talavou o loo suesue i tusitusiga paia

O Se Mamanu mo le Aoao Atu

O otootoga taitasi i lenei punaoa o loo mulimuli i se mamanu o le valaaulia, fefaasoaai, ma le aoaoina atu o le aoaoga faavae.

Valaaulia le Fefaasoaai

E avea o se vaega o vasega taitasi, valaaulia tagata o le vasega e faasoa mai malamalamaaga ma aafiaga sa latou maua i le vaiaso ua mavae a o latou suesueina tusitusiga ta’itoatasi, ma faaleāiga ma faaaogā mea sa latou aoaoina. Fesoasoani i tagata o le vasega ia iloa e tāua a latou lava suesuega patino i fafo atu o le vasega. O lo latou lava liua patino i le Tama Faalelagi ma Iesu Keriso o le a le gata ina oo mai i le aoaoina mai le Aso Sa, ae faapea foi i o latou aafiaga i aso taitasi. A oo ina faalogo tagata o le vasega i aafiga a isi ma molimau ia Iesu Keriso ma Lana talalelei, o le a tele lava ina latou sailia ni aafiaga faapea e i latou lava.

E le o tagata uma o le a faitauina mataupu mo lesona taitasi, e oo foi i nisi sa faitauina e ono le maua le lagona lelei e faasoa mai ai. Ia mautinoa e lagona e tagata uma o le vasega o i latou o se vaega tāua o le vasega, pe i ai pe leai se mea e faasoa mai.

Aoao Atu le Aoaoga Faavae

E tatau ia te oe ma tagata o lau vasega ona taula’i atu ia Iesu Keriso ma Lana aoaoga faavae—o upumoni faavavau o le talalelei—o loo maua i fuaitau o mau e atofaina. A o e talanoaina aoaoga faavae mai mau, o a fuaiupu, upusii, aafiaga, fesili, ma punaoa faaopoopo atonu e te faasoa atu? E faapefea ona e faaaogaina nei punaoa e fesoasoani ai i le vasega ia iloa ma malamalama i mataupu faavae o le talalelei? E mafai faapefea ona e fesoasoani ia i latou ia faamalosia lo latou faatuatua i le Tama Faalelagi ma Iesu Keriso?