Potutusi
Autu Faaleaoaoga Faavae

Autu Faaleaoaoga Faavae

1. O le Aigaatua

E tolu peresona mavaevae i le Aigaatua: Le Atua le Tama Faavavau; o Lona Alo o Iesu Keriso; ma le Agaga Paia. E i ai i le Tama ma le Alo ni tino o aano ma ivi, a o le Agaga Paia o se peresona o agaga (tagai MF&F 130:22–23). Ua autasi atoatoa i Latou i le faataunuuina o le fuafuaga o le faaolataga a le Tama Faalelagi.

Le Atua le Tama

O le Atua le Tama o ia o le Pule Aoao tatou te tapuai i ai. O Ia o le Tama o o tatou agaga (tagai Eperu 12:9). E atoatoa o Ia, e ona le mana uma, ma e silafia mea uma. E tonu foi o Ia, alofa mutimutivale, ma agaalofa. E alofa atoatoa le Atua i Ana fanau taitasi, ma e tutusa uma ia te Ia (tagai 2 Nifae 26:33). O Lana galuega ma le mamalu o le faataunuuina o le faaofuina o le tagata i le tino ola pea ma le ola e faavavau.

Iesu Keriso

O Iesu Keriso o le Ulumatua a le Tama i le agaga ma o le Alo e Toatasi na Fanaua a le Tama i la le tino. I lalo o le faatonuga a le Tama, na foafoaina e Iesu Keriso le lagi ma le lalolagi. O Ia o Ieova o le Feagaiga Tuai ma le Mesia o le Feagaiga Fou.

E fai e Iesu Keriso le finagalo o le Tama i mea uma. Na Ia soifua i se soifuaga e le agasala ma na togiolaina mo agasala a tagata uma (tagai 3 Nifae 11:10–11). O Lona soifuaga o se faataitaiga atoatoa o le ala e tatau ona tatou ola ai (tagai 3 Nifae 12:48). O Ia o le tagata muamua o fanau a le Tama Faalelagi na toetu mai. I o tatou aso, e pei o aso anamua, o Ia o le ulu o Lana Ekalesia. O le a toe afio mai o Ia i le mana ma le mamalu, ma o le a nofotupu i le lalolagi i le taimi o le Meleniuma (tagai MF&F 29:10–11). O le a Ia faamasinoina tagata uma.

Ona o Iesu Keriso o lo tatou Faaola ma lo tatou Puluvaga ma le Tama, o tatalo uma, faamanuiaga, ma sauniga o le perisitua e tatau ona faia i Lona suafa (tagai 3 Nifae 18:15, 20–21).

O Le Agaga Paia

O le Agaga Paia o le sui lona tolu o le Aigaatua. O ia o se peresona o agaga ma e leai sona tino o aano ma ivi. E masani ona taua o Ia o le Agaga, o le Agaga Paia, o le Agaga o le Atua, o le Agaga o le Alii, ma o le Faamafanafana.

E molimau mai le Agaga Paia i le Tama ma le Alo, e faaalia mai le moni o mea uma, ma faamama i latou o e salamo ma ua papatisoina. E ala i le mana o le Agaga Paia, e mafai ona tatou maua meaalofa faaleagaga, o faamanuiaga po o malosiaga ua tuuina mai e le Alii mo lo tatou lelei ma ia fesoasoani ia i tatou e auauna atu ma faamanuia ai isi.

2. O Le Fuafuaga o le Faaolataga

I le muai olaga, sa folasia mai ai e le Tama Faalelagi se fuafuaga e mafai ai e i tatou ona avea faapei o Ia ma maua ai le tino ola pea ma le ola e faavavau (tagai Mose 1:39). Ina ia faataunuuina lenei fuafuaga ma avea faapei o lo tatou Tama i le Lagi, e tatau ona tatou iloa o Ia ma Lona Alo, o Iesu Keriso, ma maua se malamalama sao o lo La uiga ma uiga faaalia (tagai Ioane 17:3).

E taua e tusitusiga paia lenei fuafuaga o le fuafuaga o le faaolataga, o le fuafuaga sili o le fiafia, o le fuafuaga o le togiola, ma le fuafuaga o le alofamutimutivale. O lenei fuafuaga e aofia ai le Foafoaga, le Pau, le Togiola a Iesu Keriso, ma tulafono uma, o sauniga, ma aoaoga faavae o le talalelei. O le pule faitalia—o le tomai e filifili ma faatino ai mo i tatou lava—e taua foi i le fuafuaga a le Tama Faalelagi. O lo tatou alualu i luma e faavavau e faalagolago i le ala tatou te faaaoga ai lenei meaalofa (tagai Iosua 24:15; 2 Nifae 2:27).

O Iesu Keriso e Totonugalemu i le Fuafuaga a le Tama Faalelagi. O le fuafuaga o le faaolataga e mafai ai e i tatou ona faaatoatoaina, maua se atoatoaga o le olioli, olioli i sootaga faaleaiga i le faavavau atoa, ma ola faavavau i le afioaga o le Atua.

