Vahe 1
Fineʻofá
Ko Hono Toe Fakafoki Mai ʻo ha Sīpinga ʻo e Kuonga Muʻá
Naʻe fakahaaʻi ʻe he Fakamoʻuí ʻi he kotoa ʻo ʻEne ngāue fakafaifekau ʻi he māmaní, ha ʻofa mo ha tokanga makehe ki he houʻeiki fafiné. Naʻe pehē ʻe ʻEletā Sēmisi E. Talamesi ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko Sīsū Kalaisi ʻa e toʻa tuʻukimuʻa taha ʻo e fefiné mo e tuʻunga fakaefefiné ʻi he māmaní.”1
Naʻe akoʻi fakatokolahi mo fakatāutaha ʻe he Fakamoʻuí ʻa e houʻeiki fafiné, ʻi he halá pea mo e matāfangá, ʻi he veʻe vaitupú pea ʻi honau ngaahi ʻapí. Naʻá Ne fakahaaʻi ha ʻofa-angalelei kiate kinautolu peá Ne fakamoʻui kinautolu mo honau fāmilí. ʻOku lahi ha ngaahi talanoa fakatātā naʻá Ne fai ʻo kau ki ha kau fafine ne nau fai ha ngaahi ngāue angamaheni pē. Naʻá Ne fakahaaʻi ʻEne maheni ʻaupito mo e meʻa ʻoku hoko he moʻui ʻa e houʻeiki fafiné peá ne akoʻi ha ngaahi lēsoni mahuʻinga fau ʻo e ongoongoleleí mei heʻenau ngaahi aʻusia fakaʻahó. Naʻá Ne fakamolemoleʻi kinautolu. Naʻá Ne tangi fakataha mo kinautolu. Naʻá Ne manavaʻofa kiate kinautolu ʻi honau ngaahi tūkunga takitaha ʻi heʻenau hoko ko e ngaahi ʻofefine, ngaahi uaifi, kau tauhi ʻapi, ngaahi faʻē mo e kau uitou. Naʻá Ne houngaʻia ʻiate kinautolu mo ne fakalāngilangiʻi kinautolu.
Naʻe aʻu pē ki he taimi naʻe tōtuʻa ai e mamahi ʻa e Fakamoʻuí ʻi he kolosí, naʻá Ne kei fakahaaʻi pē ʻEne tokanga ki Heʻene faʻeé, ʻa ia ne hoko he taimi ko iá ko ha uitou ne siʻi fie maʻu ke tokangaʻi.2 Pea ko ha fefine ʻa e fuofua tokotaha naʻá Ne hā ki ai hili ʻEne Toetuʻú.3
Kau Ākonga Fefine ʻi he Fuakava Foʻoú
Neongo ʻoku siʻi e ʻilo ki ha kautaha ʻa e houʻeiki fafiné ne fokotuʻu ʻi he Fuakava Foʻoú, ka ʻoku fokotuʻu mai ʻe he ngaahi fakamoʻoní naʻe kau lahi e houʻeiki fafiné ki he ngāue fakafaifekau ʻa e Fakamoʻuí. ʻOku hā ʻi he Fuakava Foʻoú ha ngaahi fakamatala fekauʻaki mo ha kau fafine, ne ʻiloʻi honau hingoá pea ʻikai ʻiloʻi ha niʻihi, ne nau fakahaaʻi ʻenau tui kia Sīsū Kalaisí, ako mo moʻui ʻaki ʻEne ngaahi akonakí pea mo fakamoʻoni fekauʻaki mo ʻEne ngāué, ngaahi maná mo ʻEne fakaʻeiʻeikí. Naʻe hoko e kau fafine ko ʻení ko ha kau ākonga tā sīpinga lelei pea mo ha kau fakamoʻoni mahuʻinga ki he ngāue ʻo e fakamoʻuí.
