Bōk Jeļāļo̧kjeņ an Jetōb

Anij ej Unjen M̧ool Ko Otemjej

Anij ejeļā men ko otemjeļo̧k im ej unjen m̧ool ko otemjeļo̧k. Kōnke Jemedwōj Ilan̄ ej iakwe kōj im kōņaan bwe jen eddōkļo̧k im erom̧ āinwōt E, Ekar rōjan̄ kōj n̄an “kappukot jeļā, em̧ool jān katak im barāinwōt jān tōmak” (Katak im Bujen Ko 88:118). Ilo ad kappukot m̧ool eo, jemaron̄ lukkuun lōke E, atartar wōt ilo jeļāļo̧kjen eo An, An iakwe, im An kajoor n̄an katakin im kōjeraam̧m̧an kōj. Anij ekar kallim̧ur n̄an kwaļo̧k m̧ool eo n̄an kōļmenļo̧kjeņ ko ad im būrowōd jen Jetōb Kwojarjar n̄e jenaaj tiljek kappukot E.
N̄an jipan̄ kōj, Jemedwōj Ilan̄ ekar katakin kōj wāween ad bōk jeļāļo̧kjeņ an jetōb. E ekar ejaake jet jekjek jej aikuj ļoore n̄an maron̄ bōk kain jeļāļo̧kjeņ rot in. Jon̄ak in ekkapit eo ekwojarjar an Anij ej kōm̧m̧an bwe jen bōk juon ikdeleel eo em̧ool n̄an jeļā m̧ool eo im n̄an kōņaan mour ekkar n̄an ta eo E ekar kwaļo̧ke. Ikdeleel eo ad enaaj tōlļo̧k kōj n̄an kappukote ilo jar im n̄an tiljek ekkatak naan eo an Anij.
Jet iien jemaron̄ lo meļeļe ko rekāāl ak wōr ad kajjitōk ikkijeen katak ko, imminene ko, ak bwebwenato in Kabun̄ in me epen ad meļeļe kaki.

Kajjitōk kajjitōk ko im pukot uwaak ko ej juon m̧ōttan eo eaorōk ilo ad ekkatak m̧ool eo. Jet iaan kajjitōk ko me rej itok n̄an kōļmenļo̧kjeņ ko ad remaron̄ im̧we jān Jetōb Kwojarjar. Kajjitōk ko reim̧we jej aikuj watōki āinwōt menin letok ko jān Anij me ej letok iien ko rem̧m̧an n̄an ad kōļapļo̧k ad meļeļe im n̄an kōkajoorļo̧k jeļā eo ad me Irooj enaaj katakin kōj. Jekdo̧o̧n kain jipan̄ rot ro n̄an kajjitōk ko ad, em̧ōj ad kar jeraam̧m̧an kōn maron̄ in n̄an ļōmņak im tōpar im n̄an bōk im̧we an Irooj ilo kōļmenļo̧kjeņ ko ad n̄an kam̧wilaļļo̧k ad meļeļe. Mwiļ im kōttōpar eo jej kajjitōk kake n̄an pukot uwaak ko enaaj jelet maron̄ eo ad n̄an ekkatak kōn Jetōb Kwojarjar.
Pedped kein jilu ilaļ renaaj tōl kōj ilo ad kappukot n̄an ekkatak im meļeļe m̧ool eo indeeo n̄an ņa mejļan kajjitōk ko ak menin ekōnono ko.
- Jerbal kōn Tōmak.
- Etale katak ko im kajjitōk ko kōn juon erreim̧aanļo̧k indeeo.
- Kappukot eļapļo̧k mālōtlōt kōn kein jipan̄ kar litok me rekwojarjar.

