Principles of Learning Glossary

ປະມວນຄຳສັບຫລັກທຳຂອງການຮຽນຮູ້

Agency

ອຳເພີໃຈ: ໃນຖານະລູກໆຂອງພຣະເຈົ້າ, ເຮົາມີອຳເພີໃຈ, ຫລື ອຳນາດ, ໃນການຕັດສິນໃຈດ້ວຍຕົວເຮົາເອງ. ເຮົາສາມາດເລືອກສິ່ງທີ່ເຮົາເຊື່ອ, ສິ່ງທີ່ເຮົາເຮັດ, ແລະ ຄົນທີ່ເຮົາຢາກເປັນ.

“ອຳເພີໃຈຄືຄວາມສາມາດ ແລະ ສິດທິພິເສດທີ່ພຣະເຈົ້າປະທານໃຫ້ເຮົາ ເພື່ອໃຫ້ເລືອກ ແລະ ກະທຳເພື່ອຕົວເຮົາເອງ” (Gospel Topics, “Agency and Accountability,” ChurchofJesusChrist.org).

“ເພາະພຣະອົງຮັກທ່ານ, ພຣະເຈົ້າຈຶ່ງໄດ້ປະທານອຳເພີໃຈໃຫ້ແກ່ທ່ານ, ຫລື ອິດສະລະໃນການຕັດສິນໃຈ. ອຳເພີໃຈຂອງທ່ານ ອະນຸຍາດໃຫ້ທ່ານເລືອກສິ່ງທີ່ດີທີ່ນຳໄປສູ່ຄວາມສຸກ; ມັນຍັງເຮັດໃຫ້ທ່ານຮູ້ຈັກຮັບຜິດຊອບຕໍ່ການເລືອກທີ່ບໍ່ດີ, ຊຶ່ງນຳໄປສູ່ຄວາມທຸກໂດຍທັນທີ ຫລື ໃນທີ່ສຸດ. ພຣະເຈົ້າຈະບໍ່ແຊກແຊງໃນການເລືອກຂອງທ່ານ; ພຣະອົງອະນຸຍາດໃຫ້ທ່ານຕັດສິນໃຈດ້ວຍຕົວເອງ ແລະ ເພື່ອຮຽນຮູ້ຈາກຜົນສະທ້ອນ. ແຕ່ພຣະອົງສະເໜີໃຫ້ການຊ່ວຍເຫລືອຂັ້ນສູງສຸດ ເພື່ອເອົາຊະນະຄວາມຜິດພາດ ແລະ ບາບ—ອຳນາດແຫ່ງການຊ່ວຍໃຫ້ລອດຂອງພຣະເຢຊູຄຣິດ. ບໍ່ວ່າສະພາບການຂອງທ່ານຈະໂຫດຮ້າຍສໍ່າໃດ ຫລື ທ່ານໄດ້ເລືອກທາງທີ່ຜິດມາຫລາຍສໍ່າໃດກໍຕາມ, ທ່ານສາມາດເລືອກທີ່ຈະປ່ຽນແປງ ແລະ ພົບສັນຕິສຸກຜ່ານທາງພຣະເຢຊູຄຣິດໄດ້ສະເໝີ” (“God Is There for You,” ComeuntoChrist.org).

Agent

ຕົວແທນ: ຕົວແທນແມ່ນຜູ້ທີ່ມີຄວາມສາມາດ ຫລື ອຳນາດໃນການກະທຳເພື່ອຕົວເອງ. ໃນຖານະລູກໆຂອງພຣະເຈົ້າ, ເຮົາເປັນຕົວແທນ; ເຮົາມີອຳເພີໃຈ, ຫລື ອຳນາດ, ໃນການຕັດສິນໃຈດ້ວຍຕົວເຮົາເອງ. ເຮົາສາມາດເລືອກສິ່ງທີ່ເຮົາເຊື່ອ, ສິ່ງທີ່ເຮົາເຮັດ, ແລະ ຄົນທີ່ເຮົາຢາກເປັນ.

