“13–19 Aperila. Mosaea 1–3: “Faatumulia i le Alofa i le Atua ma Tagata Uma,” Sau, Mulimuli Mai ia te A’u—Mo Le Aoga Sa: Tusi a Mamona 2020 (2020)
“13–19 Aperila. Mosaea 1–3,” Sau, Mulimuli Mai ia te A’u—Mo le Aoga Sa: 2020
Minerva K. Teichert (1888–1976), Lauga Faamavae a le Tupu o Peniamina, 1935, suauu i luga o le laupapa, 36 x 48 inisi. Faatufugaga a le Iunivesite a Polika Iaga
13–19 Aperila
Mosaea 1–3
“Faatumulia i le Alofa i le Atua ma Tagata Uma”
E tele mataupu faavae i le Mosaea 1–3 e mafai ona e talanoaina ma le vasega. Tatalo mo se taitaiga ia iloa pe o a mataupu faavae o le a sili ona aoga ia i latou e te faiaoga ai.
Tusi Faamaumau Ou Lagona Uunai
Valaaulia le Fefaasoaai
Ina ia avatu i tagata o le vasega se avanoa e talanoa ai e uiga i a latou lava suesuega patino pe faaleaiga o le Mosaea 1–3, valaaulia i latou e faasoa atu i se tasi tagata se fuaiupu ua latou iloa e musuia.
Aoao Atu le Aoaoga Faavae
O le mauaina o le afioga a le Atua e manaomia ai tapenapenaga.
-
O se tasi auala e amata ai se talanoaga e uiga i le tapenaina ia maua le afioga a le Atua o le talanoa e uiga i taunuuga o le tapenapena—po o le le tapenaina fo—mo isi mea. Mo se faataitaiga, e mafai e tagata o le vasega ona faasoa mai aafiaga e uiga i auala na latou tapenapena ai po o le le lava foi o tapenaga na aafia ai so latou aafiaga i le aoga po o le galuega po o se isi gaoioiga. A uma ona latou faasoa mai, e mafai ona e valaaulia le afa o le vasega e faitau le Mosaea 2:1–9, ma vaavaai mo mea na faia e le nuu o le Tupu o Peniamina e saunia ai mo le mauaina o le afioga a le Atua. E mafai e le isi afa ona sailiili i fuaiupu lava e tasi, ma vaavaai mo mea na faia e le Tupu o Peniamina na faaalia ai ona lagona e uiga i le afioga a le Atua ma le manaomia ona faasoa atu. Ona fai lea i vasega taitasi e faasoa mai o latou manatu. O le a se mea e mafai ona tatou aoao mai nei fuaiupu e mafai ona fesoasoani ia i tatou e maua ai le afioga a le Atua?
Pe a tatou auauna atu i isi, ua tatou auauna atu foi i le Atua.
-
O le Tupu o Peniamina o se auauna maoae i le Atua ma i latou na siomia o ia. O le a se mea na mafai e tagata o le vasega ona aoao mai ia te ia e fesoasoani ai ia i latou ia latou taumafaiga e auauna atu i isi? Mafaufau e amata le talanoaga e ala i le fai atu i tagata o le vasega e lisi mai mea faalavefau e feagai ma tagata i le tuuina atu o le auaunaga i isi—e pei o mafuaaga faapea tatou te le auauna atu ai po o mafuaaga e le o aoga ai la tatou auaunaga e tusa ma le mea e mafai ona i ai. Ona latou suesueina lea o le Mosaea 2:10–26 ma fai se lisi o upumoni sa aoao mai e le Tupu o Peniamina e uiga i le auauna atu i isi lea e mafai ai e i latou ona faatoilaloina ia mea faalavefau sa latou lisiina. O a mea e mafai e tagata taitasi ma aiga ona fai e taulai atu ai i le auaunaga i o latou olaga i aso taitasi? Mafaufau e faasoa atu le tala a Peresitene Thomas S. Monson i le “Punaoa Faaopoopo” e avea ma se tasi o fautuaga.
