Kolinitō, faka-Tonga ʻo Kalisí, ko e Fakataha mo e Senitā faka-Koló, tā fakatātaaʻi ʻe Balage Balogh

19–25 ʻAokosi

1 Kolinitō 1–7

“Ke Mou Māʻopoʻopo Lelei”

Naʻe akoʻi ʻe ʻEletā Jeffrey R. Holland ko e kakai tokolahi ʻoku nau “omi [ki he lotú] ke fekumi ki ha aʻusia fakalaumālie” (“A Teacher Come from God,” Ensign, May 1998, 26). ʻI hoʻo lau ʻa e 1 Kolinitō 1–7, fakakaukau ʻi he faʻa lotu ki he meʻa te ke lava ʻo fai ke tokoni ke maʻu ʻe hoʻo kalasí ha ngaahi aʻusia fakalaumālié.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

ʻE lava ke ke fakaafeʻi e kau mēmipa hoʻo kalasí ke nau tohi e founga ne nau fakahoko ai e ngaahi meʻa ʻoku nau ako mei he folofolá. Kole ki ha kau mēmipa ʻe niʻihi ʻo e kalasí ke nau vahevahe e meʻa ne nau tohí.

Akoʻi e Tokāteliné

1 Kolinitō 1:10–17; 3

Kuo pau ke fāʻutaha e kau mēmipa ʻo e siasi ʻo Kalaisí.

• ʻE lava ke hoko hono aleaʻi e ngaahi fuofua vahe ʻo e 1 Kolinitoó ko ha faingamālie ke fakatupulaki ai e uouongatahá ʻi he kau mēmipa ʻo e uōtí. ʻE lava ke ke kamata ʻaki hano kole ki he kau mēmipa ʻo e kalasí ke nau fakamatala ki ha kalapu, kulupu, pe ko ha timi ne kau ki ai ne nau uouongataha ʻaupito. Ko e hā naʻe ongoʻi uouongataha pehē ai ʻa e kulupu ko ʻení. Te mou lava leva ke kumi ha niʻihi ʻo e ngaahi akonaki ʻa Paula fekauʻaki mo e uouongatahá ʻi he 1 Kolinitō 1:10–13; 3:1–11. Ko e hā ʻoku akoʻi mai ʻe he ngaahi veesi ko ʻení, fakataha mo ʻetau ngaahi aʻusiá, fekauʻaki mo e meʻa ʻoku tokoni ke fokotuʻu ʻa e uouongatahá pea mo e meʻa ʻokú ne vetekí? Ko e hā e ngaahi tāpuaki ʻoku maʻu ʻe kinautolu ʻoku uouongatahá? ʻE lava ke tokoni e ngaahi talanoa naʻe vahevahe ʻe Palesiteni Henry  B. Eyring ʻi he “Ngaahi Maʻuʻanga Tokoni Kehé” ki he fealēleaʻaki ko ʻení.

• ʻOku fakaʻaongaʻi ʻe Paula e fakatātā ʻo ha fale ke poupouʻi ʻa e uouongatahá ʻi he 1 Kolinitō 3:9–17. ʻE tokoni fēfē nai e fakafehoanaki ko ʻení ke mahino ange ki hoʻo kalasí ʻa e uouongatahá? Hangē ko ʻení, hili hono lau fakataha e ngaahi veesi ko ʻení, ʻe lava ke ke ʻoange ha konga papa ki he mēmipa takitaha ʻo e kalasí pea nau ngāue fakataha ke faʻu pē ha meʻa. Ko e hā e tuʻunga ʻoku tau hoko ai ko e “fale ʻo e ʻOtuá”? (1 Kolinitō 3:9). ʻOku langa fakafoʻituitui fēfē ʻe he ʻOtuá kitautolu? Ko e hā ʻoku tau langa fakataha ko e Kāingalotu? Ko e hā te tau lava ʻo fai ko ha uooti ʻoku uouongataha, he ʻikai ke tau lava ʻo fakahoko fakafoʻituitui?