Naʻe fononga fakataha holo ha kau fafine mo Sīsū pea mo ʻEne Kau ʻAposetolo ʻe Toko Hongofulu Mā Uá. Naʻa nau foaki ʻenau koloá ke tokoni ki Heʻene ngāue fakafaifekaú. Hili ʻEne pekia mo Toetuʻú, naʻe hokohoko atu pē ʻa e hoko ʻa e kau fafiné ko ha kau ākonga faitōnungá. Naʻa nau fakataha mo lotu fakataha mo e kau ʻAposetoló. Ne nau foaki honau ʻapí ke hoko ko ha feituʻu fakatahaʻanga moʻó e kāingalotu ʻo e Siasí. Ne nau kau lototoʻa atu ki he ngāue ko hono fakamoʻui fakatuʻasino mo fakalaumālie ʻo e ngaahi laumālié.
ʻOku hoko ʻa Maʻata mo hono tokoua ko Melé ko ha sīpinga ʻo e kau ākonga fefine ʻi he Fuakava Foʻoú. ʻOku hā ʻi he Luke vahe 10 ha fakamatala ki hono fakaʻatā ʻe Maʻata ʻa hono ʻapí kia Sīsuú. Naʻá ne tauhi ki he ʻEikí ʻaki ʻene tokangaʻi ʻEne ngaahi fie maʻu fakatuʻasinó pea naʻe tangutu ʻa Mele ʻi he veʻe vaʻe ʻo e ʻEikí ʻo ne tokanga kakato ki Heʻene ngaahi akonakí.
ʻI ha kuonga naʻe angamaheni ʻaki hono fai ai ʻe he kakai fefiné ha tokoni fakatuʻasino pē, naʻe akoʻi ʻe he Fakamoʻuí ʻa Maʻata mo Mele ʻe lava ke kau fakalaumālie atu e kakai fefiné ki Heʻene ngāué. Naʻá Ne fakaafeʻi kinaua ke na hoko ko ʻEne ongo ākonga pea ke na kau ʻi he fakamoʻuí, ʻa e “meʻa lelei” he ʻikai toe toʻo meiate kinauá.4
Naʻe kau kakato atu ʻa Mele mo Maʻata ki he ngāue fakafaifekau ʻa e ʻEikí ʻi he māmaní. ʻOku tau lau he konga ki mui ʻo e Fuakava Foʻoú ʻo kau ki he fakamoʻoni mālohi ʻa Maʻata ki he faka-ʻOtua ʻa e Fakamoʻuí. ʻI haʻane fetalanoaʻaki mo Sīsū, naʻá ne pehē ai, “ʻOku ou tui ko e Kalaisí ʻa koe, ko e ʻAlo ʻo e ʻOtuá, ʻa ia naʻe totonu ke haʻu ki māmaní.”5
Naʻe tokolahi ha kau ākonga fefine kehe ne nau fononga holo mo Sīsū pea mo e Toko Hongofulu Mā Uá, ʻo nau ako fakalaumālie meiate Ia mo tauhi fakatuʻasino kiate Ia. Naʻe tohi ʻe Luke ʻo pehē:
“Pea pehē kuo hili ia, naʻá ne ʻalu [ʻa Sīsū] ʻi he kolo mo e potu kakai kotoa pē ʻo malanga mo fakahā ʻa e ongoongolelei ʻa e puleʻanga ʻo e ʻOtuá: pea naʻe ʻiate ia ʻa e toko hongofulu mā toko uá,
“Pea mo e kau fafine naʻe fakamoʻui mei he kau laumālie kovi, mo e ngaahi mahaki, ko Mele ʻoku ui ko Makitaliné, ʻa ia naʻe ʻalu [mei] ai ʻa e tēvolo ʻe toko fitu,
“Mo Sōana ko e ʻunoho ʻo Kusa ko e tauhi koloa ʻa Hēlotá, mo Sūsana mo e toko lahi kehe, naʻa nau tauhi ʻaki ia ʻenau koloá.”6
Ngalingali naʻe fai ʻe he kau fafine ko ʻení ha tokoni fakapaʻanga kia Sīsū mo ʻEne kau ʻAposetoló, fakataha mo ʻenau tokoni ʻi he ngāue hangē ko e feimeʻatokoní. Makehe mei hono maʻu ʻe he kau fafine ko ʻení ha tokoni fakalaumālie meia Sīsuú—ʻa e ngaahi ongoongo fakafiefia ʻo ʻEne ongoongoleleí pea mo e ngaahi tāpuaki ʻo Hono mālohi faifakamoʻuí—ne nau tokoni foki kiate Ia, ʻo foaki ʻenau koloá mo e ʻofa mateakí.