Bible

ພຣະຄຣິສຕະທຳຄຳພີ: “ພຣະຄຣິສຕະທຳຄຳພີເປັນປຶ້ມສັກສິດທີ່ບັນຈຸພຣະຄຳຂອງພຣະເຈົ້າ. ຕະຫລອດທົ່ວໜ້າປຶ້ມ, ພຣະຄຣິສຕະທຳຄຳພີສັກສິດສອນວ່າ ພຣະເຈົ້າບໍ່ມີວັນຢຸດຮັກລູກໆຂອງພຣະອົງ. …ການເຮັດຕາມຄຳສອນທີ່ພົບໃນພຣະຄຣິສຕະທຳຄຳພີ ຊ່ວຍໃຫ້ເຮົາຮູ້ວ່າ ພຣະເຈົ້າແມ່ນໃຜ … ແລະ ເຂົ້າໃຈວິທີທີ່ພຣະອົງຕ້ອງການໃຫ້ເຮົາໃຊ້ຊີວິດ. …”

“ພຣະເຢຊູຄຣິດເປັນພຣະບຸດຂອງພຣະເຈົ້າ ຜູ້ທີ່ໄດ້ສະເດັດມາສູ່ແຜ່ນດິນໂລກເພື່ອຊ່ວຍເຮົາໃຫ້ລອດຈາກບາບ, ຄວາມໂສກເສົ້າ, ຄວາມໂດດດ່ຽວ, ຄວາມເຈັບປວດ, ແລະ ອື່ນໆອີກ. ພຣະເຢຊູໄດ້ສິດສອນບົດຮຽນທີ່ງົດງາມກ່ຽວກັບການຮັບໃຊ້ ແລະ ຄວາມຮັກ ແລະ ໄດ້ສະແດງການອັດສະຈັນຫລາຍໆຢ່າງ ຂະນະທີ່ພຣະອົງຢູ່ເທິງແຜ່ນດິນໂລກ. ໃນພຣະຄຣິສຕະທຳຄຳພີ, ເຮົາສາມາດອ່ານເລື່ອງລາວເຫລົ່ານີ້ ແລະ ເລີ່ມທີ່ຈະຮູ້ວິທີທີ່ເຮົາສາມາດເອົາຊະນະສິ່ງທີ່ຍາກລຳບາກດ້ວຍຄວາມຊ່ວຍເຫລືອຈາກພຣະເຢຊູ” (“What Is the Holy Bible?,” ComeuntoChrist.org).

Book of Mormon

ພຣະຄຳພີມໍມອນ: “ພຣະຄຳພີມໍມອນບັນຈຸງານຂຽນອັນສັກສິດຈາກຜູ້ຕິດຕາມຂອງພຣະເຢຊູ. ເຊັ່ນດຽວກັບທີ່ພຣະເຈົ້າໄດ້ກ່າວກັບໂມເຊ ແລະ ໂນອາໃນພຣະຄຣິສຕະທຳຄຳພີ, ພຣະອົງກໍໄດ້ກ່າວກັບຜູ້ຄົນໃນອາເມຣິກາເຊັ່ນກັນ. ຊາຍເຫລົ່ານີ້, ທີ່ເອີ້ນວ່າ ສາດສະດາ, ໄດ້ຂຽນພຣະຄຳຂອງພຣະເຈົ້າ. ງານຂຽນຂອງພວກເພິ່ນໄດ້ຖືກທ້ອນໂຮມເຂົ້າເປັນປຶ້ມເຫລັ້ມດຽວໃນທີ່ສຸດ ໂດຍສາດສະດາທີ່ມີຊື່ວ່າ ມໍມອນ. …

“ພຣະຄຳພີມໍມອນ ເປັນຫລັກຖານວ່າ ພຣະເຈົ້າຮັກລູກໆທັງໝົດຂອງພຣະອົງ ແລະ ມີສ່ວນຮ່ວມໃນຊີວິດຂອງພວກເຂົາ. ມັນເຮັດໜ້າທີ່ເປັນພະຍານເຖິງຄວາມຈິງໃນພຣະຄຣິສຕະທຳຄຳພີ ແລະ ເຖິງຄວາມເປັນພຣະເຈົ້າ ແລະ ຄຳສອນຂອງພຣະເຢຊູຄຣິດ.” (“What Is the Book of Mormon?,” ComeuntoChrist.org).