1 Kolinitō 1:17–31; 2; 3:18–20

ʻOku tau fie maʻu e poto ʻo e ʻOtuá, ke ikunaʻi ʻaki e ngāue ʻa e ʻOtuá.

• ʻOku ongoʻi taʻe feʻunga ha kakai ʻe niʻihi ke ngāue ki he Siasí koeʻuhí he naʻe ʻikai ke nau ako pe akoʻi fakapalofesinale. ʻOku ongoʻi ʻe ha niʻihi kehe ʻoku nau feʻunga koeʻuhí ʻoku nau maʻu ha poto pe naʻe akoʻi fakapalofesinale. ʻOku ʻomi ʻe he ongo fakakaukaú fakatouʻosi ha maʻuhala ʻi he meʻa ʻokú ne fakafeʻungaʻi moʻoni kitautolu ki he ngāue ʻa e ʻOtuá. Ko ha fakakaukau ʻeni ke tokoni ki hoʻo kalasí ke nau falala ki he ʻOtuá: Vahevahe e kau mēmipa ʻo e kalasí ki ha ngaahi kulupu pea kole ange ke nau lau vave ʻa e 1 Kolinitō 1:17–31; 2; pe 3:18–20 ʻo kumi e ngaahi foʻi lea hangē ko e potó mo e valé. ʻE lava leva ke nau vahevahe ʻi heʻenau ngaahi kulupú e meʻa ʻoku akoʻi mai ʻe he ngaahi veesi ko ʻení fekauʻaki mo e potó ʻi he ngāue ʻa e ʻEikí. Ko e hā ha ngaahi meʻa ʻi he ongoongoleleí ʻe ngali vale ki ha kakai ʻe niʻihi? ʻOku fakatātaaʻi fēfē ʻe he ngaahi meʻa ko ʻení e poto ʻo e ʻOtuá? ʻE lava foki ke vahevahe ʻe he kau mēmipa ʻo e kalasí ha ngaahi aʻusia ne nau falala ai ki he poto ʻo e ʻOtuá, kae ʻikai ʻanautolú, ke ikunaʻi ʻEne ngāué.

1 Kolinitō 6:9–20

ʻOku toputapu hotau sino fakamatelié.

• Ke kamataʻi ha fealēleaʻaki ʻi he ngaahi veesi ko ʻení, ʻe lava ke ke hiki ʻi he palakipoé ha ngaahi fehuʻi peheni: Ko e hā e fakakaukau ʻa e ʻEikí ki hotau ngaahi sinó? ʻOku kehe fēfē ʻeni mei he founga ʻoku fie maʻu ʻe Sētane ke tau fakakaukau ai ki hotau sinó? Ko e ʻuhinga ki he hā ʻa e pehē ko hotau sinó ko ha temipale ia ʻo e Laumālie Māʻoniʻoní? Fakaafeʻi e kau mēmipa ʻo e kalasí ke nau kumi e tali ki he ngaahi fehuʻi ko ʻení ʻi he 1 Kolinitō 6:9–20 (vakai foki, TF 88:15; Mōsese 6:8–9).

• ʻE lava ke kau ʻi hoʻomou fealēleaʻaki fekauʻaki mo e toputapu ʻo hotau ngaahi sinó ha pōtalanoa fekauʻaki mo e fono ʻo e angamaʻá. ʻE lava ke ʻaonga ʻeni koeʻuhí ʻi heʻetau hoko ko ha Kāingalotu ʻi he Ngaahi ʻAho Kimui Ní, ʻoku tau faʻa maʻu ha ngaahi faingamālie ke fakamatalaʻi e tui ʻoku tau maʻu fekauʻaki mo e angamaʻá kiate kinautolu ʻoku ʻikai ke nau tui ki aí. ʻE lava ke ke ʻeke ki he kau mēmipa hoʻo kalasí e meʻa ne nau ako meia Paulá—pea pehē ki he ngaahi maʻuʻanga tokoni kehe ʻa e Siasí— ʻe lava ʻo tokoni ʻi heʻenau fakamatala ki he niʻihi kehé ʻa e ʻuhinga ʻoku mahuʻinga ai ʻa e angamaʻá. ʻE lava ke kau ʻi he ngaahi maʻuʻanga tokoni ko iá ʻa e ngaahi meʻa ʻoku lisi ʻi he “Ngaahi Maʻuʻanga Tokoni Kehé.”