Pedped 1: Jerbal kōn Tōmak

Ilo ad jerbal kōn tōmak n̄e jej kālet n̄an leke Anij im oktaļo̧k n̄an E m̧oktata ilo jar, katak katak ko An, im pokake kien ko An.
Ilo ad kappukot n̄an kōļapļo̧k ad meļeļe im n̄an ņa mejļan kajjitōk ko ak abūņōņō ko, eaorōk bwe jen pedped ioon naan in kam̧ool eo bwe em̧ōj ad bōk Jisōs Kraist, Jepļaaktok in gospel eo An, im katak ko an rikanaan ro An me em̧ōj kar kapit er. Elder Jeffrey R. Holland jān Doulul eo an Jon̄oulruo Rijilōk ro ekar kwaļo̧k: “N̄e iien rōt kein rej itok im men kein rej waļo̧k, uwaak eo ejjab m̧ōkaj an waļo̧k, dāpdāp wōt kōn ta eo em̧ōj am̧ jeļā im jutak peran n̄an bōk eļapļo̧k jeļā” (“Lord, I Believe,” Liaona, Māe 2013, 94). Irooj make ekar kūr kōj n̄an, “reitok n̄an [E] ilo aolep ļōmņak; jab pere, jab mijak” (Katak im Bujen Ko 6:36).
Ilo iien ko ejjab m̧ōkaj ad lo uwaak ko n̄an kajjitōk ko ad, ej jipan̄ kōj kakeememej bwe men̄e Jemedwōj Ilan̄ ekar kwaļo̧ki aolep men ko rekkar n̄an lo̧mo̧o̧r eo ad, E ejjan̄in kar kwaļo̧ki tok aolep m̧ool ko. Ilo ad kajjieon̄ pukot uwaak ko, jej aikuj mour kōn tōmak—leke bwe jenaaj lukkuun bōk uwaak ko jej kappukoti. Ilo ad tiljek n̄an m̧ool eo im meram eo jaar bōke, jenaaj bōk eļapļo̧k. Uwaak ko n̄an kajjitōk ko ad im jar ko ad ekkā aer itok “ļain im bar ļain, jidik ijin jidik ijuweo” (2 Nipai 28:30).

Pedped 2: Etale Katak ko im Kajjitōk ko kōn juon Erreim̧aanļo̧k Indeeo

N̄an etale unin katak ko, kajjitōk ko, im menin ekōnono ko kōn juon erreim̧aanļo̧k eo indeeo, jen ļōmņaki ilo likioier kōn karōk in lo̧mo̧o̧r eo im katak ko an Rilo̧mo̧o̧r. Jej kappukot jipan̄ eo an Jetōb Kwojarjar n̄an maron̄ lo men ko āinwōt an Irooj loi. Menin ekōmman bwe jen etale kajjitōk in (n̄an lo oktakļo̧kin kajjitōk eo) im loi pepe ko pedped ioon jon̄ak in m̧ool eo an Irooj ijelo̧kin bōk men pata im riab ko an laļin. Jemaron̄ kōm̧m̧ane menin n̄an kōm̧m̧ani kajjitōk ko āinwōt “Ta eo em̧ōj aō jeļā kadede kōn Jemedwōj Ilan̄, karōk eo An, im elmen An kōm̧m̧an n̄an ro Nejin?” im “Ta katak ko an gospel in me rej iookļo̧k n̄ani ak kalikkar katak in ak ekōnono in?”
Men̄e kajjitōk ko me rej iookļo̧k bwebwenato ko remenin aikuj n̄an etale kōn juon erreim̧aanļo̧k indeeo. Ilo ad emjake ad leke ilo Jemedwōj Ilan̄ im karōk in ļomo̧o̧r eo An, jej maron̄ in lo ekōnono ko ralikkarļo̧k. Emaron̄ bar jipan̄ n̄an etale kajjitōk in bwebwenato ko ilo kobban bwebwenato ko rejejjet n̄an ļōmņaki m̧anit eo im iien ko ijeļo̧kin kakkure errem̧aanļo̧k im m̧wiļ ko kiiō.
Eaorōk n̄an keememej bwe laajrak in bwebwenato ko rejjab bōkļo̧k kajoor in bujen in ļomo̧o̧r ko, kain̄i ko, im katak eo. N̄an m̧ad jen kōmeļeļe ko raorōk n̄an jerawane kabwilōn̄lōn̄ eo an Jepļaaktok in ej āinwōt joļo̧k iien n̄an etale juon bo̧o̧k menin letok im kōjekdo̧o̧n menin letok eo ej make wōt kabwilōn̄lōn̄.

