“ຄຳນຳ,” EnglishConnect 1 ສຳລັບຜູ້ຮຽນ (2022)
“ຄຳນຳ,” EnglishConnect 1 ສຳລັບຜູ້ຮຽນ
Introduction
ຄຳນຳ
Welcome to EnglishConnect!
ຍິນດີຕ້ອນຮັບສູ່ EnglishConnect!
EnglishConnect ນຳຜູ້ຄົນທີ່ສະແຫວງຫາທີ່ຈະຂະຫຍາຍໂອກາດຂອງພວກເຂົາໂດຍຜ່ານການຮຽນພາສາອັງກິດເຂົ້າມາຫາກັນ. ເຮົາທຸກຄົນລ້ວນແຕ່ມາຈາກພື້ນຖານທີ່ແຕກຕ່າງກັນ ແລະ ເວົ້າພາສາທີ່ແຕກຕ່າງກັນ. ເຮົາອາດມີລະດັບຄວາມສາມາດດ້ານພາສາອັງກິດທີ່ແຕກຕ່່າງກັນ, ແຕ່ເມື່ອຮ່ວມກັນແລ້ວ ເຮົາສາມາດບັນລຸເປົ້າໝາຍຂອງເຮົາໄດ້.
Why Are You Learning English?
ເປັນຫຍັງທ່ານຈຶ່ງຮຽນພາສາອັງກິດ?
ການມີຈຸດປະສົງທີ່ຊັດເຈນ ສາມາດຊ່ວຍໃຫ້ທ່ານມີສະມາທິ ແລະ ແຮງຈູງໃຈ. ຂໍໃຫ້ເຮົາມາພິຈາລະນາວ່າ ເປັນຫຍັງທ່ານຈຶ່ງຮຽນພາສາອັງກິດ. ທ່ານຫວັງທີ່ຈະໄດ້ວຽກທີ່ດີກວ່ານີ້ບໍ? ທ່ານຈຳເປັນຕ້ອງຮຽນພາສາອັງກິດເພື່ອສືບຕໍ່ການສຶກສາຂອງທ່ານບໍ? ໃຫ້ໃຊ້ເວລາບຶດໜຶ່ງເພື່ອຂຽນເຫດຜົນທີ່ທ່ານຮຽນພາສາອັງກິດ.
ຂ້ອຍຢາກຮຽນພາສາອັງກິດຍ້ອນວ່າ:
ການຮຽນພາສາອັງກິດ ສາມາດເພີ່ມໂອກາດຂອງທ່ານສຳລັບການສຶກສາ, ການງານ, ການຮັບໃຊ້, ແລະ ມິດຕະພາບ. EnglishConnect ສາມາດຊ່ວຍໃຫ້ທ່ານເອື້ອມເຖິງເປົ້າໝາຍຂອງທ່ານໄດ້.
What Is EnglishConnect?
EnglishConnect ແມ່ນຫຍັງ?
EnglishConnect ເປັນໂປຣແກຣມການຮຽນຮູ້ພາສາອັງກິດ ທີ່ເປັນເອກະລັກສະເພາະທີ່ຈັດຂຶ້ນໂດຍສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. EnglishConnect ແມ່ນຖືກອອກແບບມາເພື່ອຊ່ວຍໃຫ້ທ່ານພັດທະນາທັກສະພາສາອັງກິດໃນສະພາບແວດລ້ອມແຫ່ງສັດທາ, ການຜູກມິດ, ແລະ ການເຕີບໂຕ. ນັ້ນໝາຍຄວາມວ່າ ທ່ານຈະບໍ່ເຮັດສິ່ງນີ້ໂດຍລຳພັງ. ທ່ານຈະຮຽນຮູ້ກັບຄົນອື່ນ ແລະ ສົ່ງເສີມ ແລະ ຊຸກຍູ້ຊຶ່ງກັນແລະກັນ. ທ່ານຍັງສາມາດເຮັດໃຫ້ສັດທາຂອງທ່ານເຕີບໂຕຂຶ້ນ ວ່າພຣະເຈົ້າສາມາດຊ່ວຍທ່ານຮຽນຮູ້ໄດ້.
