Pag-angkon og Espirituhanong Kahibalo

Ang Dios mao ang Tinubdan sa Tanang Kamatuoran

1. Ang Dios nasayud sa tanang butang ug maoy tinubdan sa tanang kamatuoran. Tungod kay gihigugma kita sa atong Langitnong Amahan ug gusto nga kita molambo ngadto sa pagkahimong sama Kaniya, Iya kitang giawhag nga “[pangitaon] ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Sa atong pagpangita sa kamatuoran, makasalig kita Kaniya sa hingpit, makasalig sa Iyang kaalam, sa Iyang gugma, ug sa Iyang gahum sa pagtudlo ug pagpanalangin kanato. Misaad ang Dios nga ang kamatuoran ipadayag diha sa atong mga hunahuna ug kasingkasing pinaagi sa Espiritu Santo kon magkugi kita sa pagpangita Kaniya.

2. Aron matabangan kita, gitudloan kita sa Langitnong Amahan unsaon sa pag-angkon og espirituhanong kahibalo. Giestablisar niya ang mga kondisyon nga angay natong sundon aron maangkon kana nga kahibalo. Ang balaanon nga sumbanan nga gi-orden sa Dios nagkinahanglan nga kita adunay matinuorong tinguha nga mahibalo sa kamatuoran ug andam nga magpakabuhi sumala sa unsay Iyang gipadayag. Ang sinsero natong tinguha modala kanato ngadto sa pagpangita sa kamatuoran pinaagi sa pag-ampo ug magkugi sa pagtuon sa pulong sa Dios.

3. Usahay mahimo natong madiskubrihan ang bag-ong impormasyon o may mga pangutana mahitungod sa doktrina, mga gisunod, o kasaysayan sa Simbahan nga ingon og lisud sabton.

   Ang pagpangutana ug pagpangita og mga tubag usa ka mahinungdanong bahin sa atong paningkamot nga makakat-on sa kamatuoran. Ang ubang mga pangutana nga moabut sa atong mga hunahuna tingali dinasig sa Espiritu Santo. Ang dinasig nga mga pangutana kinahanglang ikonsiderar nga mga gasa gikan sa Dios nga maghatag kanato og mga kahigayunan nga mapalambo ang atong panabot ug malig-on ang atong kasiguroan nga ang Ginoo andam nga motudlo kanato. Bisan unsa ang tinubdan sa atong mga pangutana, gipanalanginan kita og abilidad sa paghunahuna ug pagpangatarungan ug ang impluwensya sa Ginoo mopalambo sa atong hunahuna ug mopalawom sa atong panabut. Ang atong kinaiya ug intensyon diin kita mangutana ug magtinguha og mga tubag makaapekto og dako sa atong abilidad sa pagkat-on pinaagi sa Espiritu Santo.

4. Ang mosunod nga tulo ka baruganan makagiya kanato samtang magtinguha kita sa pagkat-on ug pagsabut sa mahangturong kamatuoran ug pagsulbad sa mga pangutana o mga isyu:

   • Molihok inubanan sa hugot nga pagtuo.

   • Mosusi sa mga konsepto ug mga pangutana inubanan sa mahangturong panglantaw.

   • Motinguha og dugang nga panabut pinaagi sa balaanong gitudlo nga mga tinubdan.

Baruganan 1: Lihukon Inubanan sa hugot nga Pagtuo

5. Molihok kita inubanan sa hugot nga pagtuo kon atong pilion ang pagsalig sa Dios ug Siya ang unahon pinaagi sa sinserong pag-ampo, pagtuon sa Iyang mga pagtulun-an, ug pagsunod sa Iyang mga sugo.

6. Samtang magtinguha kita sa pagpalambo sa atong panabut ug pagsulbad sa mga problema, importante nga mosalig kita sa pagpamatuod nga anaa na kanato bahin ni Jesukristo, sa Pagpahiuli sa Iyang ebanghelyo, ug sa mga pagtulun-an sa Iyang gi-orden nga mga propeta. Gitudlo ni Elder Jeffrey R. Holland sa Korum sa Napulog Duha ka Apostoles nga: “Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (“Nagatuo Ako,” Liahona, Mayo 2013, 94). Ang Ginoo mismo midapit kanato sa “paghunahuna ngadto [Kaniya] sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36).