Muai Olaga

Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o ni Ana fanau agaga (tagai Aperaamo 3:22–23). I lenei muai olaga sa tatou auai i se fonotaga ma isi fanau agaga a le Tama Faalelagi. I lena fonotaga, sa folasia mai ai e le Tama Faalelagi Lana fuafuaga ma na osifeagaiga ai le Iesu Keriso o le muai olaga e avea ma Faaola.

Na tatou faaaogaina la tatou faitalia e mulimuli ai i le fuafuaga a le Tama Faalelagi. O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua le poto masani i le olaga faitino ma alualu ai i luma e agai atu i le ola e faavavau. O Lusifelo, o le isi atalii agaga o le Atua, na tetee i le fuafuaga. Sa avea o ia ma Satani, ma na tuliesea faatasi ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma le poto masani i le olaga faitino.

O Le Foafoaga

Na foafoaina e Iesu Keriso le lagi ma le lalolagi i lalo o le taitaiga a le Tama (tagai MF&F 76:22–24). Na taua le Foafoaga o le lalolagi e le Atua. Na tuuina mai ai se nofoaga e mafai ai ona tatou maua se tino faaletino, ia tofotofoina ma suesueina ai, ma atiina ae ai uiga paia.

O Atamu o le uluai tagata na foafoaina i le lalolagi. Na foafoaina e le Atua Atamu ma Eva i Lona lava faatusa. O tagata ola uma—alii ma le tamaitai—ua foafoaina i le faatusa o le Atua (tagai Kenese 1:26–27). O le itupa [o le tagata] o se uiga taua lea o tagata taitasi i le mua’i olaga, olaga faitino, ma le faasinomaga ma le faamoemoega e faavavau

O Le Pau

I le faatoaga o Etena na tuufaatasia ai e le Atua Atamu ma Eva i le faaipoipoga. Ao i ai Atamu ma Eva i le faatoaga, na i ai pea i laua i le afioaga o le Atua ma na mafai ona ola ai e faavavau. Na la ola ai i le mama, ma na saunia e le Atua mea na la manaomia.

Na tuuina atu e le Atua ia Atamu ma Eva lo la faitalia ao i ai i laua i le Faatoaga o Etena. Sa Ia poloaiina i laua e aua le aia le fua e faasaina—le fua o le laau e iloa ai le lelei ma le leaga. O le usitaia o lenei poloaiga o lona uiga e mafai ai ona la tumau i le faatoaga. Ae ui i lea, e lei malamalama Atamu ma Eva afai la te tumau i le faatoaga o le a la le agai i luma e ala i le mauaina o le poto masani o le faafeagai i le olaga faitino. O le a la le iloa le olioli aua o le a la le iloaina le faanoanoa ma le tiga. Ma le isi foi, o le a le mafai ona maua se la fanau.

Na faaosoosoina e Satani Atamu ma Eva e aai i le fua faasaina, ma na la filifili e faia o lea. Ona o lenei filifiliga, na tulieseina i laua mai le afioaga o le Atua ma na avea ai ma tagata pau ma faaletino. O le solitulafono a Atamu ma Eva ma suiga na la oo i ai o se taunuuga, e aofia ai le oti faaleagaga ma le faaletino, ua ta’ua o le Pau. O le oti faaleagaga o le vavaeeseina lea mai le Atua. O le oti faaletino o le tuueseeseina lea o le agaga mai le tino faaletino.

O le Pau o se vaega taua o le fuafuaga o le faaolataga a le Tama Faalelagi. O se taunuuga o le Pau, ua mafai ai e Atamu ma Eva ona maua ni fanau. O i laua ma le la fanau ua mafai ona aafia i le olioli ma le faanoanoa, iloa le lelei mai le leaga, ma alualu i luma (tagai 2 Nifae 2:22–25). I le avea ai ma fanau a Atamu ma Eva, ua tatou mautofi ai i se tulaga pau i le olaga faitino. Ua tuueseina i tatou mai le afioaga o le Atua ma ua oo i ai le oti faaletino. E tofotofoina foi i tatou i faigata o le olaga faitino ma faaosoosoga ā le fili. Ao le faasalaina i tatou mo le agasala a Atamu ma Eva, e faasalaina i tatou mo a tatou lava agasala. E ala mai le Togiola a Iesu Keriso, e mafai ona tatou manumalo i aafiaga leaga o le Pau, maua le faamagaloina o a tatou agasala, ma iu lava ina maua se olioli atoatoa.

Olaga Faaletino

O le olaga faitino o se taimi o le aoaoga, lea tatou te faamaonia ai o le a tatou faaaoga lo tatou faitalia e fai ai mea uma ua poloaiina ai e le Alii ma saunia mo le ola e faavavau e ala i le atiina ae o uiga auaumama mamana. Tatou te faia lenei mea ao tatou faaaoga le faatuatua ia Iesu Keriso ma Lana Togiola, salamo, maua sauniga faaola ma feagaiga e pei o le papatisoga ma le faamauga, ma tumau faamaoni seia oo i le iuga o o tatou olaga faitino i le mulimuli i le faataitaiga a Iesu Keriso.