-
O se viiga e pei o le “Se Tagata Mativa Fa‘anoanoa” (Viiga, nu. 16) po o se vitio e pei o le “The Old Shoemaker” (ChurchofJesusChrist.org) e mafai ona lagolago ai le savali o loo maua i le Mosaea 2:17—pe a tatou auauna atu i isi, ua tatou auauna atu foi lea i le Atua. E mafai faapefea ona e faaaogaina na punaoa e lagolago ai le savali a le Tupu o Peniamina? Atonu e mafai e tagata o le vasega ona fefaasoaai i aafiaga na latou maua i le auauna atu i isi po o le mauaina foi o se auaunaga faaKeriso mai se tasi. I le avea ai ma se vaega o la outou talanoaga, mafaufau e faasoa atu le upusii lenei mai ia Peresitene Henry B. Eyring, “A tatou ofo atu se fesoasoaniga i soo se tasi, e lagonaina e le Faaola e peiseai o tatou aapa atu e fesoasoani ia te Ia.” (“E Le o Lenei Ea le Anapogi Ou te Loto I Ai?” Ensign po o le Liahona Me 2015, 22). Aisea e te manatu ai o loo tatou auauna atu i le Atua pe a tatou auauna atu i isi tagata?
O le auauna atu i isi e fesoasoani tatou te lagonaina ai le alofa o le Atua.
E sau le fiafia mai le tausia o poloaiga a le Atua.
-
Ina ia fesoasoani i tagata o le vasega e “manatunatu i le tulaga manuia ma le fiafia o i latou o e e tausi i poloaiga a le Atua,” e mafai ona fesoasoani i le amata i se faauigaga o le fiafia. E faapefea ona faamatala e tagata o le vasega le fiafia e maua mai le usiusitai i le Atua? Atonu e mafai ona latou mafaufau faapea e i ai se latou uo o loo fai mai o la e fiafia e aunoa ma le tausiga o poloaiga. Valaaulia i latou e faitau le Mosaea 2:38–41 ma talanoaina pe mafai faapefea ona latou fesoasoani i la latou uo ia malamalama i le eseesega o le fiafia faalelalolagi ma le fiafia e faavavau. O a aafiaga po o faataitaiga mai olaga o tagata e mafai e tagata o le vasega ona faasoa mai o loo faata’ita’ia mai ai le fiafia e faavavau?
Ua na o le “suafa lava o Keriso, le Alii” e maua ai le faaolataga.
-
O le savali a le Tupu o Peniamina e aofia ai valoaga mamana ma le auiliili e uiga i le soifua mai, misiona, ma le taulaga togiola a Iesu Keriso. E mafai ona e fai i tagata o le vasega e faasoa mai ni fuaiupu mai le Mosaea 3:1–20 e uunaia faapitoa ai i latou ma fesoasoani latou te malamalama ai i le Faaola ma Lana misiona. Fai atu ia i latou e faasoa mai pe aisea ua uunaia ai i latou e nei fuaiupu.
-
O le faatomuaga i le Tusi a Mamona o loo aoao mai ai faapea o le tusi o loo “otooto mai ai le ata o le faaolataga.” Ina ia fesoasoani i tagata o le vasega ia iloa pe faapefea ona fesoasoani le lauga a le Tupu o Peniamina e faataunuu le faamoemoega o le Tusi a Mamona, e mafai ona e tusia i luga o le laupapa le O Iesu Keriso Ua Mafai Ai le Faaolataga. E mafai e tagata o le vasega ona iloilo le Mosaea 3:1–20, ona mafai lea e oe po o i latou ona tusi i luga o le laupapa ia upumoni latou te aoaoina e uiga i le ata o le faaolataga. Fesili i tamaiti pe o a mea ua latou aoao e uiga i le ala ua faia e Iesu Keriso ua mafai ai le ata o le faaolataga. Ona tuu atu lea i tagata o le vasega se taimi e iloilo ai le Mosaea 3:18–19 ma faasoa mai mea e tatau ona tatou fai e avea ai o ni au paia ma maua le faaolataga. E mafai faapefea e le Togiola a Iesu Keriso ona fesoasoani ia i tatou e faataunuu lenei mea? Fai i tagata o le vasega e faasoa mai o latou lagona e uiga i le matafaioi a le Faaola i le ata o le faaolataga.
