long singsing, ol pikinini oli save mekem ol aksen we oli go wetem ol singsing, o lisin long ol singsing olsem bakgraon miusik long semtaem we oli stap mekem sam nara aktiviti. Blong ol narafala aedia, lukluk long ol seksen ia “Stap Yusum Miusik blong Tijim Doktrin” mo “Stap Helpem Ol Pikinini blong Lan mo Tingbaot Ol Singsing mo Ol Hym blong Praemeri” insaed long “Ol instraksen blong Singsing Taem mo Sakramen Miusik Presentesen blong Ol Pikinini” long buk ia.

• Lisin, o aktem wan stori. Ol smol pikinini oli lavem tumas ol stori—blong ol skripja, blong laef blong yu, blong histri blong Jos, o we oli stap long Ol magasin blong Jos. Lukaotem sam wei blong yusum olgeta blong talem stori. Oli save holem ol pikja, o sam samting; oli save dro ol pikja blong wanem oli stap harem, oli save aktem stori, o help blong talem stori. Helpem ol pikinini blong luksave ol trutok blong gospel insaed long ol stori we yu stap serem.

• Ridim wan skripja. Ol yang pikinini, maet oli no save rid tumas, be yu save yusum olgeta blong lanem samting aot long ol skripja. Yu save lukluk nomo long wan ves ia nomo, wan ki sentens, o ki toktok. Taem yu stap ridim laod skripja ia, yu save invaetem sam pikinini blong stanap o leftemap han taem oli harem wan stret toktok o sentens we yu wantem oli tingting long hem bigwan. Maet bae oli save lanem baehat ol sot sentens we oli kamaot long ol skripja, sapos oli stap ripitim olgeta plante taem. Taem oli stap harem toktok blong God, bae oli filim Spirit.

• Yu mas aktiv, o muv strong. From se, plante taem, ol pikinini oli muvmuv fulap, mekem sam plan blong letem olgeta oli muv raon—oli maj, ol jiam, oli skip, oli bendaon, oli wokbaot mo oli mekem ol nara aksen we i go wetem prinsipol o stori ia we yu stap tijim. Ol aksen ia tu bae oli wok gud taem yufala i stap singsing tugeta.

• Luk long wan pikja o lukluk wan vidio. Taem yu soem wan pikja o vidio long ol pikinini, askem ol kwestin we i save helpem olgeta blong luk olsem wanem i go wetem wan gospel prinsipol o wan stori long skripja. Eksampol. Yu save askem, “?Wanem i stap hapen long pikja ia o long vidio ia?” o “?Hemia i mekem yu filim olsem wanem?” Gospel Media ap, MediaLibrary.ChurchofJesusChrist.org, mo children.ChurchofJesusChrist.org oli ol gudfala ples blong lukaotem ol vidio.

• Serem sam eksperiens. Ol smol pikinini bae oli no gat tumas samting blong serem olsem ol bigfala pikinini; be sapos yu stap lidim gud olgeta, bae oli save serem ol filing mo eksperiens blong olgeta abaot wanem oli stap lanem.

  

• Krietem samting. Ol pikinini oli save bildim samting, droem, o kalarem samting we i go wetem stori o prinsipol we oli stap lanem. Leftemap tingting blong olgeta blong tekem wanem oli mekem i gohom, mo oli serem wetem ol memba blong famli; hemia i blong helpem ol pikinini blong tingbaot wanem oli bin lanem.

• Tekpat long ol lesen we oli yusum samting long hem. Wan simpol lesen we i yusum samting i save helpem ol pikinini blong oli andastanem wan prinsipol blong gospel we i had blong andastanem. Taem yu stap yusum ol lesen we oli yusum samting, faenem ol wei blong letem ol pikinini oli tekpat. Bambae oli lanem moa aot long wan eksperiens we oli tekpat long hem, bitim wan we oli jes stap lukluk nomo wan samting.

• Rolplei. Taem ol pikinini oli rolplei long wan situesen we bae oli save fesem long ril laef, bae oli save andastanem moa olsem wanem blong yusum wan gospel prinsipol long laef blong olgeta.

• Ripitim ol aktiviti. Ol smol pikinini oli nidim blong harem sam tingting plante taem blong save andastanem olgeta. Yu no fraet blong ripitim ol stori ia, o ol aktiviti ia, plante taem, iven long taem blong semfala lesen. Eksampol. Maet bae yu serem wan skripja stori plante taem long plante defren wei long taem blong wan lesen—olsem ridim stori aot long ol skripja, blong talem sot long toktok blong olgeta, soem wan vidio, letem ol pikinini oli help blong talem stori, invaetem olgeta blong aktem wan stori, mo sam narafala moa. Sapos i gat wan aktiviti long klas we bae oli ripitim tu long hom, fasin blong ripripitim samting bae i helpem ol pikinini blong lanem samting mo tingbaot olgeta samting ia.

• Mekem samting wetem ol narafalawan. Ol pikinini oli stap developem ol sosol skil, mo plante taem oli laekem blong lanem samting mo pleiplei wetem ol fren blong olgeta. Krietem sam janis blong oli serem, wanwan i gat wan taem, mo oli wok wan long semtaem we oli stap lanem samting.

• Tekpat long plante defren kaen aktiviti. I nomol se ol pikinini oli save lisingud nomo blong sot taem, mo oli gat ol defren stael blong lanem samting. Yusum ol defren kaen aktiviti, mo luklukgud long ol saen we i soem se ol pikinini oli nidim blong jenisim spid blong mekem samting. Eksampol. Bae yu nid blong jusum blong yusum ol kwaet aktiviti mo ol aktiviti we oli muvmuv plante.

Pat blong rol blong yu olsem wan tija blong ol smol pikinini—antap long hemia blong tijim ol prinsipol blong gospel—i blong helpem ol pikinini blong oli lanem olsem wanem blong tekpat long wan gudfala wei insaed long klas blong Jos. Eksampol. Maet oli nidim blong lanem se i gat taem blong olgeta blong mekem samting, blong serem wanem oli gat, blong respektem ol narawan, mo sam narawan moa. Sam tija oli mekem ol jat wetem wok blong wanwan pikinini i tekpat long klas blong wan spesifik wei (olsem i talem prea, i holem pikja, o i pasem pepa). Wok ia we yu stap givimaot, i save jenis evri wik. Hemia i letem ol pikinini oli gat taem mo oli lukluk nomo blong gat gudfala fasin insaed long klas.

Ol pikinini—speseli ol smol pikinini—plante taem oli lanem gud samting taem oli gat wan fasin blong mekem samting we i semmak oltaem. From se ol smol pikinini oli save lisingud blong sot taem nomo, mo samtaem oli gat trabol blong stap kwaet long ful klas, i moa gud blong i gat insaed long program blong klas, wan taem blong muvaot long wan aktiviti i go long narawan. Eksampol. Klas plan blong yu i save tekem smol minit blong stop mo kala wan pikja, singsing wan singsing, mo ol narawan moa.