Minerva Teichert (1888–1976), Moronai: Rinipai eo Āliktata, 1949–1951, oil ioon masonite, 34¾ x 47 inij. Brigham Young University Museum of Art, 1969

Tijem̧ba 7–13

Moronai 7–9

“A Kraist En Ļōn̄aj Eok”

Jibadbad eo am̧ ej n̄an jipan̄ armej itok epaakeļo̧k Anij, jab jān baj kwaļo̧ke juon katak. M̧aanjabpopo n̄an Jabōt Jikuuļ jān riiti Moronai 7–9 ippān ro uwaan kūlaaj eo ilo kōļmenļo̧kjeņ, pukot pedped in katak ko me renaaj jipan̄ er.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān kajjojo ro uwaan kūlaaj eo n̄an etale Moronai jebta 7, 8, ak 9 im pukot juon m̧ool me eļap tokjān n̄an e. Ro uwaan kūlaaj eo remaron̄ in kwaļo̧k m̧ool eo rekar loe im ewi wāween an kar kōjeraam̧man er.

Katakin Katak ko

Moronai 7:3–19

“A lo, men eo jān Anij ej karuwainene im karreel n̄an kōm̧m̧an em̧m̧an iien otemjej.”

• N̄an erom̧ rikaļoor ro an Jisōs Kraist, jej aikuj in maron̄ ekajet ikōtaan em̧m̧an in nana. Bōlen ekōnono kōn m̧ool ko ilo Moronai 7:3–19 emaron̄ jipan̄ ro uwaan kūlaaj eo jab ekajet “bōd” (Moronai 7:18). N̄an m̧aanjabpopo n̄an juon iien ekōnono, jimettan in kūlaaj eo emaron̄ in etale eoon kein n̄an ko̧o̧njeļ eo Mormon ej letok kōn wāween n̄an kalikkar ta eo ej itok jān Anij, im jimettan eo juon emaron̄ pukot wāween n̄an kalikkar ta eo ej itok jān tepil eo. Remaron̄ in ekōnono kōn ta eo rekar loe im kwaļo̧k waanjon̄ak ko an men ko rej karuwaineneik er “n̄an kōm̧m̧an em̧m̧an, im n̄an iakwe Anij, im n̄an jerbal n̄an E” (Moronai 7:13). Ewi wāween ad kōjerbal ko̧o̧njeļ eo an Mormon ilo kāālet ko ad aolep raan? Ewi wāween ad maron̄ kāālet kāālet ko rejim̧we im aaet kwaļo̧k iakwe n̄an ro rej jokwe ipeļaakid im rejjab mour kōn gospel eo?

• Elōn̄ armej rej bwilōn̄, “Ewi wāween aō jeļā eļan̄n̄e juon im̧we ippa ej itok jān Anij ak jān ļōmņak ko aō make?” Komaron̄ je kajjitōk in ioon boot eo im kajjitōk ippān ro uwaan kūlaaj eo n̄an etale Moronai 7:13–16 kōn pedped in katak ko me remaron̄ jipan̄ uwaake kajjitōk in. Ewi wāween an eoon kein jipan̄ kōj kile im̧we eo ekwojarjar? Emaron̄ jipan̄ n̄an kōmeļeļeik bwe “Jetōb in Kraist,” ej barāinwōt jeļā āinwōt meram in Kraist, ej jet iien kōnono āinwōt en̄jake ko ad rem̧ool. Ennaan eo jān Gordon B. Hinckley ilo “Kein Jipan̄ ko Jet” im pija eo “Patterns of Light: Discerning Light” (ChurchofJesusChrist.org) emaron̄ barāinwōt jipan̄.

Moronai 7:21–48

Ro rej ļoor Jisōs Kraist rej pukot tōmak, kōjatdikdik, im iakwe em̧ool.

• N̄an jipan̄ kūlaaj eo am̧ lukkuun meļeļe eo ej ekkejelļo̧k ikōtaan tōmak, kōjatdikdik, im iakwe em̧ool, komaron̄ in kwaļo̧k juon jea stool ko jilu neer (ak juon pija in juon) im kajjitōk ippān ro uwaan kūlaaj eo ļōmņak kōn wāween an tōmak, kōjatdikdik, im iakwe em̧ool āinwōt ne kein jilu (lale ennaan eo an Būreejtōn Dieter F. Uchtdorf ilo “Kein Jipan̄ ko Jet”). Komaron̄ in kajjitōk ippāer n̄an kāālet juon iaan m̧wil kein im lale ta eo Mormon ej katakin kake ilo Moronai 7:21–48. Ekōnono kōn kajjitōk kein rej ellaajrak: Etke jej aikuji tōmak im kōjatdikdik n̄an bōk mennin letok eo an iakwe em̧ool? Ewi wāween an kajjojo m̧wil kein kakkejelļo̧k kōj n̄an Jisōs Kraist? Etke m̧wil kein rej aorōk n̄an juon rikaļoor an Jisōs Kraist? Ta eo enaaj waļo̧k n̄an kōj eļan̄n̄e jej luuji tōmak? kōjatdikdik? iakwe em̧ool? Kajjitōk ippān ro uwaan kūlaaj eo n̄an bōk jidik iien n̄an jet im̧we ko aer.