I le olaga faitino, e tuufaatasia o tatou agaga ma o tatou tino faaletino, e maua ai e i tatou avanoa e tuputupuae ai ma atiina ae i auala e lei mafaia i le muai olaga. Ona o lo tatou Tama i le Lagi e i ai se tino o aano ma ivi, e manaomia e o tatou tino le alualu i luma ma avea faapei o Ia. O o tatou tino e paia ma e tatau ona faaaloalo i ai o se meaalofa mai lo tatou Tama Faalelagi (tagai 1 Korinito 6:19–20).

Olaga pe a mavae le Oti

Pe a tatou oti, o le a ulufale atu o tatou agaga i le lalolagi o agaga ma faatalitali ai mo le Toetutu. O agaga o e amiotonu o le a nonofo i le mea o i ai le fiafia, ua ta’ua o le parataiso. O i latou e maliliu e aunoa ma le malamalama i le upumoni ma i latou e le usiusitai i le olaga faitino e ulufale atu i se nofoaga le tumau i le lalolagi pe a mavae le oti ua taua o le falepuipui o agaga.

O tagata taitasi o le a iu ina maua le avanoa e aoao ai mataupu faavae o le talalelei ma maua ona sauniga ma feagaiga. O le toatele o ē faamaoni o le a talaiina atu le talalelei ia i latou o i le falepuipui o agaga. O i latou na filifili e salamo, ma talia sauniga o le faaolataga ua faia mo i latou i malumalu o le a mau i parataiso seia oo i le Toetu (tagai 1 Peteru 4:6)

O le Toetu o le toe faatasia lea o o tatou tino agaga ma o tatou tino faaletino o aano ma ivi ua faaatoatoaina. A mavae le toetu o le a tatou faavavau—o lo tatou agaga ma le tino o le a le toe tuueseeseina lava. O tagata uma e fananau mai i le lalolagi o le a toetutu aua na manumalo Iesu Keriso i le oti (tagai 1 Korinito 15:20–22). O le a toetutu muamua e amiotonu nai lo e amioleaga ma o le a tutula’i mai i le Uluai Toetu.

O le a faia le Faamasinoga Mulimuli pe a mavae le Toetu. O le a faamasinoina e Iesu Keriso tagata taitasi e iloa ai le mamalu faavavau o le a ia mauaina. O lenei faamasinoga o le a faalagolago i le usiusitai o tagata taitoatasi i poloaiga a le Atua (tagai Faaaliga 20:12).

E tolu malo o le mamalu: o le malo selesitila, le malo teresitila, ma le malo telesitila (tagai 1 Korinito 15:40–42). O i latou e lotototoa i le molimau ia Iesu ma usiusitai i mataupu faavae o le talalelei, o le a nonofo i le malo selesitila i le afioaga o le Atua le Tama ma Lona Alo o Iesu Keriso, ma faatasi ma tagata amiotonu o o latou aiga.

3. O le Togiola a Iesu Keriso

Na muaifaauuina Iesu Keriso i le muai olaga e avea ma o tatou Faaola ma Laveai. Na Ia afio mai i le lalolagi ma puapuagatia ma le loto i ai ina ia laveai tagata ola uma mai taunuuga leaga o le Pau ma totogi le sala o a tatou agasala. O le manumalo o Iesu Keriso i le oti faaleagaga ma le faaletino e ala i Lona puapuagatia, maliu, ma le Toetu ua taua o le Togiola. O Lana taulaga e manuia ai tatou taitoatasi ma faaalia ai le taua faavavau o fanau taitasi ma fanau uma a le Tama Faalelagi (tagai MF&F 18:10–11).

Ua na o Iesu Keriso lava e mafai ona faaolaina ai i tatou ona ua na o Ia lava e mafaia se Togiola e le iu ma le faavavau mo tagata ola uma (tagai Alema 34:9–10). Ua na o Ia lava e i ai le mana e manumalo ai i le oti faaletino. Mai i Lona tina faaletino, o Maria, na Ia mautofi ai i le mafaia ona oti. Mai i le Atua, Lona Tama faavavau, na Ia mautofi ai i le mana e ola ai e faavavau pe maliu ma toetu mai. Ua na o Ia lava e mafai ona laveaiina i tatou mai a tatou agasala. Ona sa Ia soifua i se olaga atoatoa, le agasala, na Ia saoloto mai le manaomia o le faamasinoga tonu ma mafai ai ona totogi le aitalafu mo i latou e salamo.

