Talateu ki he Fakataukei Fakatokāteliné

ʻI he Tohi ʻa Molomoná, naʻe akoʻi ʻe he palōfita ko Hilamaní ki hono ongo fohá, “ʻOku makatuʻunga ʻi he maka ʻo hotau Huhuʻí, ʻa ia ko Kalaisi ko e ʻAlo ʻo e ʻOtuá, kuo pau ke mo langa ai homo makatuʻungá” (Hilamani 5:12). Ko hono langa ha makatuʻunga ʻia Sīsū Kalaisí—ʻa ia ʻoku kau ai e mahinó, tuí, mo moʻui ʻo fakatatau mo ʻEne tokāteliné—te ne fakaloloto ʻetau uluí mo e tukupaá ʻi heʻetau hoko ko ʻEne kau ākongá, maluʻi kitautolu mei he ngaahi ivi tākiekina ʻo e filí, pea tokoniʻi kitautolu ke faitāpuekina ai e niʻihi kehé.

Ko e taha ʻo e ngaahi founga te tau lavaʻi ai ʻení ko hono ako fakataha fakahokohoko e folofolá fakataha mo e kalasí. Ko e founga ʻe taha ʻoku tau langa ai hotau makatuʻungá ʻia Sīsū Kalaisi mo ʻEne tokāteliné ʻoku fakafou ia ʻi he ngāue ʻoku ui ko e Fakataukei Fakatokāteline.

ʻOku fakatefito e Fakataukei Fakatokāteliné ʻi ha ola ʻe ua:

1. Ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié. Kuo fakahā mai ʻe he Tamai Hēvaní ʻa e ngaahi tefitoʻi moʻoni ki hono maʻu ʻo e ʻilo fakalaumālié. ʻOku kau ʻi he ngaahi tefitoʻi moʻoni ko ʻení ʻa e ngāue ʻi he tuí, vakaiʻi e ngaahi fakakaukau mo e ngaahi fehuʻi ʻoku ʻi ai ha fakakaukau taʻengatá, pea fekumi ki ha mahino lahi ange ʻo fakafou ʻi he ngaahi maʻuʻanga tokoni fakalangi kuo tuku atú. ʻOku tau fakatupulaki ʻa e fakataukei fakatokāteliné ʻi heʻetau moʻui ʻaki e ngaahi tefitoʻi moʻoni ko ʻení lolotonga e kalasí pea ʻi tuʻa ʻi he kalasí mo fekumi ki he tali ki ha ngaahi fehuʻi fakatokāteline, fakataautaha, fakasōsiale mo fakahisitōlia ʻi ha founga ʻoku nau fakaafeʻi ai ʻa e Laumālie Māʻoniʻoní ke fakamālohia ʻetau tui ki he Tamai Hēvaní mo Sīsū Kalaisí.

2. Taukei ʻi he ngaahi potufolofola fakataukei fakatokāteliné mo e tokāteline ʻo e ongoongolelei ʻo Sīsū Kalaisi ʻoku nau akoʻí. ʻOku aʻusia ʻa e ola ko ʻení ʻaki hono:

   1. ʻIloʻi ʻa e tokāteline naʻe akoʻi ʻi he ngaahi potufolofola fakataukei fakatokāteliné.

   2. Fakamatalaʻi mahino ʻa e tokāteliné ʻo fakaʻaongaʻi e ngaahi potufolofola fakataukei fakatokāteline ʻoku fekauʻaki mo iá.

   3. Ko hono lava ʻo manatuʻi mo ʻiloʻi ʻa e ngaahi potufolofola fakataukei fakatokāteliné mo ako maʻuloto ʻa e ngaahi kupuʻi lea mahuʻinga ʻo e folofolá.

   4. Ko hono fakaʻaongaʻi e tokāteline ʻo e ongoongolelei ʻo Sīsū Kalaisí mo e ngaahi tefitoʻi moʻoni ʻo e maʻu ʻo e ʻilo fakalaumālié ʻi heʻetau ngaahi fili fakaʻahó pea ʻi heʻetau ngaahi tali ki he ngaahi palopalema mo e ngaahi fehuʻi fakatokāteline, fakataautaha, fakasōsiale, mo fakahisitōliá.