7. Atol sa mga panahon nga dili dayon matubag ang atong mga pangutana, makatabang ang paghinumdom nga bisan og ang Langitnong Amahan mipadayag sa tanan nga gikinahanglan sa atong kaluwasan, wala pa Niya ikapadayag ang tanang kamatuoran. Samtang padayon kita nga mangita og mga tubag, kinahanglan nga magpakabuhi kita pinaagi sa hugot nga pagtuo—mosalig nga sa katapusan kita makadawat sa mga tubag nga atong gitinguha. Samtang magmatinud-anon kita sa mga kamatuoran ug kahayag nga nadawat na nato, makadawat pa kita og daghan. Ang mga tubag sa atong mga pangutana ug mga pag-ampo kasagaran moabut nga “pagtulun-an human sa usa ka pagtulun-an, lagda human sa usa ka lagda” (2 Nephi 28:30).

Baruganan 2: Susihon ang mga Konsepto ug mga Pangutana inubanan sa Mahangturong Panglantaw

8. Sa pagsusi sa doktrinal nga mga konsepto, mga pangutana, ug sosyal nga mga isyu inubanan sa mahangturong panglantaw, atong ikonsiderar ang kinatibuk-ang kahulugan niini sa plano sa kaluwasan ug sa mga pagtulun-an sa Manluluwas. Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo. Magtugot kini nga atong maporma og usab ang pangutana (aron makita sa laing paagi ang pangutana) ug matan-aw ang mga ideya basi sa sumbanan sa kamatuoran nga gihimo sa Ginoo kay sa pagdawat sa mga ideya o mga pagbana-bana nga gihimo sa kalibutan. Mahimo nato kini pinaagi sa pagpangutana og sama sa “Unsa man gayud ang akong nahibaloan na mahitungod sa Langitnong Amahan, sa Iyang plano, ug sa unsang paagi Niya gidumala ang Iyang mga anak?” ug “Unsa nga pagtulun-an sa ebanghelyo ang may kalabutan o naghatag og katin-awan niining konsepto o isyu?”

9. Gani ang mga pangutana nga may kalabotan sa makasaysayanon nga mga hitabo mahimong nagkinahanglan sa pagsusi niini inubanan sa mahangturong panglantaw. Samtang padayon natong gipalig-on ang atong pagsalig sa atong Langitnong Amahan ug sa Iyang plano sa kaluwasan, mas klaro natong makita ang mga problema. Mahimong makatabang usab ang pagsusi sa makasaysayanon nga mga pangutana sa tukmang makasaysayanon nga kahulugan pinaagi sa pagkonsiderar sa kultura ug mga kinaiya sa maong panahon kay sa pagtan-aw sa kasamtangang mga panglantaw ug mga kinaiya.

10. Importante ang paghinumdom nga ang makasaysayanon nga mga detalye wala magdala sa makaluwas nga gahom sa mga pakigsaad, mga ordinansa, ug doktrina. Ang pagkabalda sa wala kaayoy kahulugan nga mga detalye nga maoy hinungdan nga dili na nimo makita ang nagkadayag nga mga milagro sa Pagpahiuli sama ra kini sa paggahin og panahon sa pag-analisar sa sudlanan sa regalo ug gibaliwala ang kanindot sa regalo mismo.

Baruganan 3: Tinguhaa ang Dugang nga Panabut pinaagi sa Balaanong Gitudlo nga mga Tinubdan

11. Isip kabahin sa gipili sa Ginoo nga proseso sa pag-angkon og espirituhanong kahibalo, miestablisar Siya og mga tinubdan nga pinaagi niini Iyang ikapadayag ang kamatuoran ug giya sa Iyang mga anak. Kini nga mga tinubdan naglakip sa kahayag ni Kristo, sa Espiritu Santo, sa mga kasulatan, mga ginikanan, ug mga lider sa Simbahan. Ang Unang Kapangulohan ug ang Korum sa Napulog Duha ka Apostoles—mga propeta sa Ginoo dinhi sa kalibutan karon—mao ang importante kaayong tinubdan sa kamatuoran. Gipili ug gi-orden sa Ginoo kining mga tawhana nga mamulong alang Kaniya.