O le Togiola a Iesu Keriso e aofia ai Lona puapuagatia mo agasala a tagata uma i le Faatoaga o Ketesemane, le faamaligiina o Lona toto, Lona puapuagatia ma le maliu i le satauro, ma Lona Toetu moni lava. O Ia o le tagata muamua na toetu mai. Na Ia toetu mai le tuugamau ma se tino o aano ma ivi, faamamaluina (tagai Luka 24:36–39). Ona o Lana Togiola o le a toetutu mai tagata uma ma ni tino atoatoa, faavavau ma o le a toe aumaia i le afioaga o le Atua e faamasinoina. Ua saunia e le togiola a Iesu Keriso le ala e tasi mo i tatou ina ia faamamaina ma faamagaloina ia tatou agasala ina ia mafai ona tatou nonofo i le afioaga o le Atua faavavau (tagai Isaia 1:18; MF&F 19:16–19).

O se vagea o Lana Togiola, sa le gata ina puapuagatia Iesu Keriso mo a tatou agasala ae sa Ia tauave foi i Ona luga ia tiga, faaosoosoga, ma’i, ma lē atoatoa o tagata uma (tagai Isaia 53:3–5; Alema 7:11–13). E malamalama o Ia i o tatou puapuagatia aua na oo i ai o Ia. Ao tatou o mai ia te Ia i le faatuatua, o le a faamalosia e le Faaola i tatou ia mafaia ona tatou tauaveina a tatou avega ma faataunuu galuega e le mafai ona tatou faia na o i tatou lava (tagai Mataio 11:28–30; Eteru 12:27).

I le totogiina o le tau mo a tatou agasala, sa lei aveesea ai e Iesu Keriso lo tatou tiutetauave faaletagata lava ia. Ina ia taliaina Lana taulaga, faamamaina mai a tatou agasala, ma mautofi i le ola e faavavau, e tatau ona tatou faatino le faatuatua ia te Ia, salamo, papatiso, maua le Agaga Paia, ma tumau faamaoni seia oo i le iuga o o tatou olaga.

Faatuatua ia Iesu Keriso

O le muai mataupu faavae o le talalelei o le faatuatua i le Alii o Iesu Keriso. O lo tatou faatuatua e mafai ona taitai atu i le faaolataga i le na o le faatotonugalemuina ia Iesu Keriso [tagai Helamana 5:12].

O le mauaina o le faatuatua ia Iesu Keriso e aofia ai le mauaina o se talitonu mausali faapea o Ia o le Alo e Toatasi o le Atua na Fanaua ma o le Faaola o le lalolagi. Tatou te iloaina ua na o le pau le ala e mafai ai ona tatou toe foi atu e nonofo faatasi ma lo tatou Tama Faalelagi o le faalagolago lea i le Togiola e le iu a Lona Alo ma le faalagolago ia Iesu Keriso ma mulimuli i Ana aoaoga. E sili atu nai lo le na ona talitonu, o le faatuatua moni ia Iesu Keriso e taitai atu i le faatinoga ma e faaalia i le ala tatou te ola ai (tagai Iakopo 2:17–18). E mafai ona faateleina lo tatou faatuatua pe a tatou tatalo, suesue i tusitusiga paia, ma usitai i poloaiga a le Atua.

Salamo

O le faatuatua ia Iesu Keriso ma lo tatou alofa mo Ia ma le Tama Faalelagi e taitai ai i tatou i le salamo. O le salamo o se vaega o le fuafuaga a le Tama Faalelagi mo Ana fanau uma lava o e tauia e tusa ai ma a latou filifiliga. O lenei meaalofa ua mafai ona maua ona o le Togiola a Iesu Keriso. O le salamo o se suiga o le mafaufau ma le loto. E aofia ai le liliuese mai agasala ma liliu atu o tatou manatu, faatinoga, ma manaoga agai i le Atua ma ia ogatusa o tatou manatu ma Lona finagalo (tagai Mosaea 3:19

O le salamo e aofia ai le iloaina o a tatou agasala; le lagona faanoanoa, po o le faanoanoa faaleatua, mo le faia o le agasala, ta’uta’u atu o a tatou agasala i le Tama Faalelagi ma, pe a tatau ai, i isi; lafoai le agasala; sailia le toefuatai,i le mea e sili e mafaia, mea uma na faaleagaina e la tatou agasala; ma ola ai i se olaga usiusitai i poloaiga a le Atua (tagai MF&F 58:42–43). Ua folafola mai le Alii e faamagaloina i tatou ia tatou agasala i le papatisoga, ma tatou te faafouina lena feagaiga i taimi uma tatou te tagofia ai le faamanatuga ma le faamaoni ma le manao e manatua le Faaola ma tausi Ana poloaiga.

E ala i le salamo faamaoni ma le alofa tunoa ua ofoina mai e le Togiola a Iesu Keriso, e mafai ona tatou maua le faamagaloga a le Atua ma lagona le filemu. Tatou te lagonaina le uunaiga faateleina a le Agaga, ma e sili atu lo tatou saunia e ola e faavavau ma lo tatou Tama Faalelagi ma Lona Alo.

4. O le Toefuataiga

Ua toefuatai mai e le Atua Lana talalelei i nei aso e gata ai e ala i le toe faatuina o Ana upumoni, pule o le perisitua, ma le Ekalesia i le lalolagi. Na valoia mai e perofeta anamua le Toefuataiga o le talalelei i aso e gata ai (tagai Isaia 29:13–14; Galuega 3:19–21).