Poupouʻi e Akó ʻi ʻApi

Talaange ki hoʻo kalasí kapau ʻoku nau fie maʻu mo ha ngaahi toe fakakaukau kehe fekauʻaki mo e founga ke nau toe uouongataha ange ai mo honau ngaahi malí, fāmilí, pe uōtí, ʻoku hoko atu e kaveinga ʻo e uouongatahá ʻi he1 Kolinitō 8–11.

Ngaahi Maʻuʻanga Tokoni Kehé

1 Kolinitō 1–7

Ngaahi Sīpinga ʻo e Uouongatahá.

Naʻe akoʻi ʻe Palesiteni Henry  B. Eyring:

“Ne fakaafeʻi au ʻe ha fāmili heʻeku nofo ʻi honau ʻapí ke mau lotu pea mau toki mohé. Naʻe fai e lotú ʻe he kiʻi tamasiʻi siʻisiʻi tahá. Naʻá ne lotua e tokotaha kotoa pē ʻi he fāmilí, ʻo ne lea ʻaki honau hingoá, ʻo hangē ha pēteliaké. Ne u ʻāʻā hake leva ke u sio ki he mata ʻo e fānaú mo e ongomātuʻá. Ne u lava ʻo tala ne nau fakatahaʻi ʻenau tuí mo honau ngaahi lotó ʻi he lotu ʻa e kiʻi tamasiʻí ni.

Ne lotu fakataha ha kau Fineʻofa kimuí ni ko e teuteu ki heʻenau fuofua ʻaʻahi ki ha uitou kei siʻi ne mate fakafokifā hono husepānití. Ne nau fie ʻilo ki he meʻa ke faí mo e founga te nau ngāue fakataha ai ke tokoni ʻi hono teuteuʻi e ʻapí ki he fāmilí mo e kaungāmeʻa ʻe ō mai ki he meʻafakaʻeikí. Ne maʻu ha tali ʻenau lotú. ʻI heʻenau aʻu atu ki he ʻapí, ne fai ʻe he fefine takitaha ha ngāue. Ne vave e maau ʻa e falé pea fakameʻapangoʻia e kau fafine ʻe niʻihi he ʻikai lahi ange e meʻa ke nau faí. Naʻe fai mo ha ngaahi lea fakafiemālie naʻe tō lelei. Naʻa nau fai e ngāue ʻa e ʻEikí ʻi he uouongataha, ʻi he loto taha” (“Ke Taha Hotau Lotó,” Ensign pe Liahona, Nōvema 2008, 68–69).

Ko e ngaahi tāpuaki ʻo e maʻa fakasekisualé.

Naʻe lea ʻa Sisitā Uenitī W. Nalesoni ʻi ha Fakataha Lotu Fakaemāmani Lahi maʻá e Kakai Lalahi Kei Talavoú ʻo pehē:

“Ko e haohaoa fakatāutahá ʻa e kī ki he feʻofaʻaki moʻoní. Ko e maʻa ange ko ia hoʻo fakakaukaú, ongó, leá mo e ngāué, ko e lahi ange ia hoʻo faingamālie ke maʻu mo fakahā ʻa e ʻofa moʻoní. …

“Ko ha konga mahuʻinga hono fakahaaʻi ʻena feʻofaʻakí, ʻoku fie maʻu ai ʻe he ʻEikí ke maʻu ʻe he husepanití mo e uaifí ʻa e fiefia mo hono fakaofo ʻo e feohi fafale ʻi he nofo malí. …

“… Ko e meʻa kotoa pē ʻokú ne fakaafeʻi ʻa e Laumālié ki hoʻo moʻuí, mo e moʻui ʻo ho hoá pea mo hoʻomo nofo malí, te ne fakatupulaki hoʻomo malava ke aʻusia ʻa e feohi fafale ʻi he nofo malí. … Ko hono ʻai ʻe tahá, ko e meʻa kotoa pē ʻoku tuʻu fehangahangai mo e Laumālié te ne holoki ʻe ia ʻa e malava ke mo hoko ʻo tahá. …

“ʻOku faitāpuekina mo fakamāʻoniʻoniʻi ʻe he ʻEikí ʻa e feohi fafale ʻi he nofo mali ʻoku fakamaʻu ʻe he Laumālié” (“ʻOfá mo e Nofo Malí,” Fakataha Lotu Fakaemāmani Lahi maʻá e Kakai Lalahi Kei Talavoú: ʻAho 8 Sānuali, 2017, broadcasts.lds.org).

