Kōjerbal Itok, Ļoor Eō—N̄an Jabōt Jikuuļ

M̧aanjabpopo n̄an Katakin ilo Jabōt Jikuuļ

Ekkatak eo am̧ make im an baam̧le ilo m̧weo ej aikuj in pedped wōt ioon ekkatak gospel eo. Menin em̧ool n̄an kwe im n̄an ro kwoj katakin. Ilo am̧ m̧aanjabpopo n̄an katakin, jino kōn en̄jake ko am̧ make ilo jeje ko rekwojarjar. M̧aanjabpopo eo am̧ elukkuun aorōktata enaaj waļo̧k ilo am̧ kappukot eoon ko im pukōt im̧we eo an Jetōb Kwojarjar eo.

Itok, Ļoor Eō—N̄an Kajjojo Armej im Baam̧le ko ej m̧ōttan eo eaorōk jim̧or ilo am̧ ekkatak im am̧ m̧aanjabpopo n̄an katakin. Enaaj jipan̄ eok bōk juon meļeļe eo em̧wilaļļo̧k an pedped in katak ko loi ilo jeje ko rekwojarjar. Enaaj barāinwōt kōmaron̄ am̧ im̧we im kajjitōk ippān ro uwaan kūlaaj eo n̄an kōjerbale Itok, Ļoor Eō—N̄an Kajjojo Armej im Baam̧le ko n̄an kōkōm̧anm̧anļo̧k aer make ekkatak im an baam̧le eo aer ekkatak jeje ko rekwojarjar “Ļōmņak ko n̄an Kōketak Ekkatak an Juon Make im an Baam̧le” ilo bok in jipan̄ in). Ilo am̧ kōm̧m̧ane, keememej n̄an maron̄ jab kainebataiki ro uwaan kūlaaj eo me jekjek ko an baam̧le eo remaron̄ jab rie ekkatak jeje ko rekwojarjar ilo baam̧le im nokon in jota eo an baam̧le.

Ilo iien m̧aanjabpopo eo am̧, ļōmņak ko im im̧we ko renaaj iwōj n̄an eok kōn armej ro kwoj katakin, wāween an pedped in katak ko ilo jeje ko rekwojarjar naaj kōjeraam̧m̧an mour ko aer, im ewi wāween aer maron̄ im̧we er n̄an loi pedped in katak ko ilo aer katak jeje ko rekwojarjar ippāer make.

Ļōmņak ko n̄an Katakin

Ilo am̧ m̧aanjabpopo n̄an katakin, komaron̄ in bōk im̧we ko jet jān am̧ etali laajrak in katak ko ilo bok in jipan̄ in. Jab ļōmņak kōn meļeļe kein āinwōt kwoj aikuj ļoore kōmeļeļe bun̄tōn ņae bun̄tōn (step-step) ak āinwōt elmakot ko n̄an kōkajoorļo̧k en̄jake ko am̧ make. Kwojeļā ro uwaan kūlaaj eo am̧, im kwonaaj kōm̧m̧an bwe kwon jeļā kajjeer em̧m̧anļo̧k ilo ami ekkatak ippān doon ilo kūlaaj. Irooj ejeļā kajjeer barāinwōt, im Enaaj im̧we eok kōn wāween ko rem̧m̧antata n̄an jipan̄ ro uwaan kūlaaj eo kalōk ekkatak gospel eo rej kōm̧m̧ane ilo m̧weo.

Elōn̄ kein jipan̄ ko jet rej pād n̄an eok n̄an am̧ kōjerbali ilo am̧ m̧aanjabpopo, ekoba ļōmņak ko ilo Itok, Ļoor Eō—N̄an Kajjojo Armej im Baam̧le ko im māākjin ko an Kabun̄ in. N̄an eļapļo̧k meļeļe ko kōn kein jipan̄ kein im ko jet, lale jākjen eo taitōl eo ej “Kein Jipan̄ ko Jet” ilo bok in jipan̄ in.