Na amata le Toefuataiga i le 1820. O le Atua le Tama ma Lona Alo, o Iesu Keriso, na faaali atu ia Iosefa Samita i le tali i le tatalo a Iosefa, ma na La valaaulia o ia e avea ma Perofeta o le Toefuataiga (tagai Iosefa Samita—Talafaasolopito 1:15–20). Na valaaulia e le Atua Iosefa Samita e avea ma molimau o le Keriso soifua o aso e gata ai. I le avea ai ma le Perofeta o le Toefuataiga, na faaliliu e Iosefa Samita le Tusi a Mamona e ala i le mana o le Atua (tagai MF&F 135:3). Faatasi ma le Tusi Paia, ua molimau le Tusi a Mamona ia Iesu Keriso ma e maua ai le atoatoaga o le talalelei (tagai Esekielu 37:15–17). O le Tusi a Mamona o se molimau foi i le valaauga faaperofeta o Iosefa Samita ma le moni o le Toefuataiga.

O se vaega o le Toefuataiga, na auina mai e le Atua avefeau e toefuatai mai Perisitua Arona ma le Mekisateko. Ona Ia faatonuina lea o Lana Ekalesia ia toe faatuina i le lalolagi ia Aperilal 6, 1830. Ona sa faatuina e le Atua lava Ia, O le Ekalesia a Iesu Keriso o le Au Paia o Aso e Gata Ai ua pau lea o “leekalesia moni ma ola e tasi i luga o le lalolagi atoa” (MF&F 1:30).

Liliuese

O le manaomia o le Toefuataiga o upumoni a le Atua i aso e gata ai, pule o le perisitua, ma le Ekalesia na tupuga mai ona o le liliuese. Na tupu le liliuese ina ua aluese se tagata se toatasi pe sili atu mai upumoni o le talalelei.

Ina ua mavae le faasatauroina o le Faaola ma le maliliu ai o Ana Aposetolo, e toatele tagata na liliuese mai upumoni na faatuina e le Faaola (tagai 2 Tesalonia 2:1–3). O mataupu faavae o le talalelei ma vaega o tusitusiga paia na faaleagaina ma leiloloa. O suiga le faatagaina na faia i le faatulagaina o le Ekalesia ma sauniga o le perisitua. Ona ua salalau tele lenei amioleaga, o lea sa aveesea ai e le Alii le pule ma ki o le perisitua mai le lalolagi. E ui lava e toatele tagata lelei ma faamaoni na tapuai i le Atua e tusa ai ma le malamalama na i ai ia i latou ma maua tali ia latou tatalo, na tuua le lalolagi e aunoa ma ni faaaliga mamana e ala mai i perofeta soifua. O lenei periota e taua o le Liliuese Tele.

O isi vaitaimi o le liliuese lautele na tutupu lava i le gasologa o le talafaasolopito o le lalolagi.

Tisipenisione

Ina ua pauu fanau a le Atua i se tulaga o le liliuese, sa Ia aapa atu ma le agaalofa ia i latou e ala i le valaaulia o perofeta ma toe faasafua atu faamanuiaga o le talalelei e ala atu i Ana perofeta i tagata. O se vaitaimi e faaali atu ai e le Alii Ana upumoni, pule o le perisitua, ma sauniga e taua o se tisipenisione. O se vaitaimi lea e i ai i le Alii e lē itiiti ifo ma le toatasi se auauna tofia o lē e umia le perisitua paia ma e i ai le tiute paia e faasalalau atu le talalelei ma faia ona sauniga o iai.

O tisipenisione ua faailoaina faatasi ma Atamu, Enoka, Noa, Aperaamo, Mose, Iesu Keriso, ma isi. O le Toefuataiga o le talalelei i aso e gata ai, lea na amata e le Alii e ala mai i le Perofeta o Iosefa Samita, o se vaega o lenei mamanu o tisipenisione.

I tisipenisione uma lava, ua saili le Alii ma Ana perofeta e faatu Siona. O Siona e faatatau i tagata o le feagaiga a le Alii o e mama loto, ua tuufaatasia i le amiotonu, ma tausia e le tasi le isi (tagai Mose 7:18). O Siona foi e faatatau i se nofoaga e nonofo ai tagata e mama loto.

Ua tatou ola nei i le tisipenisione mulimuli—le tisipenisione o le atoatoaga o taimi. Ua na o le pau lea o le tisipenisione o le a le iu i se liliuese. O le Ekalesia a Iesu Keriso o le Au Paia o Aso e Gata Ai o le a iu lava ina tumu ai le lalolagi atoa ma tumau faavavau (tagai Tanielu 2:44.