Naʻe tohi ʻa e ʻAposetolo ko Paulá ʻo fekauʻaki mo ha kau fafine ne nau tokoni ki he Kāingalotú, ʻi honau ngaahi lakanga he Siasí mo ʻenau fili pē ʻanautolú. Naʻe hanga ʻe heʻene fakamatalaʻi ʻa e uitou angatonú ʻo fakamahinoʻi mai e ngaahi ʻulungāanga ne maʻu ʻe ha kau fafine tokolahi ʻi he Siasí: “Kuo fakaongo[ongo]lelei ia ʻi he ngaahi ngāue leleí; ʻo kapau naʻá ne tauhi fānau, ʻo kapau naʻá ne fakaafe ʻa e kakai fonongá, kapau naʻá ne fufulu ʻa e vaʻe ʻo e kāinga māʻoniʻoní, kapau naʻá ne tokoni ki he kakai mahakí, kapau naʻá ne faʻa fai ʻa e ngaahi ngāue lelei kotoa pē.”7 Naʻe toe tohi foki ʻe Paula ʻo kau ki he tākiekina ʻa ha kau fafine matuʻotuʻa, fakapotopoto mo taukei. Naʻá ne naʻinaʻi kia Taitusi ke poupouʻi e kau fafine matuʻotuʻa angé ke nau tokoni mo akoʻi e kau finemuí ʻo fekauʻaki mo honau ngaahi fatongia taʻengata ko e uaifi mo e faʻeé, “koeʻuhí ke nau ako ki he kau finemuí ke nau anga fakapotopoto, ke ʻofa ki honau ʻunohó, ke ʻofa ki heʻenau fānaú.”8
ʻOku kau ʻi he tohi ʻa Ngāué ha fakamatala ki ha fefine naʻá ne maʻu e ngaahi ʻulungāanga fisifisimuʻa ne fakamatalaʻi ʻe Paulá. Naʻe nofo ʻa Tāpaita, ne toe ʻiloa pē ko Toakasé, ʻi Sopa, ʻo ne tuitui ai ha vala maʻá e siʻi kau fafine ne masivá.
“Pea naʻe ʻi Sopa ʻa e ākonga ʻe taha naʻe hingoa ko Tāpaita, ko e hingoa tatau ia mo Toakase; pea naʻe faʻa fai ʻe he fefiné ni ʻa e ngaahi ngāue lelei mo e faʻa foakí.
“Pea ko ʻeni naʻe tuʻia hono mahaki ʻi he ngaahi ʻaho ko iá pea pekia. …
“Pea naʻe vāofi ʻa [e kolo ko] Litá mo Sopa, pea ʻi he fanongo ʻa e kau ākongá ʻoku ʻi ai ʻa Pitá, naʻa nau fekau ʻa e ongo tangata ʻo kole kiate ia ke ʻoua naʻa tuai ʻene haʻu kiate kinautolú.
“Pea tuʻu ʻa Pita ʻo ʻalu mo kinaua. Pea kuo hoko atu ia, naʻa nau ʻomi ia ki he potu fale ʻi ʻolungá: pea naʻe tutuʻu mo tangi ʻo ofi kiate ia ʻa e kau fafine kotoa pē kuo mate honau ʻunohó, ʻo nau fakahā ʻa e ngaahi kofutuʻa mo e kofu kehekehe naʻe ngaohi ʻe Toakasé, ʻi heʻene kei ʻiate kinautolú.