EnglishConnect ມີຫລາຍລະດັບ. EnglishConnect 1 ແລະ 2 ຊ່ວຍໃຫ້ຜູ້ຮຽນພັດທະນາທັກສະພາສາອັງກິດຂັ້ນພື້ນຖານ. EnglishConnect 3 ກຽມຜູ້ຮຽນໃຫ້ພ້ອມສຳລັບໂອກາດທາງການສຶກສາ—ໂດຍສະເພາະແມ່ນ BYU–Pathway Worldwide. ທ່ານສາມາດຮຽນຮູ້ເພີ່ມເຕີມກ່ຽວກັບ BYU–Pathway ໄດ້ທີ່ byupathway.org. ຮຽນຮູ້ເພີ່ມເຕີມກ່ຽວກັບ EnglishConnect ທີ່ englishconnect.org.
What Makes EnglishConnect Unique?
ແມ່ນຫຍັງທີ່ເຮັດໃຫ້ EnglishConnect ມີເອກະລັກສະເພາະ?
ໃນ EnglishConnect, ເຮົາພັດທະນາທັກສະພາສາອັງກິດ ໃນສະພາບແວດລ້ອມແຫ່ງສັດທາ, ການຜູກມິດ, ແລະ ການເຕີບໂຕ.
Faith
ສັດທາ
ໃນ EnglishConnect, ເຮົາຮຽນຮູ້ໂດຍການສຶກສາ ແລະ ໂດຍສັດທາ. ທຸກໆບົດຮຽນເລີ່ມຕົ້ນດ້ວຍຫລັກທຳຂອງການຮຽນຮູ້. ສິ່ງເຫລົ່ານີ້ຄືຫລັກທຳທາງວິນຍານ ທີ່ຊ່ວຍໃຫ້ເຮົາເພິ່ງອາໄສພຣະເຈົ້າ ເພື່ອເພີ່ມຄວາມສາມາດຂອງເຮົາໃນການຮຽນຮູ້. ຄວາມເຊື່ອທີ່ທ່ານມີກ່ຽວກັບຄວາມສາມາດໃນການຮຽນຮູ້ຂອງທ່ານ ຈະມີຜົນກະທົບອັນໃຫຍ່ຫລວງຕໍ່ຄວາມພະຍາຍາມ ແລະ ຜົນໄດ້ຮັບຂອງທ່ານ. ຫລັກທຳຂອງການຮຽນຮູ້ສາມາດຊ່ວຍໃຫ້ທ່ານເຂົ້າໃຈສັກກະຍະພາບທີ່ແທ້ຈິງຂອງທ່ານ ແລະ ຄວາມສາມາດຂອງພຣະເຈົ້າໃນການຊ່ວຍທ່ານ. ຕໍ່ໄປນີ້ ແມ່ນຫລັກທຳທີ່ທ່ານຈະສຶກສາ:
ທ່ານເປັນລູກຂອງພຣະເຈົ້າ
“ເຮົາເປັນລູກຂອງພຣະເຈົ້າ ພ້ອມດ້ວຍສັກກະຍະພາບ ແລະ ຈຸດປະສົງນິລັນດອນ.”
(ເບິ່ງ ໂຣມ 8:16–17; ຄອບຄົວ: ການປະກາດຕໍ່ໂລກ)
ໃຊ້ສັດທາໃນພຣະເຢຊູຄຣິດ
“ພຣະເຢຊູຄຣິດສາມາດຊ່ວຍໃຫ້ເຮົາເຮັດທຸກສິ່ງ ຂະນະທີ່ເຮົາໃຊ້ສັດທາໃນພຣະອົງ.”
(ເບິ່ງ ຟີລິບປອຍ 4:13; ອີເທີ 12:27; ໂມໂຣໄນ 7:33)
ຮັບເອົາໜ້າທີ່ຮັບຜິດຊອບ
“ເຮົາມີອຳນາດທີ່ຈະເລືອກ, ແລະ ເຮົາມີຄວາມຮັບຜິດຊອບຕໍ່ການຮຽນຮູ້ຂອງເຮົາເອງ.”