Pedped 3: Kappukot Eļapļo̧k Meļeļe kōn Kein Jipan̄ ko Rekwojarjar

Āinwōt m̧ōttan jerbal in an Irooj me kar letok n̄an bōk jeļāļo̧kjeņ an jetōb, E ekar ejaake kein jipan̄ ko ilo an kar kwaļo̧k m̧ool eo im tōl n̄an ro Nejin. Kein jipan̄ kein ekoba meram in Kraist, Jetōb Kwojarjar, jeje ko rekwojarjar, pāāren ro, im ritōl ro an Kabun̄ in. Būreejtōnji eo Kein Kajuon im Doulul eo an Jon̄oulruo Rijilōk ro—rikanaan ro an Irooj ioon laļin rainin—rej juon kein jipan̄ an m̧ool eo. Irooj ekar kālet im kar kapit rein kajjojo bwe ren kōn E.
Jemaron̄ bar jeļā m̧ool eo kōn kein jipan̄ ko jet rem̧m̧an. Ijoke, ro rej kappukot m̧ool in ilo m̧ool raikuj ekkōļ kōn meļeļein menin jipan̄ ko ejjeļo̧k tokjeer. Jej mour ilo juon tōre me elōn̄ “rej ņa etan nana em̧m̧an, im em̧m̧an n̄an nana” (Aiseia 5:20). Setan ej jemen aolep riab im ej kappukot n̄an kakkure m̧ool eo im kareel kōj n̄an oktakļo̧k jān Irooj im ro Rikarejeraņ me em̧ōj kar kālet er. Ekkatak n̄an kile im jum̧ae meļeļein menin jipan̄ ko ejjeļo̧k tokjāer emaron̄ jipan̄ kōj jān bōd in meļeļe im jān ro rej kappukot n̄an kakkure tōmak in. Ilo ad kappukot jipan̄ eo an Jetōb Kwojarjar im oktakļo̧k n̄an Irooj kōn menin jipan̄ ko kar litoki n̄an uwaak ko im tōl, jemaron̄ jeraam̧m̧an n̄an jeļā em̧m̧an jān nana. Jemaron̄ leke kallim̧ur eo an Irooj “jān kajoor eo an Jetōb Kwōjarjar, kom̧ maron̄ jeļā m̧ool eo an men ko otemjeļo̧k” (Moronai 10:5).

Jipan̄ ro Jet Bōk Jeļāļo̧kjeņ an Jetōb

N̄e ro rej itok n̄an ippād im kajjitōk kajjitōk ko ak etale katak ko an Kabun̄ in, imminene ko, ak bwebwenato, elmen ad maron̄ leļo̧k jipan̄ eo em̧m̧antata n̄an er ilo aer kappukot m̧ool eo? Men kein ilaļ rej jet wāween ko jemaron̄ jipan̄ er:
Lukkuun ron̄jake im jar. Ron̄jake m̧okta jen am̧ uwaak, kappukot n̄an kalikkare im meļeļe jejjet in kajjitōk ko rej kajjitōk. Lukkuun kappukot n̄an meļeļe m̧ool eo kōn kajjitōk ko aer im en̄jake ko im tōmak ko aer. Jar n̄an bōk tōl elmen am maron̄ jipan̄ ro kōn kajjitōk ko.
Katak im kam̧ool kōn m̧ool ko an gospel in. Kwaļo̧k katak ko rekkar jān jeje ko rekwojarjar im rikanaan ro raan kein im elmen aer kar kōm̧m̧an oktak ilo mour eo am̧. Jipan̄ ro kwoj ekōnono ippāer etale ak etale kajjitōk ko aer ilo kobban gospel in im karōk in lo̧mo̧o̧r.
Kajjitōk ippāer n̄an jerbal kōn tōmak. Keememej bwe Irooj ej kajjitōk ippād n̄an kappukot jeļāļo̧kjeņ an jetōb n̄an kōj make. Kōn menin jej aikuj kajjitōk ippān ro jet n̄an jerbal kōn tōmak ilo jar, pokake kien ko, im tiljek ekkatak kōn naan in Anij, kōjerbal kein jipan̄ ko me em̧ōj kāleti ko me rekwojarjar, eļaptata Bok in Mormon. N̄e ekkar, kajjitōk ippāer n̄an keememej en̄jake ko raar en̄jake ilo aer kar en̄jake Jetōb Kwojarjar im n̄an dim wōt n̄an m̧ool ko indeeo raar ekkatak m̧ae elōn̄ļo̧k jeļāļo̧kjeņ rej itok.
Ļoori. Leļo̧k n̄an kappukot uwaak ko, innām ļoori ilo am kwaļo̧k ta ko kwoj ekkatak. Kwomaron̄ bar kappukot uwaak ko ippān doon. Kwaļo̧k leke ilo kallim̧ur ko an Irooj n̄an bōk revelesōn an juon make.