“Ka kuo tuku atu ʻe Pita ʻa kinautolu kotoa pē ki tuʻa pea tūʻulutui ia ʻo lotu; pea hanga ia ki he sinó mo ne pehē, Tāpaita, tuʻu hake. Peá ne ʻā hake hono matá: pea ʻi heʻene mamata kia Pitá naʻá ne nofo hake.”9
ʻOku toe hā foki he Fuakava Foʻoú ha kau fafine moʻui mateaki kehe. Naʻe foaki ʻe Pīsila mo hono husepāniti ko ʻAkuilá ʻa ʻena moʻuí koeʻuhí ko e kau ʻAposetoló peá na foaki hona ʻapí ke fai ai e ngaahi fakataha ʻa e Siasí.10 Naʻe tohi ʻe Paula, “ʻOku ʻofa lahi atu kiate kimoutolu ʻi he ʻEikí ʻa ʻAkuila mo Pīsila pea mo e siasi ʻoku ʻi hona falé.”11
Naʻe hanga foki ʻe ha fefine ko Mele ʻo “fai ʻa e ngāue lahi” maʻá e kau ʻAposetoló.12 Naʻe papitaiso ha fefine ko Litia fakataha mo hono falé pea nau tokoni leva ki he niʻihi ne nau akoʻi iá.13
Neʻi ai ha fatongia fakalotu ʻo ha fefine ko Fīpē ʻi hono haʻofanga lotú. Naʻe pehē ʻe Paula, “ʻOku ou fakaongolelei atu kiate kimoutolu ʻa Fīpē, ko hotau tuofefine, ʻa ia ko e tauhi ʻi he siasí … ke mou maʻu ia ʻi he ʻEikí ʻo taau mo e kāinga māʻoniʻoni pea ke mou tokoniʻi ia ʻi he ngāue kotoa pē te mou ʻaonga ai kiate iá: he kuó ne tokoniʻi ʻa e tokolahi.”14 ʻOku kei hokohoko atu pē he ʻahó ni hono fai ʻe he kau mēmipa ʻo e Fineʻofá ʻa e faʻahinga tokoni ne fai ʻe Fīpē mo ha kau fafine maʻongoʻonga kehe ʻo e Fuakava Foʻoú—ʻa ia ko ha kau taki ʻo e Fineʻofá, kau faiako ʻaʻahi, ngaahi faʻē pea mo ha niʻihi kehe pē—ʻo nau poupou mo tokoni ki ha niʻihi tokolahi.
Kau Ākonga Fefine ʻi he Ngaahi ʻAho Kimui Ní
Naʻe lāngilangiʻia, anga fakaʻeiʻeiki, fie maʻua mo fakamahuʻingaʻi e kau fafine ʻi he Siasi he kuonga muʻá. Ne nau tokoni ki he niʻihi kehé, ʻo fakatupulaki ʻenau māʻoniʻoni fakatāutahá mo nau kau ki he ngāue maʻongoʻonga ko hono fakahaofi e ngaahi laumālié.