Naʻe akonaki ʻa ʻEletā Jeffrey  R. Holland ʻo pehē:

“Tuku muʻa ke u fakamamafaʻi atu ʻoku toki fakahoko pē ʻa e feohi fafale ʻa e tangatá mo e fefiné ʻe ha ongo meʻa mali koeʻuhí he ko e fakaʻilonga taupotu taha ia ʻo e fakataha kakato, ne tuʻutuʻuni mo finangalo ki ai ʻa e ʻOtuá. …

“Ka ʻe toki hoko pē ʻa e fakataha kakato peheé, ʻa e tukupā tuʻuloa pehē ʻi he vā ʻo ha tangata mo ha fefine, ʻi he vāofi pea mo e tuʻuloa ʻo e fuakava ʻoku fai ʻi he mali, ʻi ha ngaahi palōmesi mamalu mo e tukupā kakato ʻi he meʻa kotoa ʻokú na maʻú—ʻaki hona lotó mo e ʻatamaí, moʻuí mo ʻena ngaahi fakaʻānauá kotoa” (“Personal Purity,” Ensign, Nov. 1998, 76).

Naʻe fakamatala ʻa ʻEletā David  A. Bednar ʻo pehē: Ko e faʻahinga feohi fafale ko iá ʻoku ʻikai ko ha fie ʻilo pē ki ha meʻa ke ʻahiʻahiʻi, fakafiemālieʻi ha holi, pe ha faʻahinga fakafiefia pe meʻa fakamānako ke tulifua siokita ki ai. ʻOku ʻikai ko ha tau ke ikunaʻi pe ko ha foʻi ngāue pē ke fakahoko. Ka ko e meʻa pē ia ʻe taha ʻi he moʻui fakamatelié ʻokú ne fakahaaʻi ai hotau anga fakalangí mo e meʻa ʻoku tau malavá mo ha founga ke fakamālohia ai e ngaahi haʻi fakaeloto mo fakalaumālie ʻi he vā ʻo e husepānití mo e uaifí. Ko ha kau fakafofonga pē kitautolu kuo tāpuekina ʻaki ha tauʻatāina ke fili ki he anga ʻoku maʻá pea ʻoku hā ia mei hotau tukufakaholo fakalangi ko e fānau ʻa e ʻOtuá—kae ʻikai mei he ngaahi ʻulungaanga fakasekisualé pe tōʻonga moʻuí pe ngaahi fakakaukau fakapotó” (“ʻOku Mau Tui ki he Angamaʻá,” Ensign pe Liahona, Mē 2013, 42).

Founga ke maʻa fakasekisuale aí.

• “Angamaʻá: Ko e Hā e Ngaahi Fakangatangatá?” “I Choose to Be Pure” (videos), LDS.org

• “Ko e Haohaoa Fakasekisualé,” Ki Hono Fakamālohia ʻo e Toʻu Tupú, 35–37

Fakatupulaki ʻo ʻEtau Founga Akoʻí

Fakamoʻoni kia Sīsū Kalaisi. ʻI hoʻo faiakó, manatuʻi e sīpinga ʻa Paulá: naʻe “ʻikai [ke ne haʻu] ʻi he mālie ʻo e leá, pe ʻi he potó, ke fahakā… ʻa e fakamoʻoni ʻa e ʻOtuá” (1 Kolinitō 2:1). ʻE lava ke maʻu ʻe hoʻo fakamoʻoni nounou ki he fakamoʻuí ha ivi tākiekina mālohi.