5. Perofeta ma Faaaliga

O se perofeta o se tagata ua valaaulia e le Atua e saunoa atu mo Ia (tagai Ieremia 1:4–5; Amosa 3:7; Ioane 15:16; MF&F 1:37–38). E molimau mai perofeta ia Iesu Keriso ma aoao atu Lana talalelei. Latou te faalauiloa mai le finagalo o le Atua ma Lona tulaga moni. Latou te fetuuina le agasala, lapatai atu i ona taunuuga, ma fesoasoani ia i tatou e aloese mai le faaseseina (tagai Esekielu 3:16–17; Efeso 4:11–14). I nisi o taimi, latou te valoia mea e tutupu i le lumanai. E mafai e perofeta ona faia nei tiutetauave ona latou te maua le pule ma faaaliga mai le Atua.

O faaaliga o le fesootaiga lea mai le Atua i Ana fanau. O le tele o faaaliga e oo mai uunaiga, manatu, ma lagona mai le Agaga Paia. E mafai foi ona oo mai faaaliga e ala i faaaliga vaaia, miti, ma asiasiga a agelu.

I Lana galuega i le lalolagi faapea foi i o tatou aso, ua faatuina e le Alii Lana Ekalesia i le faavae o perofeta ma Aposetolo (tagai Efeso 2:19–20). O le Peresitene o le Ekalesia a Iesu Keriso o le Au Paia o Aso e Gata Ai o le perofeta a le Atua i le lalolagi i le aso. Matou te lagolagoina le Peresitene o le Ekalesia o se perofeta, tagatavaai, ma talifaaaliga ma na o le pau lea o le tagata i le lalolagi e mauaina faaaliga e taitaiina ai le Ekalesia atoa. Afai tatou te mauaina ma le faatuatua ma usiusitai i aoaoga a le Peresitene o le Ekalesia, o le a faamanuiaina i tatou e le Atua e manumalo i le taufaasese ma le tiapolo (tagai MF&F 21:4–6). Tatou te lagolagoina foi fesoasoani i le Au Peresitene Sili ma sui o le Korama a Aposetolo e Toasefululua, o ni perofeta, tagatavaai ma talifaaaliga.

O tusitusiga paia —o le Tusi Paia, Tusi a Mamona, Mataupu Faavae ma Feagaiga, ma le Penina Tautele —o loo iai faaaliga na tuuina mai e ala i perofeta anamua ma perofeta o aso e gata ai. Ao tatou suesue i upu a perofeta, e mafai ona tatou aoaoina upumoni ma maua taitaiga.

Ao tuuina mai e le Atua faaaliga e ala mai perofeta e taitaia Ana fanau uma, e mafai e tagata ona maua faaaliga e fesoasoani ia i latou i o latou manaoga faapitoa, tiutetauave, ma fesili ma fesoasoani e faamalosia a latou molimau. Ae ui i lea, o uunaiga patino mai le Alii o le a le feteenai lava ma faaaliga e tuuina mai e le Atua e ala mai i Ana perofeta.

6. Perisitua ma Ki o le Perisitua

O le perisitua o le mana e faavavau ma le pule a le Atua. E ala mai i le perisitua, na foafoaina ai e le Atua ma puleaina lagi ma le lalolagi. E ala mai i lenei mana ua Ia faaolaina ma faaeaina ai Lana fanau.

E tuuina mai e le Atua le pule o le perisitua i alii agavaa o le Ekalesia ina ia mafai ai ona latou galulue i Lona suafa mo le faaolataga ma le siitiaina o Ana fanau uma (tagai MF&F 121:36, 41–42).

O ki o le perisitua o aia tatau ia o le au peresitene, po o le mana ua tuuina mai e le Atua i le tagata e pulea ma taitai ai le malo o le Atua i luga o le fogaeleele (tagai Mataio 16:15–19). O ki o le perisitua e taua e taitai ai le talaiina o le talalelei ma le taitaiina o sauniga o le faaolataga.

O Iesu Keriso o loo umia ki uma o le perisitua e faatatau i Lana Ekalesia. Ua Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Peresitene o le Ekalesia e na o le pau lea o le tagata ua faatagaina e faaaoga uma na ki o le perisitua. O peresitene o malumalu, peresitene o misiona, peresitene o siteki, epikopo, ma peresitene o korama e umia foi ki o le perisitua lena e faatagaina i latou e pule faamalumalu ma taitaia le galuega ua tofia i latou e fai.

O i latou uma o e auauna atu i le Ekalesia—alii ma tamaitai—e valaauina i lalo o le taitaiga a lē ua umia ki o le perisitua. O lea, latou te agavaa ai mo le mana e manaomia e auauna atu ai ma faataunuu matafaioi o o latou valaauga (tagai MF&F 42:11).

O i latou ua faauuina i Perisitua Arona ma le Mekisateko e ulu atu i le tautoga ma le feagaiga o le perisitua. Afai latou te faalautele lo latou valaaulia ma taliaina ma le faatuatua le Alii ma Ana auauna, o le a latou maua faamanuiaga o le faaeaga. Ua folafolaina atu foi faapena i tamaitai faamanuiaga o le faaeaga ao latou faamaoni i feagaiga na latou faia ma le Alii.