Doctrine and Covenants

ຄຳສອນ ແລະ ພັນທະສັນຍາ: “ຄຳສອນ ແລະ ພັນທະສັນຍາເປັນພຣະຄຳພີທີ່ບັນຈຸການເປີດເຜີຍຈາກພຣະຜູ້ເປັນເຈົ້າເຖິງສາດສະດາໂຈເຊັບ ສະມິດ ແລະ ເຖິງສາດສະດາຍຸກສຸດທ້າຍຄົນອື່ນໆອີກສອງສາມຄົນ. ມັນເປັນພຣະຄຳພີທີ່ເປັນເອກະລັກ ເພາະມັນບໍ່ແມ່ນການແປຂອງເອກະສານບູຮານ.

“ຄຳສອນ ແລະ ພັນທະສັນຍາແມ່ນໜຶ່ງໃນປຶ້ມສີ່ເຫລັ້ມຂອງພຣະຄຳພີທີ່ໃຊ້ໃນ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ (ອີກສາມເຫລັ້ມແມ່ນ ພຣະຄຣິສຕະທຳຄຳພີ, ພຣະຄຳພີມໍມອນ, ແລະ ໄຂ່ມຸກອັນລ້ຳຄ່າ)” (Gospel Topics, “Doctrine and Covenants,” ChurchofJesusChrist.org).

Faith

ສັດທາ: “ສັດທາເປັນຫລັກທຳຂອງການກະທຳ ແລະ ລິດອຳນາດ. ເມື່ອໃດກໍຕາມທີ່ເຮົາເຮັດວຽກເພື່ອເປົ້າໝາຍທີ່ມີຄ່າຄວນ, ເຮົາໃຊ້ສັດທາ. ເຮົາສະແດງຄວາມຫວັງຂອງເຮົາໃນສິ່ງທີ່ເຮົາຍັງບໍ່ທັນເຫັນ. …”

“ການມີສັດທາໃນພຣະເຢຊູຄຣິດໝາຍເຖິງການເພິ່ງອາໄສພຣະອົງຢ່າງໝົດສິ້ນ—ໄວ້ວາງໃຈໃນອຳນາດທີ່ບໍ່ມີຂອບເຂດ, ຄວາມຮູ້ແຈ້ງ, ແລະ ຄວາມຮັກຂອງພຣະອົງ. ມັນລວມທັງການເຊື່ອໃນຄຳສອນຂອງພຣະອົງ. ມັນໝາຍເຖິງການເຊື່ອ ເຖິງແມ່ນວ່າເຮົາຈະບໍ່ເຂົ້າໃຈທຸກສິ່ງກໍຕາມ, ແຕ່ພຣະອົງເຂົ້າໃຈ. ດ້ວຍວ່າພຣະອົງໄດ້ປະສົບກັບຄວາມເຈັບປວດ, ຄວາມທຸກທໍລະມານ, ແລະ ຄວາມບົກພ່ອງທັງໝົດຂອງເຮົາ, ພຣະອົງຈຶ່ງຮູ້ວິທີທີ່ຈະຊ່ວຍເຮົາໃຫ້ເອົາຊະນະເໜືອຄວາມຫຍຸ້ງຍາກໃນແຕ່ລະວັນຂອງເຮົາ. … (ເບິ່ງ ແອວມາ 7:11–12; ຄຳສອນ ແລະ ພັນທະສັນຍາ 122:8).”

“ສັດທາແມ່ນເປັນຫລາຍກວ່າການມີຄວາມເຊື່ອແບບບໍ່ຕອບໂຕ້. ເຮົາສະແດງສັດທາຂອງເຮົາໂດຍຜ່ານການກະທຳ—ໂດຍວິທີທີ່ເຮົາໃຊ້ຊີວິດ. …”

“ສັດທາແມ່ນຂອງປະທານຈາກພຣະເຈົ້າ, ແຕ່ເຮົາຕ້ອງບຳລຸງລ້ຽງສັດທາຂອງເຮົາ ເພື່ອທີ່ຈະຮັກສາມັນໃຫ້ເຂັ້ມແຂງ. ສັດທາກໍເປັນເໝືອນດັ່ງກ້າມເນື້ອ. ຖ້າໃຊ້ມັນອອກກຳລັງກາຍ, ມັນກໍຈະແຂງແຮງຂຶ້ນ. ຖ້າປ່ອຍໃຫ້ມັນຢູ່ຊື່ໆ, ມັນກໍຈະອ່ອນແອລົງ” (Gospel Topics, “Faith in Jesus Christ,” ChurchofJesusChrist.org).

