Pasiuna sa Doktrinal nga Kahanas

Diha sa Basahon ni Mormon, gitudloan ni propeta Helaman ang iyang mga anak, “Kini diha sa lig-on nga sukaranan sa atong Manunubos, kinsa mao si Kristo, ang Anak sa Dios, nga kamo kinahanglan gayud motukod sa inyong tukuranan” (Helaman 5:12). Ang pagtukod og pundasyon diha kang Jesukristo—nga naglakip sa pagkasabut, pagtuo, ug pagpakabuhi subay sa Iyang doktrina—mopalawom sa atong pagkakabig ug pasalig isip Iyang mga disipulo, manalipud kanato batok sa mga impluwensya sa kaaway, ug matabangan kita sa pagpanalangin sa kinabuhi sa uban.

Usa sa mga paagi sa pagtuman niini mao ang dungan nga sumpay-sumpay nga pagtuon sa mga kasulatan diha sa klase. Laing paagi nga atong matukod ang pundasyon diha ni Jesukristo ug sa Iyang doktrina mao ang usa ka paningkamot nga gitawag og Doktrinal nga Kahanas.

Ang Doktrinal nga Kahanas magtutok sa duha ka sangputanan:

1. Makakat-on ug mogamit sa balaanong mga baruganan alang sa pag-angkon og espirituhanong kahibalo. Ang Langitnong Amahan mipadayag sa mga baruganan alang sa pag-angkon og espirituhanong kahibalo. Kini nga mga baruganan naglakip sa paglihok pinaagi sa hugot nga pagtuo, pagsuta sa mga konsepto ug mga pangutana inubanan sa mahangturong panglantaw, ug sa dugang nga pagtinguha og panabut pinaagi sa balaanong gitudlo nga mga tinubdan. Mapalambo nato ang doktrinal nga kahanas samtang kita mogamit niini nga mga baruganan sa sulod ug gawas sa klase ug mangita og mga tubag sa doktrinal, personal, sosyal, ug makasaysayanon nga mga pangutana sa paagi nga madapit ang Espiritu Santo sa pagpalig-on sa atong hugot nga pagtuo ngadto sa Langitnong Amahan ug kang Jesukristo.

2. Bansaya ang mga tudling sa kasulatan sa doktrinal nga kahanas ug ang doktrina sa ebanghelyo ni Jesukristo nga ilang gitudlo. Kini nga sangputanan makab-ot pinaagi sa:

   1. Pagkahibalo sa doktrina nga gitudlo diha sa mga tudling sa kasulatan sa doktrinal nga kahanas.

   2. Pagpasabot sa doktrina sa tin-aw nga paagi gamit ang may kalabotan nga mga tudling sa kasulatan sa doktrinal nga kahanas.

   3. Pagkahinumdom ug pagkatultol sa mga tudling sa kasulatan sa doktrinal nga kahanas ug pagmemorya sa importanting hugpong sa mga pulong sa kasulatan.

   4. Ang paggamit sa doktrina sa ebanghelyo ni Jesukristo ug sa mga baruganan sa pag-angkon og espirituhanon nga kahibalo diha sa atong inadlaw-adlaw nga mga pagpili ug diha sa atong mga tubag nga doktrinal, personal, sosyal, ug makasaysayanon nga mga isyu ug mga pangutana.