Perisitua Arona

E masani lava ona taua le Perisitua Arona o le perisitua sauniuni. O le Perisitua Arona “e umia ki o le auaunaga a agelu, ma o le talalelei o le salamo, ma o le papatisoga” (MF&F 13:1). E ala i le faaaogaina o lenei perisitua, o le faamanatuga e saunia, faamanuiaina, ma faatautaia. O tofi i le Perisitua Arona o le tiakono, aoao, ositaulaga, ma le epikopo.

Perisitua Mekisateko

O le Perisitua Mekisateko o le perisitua e maualuga atu, e sili atu, ma e “e umia le aiā o le pulefaamalumalu, ma ua i ai le mana ma le pule i luga o tofi uma i le ekalesia i tupulaga uma o le lalolagi, e taitai ai i mea faaleagaga.” (MF&F 107:8). O faamanuiaga uma, sauniga, feagaiga, ma faatulagaga o le Ekalesia ua taitaia i lalo o le pule o le Peresitene o le Ekalesia, o le Peresitene lea o le Perisitua Mekisateko. O lenei perisitua na tuuina atu ia Atamu ma na i ai pea lava i le lalolagi i soo se taimi e faaali mai ai e le Alii Lana talalelei. E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu ma le Aposetolo.

7. Sauniga ma Feagaiga

Sauniga

O se sauniga o se faatinoga paia e faia i le pule o le perisitua. Ua mamanuina sauniga taitasi e le Atua ina ia aoao atu ai upumoni faaleagaga, e masani lava e ala atu i faatusa.

O nisi sauniga e taua mo le faaeaga ma ua ta’ua o sauniga faaola. Ua na o le mauaina o sauniga faaola ma le tausia o feagaiga e fesootai e mafai ai ona tatou maua faamanuiaga uma ua mafai ona maua e ala mai i le Togiola a Iesu Keriso. A aunoa ma nei sauniga faaola e le mafai ona tatou avea faapei o lo tatou Tama Faalelagi pe toe foi atu i ola i Lona afioaga faavavau (tagai MF&F 84:20–22). O sauniga faaola e faia i lalo o le taitaiga a i latou e umia ki o le perisitua.

O le sauniga faaola muamua o le talalelei o le papatisoga e ala i le faatofuina i le vai e se tasi ua iai le pule. O le papatisoga e manaomia e se tagata ina ia avea ai ma se tagata o le Ekalesia ma ia ulufale atu ai i le malo selesitila (tagai Ioane 3:5).

A uma ona papatiso se tagata, e toatasi pe sili atu tagata e umia le Perisitua Mekisateko e faamauina o ia o se tagata o le Ekalesia ma faaee i ona luga le meaalofa o le Agaga Paia (tagai 3 Nifae 27:20). O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e se tagata le uunaiga a le Agaga Paia ma maua se molimau o le upumoni. A uma ona maua le meaalofa o le Agaga Paia, o se tagata e tausia ana feagaiga e i ai le aia i le mafutaga faifai pea a le Agaga Paia.

O isi sauniga faaola e aofia ai le faauuga i le Perisitua Mekisateko (mo alii), o le faaeega paia o le malumalu, ma le faamauga o le faaipoipoga. I le malumalu, o nei sauniga faaola e mafai foi ona faataunuuina e fai ai ma sui mo e ua maliliu. E pau lava le taimi e aoga ai sauniga e fai ai ma sui, pe afai lea e talia e tagata ua maliliu ia sauniga i le lalolagi o agaga ma faamamalu ia feagaiga e faatatau i ai.

O isi sauniga, pei o le faamaloloina o mai ma le faaigoaina ma le faamanuiaina o fanau, e taua foi mo lo tatou tuputupu a’e faaleagaga.

Feagaiga

O le feagaiga o se maliega paia i le va o le Atua ma le tagata. E tuuina mai e le Atua tuutuuga mo le feagaiga, ma e tatou te malilie e faia le mea Na te poloaiina i tatou e fai; ona folafola mai lea e le Atua mo i tatou ni faamanuiaga faapitoa mo lo tatou usiusitai (tagai Esoto 19:5–6; MF&F 82:10). Afai tatou te le tausia a tatou feagaiga, ona tatou le maua lea o faamanuiaga ua folafolaina mai.

O sauniga faaola uma o le perisitua e o faatasi ma feagaiga. Mo se faataitaiga, tatou te osi feagaiga ma le Alii e ala i le papatisoga (tagai Mosaea 18:8–10), ma o alii e maua le Perisitua Mekisateko e ulufale atu i le tautoga ma le feagaiga o le perisitua. Tatou te faafouina feagaiga na tatou faia e ala i le faamanatuga.

Tatou te osia isi feagaiga ao tatou maua sauniga faaola o le faaeega paia ma le faamauga o le faaipoipoga i le malumalu. Tatou te saunia e auai i sauniga ma osia feagaiga i le malumalu e ala i le ola i tulaga faatonuina o le agavaa ua faatuina e le Alii (tagai Salamo 24:3–4). E taua lo tatou agavaa e ulufale atu i le malumalu aua o le malumalu o le maota moni lava o le Alii. O le nofoaga lea e sili le paia i nofoaga tapuai uma i le lalolagi.