God/Heavenly Father

ພຣະເຈົ້າ/ພຣະບິດາເທິງສະຫວັນ: “ພຣະເຈົ້າອົງເປັນພຣະບິດາເປັນອົງສູງສຸດ ຜູ້ທີ່ເຮົາເຊື່ອ, ຜູ້ທີ່ເຮົານະມັດສະການ, ແລະ ຜູ້ທີ່ເຮົາອະທິຖານຫາ. ພຣະອົງເປັນພຣະຜູ້ສ້າງສູງສຸດ, ພຣະຜູ້ປົກຄອງ, ແລະ ພຣະຜູ້ພິທັກຂອງທຸກສັບພະສິ່ງ. ພຣະອົງດີພ້ອມ, ມີອຳນາດທັງໝົດ, ແລະ ຮູ້ຈັກທຸກສິ່ງ” (Gospel Topics, “God the Father,” ChurchofJesusChrist.org).

“ພຣະເຈົ້າເປັນພຣະບິດາຜູ້ສະຖິດຢູ່ໃນສະຫວັນທີ່ຊົງຮັກຂອງເຮົາ. … ພຣະອົງເປັນພຣະບິດາຂອງວິນຍານ [ຂອງເຮົາ]. … [ພຣະບິດາເທິງສະຫວັນ] ຮັກລູກໆຂອງພຣະອົງທຸກຄົນຢ່າງສົມບູນແບບ, ລວມທັງທ່ານ. … ພຣະອົງຢາກມີຄວາມສຳພັນກັບທ່ານ” (“God’s Love,” ComeuntoChrist.org).

ໃນພຣະຄຳພີ, ຄຳວ່າ ພຣະເຈົ້າ ມັກຈະຖືກໃຊ້ຢູ່ເລື້ອຍໆເພື່ອອ້າງເຖິງພຣະບິດາເທິງສະຫວັນ ຫລື ພຣະເຢຊູຄຣິດ ເພາະພຣະອົງເປັນໜຶ່ງດຽວກັນໃນຈຸດປະສົງ. ເຮົາອະທິຖານຫາພຣະບິດາເທິງສະຫວັນຂອງເຮົາ.

Holy Spirit

ພຣະວິນຍານສັກສິດ: “ພຣະວິນຍານສັກສິດ, ຫລື ພຣະວິນຍານບໍລິສຸດ, ເປັນພະຍານເຖິງພຣະເຈົ້າ ແລະ ພຣະເຢຊູຄຣິດ. … ພຣະວິນຍານສັກສິດໃຫ້ຄວາມປອບໂຍນແກ່ເຮົາ, ຊ່ວຍໃຫ້ເຮົາຮູ້ຈັກຄວາມຈິງ, ແລະ ເປັນພະຍານເຖິງພຣະເຢຊູ. … ໜຶ່ງໃນວິທີທີ່ພຣະເຈົ້າສື່ສານກັບເຮົາ ກໍແມ່ນຜ່ານທາງພຣະວິນຍານບໍລິສຸດ. ພຣະວິນຍານສັກສິດກ່າວແກ່ຈິດໃຈຂອງເຮົາ ແລະ ແກ່ຫົວໃຈຂອງເຮົາ ຜ່ານທາງຄວາມຄິດ ແລະ ຄວາມຮູ້ສຶກ” (“The Holy Spirit,” ComeuntoChrist.org).

