Roksinkil Kim, Taaqehin—Choq’ re li Domnkil Tzoleb’aal

Xkawresinkil aawib’ chi k’utuk sa’ li Dominkil Tzoleb’aal

Li junkab’al tento raj naq taawanq choq’ xch’oolil li tzolok chirix li evangelio. Yaal a’in choq’ aawe laa’at jo’ ajwi’ choq’ reheb’ li tzolb’ileb’ aab’aan. Naq nakakawresi aawib’ chi k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taasik’ aamusiq’ankil xb’aan li Santil Musiq’ej.

Kim, Taaqehin—Choq’ reheb’ li komon ut li junkab’al taak’anjelaq ajwi’ re aakawresinkil. Tatxtenq’a chixtawb’al chik aana’leb’ chirixeb’ li tzol’leb’ re li evangelio li neke’tawman sa’eb’ li loq’laj hu. Taaruuq ajwi’ taak’eheb’ xch’ool ut taab’oqeb’ li komon sa’ li tzoleb’aal chiroksinkil Kim, Taaqehin—Choq’ reheb’ li komon ut li junkab’al re taachaab’ilo’q li tzolok neke’xb’aanu xjuneseb’ ut sa’ junkab’al (re aatenq’ankil chixb’aanunkil a’in, chi’ilmanq “Li na’leb’ re xb’oqb’aleb’ chi tzolok xjuneseb’ ut sa’ junkab’al” sa’ li hu a’in). Naq nakab’aanu chi jo’kan, chiwanq sa’ aach’ool naq te’wanq komon sa’ laa tzoleb’aal li wankeb’ sa’eb’ li ochoch b’ar wi’ ink’a’ naru na’ux xtzolb’aleb’ li loq’laj hu sa’ junkab’al.

Naq yookat chixkawresinkil aawib’, te’chalq li na’leb’ ut li eek’ahom aawik’in chirixeb’ li ani yookat chixtzolb’al, chan ru naq eb’ li na’leb’ sa’eb’ li loq’laj hu taarosob’tesi lix yu’ameb’, ut chan ru naru taatenq’aheb’ chixtawb’aleb’ li na’leb’ a’an naq neke’xtzol xjuneseb’ li loq’laj hu.

Li na’leb’ re k’utuk

Naq yookat chixk’uub’ankil aana’leb’ re k’utuk, naru taataw chik aana’leb’ rik’in li aatin li tusub’anb’il sa’ li hu a’in. Maak’oxla naq tento xtaaqenkileb’ li aatin a’in chi tzoltzo jo’ tz’iib’anb’il; a’an b’an tenq’ re tat-ok chixk’ulb’al li na’leb’ chi musiq’anb’il. Laa’at nakanaweb’ ru li ani tzolb’ileb’ aab’aan, ut li Qaawa’ ajwi’ naxnaweb’ ru. A’an tatxmusiq’a re xnawb’al chan ru us xtenq’ankileb’ li komon sa’ li tzoleb’aal chi kab’lak sa’ xb’een li tzolok chirix li evangelio li yookeb’ chixb’aanunkil sa’ rochocheb’.

Wankeb’ chik li k’anjeleb’aal li te’ruuq chatenq’ankil naq yookat chixkawresinkil awib’, jo’eb’ li na’leb’ sa’ Kim, Taaqehin—Choq’ reheb’ li komon ut li junkab’al ut eb’ li taqlanb’il hu re li Iglesia. Re xtawb’al chik li na’leb’ chirixeb’ li k’anjeleb’aal a’in, chi’ilmanq “Xkomon chik li k’anjeleb’aal.”

Junjunq li na’leb’ li tento taawanq sa’ aach’ool

• Li ochoch a’an li na’ajej q’axal chaab’il re tzolok chirix li evangelio. Jo’ aj k’utunel, wan jun aanimla k’anjel xkawresinkil, xwaklesinkil, ut kab’lak sa’ xb’een li tzolok chirix li evangelio li na’ux sa’ li junkab’al.

• Eb’ li komon sa’ li tzoleb’aal te’chamo’q lix paab’aaleb’ chirix lix evangelio li Jesukristo a’ yaal jo’ neke’xtaw ru ut neke’xk’anjela li yaalil na’leb’. Waklesiheb’ xch’ool chixtz’iib’ankil ut chixyu’aminkil li na’leb’ neke’xk’ul rik’in li Santil Musiq’ej.

• Li k’utuk maawa’ yal aatinak, ut maawa’ ajwi’ yal xtikib’ankil jun seraq’. Jun laa k’anjel a’an naq taa’uxq li aatinak li nawaklesin aamej, ut li wan chi xaqxo sa’ xb’eeneb’ li loq’laj hu.

• Li qaChoxahil Yuwa’ taaraj naq us tat-elq jo’ aj k’utunel. A’an xk’e k’iila k’anjeleb’aal re aatenq’ankil chi usaak, jo’eb’ li ch’utam reheb’ laj k’utunel. Sa’eb’ li ch’utam a’in naru taak’ul aana’leb’ rik’ineb’ li jun ch’ol chik chi aj k’utunel chirixeb’ li ch’a’ajkilal li yookat chirilb’al. Naru ajwi’ tex’aatinaq chirix li tzolok jo’ chanru li Kristo, ut teeyal xb’aanunkil.

• Eb’ li komon mas wi’chik neke’tzolok naq neke’ru chi k’utuk. Yalaq jo’q’e naru taakanab’eb’ li komon sa’ laa tzoleb’aal chixk’utb’al jun raqal re li tzolom, ut naru ajwi’ te’xb’aanu li toj saajeb’. Naru taab’aanu a’in a’ yaal jo’ tixtenq’aheb’ li komon, ut a’ yaal jo’ te’ruuq chixb’aanunkil. Wi nakab’oq jun reheb’ li komon sa’ li tzoleb’aal chi k’utuk, numsi li hoonal re xtenq’ankil chixkawresinkil rib’ chi rub’elaj, rik’in roksinkil li na’leb’ sa’ li hu a’in ut sa’ Kim, Taaqehin—Choq’ reheb’ li komon ut li junkab’al. Chijultiko’q aawe naq laa’at li b’oqb’ilat jo’ aj k’utunel, ut wan sa’ aab’een laa’at li k’a’ru taak’utmanq sa’ li tzoleb’aal.

• Li hu a’in naxk’e jun tzolom choq’ re li junjunq xamaan re li chihab’, ka’ajwi’ li wiib’ xamaan li na’ux wi’ li jolomil ch’utub’aj-ib’ maak’a’. Sa’eb’ li domingo maak’a’ wi’ jun li Dominkil Tzoleb’aal sa’ xk’ab’a’ jun li ch’utub’aj-ib’ re oqech malaj jalan chik li na’leb’, eb’ li junkab’al toj te’ruuq chirilb’al li Ak’ Chaq’rab’ sa’ rochocheb’ jo’ chanru tz’iib’anb’il resil. Re naq ink’a’ texb’ayq sa’ laa tzoleb’aal re li Dominkil Tzoleb’aal, naru taaq’ax jun li tzolom, malaj taajunaji wiib’ tzolom. Re naq ink’a’ te’sachq xna’leb’, eb’ li awa’b’ej re li Dominkil Tzoleb’aal us naq te’xye resil reheb’ laj k’utunel chi rub’elaj naq taajalmanq li kutan.