ຮັກ ແລະ ສິດສອນຊຶ່ງກັນແລະກັນ
“ເຮົາສາມາດຮຽນຮູ້ຈາກພຣະວິນຍານສັກສິດ ຂະນະທີ່ເຮົາຮັກ, ສິດສອນ, ແລະ ຮຽນຮູ້ກັບຄົນອື່ນ.”
(ເບິ່ງ ໂຢຮັນ 13:34–35; ໂຢຮັນ 14:26–27; ຄຳສອນ ແລະ ພັນທະສັນຍາ 88:77, 88:122–123)
ມຸ້ງໜ້າ
“ດ້ວຍຄວາມຊ່ວຍເຫລືອຈາກພຣະເຈົ້າ, ເຮົາສາມາດມຸ້ງໜ້າ ເຖິງແມ່ນຕ້ອງປະເຊີນກັບອຸປະສັກກໍຕາມ.”
(ເບິ່ງ 2 ນີໄຟ 31:20; 2 ນີໄຟ 32:9; ຄຳສອນ ແລະ ພັນທະສັນຍາ 50:41–42)
ປຶກສາກັບພຣະຜູ້ເປັນເຈົ້າ
“ເຮົາປັບປຸງການຮຽນຮູ້ຂອງເຮົາ ໂດຍການປຶກສາກັບພຣະເຈົ້າທຸກວັນກ່ຽວກັບຄວາມພະຍາຍາມຂອງເຮົາ.”
(ເບິ່ງ ສຸພາສິດ 3:5–6; ມັດທາຍ 7:7–8; ແອວມາ 37:37)
ຫລັກທຳຂອງການຮຽນຮູ້ແມ່ນຄຳຖະແຫລງການແຫ່ງຄວາມຈິງ. ທ່ານສາມາດກ່າວຄຳຖະແຫລງການເຫລົ່ານີ້ກັບຕົວທ່ານເອງ ເມື່ອທ່ານຕ້ອງການແຮງຈູງໃຈ ຫລື ການຊຸກຍູ້. ເມື່ອທ່ານນໍາໃຊ້ຫລັກທຳເຫລົ່ານີ້, ຄວາມສາມາດຂອງທ່ານໃນການຮຽນຮູ້ກໍຈະເພີ່ມຂຶ້ນ. ທ່ານຈະຮູ້ວ່າ ດ້ວຍຄວາມຊ່ວຍເຫລືອຈາກພຣະເຈົ້າ, ທ່ານສາມາດບັນລຸເປົ້າໝາຍຂອງທ່ານໄດ້.
Fellowship
ການຜູກມິດ
ສ່ວນໜຶ່ງທີ່ສໍາຄັນຂອງປະສົບການ EnglishConnect ກໍຄືການຮຽນຮູ້ກັບຄົນອື່ນ. ກຸ່ມ EnglishConnect ຮັກ, ຊ່ວຍເຫລືອ, ແລະ ສົ່ງເສີມກັນແລະກັນ. ການປະຊຸມກຸ່ມຂອງທ່ານນັ້ນ ແມ່ນບ່ອນທີ່ປອດໄພສຳລັບການຝຶກເວົ້າ ແລະ ເຮັດຜິດພາດ. ການເຂົ້າຮ່ວມກຸ່ມ EnglishConnect ສາມາດຊ່ວຍໃຫ້ທ່ານມີແຮງຈູງໃຈ ແລະ ສ້າງມິດຕະພາບ.
Growth
ການເຕີບໂຕ
EnglishConnect ເປັນຫລາຍກວ່າໂປຣແກຣມສຳລັບການຮຽນພາສາອັງກິດເທົ່ານັ້ນ. ບໍ່ວ່າທ່ານຈະເລີ່ມຕົ້ນຢູ່ບ່ອນໃດກໍຕາມ, ປະສົບການຕ່າງໆທີ່ທ່ານມີ ຈະຊ່ວຍໃຫ້ທ່ານກາຍເປັນຜູ້ຮຽນທີ່ດີກວ່າເກົ່າ. ທ່ານຈະມີໂອກາດທີ່ຈະ:
-
ຝຶກພາສາອັງກິດທຸກວັນ.
-
ຕິດຕາມເບິ່ງຄວາມກ້າວໜ້າຂອງທ່ານ.