8. Faaipoipoga ma le Aiga

O le faaipoipoga i le va o se alii ma se tamaitai, ua faauuina e le Atua ma o le aiga o le totonugalemu lea o Lana fuafuaga o le faaolataga ma lo tatou fiafia (tagai Kenese 2:24; MF&F 49:15–17). Ua na o le ulufale atu ma le tausia faamaoni o le feagaiga o le faaipoipoga selesitila e mafai ai e le alii ma le tamaitai ona faataunuu lo la malosiaga paia, ma faavavau (tagai 1 Korinito 11:11; MF&F 131:1–4).

Ua poloaiina e le Atua Ana fanau ia fanafanau ma faatumu ai le lalolagi (tagai Kenese 1:28). O mana paia o le foafoaga e tatau ona faaaogaina tau lava o le va o le alii ma le tamaitai ua faaipoipoina faaletulafono o se tane ma se ava(tagai Kenese 39:9; Alema 39:9). O le tane ma le ava ua i ai se tiutetauave paia e alolofa ma tausi e le tasi le isi ma a la fanau. E tatau i matua ona tausia a latou fanau i le alofa ma le amiotonu ma saunia mea latou te manaomia faaleagaga ma le faaletino.

E maua le fiafia i le olaga faaleaiga pe a faavae i aoaoga a le Alii o Iesu Keriso. E ala atu i le mamanu paia, e tatau ona pulefaamalumalu tamā i o latou aiga i le alofa ma le amiotonu, ma tuuina atu mea e manaomia o le olaga. O le uluai matafaioi a tina o le faafaileleina lea o a latou fanau. I nei matafaioi paia, e ao i tamā ma tina ona fesoasoani le tasi i le isi o ni paaga tutusa.

O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Sa foafoaina le lalolagi ma faaalia mai le talalelei ina ia mafai ai ona fausia aiga, faamauina, ma faaeaina e faavavau. E ala atu i le talafaasolopito o aiga ma auaunaga faalemalumalu, e mafai ona tatou faia sauniga ma feagaiga o le talalelei ua avanoa i o tatou tuaa(tagai Malaki 4:5–6).

(Faafetauia mai “O Le Aiga: O Se Folafolaga i le Lalolagi,” Ensign po o Liahona, Nov. 2010, 129.

9. Poloaiga

O poloaiga o tulafono ma mea e manaomia e tuuina mai e le Atua e fesoasoani ia i tatou e alualu ai i luma ma avea faapei o Ia. O poloaiga o le faaalia lea o le alofa o le Atua mo i tatou. Tatou te faaalia lo tatou alolofa mo Ia e ala i le tausia o Ana poloaiga (tagai Ioane 14:15). O le tausia o poloaiga o le a aumaia ai i taimi uma le fiafia ma faamanuiaga mai le Alii (tagai Mosaea 2:41; Alema 41:10). O le a le tuuina mai e le Atua ia i tatou se poloaiga e aunoa ma Lona saunia o se ala mo i tatou e faataunuu ai (tagai 1 Nifae 3:7).

O poloaiga autu sili e lua o le “ alofa atu i le Alii lou Atua ma lou loto atoa, ma lou agaga atoa, ma lou manatu atoa. … Ma… le alofa atu i le lua te tuaoi ia pei o oe lava ia te oe” (tagai Mataio 22:36–39). E mafai ona tatou alolofa ma auauna atu i le Atua i le filifili e alolofa ma auauna atu i isi (tagai Mosaea 2:17; Moronae 7:45, 47–48).

O se tasi o poloaiga muamua lava na tuuina mai i le tagata o le tausia o le aso Sapati ia paia. Ua poloaiina e le Atua Ana fanau e faamamaluina o Ia e ala i le faia o Lona finagalo nai lo o tatou lava manao i le Sapati, ma ua Ia folafola mai ni faamanuiaga maoae ia i latou e tausia Lona aso ia paia (tagai Isaia 58:13–14).

O Poloaiga e Sefulu o se vaega taua o le talalelei ma o ni mataupu faavae e faavavau ia e taua mo lo tatou faaeaga (tagai Esoto 20:3–17). Sa faaali atu e le Alii ia Mose i aso anamua, ma ua Ia toe aumaia i faaaliga i aso e gata ai.

O poloaiga a le Atua e aofia ai le tatalo i aso uma, suesue le afioga a le Atua, salamo, usiusitai i le tulafono o le ola mama, totogiina o se sefuluai atoa (tagai Malaki 3:8–10), anapogi (tagai Isaia 58:6–7), faamagalo i isi(tagai MF&F 64:9–11), tausia o le upu o le poto (tagai MF&F 89:18–21), ma le aoaoina atu o le talalelei i isi (tagai Mataio 5:14–16; MF&F 18:15–16).

Mo nisi faamatalaga i nei autu, alu i le gospeltopics.lds.org pe tagai Faamaoni i le Faatuatua: O Se Tusitaiala o le Talalelei (2004).