Fautuaina le Aoaoina i le Aiga
Pe ua i ai ea i ni tagata o le vasega se aafiaga ina ua aoao atu se aoaoga faavae i se tautalaga, lesona, po o se mau na suia ai i latou? Tau atu ia i latou e faapea o le Mosaea 4–6 o le a latou faitau ai e uiga i le aafiaga maoae sa i ai luga o lona nuu ona o upumoni sa aoao atu e le Tupu o Peniamina.
Punaoa Faaopoopo
Auauna atu i isi.
Na saunoa mai Peresitene Thomas S. Monson:
“I ni nai tausaga ua mavae sa ou faitau ai i se tala na tusia e Jack McConnell, MD. Na ola a’e o ia i atumauga o sasaeisisifo o Virginia i le Iunaite Setete o se tasi o le fanau e toafitu a se faifeau Metotisi ma se tina sa nofo i le fale. Sa faatauvaa lava o latou tulaga. Sa ia faamatalaina faapea i le taimi o lona laitiiti, o aso uma lava e nonofo ai faataamilo i le laulau ‘ai lo latou aiga, e fesili atu ai lona tama ia i latou taitoatasi e feauauai, ‘Ma o le a se mea sa e faia mo se tasi i le aso?’ Sa naunau le fanau e faia se mea lelei i aso uma ina ia mafai ai ona latou lipoti atu i lo latou tama faapea sa latou fesoasoani i se tasi. E faaigoa e Dr. McConnell lenei gaoioiga o le measina aupito taua a lona tama, aua o lena faamoemoega ma na upu na musuia ai o ia ma nai ona tei e fesoasoani i isi i le gasologa o o latou olaga. Ina ua latou tutupu ae ma ua matutua, sa suia lo latou faaosofia e tuuina atu auaunaga i se naunautaiga i le loto e fesoasoani i isi.
“E le gata i le matata iloga faafomai a Dr. McConnell … sa ia amatalia se faalapotopotoga na ia faaigoa o Volenitia i Vailaau, lea e maua ai e se fomai ua litaea se avanoa e ofofua atu ai i ofisa e vaai fua ai ma’i, e tautuaina ai tagata faigaluega e leai ni inisiua. Na saunoa Dr. McConnell o ona taimi paganoa talu ona litaea na ‘suia i le 60-itula i le vaiaso o faigaluega e le totogia, ae o le maualuga o [lona] malosi sa faateleina ma o loo i ai le faamalieina i [lona] olaga sa le’i i ai muamua.’ [Jack McConnell, “O Le a se Mea Ua E Faia mo Se Tasi i le Aso?” Newsweek, 18 Iuni, 2001, 13.] …
“E moni, e le mafai ona avea uma i tatou o ni Dr. McConnells, e faavaea ni ofisa faafomai e fesoasoani ai i e matitiva; peitai, o le manaoga o isi o loo i ai pea lava, ma e mafai e i tatou taitoatasi ona faia se mea e fesoasoani ai i se tasi. …
“O’u uso e ma tuafafine, ua siomia i tatou e i latou e manaomia lo tatou gauai atu, la tatou faamalosiau atu, la tatou lagolago, la tatou faamafanafana, lo tatou agalelei—pe o nisi o le aiga, uo, paaga, po o ni tagata ese. O i tatou o aao o le Alii i luga o le fogaeleele, faatasi ai ma le poloaiga e auauna atu ma ia sii ae Ana fanau. O loo faalagolago mai o Ia ia i tatou taitoatasi. … Talosia ia tatou fesili ifo ia i tatou lava i le fesili lea na faafeiloa’ia ai Dr. Jack McConnell ma ona uso ma tuafafine i afiafi taitasi i le taimi o taligasua i le afiafi: ‘O le a se mea ua ou faia mo se tasi i le aso?’“ (“O Le a se Mea Ua Ou Faia mo Se Tasi i le Aso?” Ensign po o le Liahona, Nov. 2009, 84--87).
Faaleleia o Lo Tatou Aoao Atu
Avea o se Meafaigaluega a le Agaga O lou faamoemoega o se faiaoga e le o le tuuina atu o se lesona manaia ae ia fesoasoani i isi ia maua faatosinaga a le Agaga Paia—o le faiaoga moni. (Tagai Aoao Atu i le Ala a le Faaola, 10.)