-
ຮຽນຮູ້ກັບຄົນອື່ນ.
-
ອະທິຖານຂໍໃຫ້ພຣະເຈົ້າຊ່ວຍໃຫ້ທ່ານບັນລຸເປົ້າໝາຍຂອງທ່ານ.
What Will I Do in EnglishConnect?
ຂ້ອຍຈະເຮັດຫຍັງໃນ EnglishConnect?
ໃນ EnglishConnect, ທ່ານຈະເຮັດການສຶກສາສ່ວນຕົວ, ຝຶກຫັດການສົນທະນາເປັນກຸ່ມ, ແລະ ຝຶກທຸກວັນ. ແຕ່ລະບົດຮຽນໃນຄູ່ມືຜູ້ຮຽນ EnglishConnect ແມ່ນໄດ້ຖືກແບ່ງອອກເປັນສອງພາກ—“ການສຶກສາສ່ວນຕົວ” ແລະ “ກຸ່ມສົນທະນາ.”
Personal Study
ການສຶກສາສ່ວນຕົວ
ພາກ “ການສຶກສາສ່ວນຕົວ” ຈະກຽມທ່ານສຳລັບກຸ່ມສົນທະນາ. ໃນ “ການສຶກສາສ່ວນຕົວ,” ທ່ານຈະເຮັດກິດຈະກຳຕໍ່ໄປນີ້ໃຫ້ສຳເລັດ:
Study the Principle of Learning
ສຶກສາຫລັກທຳຂອງການຮຽນຮູ້
ແຕ່ລະບົດຮຽນມີຫລັກທຳຂອງການຮຽນຮູ້. ນີ້ຄືຫລັກທຳທາງວິນຍານທີ່ຈະຊ່ວຍໃຫ້ທ່ານຮ່ວມມືກັບພຣະເຈົ້າໃນການຮຽນພາສາອັງກິດ. ກ່ອນກຸ່ມສົນທະນາຂອງທ່ານ, ໃຫ້ອ່ານຫລັກທຳຂອງການຮຽນຮູ້, ໄຕ່ຕອງຄຳຖາມ, ແລະ ຂຽນຄວາມຄິດຂອງທ່ານລົງ.
Memorize Vocabulary
ທ່ອງຈຳຄຳສັບ
ຮຽນຮູ້ຄວາມໝາຍ ແລະ ການອອກສຽງຂອງແຕ່ລະຄຳສັບ. ໃຊ້ຄຳສັບເພື່ອຝຶກແບບແຜນ. ທ່ານສາມາດຊອກຫາຄຳສັບເພີ່ມເຕີມທີ່ສາມາດໃຊ້ໃນແບບແຜນນີ້.
Practice the Patterns
ຝຶກແບບແຜນ
ເລີ່ມຕົ້ນໂດຍການທ່ອງຈຳແບບແຜນປະໂຫຍກ. ແລ້ວໃຊ້ແບບແຜນນັ້ນເພື່ອສ້າງຄຳຖາມ ແລະ ຄຳຕອບຂອງທ່ານເອງ. ທ່ານສາມາດແທນຄຳສັບທີ່ຂີດກ້ອງ ດ້ວຍຄຳສັບອື່ນໆ ຈາກລາຍການຄຳສັບ. ສືບຕໍ່ຝຶກອອກສຽງ ຈົນກວ່າທ່ານຈະສາມາດໃຊ້ແບບແຜນນັ້້ນຢ່າງໝັ້ນໃຈເພື່ອຖາມ ແລະ ຕອບຄຳຖາມ.
Conversation Group
ກຸ່ມສົນທະນາ
ພາກ “ກຸ່ມສົນທະນາ” ມີກິດຈະກຳທີ່ທ່ານຈະໃຊ້ເພື່ອຮຽນຮູ້ກັບຄົນອື່ນ. ໃນ “ກຸ່ມສົນທະນາ,” ທ່ານຈະເຮັດກິດຈະກຳຕໍ່ໄປນີ້ໃຫ້ສຳເລັດ:
Discuss the Principle of Learning (20–30 minutes)
ສົນທະນາກ່ຽວກັບຫລັກທຳຂອງການຮຽນຮູ້ (20–30 ນາທີ)
ໃນກຸ່ມຂອງທ່ານ, ໃຫ້ອ່ານ ແລະ ສົນທະນາກ່ຽວກັບຫລັກທຳຂອງການຮຽນຮູ້. ນີ້ແມ່ນໂອກາດທີ່ຈະແບ່ງປັນ ແລະ ຮຽນຮູ້ຈາກຜູ້ອື່ນ.