Jet Men ko n̄an Keememeji

• M̧weo ej jikin eo em̧m̧antata n̄an ekkatak gospel eo. Āinwōt juon rūkaki, emaron̄ wōr juon am̧ eddo eaorōk n̄an rie, kōketak, im kalōk ekkatak gospel ioon ro uwaan kūlaaj eo ilo m̧weo.

• Oktak eo an ro uwaan kūlaaj eo n̄an gospel eo an Jisōs Kraist enaaj m̧wilaļļo̧k ilo aer meļeļe im mour kōn katak ko rem̧ool. Kōketak er n̄an je im m̧akūtkūt ekkar n̄an im̧we ko rej būki jān Jetōb Kwojarjar eo.

• Katakin eļapļo̧k jān baj kōmeļeļe wōt, ak ej barāinwōt ļapļo̧k jān baj tōl juon iien ekōnono. M̧ōttan wōt eddo eo am̧ ej n̄an kōketak bōk koņaan me ej kōkōm̧anm̧anļo̧k im ej pedped wōt ioon jeje ko rekwojarjar. Kwoj aikuj barāinwōt kwaļo̧k en̄jake ko rej im̧we eok me kwoj būki ilo am̧ ekkatak jeje ko rekwojarjar.

• Jemedwōj Ilan̄ ekōņaan bwe kwon tōprak āinwōt juon rūkaki. Ekar kōpooji elōn̄ kein jipan̄ ko n̄an jipan̄ eok, ekoba kweilo̧k in ko̧o̧njeļ eo an rūkaki ro. Ilo kweilo̧k in komaron̄ ko̧o̧njeļ ippān rūkaki ro jet kōn apan̄ ko kwoj jelm̧ai. Komaron̄ barāinwōt ekōnono im kamminene pedped in katakin ko an katakin āinwōt Kraist.

• Em̧m̧an tata an armej ro ekkatak n̄e ewōr aer iien ko rem̧m̧an n̄an katakin. Ilo juon iien, ļōmņak in kōtļo̧k an ro uwaan kūlaaj eo, ekoba jodikdik ro, n̄an katakin jidik in katak eo. Pedped wōt ioon jokāālet in kōn aikuj ko im maron̄ ko an ro uwaan kūlaaj eo. Eļan̄n̄e kwoj kajjitōk ippān juon uwaan kūlaaj eo n̄an katakin, bōk iien n̄an jipan̄ n̄e ļeo ak lio m̧aanjabpopo m̧oktaļo̧k jān am̧ kōjerbal ļōmņak ko loi ilo bok in jipan̄ in im ilo Itok, Ļoor Eō—N̄an Kajjojo Armej im Baam̧le ko. Keememej bwe ilo an rūkaki ro bōk kūr eo, kwoj lukkuun bōk eddo in ta eo im katak kake ilo kūlaaj eo.

• Bok in jipan̄ in ej kitbuuj unin tōl ko an katakin kajjojo wiik an iiō eo ijjelo̧kin Jabōt ko ruo n̄e kweilo̧k eo eļap ej kōm̧m̧an. Ilo Jabōt ko me Jabōt Jikuuļ ejjab kōm̧m̧an kōnke ewōr kweilo̧k ko reļļap an stake ak bar jabdewōt un, baam̧le ko remaron̄ wōnm̧aanļo̧k wōt im riiti Bok in Mormon eo ilo m̧weo ekkar n̄an laajrak in jikejuuļ eo ilo Itok, Ļoor Eō—N̄an Kajjojo Armej im Baam̧le ko. N̄an maron̄ ļoor wōt jikejuuļ in kūlaaj eo an Jabōt Jikuuļ, komaron̄ kāālet n̄an bōlen etal wōt jān juon katak ak maron̄ kobaik ruo katak ko ippān doon. N̄an kōm̧m̧an bwe en ejjeļo̧k pok, būreejtōn eo an Jabōt Jikuuļ emaron̄ in rōjan̄ rūkaki ro an Jabōt Jikuuļ kōn oktak kein im̧aanļo̧k.