Sauniuniga mo Faalavelave Faafuasei a le Siteki ma le Uarota

“Sauni ia, ina e saunia ia oe, o oe ma lou vao tagata uma o e ua faapotopoto mai ia te oe, ia fai foi oe ma leoleo ia te i latou” (Esekielu 38:7).

o se alii o loo faitau mai se tusi lesona

O Le Faatomuaga

E mafai e aufono a le uarota ma le siteki ona faaaogaina lenei taiala e fatu ai pe faafou ai fuafuaga o le tali atu i faalavelave faafuasei. O nei fuafuaga e tatau ona pupuu ma faigofie ma e sili ona anoa pe a tuufaatasia ma fuafuaga a le afioaga. E mafai e taitai o le uarota ma le siteki ona mafaufau e valaau ia tagata tomai faapitoa o le uelefea e fesoasoani i taumafaiga o le tali atu i faalavelave faafuasei ma taumafaiga mo fesootaiga i faalavelave faafuasei E tatau i aufono ona toeiloilo ma faafou e le aunoa ia fuafuaga.

Faatasi ai ma le fesoasoani a lenei taiala ua ono mafai ai ona e fatuina:

• Se fuafuaga o le sauniuniga a le siteki ma le uarota mo faalavelave faafuasei

• Se iloiloga o mea e manaomia ma laasaga o le faatinoga

Laasaga 1: Faailoa Faalavelave e Ono I Ai

Lisi ia faalavelave faafuasei (faatupu e le tagata pe faalenatura) ia atonu e tele se avanoa e tupu ai i la outou eria. Mo ituaiga o faalavelave taitasi, faailoa mai ni faatinoga faapitoa e tali atu ai lea e ono manaomia. (Mo se faataitaiga, i se faalavelave lea e mafai ona faaleagaina ai fale—e pei o se mafuie, afi, lologa, po o se afa—o se faatinoga taua o le saili lea o se fale le tumau mo aiga ua leai ni fale.)

Faaaoga le pepa o galuega o le Toeiloiloga o Faalavelave ma le Fuafuaina mo Mea Faalavefau e faamaea ai lenei laasaga.

Laasaga 2: Ao Mai ia Faamatalaga Taua

E taua fesootaiga i le tali atu i faalavelave faafuasei. O se vaega o le mafai ona fesootai atu i se faalavelave faafuasei o le i ai lea o faamatalaga talafeagai ma punaoa mo fesootaiga. O le aoina mai ma le faatumauina o lenei faamatalaga e faaleleia ai le faavasegaga o manaoga ma taumafaiga e tali atu ai. Tuufaatasi faamatalaga taua nei, ma faafou e le aunoa:

• Faamatalaga fesootai mo tagata o le ekalesia ma faifeautalai uma o loo nonofo i totonu o tuaoi a le siteki po o le uarota.

• O se faafanua o le eria, e aofia ai nofoaga o maota ma laoa o tagata ma faifeautalai ma nofoaga o punoa i le nuu.

• O se lisi o tagata e i ai manaoga faapitoa, e pei o i latou e le atoatoa le malosi ma tagata matutua.

• O se lisi o tagata o le ekalesia e i ai meafaigaluega po o tomai (e pei o aoaoga masani i le tali atu faafomai po o faalavelave faafuasei) o le a aoga i se faalavelave.

• O faamatalaga fesootai mo ofisa o le saogalemu o tagata lautele (e pei o leoleo, tineimu, po o fomai).

• O faamatalaga fesootai mo faalapotopotoga o le Koluse Mumu po o le Red Crescent) lea e saunia auaunaga mo faalavelave faafuasei e pei o meaai, fale, ma tausiga faafomai.

• Faamatalaga e faafesootai ai mo taitai o le uelefea a le eria ma faagaoioiga o le uelefea a le Ekalesia i le lotoifale, i nofoaga o loo maua ai

Faaaoga ia pepa o Faamatalaga Taua ma Faatinoga ma Tofitofiga e faamaea ai lenei laasaga.

tamaitai o loo volenitia

Laasaga 3: Otootoina o Tofitofiga ma Aiaiga

Fuafua pe faapefea e le aufono ona faatulaga ma faataunuu ia galuega taitasi o loo lisi atu i lalo, faailoa mai po o ai e nafa ma galuega taitasi ma po o a faiga faavae o le a latou mulimulitaia. Faamautu se nofoaga autu muamua ma le lona lua lea o le a potopoto ai tagata o le aufono pe a uma se faalavelave faafuasei e faatulaga ai taumafaiga tau fesoasoaniga.

Sauniuniga mo faalavelave matautia:

• Atiae ia sootaga aoga ma taitai faalemalo ma isi faalapotopotoga o le toomaga i le nuu.