Activities
ກິດຈະກຳ
ໃນ ກິດຈະກຳ 1, 2, ແລະ 3, ໃຫ້ໃຊ້ຄຳສັບ ແລະ ແບບແຜນປະໂຫຍກເພື່ອມີສ່ວນຮ່ວມໃນການສົນທະນາທີ່ມີຄວາມໝາຍ. ກິດຈະກຳເຫລົ່ານີ້ຈະຊ່ວຍໃຫ້ທ່ານກ້າວໜ້າຈາກການຝຶກທີ່ຊໍ້າໄປຊໍ້າມາ ເພື່ອສ້າງບົດສົນທະນາຂອງທ່ານເອງ. ແຕ່ລະກິດຈະກຳຈະກຽມທ່ານສຳລັບກິດຈະກຳຄັ້ງຕໍ່ໄປ.
Activity 1: Practice the Patterns (10–15 minutes)
ກິດຈະກຳ 1: ການຝຶກແບບແຜນ (10–15 ນາທີ)
ໃນກິດຈະກຳ 1, ໃຫ້ທົບທວນຄຳສັບ ແລະ ແບບແຜນທີ່ທ່ານໄດ້ຮຽນໃນການສຶກສາສ່ວນຕົວຂອງທ່ານ. ເປົ້າໝາຍຂອງທ່ານກໍຄືການໃຊ້ແບບແຜນເພື່ອເວົ້າ ແລະ ເຂົ້າໃຈຄຳຖາມ ແລະ ຄຳຕອບທີ່ງ່າຍໆ.
Activity 2: Create Your Own Sentences (10–15 minutes)
ກິດຈະກຳ 2: ສ້າງປະໂຫຍກຂອງທ່ານເອງ (10–15 ນາທີ)
ໃນກິດຈະກຳ 2, ໃຫ້ສຸມໃຈໃສ່ການໃຊ້ແບບແຜນເພື່ອສ້າງປະໂຫຍກຂອງທ່ານເອງ. ມີຄວາມຄິດສ້າງສັນ. ເປົ້າໝາຍຂອງທ່ານກໍຄືການໃຊ້ແບບແຜນເພື່ອສ້າງຄຳຖາມ ແລະ ຄຳຕອບໃຫ້ຫລາຍທີ່ສຸດເທົ່າທີ່ທ່ານຈະເຮັດໄດ້.
Activity 3: Create Your Own Conversations (15–20 minutes)
ກິດຈະກຳ 3: ສ້າງບົດສົນທະນາຂອງທ່ານເອງ (15–20 ນາທີ)
ໃນກິດຈະກຳ 3, ຝຶກການສົນທະນາທີ່ສົມບູນໃນສະຖານະການຊີວິດຈິງ. ເປົ້າໝາຍຂອງທ່ານກໍຄືການມີການສົນທະນາທີ່ມີຄວາມໝາຍ ໂດຍໃຊ້ພາສາອັງກິດທີ່ທ່ານໄດ້ຮຽນມາແລ້ວ.
Evaluate (5–10 minutes)
ປະເມີນ (5–10 ນາທີ)
ໃນທ້າຍຂອງກຸ່ມສົນທະນາແຕ່ລະຄັ້ງ, ໃຫ້ປະເມີນຄວາມກ້າວໜ້າຂອງທ່ານຢູ່ຈຸດປະສົງຂອງບົດຮຽນ. ໃຊ້ “ລະບົບການຕິດຕາມການສຶກສາສ່ວນຕົວ” ເພື່ອປະເມີນຄວາມພະຍາຍາມຂອງທ່ານໃນການສຶກສາສ່ວນຕົວ, ແລະ ຕັ້ງເປົ້າໝາຍທີ່ຈະປັບປຸງ. ໃຊ້ເວລາໃນການສະຫລອງຄວາມກ້າວໜ້າ ແລະ ຄວາມພະຍາຍາມຂອງທ່ານ.