Kuo toe fakafoki mai e ngaahi sīpinga ko ʻení ʻi he ngaahi ʻaho fakaʻosí ʻo fakafou ʻi hono fokotuʻu ʻo e Fineʻofá. Naʻe pehē ʻe he Palōfita ko Siosefa Sāmitá, “Naʻe teʻeki ai ʻaupito ke haohaoa ʻa e Siasí ka ne taʻeʻoua hono fokotuʻu ʻo e kakai fefiné.”15 Naʻe toe fakamamafaʻi mai e akonaki ko ʻení ʻe ʻĪlisa R. Sinou, ko e palesiteni lahi hono ua ʻo e Fineʻofá. Naʻá ne pehē: “Neongo ʻoku fakaeonopooni ʻa e hingoá ka ko e tukuʻau mai e tupuʻanga ʻo e kautahá mei he kuonga muʻá. Naʻe fakahā mai ʻe hotau palōfita ne fakapōngí naʻe ʻi ai ha kautaha pehē pē ʻi he siasi he kuonga muʻá.”16
Makehe meia Siosefa Sāmita, kuo fakamoʻoni foki ha kau palōfita kehe ʻi he ngaahi ʻaho kimui ní ko hono fokotuʻu ko ia ʻo e Fineʻofá, ko ha ueʻi fakalaumālie ia ʻi hono Toe Fakafoki Mai ʻo e ongoongoleleí, ʻa ia ʻoku uiuiʻi ai ʻa e kau fafine ʻi he Siasí ki ha ngaahi tuʻunga fakalotu ke nau fetokoniʻaki pea mo faitāpuekina e Siasí fakalūkufua. Naʻe pehē ʻe Palesiteni Siosefa F. Sāmita ko e Palesiteni hono ono ʻo e Siasí, “Ko e kautahá ni naʻe faʻu, fakamafaiʻi, tuʻutuʻuni pea mo fokotuʻu fakalangi ia ʻe he ʻOtuá ke tokoni ki hono fakamoʻui ʻo e ngaahi laumālie ʻo e kakai fefiné mo e kakai tangatá.”17 Naʻe lea ʻa e Palesiteni hono nima ʻo e Siasí ko Palesiteni Lōlenisou Sinou, ki ha houʻeiki fafine ʻo e Fineʻofá ʻo pehē: “Kuo mou tuʻu maʻu pē ʻi he tafaʻaki ʻo e Lakanga Fakataulaʻeikí, ʻo mateuteu ke fakamālohia kinautolu mo fai homou fatongia ʻi hono ʻunuaki ki muʻa e ngaahi ngāue ʻa e puleʻanga ʻo e ʻOtuá; kuo mou kau ki hono fakahoko e ngāué ni, ko ia kuo pau ke mou ʻinasi foki ʻi he ikuna kāfakafa ʻe aʻusia ʻe he ngāué pea ʻi he hakeakiʻi mo e nāunau ʻe foaki ʻe he ʻEikí ki Heʻene fānau faivelengá.”18
ʻI he kau ko ia e houʻeiki fafiné ki he Fineʻofá, ʻoku nau hoko ai ko ha kau ākonga lototoʻa ʻo Sīsū Kalaisi ʻi he ngāue ʻo e fakamoʻuí. Hangē ko e kau fafine ʻi he Siasí he kuonga muʻá, ʻoku nau ngāue fakataha foki mo ha kau tangata maʻu lakanga fakataulaʻeiki ke fakatupulaki ʻa e tuí mo e angatonu fakafoʻituituí, fakamālohia e ngaahi fāmilí mo e ʻapí pea mo kumi pea tokoniʻi ʻa kinautolu ʻoku faingataʻaʻiá. Naʻe akonaki mai ʻa Sisitā Suli B. Peki ko e palesiteni lahi hono hongofulu mā nima ʻo e Fineʻofá, ʻo pehē: “ ʻI he Fineʻofá, ʻoku tau ako ai ke hoko ko ha kau ākonga ʻa Kalaisi. ʻOku tau ako ai ʻa e meʻa ʻokú Ne finangalo ke tau akó, fakahoko ai ʻa e meʻa ʻokú Ne finangalo ke tau faí pea tau hoko ai ko e kakai ʻokú Ne finangalo ki aí.”19
“Naʻe maʻu [ʻa Sīsū] ʻe Maʻata ki hono falé.” Naʻe ai hono tokoua ko Mele, naʻe nofo foki ia “ ʻi he vaʻe ʻo e Sīsuú” ʻo “fanongo ki heʻene leá” (Luke 10:38–39).
Naʻe fakahaaʻi ʻe he Fakamoʻuí ha ʻofa mo ha tokanga makehe ki he houʻeiki fafiné lolotonga ʻEne ngāue fakafaifekau ʻi he māmaní.
Ko Tāpaitá naʻá ne “faʻa fai … ʻa e ngaahi ngāue lelei mo faʻa foaki” (Ngāue 9:36).