Tali atu i faalavelave:

• Faatulaga se faiga faavae mo le lipotia o faamatalaga na aoina mai i le taimi o se faalavelave. O lipoti e uiga i tagata o le au paia e tatau lava ona ao mai e uso ma tuafafine o auaunaga ona tuuina atu lea i le faasologa lenei:

  • Uso ma tuafafine o auaunaga

  • Taitai o le korama a toeaina ma le Aualofa.

  • O le epikopo

  • O le peresitene o le siteki

  • O le Fitugafulu Eria

  • O le Au Peresitene o le Eria, o le faatonusili mo mataupu faaletino, ma le pule o le uelefea ma le ola tutoatasi

• Fuafua ma lipoti atu le tulaga o tagata o le au paia ma faifeautalai.

• Fesoasoani e saili ma toefaatasia tagata o aiga o e na vavaeeseina.

• Ia maua le tausiga faafomai mo i latou na manunu’a po o ē e i ai ni luitau o le soifua maloloina.

• Tuufaatasi taumafaiga o le tali atu ma taitai faalemalo ma isi faalapotopotoga o le toomaga i le nuu.

• Iloilo manaoga ma faatulaga mo le tuuina atu o sapalai masani ma auaunaga—e pei o meaai, fale le tumau, tumama, ma lavalava—mo tagata o le au paia ma isi.

• Fuafua ma lipoti atu le tulaga o fale ma meatotino a le Ekalesia.

Fesoasoaniga i le taimi e uma ai le faalavelave:

• Fesoasoani atu i tagata o e na faaleagaina fale po o meatotino, mafatiaga faalelagona, po o le toesea ai o meatotino e tausi ai le aiga.

• Galulue faatasi ma taitai faalemalo ma faalapotopotoga o toomaga e faailoa mai ma tali atu i avanoa e fesoasoani ai le Ekalesia i manaoga o le afioaga.

Faaaoga le pepa o galuega o Faamatalaga Taua ma Faatinoga ma Tofitofiga e faamae’a ai lenei laasaga.

Laasaga 4: Faailoa Metotia o Fesootaiga mo Faalavelave Faafuasei

O se vaega taua o le tali atu i faalavelave e mo taitai o le Ekalesia ina ia mulimuli i taiala o fesootaiga mo faalavelave faafuasei ma ia tatalaina laina o fesootaiga ma le laumua o le Ekalesia, tagata o le Ekalesia, ma taitai o le nuu.

Ia iloa ma fuafua mo isi metotia o fesootaiga lea e mafai ona faaaoga i tulaga e faaletonu ai laina o telefoni, auaunaga o telefoni feaveai, po o auala o femalagaaiga o taavale i le taimi o le faalavelave. O ia metotia e mafai ona aofia ai:

• Fesootaiga tau Initoneti (e aofia ai imeli, faasalalauga faaagafesootai, ma feau faavavave)

• Feau tusitusia (tesi) i telefoni feaveai (lea e ono mafai ona maua e tusa pe le maua le auaunaga o le leo).

• Leitio feaveai

• Fesootaiga patino e ala i le savali, uila, ma isi auala o femalagaaiga

Pe a manaomia, e mafai e taitai perisitua ona valaau atu i tagata i o latou iunite ina ia avea ma tagata faapitoa o fesootaiga. O tagata faapitoa agavaa e masani ona i ai meafaigaluega o fesootaiga ma iai le poto masani taua.

Tagai i pepa o galuega Toeiloiloina o Faalavelave ma le fuafuaina mo Mea Faalavefau e fuafua ai mo faaletonu tau i fesootaiga. E le gata i lea, faaaoga le pepa o galuega o Faamatalaga Taua—Meafaigaluega, Tomai, ma Punaoa mo Fesootaiga e fuafua ai pe faapefea ona e fesootai atu i se faalavelave ma po o a metotia tau fesootaiga o le a e faaaogaina.

Laasaga 5: Uunaia le Sauniuniga a le Tagata

E faatoa mae’a le fuafuaga o le sauniuniga mo faalavelave faafuasei a le siteki po o le uarota pe a faatinoina e tagata. Iloilo le fuafuaga ma tagata o le ekalesia ma uunaia i latou ia faamasani i lona faatonuga.

Ia uunaia e le aunoa tagata o le au paia ia auai i taumafaiga o sauniuniga—e pei o le faia o a latou lava fuafuaga mo sauniuniga faaleaiga ma auai i gaoioiga sauniuni a le nuu—ma ia mulimuli i fautuaga o loo otooto atu i le Sauniuniga mo Faalavelave Faafuasei a le Tagata Lava Ia ma le Aiga ma la latou taiala o sauniuniga i le eria i le lotoifale. O auala mo le faailoaina atu o lenei fautuaga e mafai ona aofia ai:

• Fonotga a korama a toeaina ma le Aualofa

• Saunoaga o le sauniga faamanatuga po o konafesi a le siteki

• Savali mai i uso ma tuafafine o auaunaga