Daily Practice
ການຝຶກທຸກວັນ
ເພື່ອທີ່ຈະຮຽນພາສາອັງກິດ, ທ່ານຈຳເປັນຕ້ອງພັດທະນານິໄສຂອງການຝຶກທຸກວັນ. ນອກຈາກເວລາຮຽນໜັງສືທີ່ຈັດໄວ້ຕ່າງຫາກແລ້ວ, ໃຫ້ຊອກຫາວິທີທີ່ຈະໃຊ້ພາສາອັງກິດໃນກິດຈະກຳປະຈຳວັນຂອງທ່ານ. ຍົກຕົວຢ່າງ, ເມື່ອທ່ານຟັງເພງ, ໃຫ້ຟັງເປັນພາສາອັງກິດ. ເມື່ອທ່ານເບິ່ງໜັງ, ໃຫ້ເບິ່ງເປັນພາສາອັງກິດ ຫລື ເປີດຄຳບັນຍາຍເປັນພາສາອັງກິດ. ເມື່ອໃດກໍຕາມທີ່ທ່ານກຳລັງຖ້າຢູ່ບ່ອນໃດກໍຕາມ, ໃຫ້ຝຶກການສົນທະນາເປັນພາສາອັງກິດຢູ່ໃນໃຈຂອງທ່ານ. ເມື່ອທ່ານອະທິຖານ, ໃຫ້ເວົ້າເປັນພາສາອັງກິດໃຫ້ຫລາຍເທົ່າທີ່ທ່ານຈະສາມາດເຮັດໄດ້. ສິ່ງສຳຄັນໃນການຝຶກທຸກວັນກໍຄືການໃຊ້ພາສາອັງກິດ ໃນກິດຈະວັດປະຈຳວັນຕາມປົກກະຕິຂອງທ່ານ.
ທ່ານກໍສາມາດສຳເລັດກິດຈະກຳບົດຮຽນ ແລະ ການປະເມີນຜົນທາງອອນລາຍໄດ້ທີ່ englishconnect.org/learner/resources ແລະ ໃນ ປຶ້ມບົດຝຶກຫັດ EnglishConnect.
ເມື່ອທ່ານສຳເລັດກິດຈະກຳການສຶກສາສ່ວນຕົວສຳລັບບົດຮຽນແຕ່ລະບົດ ແລະ ຝຶກທຸກວັນ, ທ່ານຈະຮຽນຮູ້ໄວຂຶ້ນ ແລະ ກຽມຕົວໄດ້ດີຂຶ້ນສຳລັບກຸ່ມສົນທະນາຂອງທ່ານ. ໃຫ້ໃຊ້ “ລະບົບການຕິດຕາມການສຶກສາສ່ວນຕົວ” ທີ່ມີຢູ່ໃນທ້າຍຄຳນຳນີ້ ເພື່ອຕິດຕາມເບິ່ງຄວາມພະຍາຍາມ ແລະ ເປົ້າໝາຍຂອງທ່ານ.
Remember This
ຈື່ຈຳສິ່ງນີ້
ເມື່ອທ່ານສຳເລັດກິດຈະກຳການສຶກສາສ່ວນຕົວ, ຝຶກພາສາອັງກິດທຸກວັນ, ແລະ ມີສ່ວນຮ່ວມໃນກຸ່ມສົນທະນາຂອງທ່ານຢ່າງຫ້າວຫັນ, ທ່ານຈະພັດທະນາທັກສະການສົນທະນາພາສາອັງກິດຂອງທ່ານ. ທີ່ສຳຄັນໄປກວ່ານັ້ນ, ເມື່ອທ່ານນໍາໃຊ້ຫລັກທຳຂອງການຮຽນຮູ້ ແລະ ອະທິຖານຂໍຄວາມຊ່ວຍເຫລືອຈາກພຣະເຈົ້າ, ພຣະອົງຈະຊ່ວຍໃຫ້ທ່ານບັນລຸເປົ້າໝາຍຂອງທ່ານໃນຕອນນີ້ ແລະ ໃນອະນາຄົດ.