Moronai 8:4–21

Meļeļe katak ko rem̧ool remaron̄ jipan̄ kōj kōm̧m̧an kāālet ko.

• Kūlaaj eo am̧ emaron̄ jab aikuj n̄an kōnono etke ebōd n̄an peptaij nin̄nin̄, ak naan ko an Mormon kōn unin kōnono in emaron̄ jipan̄ er loe kauwōtata ko an katak ko reriab. N̄an kōmeļeļeiki ewi wāween an Bok in Mormon “[kapok] katak ko reriab” (2 Nipai 3:12), komaron̄ kajjitōk ippān ro uwaan kūlaaj eo n̄an riiti Moronai 8:4–21 ilo kumi ko ak kajjojo armej. Jimettanier emaron̄ pukot katak ko me Mormon ekar en̄jake ke armej ro rekar jab meļeļe, ekoba Pinmuur eo an Jisōs Kraist (lale eoon 20) im bōk eddo (lale eoon 10). Jimettan eo juon emaron̄ pukot kaje ko kōn bōd ko an armej. Kajjojo kumi emaron̄ kwaļo̧k ippān kūlaaj eo ta eo rekar loe. Ta eo eoon kein rej katakin kōj kōn aorōk eo an ekkatak im mour kōn katak ko rejim̧we? Ia eo jemaron̄ loi kōmeļeļe ko rejim̧we an katak ko an Kraist? Ewi wāween ad maron̄ jeļā bwe meļeļe eo ad kōn katak eo ejim̧we?

• Bōlen kūlaaj eo am̧ enaaj jeraam̧m̧an jān ļoore waanjon̄ak eo an Mormon an jipan̄ juon armej kāālete kāālet ko rem̧m̧an jān katakin er katak ko rejim̧we. Komaron̄ in kōm̧m̧ane menin jān am̧ kajjitōk ippān ro uwaan kūlaaj eo ļōmņak kōn juon armej jān jeje ko rekwojarjar eo ekar kōm̧m̧ane juon kāālet ebōd. Ta katak eo em̧ool enaaj jipan̄ armej eo jab bar kōm̧m̧an kāālet in ebōd? Leļo̧k n̄an ro uwaan kūlaaj eo jejjo minit n̄an pukote eoon ko ak ennaan ko jān juon kweilo̧k eļap ej kab jem̧ļo̧kļo̧k eo enaaj jipan̄ armej eo meļeļe katak eo em̧ool. Innām komaron̄ kajjitōk ippān ro uwaan kūlaaj eo n̄an kwaļo̧k ta eo rekar loe.

Moronai 9:25–26

Emaron̄ wōr ad kōjatdikdik ilo Kraist mekarta jekjek ko ad.

• Ennaan eo an Mormon āliktata kar rekoote n̄an ļaddik eo nejin ilo Moronai 9:25–26 emaron̄ jipan̄ ro uwaan kūlaaj eo loe kōjatdikdik ilo Kraist, men̄e jekjek eo emaron̄ ejjeļo̧k kōjatdikdik kake. Bōlen komaron̄ jino kajjitōk ippān ro uwaan kūlaaj eo n̄an kwaļo̧k un ko Moronai emaron̄ kar ebbeer. Innām remaron̄ in riiti eoon kein im kōllaajraki ioon boot eo m̧ool ko me Mormon ekar kōketak Moronai n̄an kalimjōki wōt. Ewi wāween ejja m̧ool kein “ļōn̄aj [kōj” ilo raan kein ad? Ro uwaan kūlaaj eo remaron̄ barāinwōt kwaļo̧k waanjon̄ak ko Anij kōn “tūriamokake im kijenmej” me raar kein kam̧ool. Ak remaron̄ in kwaļo̧k ļōmņak ko n̄an jipan̄ doon dāpij wōt Rilo̧mo̧o̧r eo im gospel eo An “ilo ļōmņak eo [ad] n̄an indeeo,” men̄e jej jelm̧ae ebbeer (eoon 25).