Jesus Christ

ພຣະເຢຊູຄຣິດ: “ພຣະເຢຊູເປັນພຣະຜູ້ຊ່ວຍໃຫ້ລອດຂອງໂລກ ແລະ ຕົວຢ່າງທີ່ດີພ້ອມຂອງເຮົາ. ເມື່ອເຮົາຕິດຕາມພຣະອົງ, ເຮົາກໍພົບສັນຕິສຸກ ແລະ ຄວາມສຸກທີ່ຍິ່ງໃຫຍ່ກວ່າໃນຊີວິດ. …”

“ພຣະເຢຊູເປັນພຣະບຸດຂອງພຣະເຈົ້າ. ພຣະບິດາເທິງສະຫວັນຂອງເຮົາໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອຮັບເອົາບາບຂອງທຸກຄົນທີ່ມີຊີວິດຢູ່ໃນແຜ່ນດິນໂລກ ເພື່ອວ່າເຮົາຈະໄດ້ຮັບການອະໄພ. …”

“ພຣະເຢຊູໄດ້ໃຊ້ຊີວິດທີ່ດີພ້ອມ ເພື່ອສະແດງໃຫ້ເຮົາເຫັນຫົນທາງກັບຄືນສູ່ພຣະບິດາເທິງສະຫວັນຂອງເຮົາ. …”

“ພຣະເຢຊູໄດ້ທົນທຸກ ແລະ ໄດ້ສິ້ນພຣະຊົນເພື່ອບາບຂອງເຮົາ. ພາລະກິດຂອງພຣະເຢຊູໃນການສະເດັດມາສູ່ແຜ່ນດິນໂລກ ແມ່ນເພື່ອຊ່ວຍເຮົາໃຫ້ລອດຈາກບາບຂອງເຮົາ. ພຣະອົງເຕັມໃຈທີ່ຈະທົນທຸກ ແລະ ເສຍສະລະພຣະອົງເອງເພື່ອຈ່າຍຄ່າຂອງຄວາມຜິດພາດຂອງເຮົາ ເພື່ອວ່າເຮົາຈະສາມາດກັບໃຈ ແລະ ຮັບການໃຫ້ອະໄພໄດ້. …”

“ພຣະເຢຊູໄດ້ຟື້ນຄືນພຣະຊົນ ເພື່ອວ່າເຮົາຈະສາມາດມີຊີວິດອີກຄັ້ງ. ສາມມື້ຫລັງຈາກການສິ້ນພຣະຊົນຂອງພຣະອົງ, ພຣະເຢຊູໄດ້ລຸກຂຶ້ນຈາກອຸບມຸງ ແລະ ໄດ້ປະກົດຕົວຕໍ່ໝູ່ເພື່ອນ ແລະ ຜູ້ຕິດຕາມຂອງພຣະອົງຫລາຍໆຄົນ. ພຣະອົງເປັນຄົນທຳອິດທີ່ໄດ້ຟື້ນຄືນພຣະຊົນ, ໝາຍຄວາມວ່າ ພຣະວິນຍານຂອງພຣະອົງໄດ້ກັບມາລວມເຂົ້າກັບພຣະກາຍອັນສົມບູນແບບຂອງພຣະອົງຫລັງຈາກຄວາມຕາຍ. ຍ້ອນວ່າພຣະເຢຊູໄດ້ເອົາຊະນະຄວາມຕາຍ, ມື້ໜຶ່ງ ເຮົາທຸກຄົນກໍຈະຟື້ນຄືນຊີວິດ” (“Following Jesus Christ, Our Perfect Example,” ComeuntoChrist.org).

Prayer

ການອະທິຖານ: ການອະທິຖານແມ່ນ “ການສື່ສານດ້ວຍຄວາມຄາລະວະນຳພຣະເຈົ້າ ຊຶ່ງໃນລະຫວ່າງນັ້ນ ຜູ້ຄົນຈະຂອບພຣະໄທ ແລະ ທູນຂໍພອນ. ການອະທິຖານເປັນການກ່າວຕໍ່ພຣະບິດາເທິງສະຫວັນຂອງເຮົາ ໃນພຣະນາມຂອງພຣະເຢຊູຄຣິດ” (ຄູ່ມືພຣະຄຳພີ, “ອະທິຖານ, ການອະທິຖານ, ຄຳອະທິຖານ,” ChurchofJesusChrist.org).

“ພຣະເຈົ້າເປັນພຣະບິດາຜູ້ສະຖິດຢູ່ໃນສະຫວັນທີ່ຊົງຮັກຂອງທ່ານ, ແລະ ພຣະອົງຢາກໄດ້ຍິນຈາກທ່ານ” (“How to Pray,” ComeuntoChrist.org).