12. Makat-unan usab nato ang kamatuoran pinaagi sa ubang kasaligan nga mga tinubdan. Bisan pa niana, ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon. Nagpuyo kita sa panahon diin daghan ang “nagangalan sa dautan nga maayo, ug sa maayo nga dautan” (Isaias 5:20). Si Satanas mao ang amahan sa tanang bakak ug nagtinguha sa pagtuis sa kamatuoran ug pag-agni kanato aron mopalayo sa Ginoo ug sa Iyang pinili nga mga sulugoon. Ang pagkat-on sa pag-ila ug paglikay sa dili kasaligang mga tinubdan makapanalipod nato gikan sa sayop nga impormasyon ug gikan niadtong kinsa nagtinguha sa pagdaot sa atong tinuohan. Samtang kita nagtinguha og tabang gikan sa Espiritu Santo ug modangop ngadto sa balaanong pinili sa Ginoo nga mga tinubdan alang sa mga tubag og direksyon, mapanalanginan kita nga makaila tali sa kamatuoran ug sa sayop. Kita makasalig sa gisaad sa Ginoo nga “pinaagi sa gah[o]m sa Espiritu Santo kamo mahimo nga masay[o]d sa kamatuoran sa tanan nga mga butang” (Moroni 10:5).

Pagtabang sa Uban nga Makaangkon og Espirituhanong Kahibalo

13. Kon ang uban moduol ngari kanato nga mangutana o magpakisusi bahin sa doktrina sa Simbahan, mga gibuhat, o kasaysayan, unsaon kaha nato pagtabang nila og maayo sa ilang pagpangita sa kamatuoran? Ang mosunod mao ang pipila ka mga paagi nga sila atong matabangan:

14. Maminaw sa mainampingon ug mainampuong paagi. Paminaw og maayo sa dili pa ikaw motubag, pangayo og katin-awan ug sabta ang aktwal nga mga pangutana nga ilang gipangutana. Mahunahunaong magtinguha sa pagsabut sa tinuod nga tumong sa ilang mga pangutana ug sa ilang mga pagbati ug mga gituohan. Pag-ampo alang sa giya mahitungod kon unsaon nga matabangan nimo sa labing maayo kadtong adunay mga pangutana.

15. Motudlo ug mopamatuod sa mga kamatuoran sa ebanghelyo. Ipaambit ang magamit nga mga pagtulun-an gikan sa mga kasulatan ug sa modernong mga propeta ug kon sa unsang paagi nga nakahimo kini og kalainan sa imong kinabuhi. Tabangi kadtong imong gipakigsultihan nga mosusi o mousab sa ilang mga pangutana diha sa kinatibuk-ang kahulugan sa ebanghelyo ug sa plano sa kaluwasan.

16. Dapita sila sa paglihok diha sa hugot nga pagtuo. Hinumdumi nga ang Ginoo nagkinahanglan nga kita magtinguha og espiritwal nga kahibalo alang sa atong kaugalingon. Busa kinahanglan gayud nga dapiton nato ang uban sa paglihok inubanan sa hugot nga pagtuo pinaagi sa pag-ampo, pagkamasulundon sa mga sugo, ug makugihon nga pagtuon sa pulong sa Dios, gamit ang balaanong gitudlo nga mga tinubdan, ilabi na ang Basahon ni Mormon. Kon mahimo, dapita sila sa paghinumdom sa ilang mga kasinatian dihang mibati sila sa Espiritu Santo ug sa hugot nga pagpanggunit sa mahangturong mga kamatuoran nga ilang nakat-unan hangtud moabut ang dugang nga kahibalo.

17. Abagi hangtod sa pagtapos. Magtanyag sa pagpangita sa mga tubag, ug dayon abagi hangtod sa pagtapos pinaagi sa pagpaambit sa unsay imong nakat-unan. Mahimo usab nimong dunganan sa pagpangita og mga tubag. Ipahayag ang pagsalig diha sa saad sa Ginoo nga mohatag og personal nga pagpadayag.