Kōketak Ekkatak ilo Mweo

N̄an rōjan̄ ro uwaan kūlaaj eo meļeļe Moronai 10, komaron̄ elmakote bwe emaron̄ juon iien em̧m̧an n̄an kejōkļo̧kjeņ kōn wāween aer kar en̄jake juon kam̧ool ekāāl an m̧ool eo an Bok in Mormon ilo aer katak iiō in.

Kein Jipan̄ ko jet

Ej ke itok jān Jetōb eo?

N̄an uwaake kajjitōk in “Ewi wāween ad kile im̧we ko an Jetōb?” Būreejtōn Gordon B. Hinckley ekar kouti Moronai 7:13 im kar ba: “Ijjab ļōmņak [ej] kanooj in pen, aaet. … Ej ke kareel juon armej n̄an kōm̧m̧an em̧man, n̄an jutak, n̄an jutak wōt, n̄an kōm̧mane men eo ejim̧we, n̄an jouj, n̄an jouj? Innām ej Jetōb in Anij” (Teachings of Gordon B. Hinckley [1997], 260–61).

Tōmak, kōjatdikdik, im iakwe em̧ool.

Būreejtōn Dieter F. Uchtdorf ekar keidi tōmak, kōjatdikdik, im iakwe em̧ool n̄an juon jea jilu neen, kōmeļeļeiki bwe wanōk kein jilu “ej kapen mour ko ad mekarta pedped ko rekulpalōklōk ak jab jokun wōt juon me jemaron̄ in jelm̧ai. …

“Tōmak, kōjatdikdik, im iakwe rej nōbar doon, im ilo an juon eddōkļo̧k, ko jet rej eddōkļo̧k barāinwōt. Kōjatdikdik ej itok tōmak, bwe eļan̄n̄e ejjeļo̧k tōmak, ejjeļo̧k kōjatdikdik. Āinwōt tōmak ej itok kōjatdikdik, bwe tōmak ej ‘men ko kōjatdikdik kaki.’

“Kōjatdikdik eaorōk n̄an jim̧or tōmak im iakwe em̧ool. N̄e jab pokake, inepata, im aibadbad kōm̧ōjņo̧ik tōmak, kōjatdikdik epād ijeņ n̄an dāpiji tōmak eo ad. N̄e ebbeer im jab kijenmej jum̧we iakwe em̧ool, kōjatdikdik rie kōj ņamejļan im kōketak kōj n̄an kōjparok ro m̧ōttad aaet ilo an ejjeļo̧k kōtmāne in bōk nōbar. Ilo an meramļo̧k ad kōjatdikdik, eļapļo̧k ad tōmak. Ilo an kajoorļo̧k ad kōjatdikdik, ej erreoļo̧k ad iakwe em̧ool” (“The Infinite Power of Hope,” Ensign ak Liahona, Nov. 2008, 21, 23–24).

“Iakwe eo erreo an Kraist.”

Elder Jeffrey R. Holland ej elmakote ro meļeļe ko rem̧man an ennaan in “iakwe eo erreo an Kraist”:

“Juon … ej juon kain tūriamo̧, iakwe eo ejouj an rikaļoor ro an Kraist n̄an doon. …

“[Bar juon meļeļe ej] iakwe eo ejjab likjab, eļap, im iakwe in pinmuur eo n̄an kōj. … Ej bwe iakwe eo em̧ool—an iakwe erreo n̄an kōj—eļan̄n̄e en kar jab enaaj kar ejjeļo̧k tokjād” (Christ and the New Covenant: The Messianic Message of the Book of Mormon [1997], 336).

Kōkōm̧anm̧anļo̧k Ad Katakin

Jipan̄ rikkatak ro ejaake jetōb in un̄n̄are peid make. “Ilo am̧ katakin, ijjelo̧kin baj leļo̧k meļeļe ko, jipan̄ [ro uwaan kūlaaj eo] loe m̧ool ko an gospel eo n̄an er make. … N̄e ewōr aer kajjitōk, jet iien em̧m̧anļo̧k n̄an katakin er wāween aer loe uwaak ko n̄an er make” (Teaching in the Savior’s Way, 28). N̄an waanjon̄ak, komaron̄ kwaļo̧k n̄an membōr ro Gospel Topics ilo topics.ChurchofJesusChrist.org, eo ej kitbuuj meļeļe ko rejipan̄ kōn elōn̄ unin kōnono ko.