Prophet

ສາດສະດາ: “ສາດສະດາແມ່ນຜູ້ທີ່ຖືກເອີ້ນໂດຍພຣະເຈົ້າໃຫ້ນຳພາທົ່ວໂລກ. ຈາກອັບຣາຮາມ ແລະ ໂມເຊ ຈົນເຖິງສາດສະດາທີ່ມີຊີວິດຢູ່ທຸກມື້ນີ້, ພຣະເຈົ້າກະທຳຕາມແບບແຜນຂອງການນຳພາລູກໆຂອງພຣະອົງຜ່ານທາງສາດສະດາ” (“God Speaks to Us through Prophets,” ComeuntoChrist.org).

Savior

ພຣະຜູ້ຊ່ວຍໃຫ້ລອດ: “ຜູ້ຊ່ວຍໃຫ້ລອດ. … ‘ພຣະຜູ້ຊ່ວຍໃຫ້ລອດ’ ແມ່ນພຣະນາມ ແລະ ຕຳແໜ່ງຂອງພຣະເຢຊູຄຣິດ” (ຄູ່ມືພຣະຄຳພີ, “ພຣະຜູ້ຊ່ວຍໃຫ້ລອດ,” ChurchofJesusChrist.org).

ພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ ເພາະພຣະອົງໄດ້ມອບພຣະຊົນຊີບຂອງພຣະອົງ ແລະ ໄດ້ຟື້ນຄືນພຣະຊົນ ເພື່ອວ່າເຮົາຈະສາມາດເອົາຊະນະຜົນກະທົບຂອງບາບ ແລະ ຄວາມຕາຍ ແລະ ໄດ້ຢູ່ກັບພຣະເຈົ້າອີກຄັ້ງ.

“ພຣະເຢຊູໄດ້ທົນທຸກ ແລະ ໄດ້ສິ້ນພຣະຊົນເພື່ອບາບຂອງເຮົາ. ພາລະກິດຂອງພຣະເຢຊູໃນການສະເດັດມາສູ່ແຜ່ນດິນໂລກ ແມ່ນເພື່ອຊ່ວຍເຮົາໃຫ້ລອດຈາກບາບຂອງເຮົາ. ພຣະອົງເຕັມພຣະໄທທີ່ຈະທົນທຸກ ແລະ ເສຍສະລະພຣະອົງເອງເພື່ອຈ່າຍຄ່າຂອງຄວາມຜິດພາດຂອງເຮົາ ເພື່ອວ່າເຮົາຈະສາມາດກັບໃຈ ແລະ ຮັບການອະໄພໄດ້. …”

Scripture

ພຣະຄຳພີ: “ເມື່ອໃດທີ່ບຸກຄົນອັນບໍລິສຸດຂອງພຣະເຈົ້າຂຽນ ຫລື ກ່າວໂດຍອຳນາດຂອງພຣະວິນຍານບໍລິສຸດ, ຖ້ອຍຄຳຂອງເພິ່ນ ‘ຈະເປັນພຣະຄຳພີ, ຈະເປັນພຣະປະສົງຂອງພຣະຜູ້ເປັນເຈົ້າ, ຈະເປັນພຣະດຳລັດຂອງພຣະຜູ້ເປັນເຈົ້າ, ຈະເປັນພຣະຄຳຂອງພຣະຜູ້ເປັນເຈົ້າ, ຈະເປັນສຸລະສຽງຂອງພຣະຜູ້ເປັນເຈົ້າ, ແລະ ເປັນອຳນາດຂອງພຣະເຈົ້າໄປສູ່ຄວາມລອດ’ (ຄຳສອນ ແລະ ພັນທະສັນຍາ 68:4). …

“ຈຸດປະສົງຫລັກຂອງພຣະຄຳພີແມ່ນເພື່ອເປັນພະຍານເຖິງພຣະຄຣິດ ແລະ ເພື່ອນຳພາລູກໆຂອງພຣະເຈົ້າ ເພື່ອວ່າພວກເຂົາຈະສາມາດເຂົ້າມາຫາພຣະອົງ ແລະ ຮັບຊີວິດນິລັນດອນ (ເບິ່ງ ໂຢຮັນ 5:39; 20:31; 1 ນີໄຟ 6:4; ໂມໄຊຢາ 13:33–35)” (Gospel Topics, “Scriptures,” ChurchofJesusChrist.org).