Kam Wan Man blong Lukaot long Sipsip
Mi hop se olgeta we yu stap givhan long olgeta oli luk yu olsem wan fren mo luksave se, tru long yu, olgeta oli gat wan fren, wan man blong protektem olgeta mo wan we oli save toktok wetem.
I no longtaem i pas, wan pikinini blong Praemeri we mi bin mitim long Jile i mekem mi smael. “Halo,” hem i talem, “Mi mi Deved. ?Bae yu tokbaot mi long jeneral konfrens?”
Long ol kwaet taem, mi tingting hevi long sapraes toktok blong Deved. Yumi evriwan i wantem man i luksave yumi. Yumi wantem kam impoten, man i tingbaot yumi mo gat filing ia se man i lavem yumi.
Ol sista mo brata, wanwan long yufala i impoten. Iven sapos oli no tokbaot yu long jeneral konfrens, Sevya i save mo i lavem yu. Sapos yu stap wari se toktok ia i tru o no, yu nid blong tingbaot hemia se Hem i “bin raetem [yu] long indsaedhan blong ol han blong [Hem].”1
From se yumi save se Sevya i lavem yumi, nao bae yumi save askem: ?wanem i bes wei blong yumi soem lav we yumi gat long Hem?
Sevya i askem long Pita, “?Yu, yu lavem mi … ?”
Pita i ansa, “Yes Masta. Yu save we mi mi lavem yu. Hem i talem long hem se, ‘Ale, yu givim kakae long ol smol sipsip blong mi.’”
Taem Hem i askem kwestin ia nambatu mo nambatri taem, “Yu, yu lavem mi?” Pita i harem nogud from we Jisas i askem long hem nambatri taem blong talem tru se hem i lavem Hem: “Masta, Yu yu save olgeta samting; Yu save we mi mi lavem yu. Jisas i talem long hem, ‘Ale yu givim kakae long ol sipsip blong mi.’”2
?Weswe? ?Pita i no soem hemwan finis se hem i wan man wei i biaen long Jisas? Taem tufala i mit blong fastaem daon long solwota, “wantaem nomo” hem i livim ol net blong hem mo biaen long Sevya.3 Pita i kam wan tru man blong winim ol man. Hem i bin wan disaepol we i komitim hemwan blong biaen long Sevya long taem we hemwan i stap givhan mo help blong tijim ol narawan long gospel blong Jisas Kraes.
Be naoia Lod we i girap bakegen i save se Hem bae i nomo stap long saed blong Pita blong soem long hem olsem wanem blong givhan mo taem blong hem i givhan. Taem bae Sevya i no stap, bae Pita i nidim blong lukaotem Spirit blong i lidim hem, blong hem i kasem revelesen hemwan, mo afta, blong hem i gat paoa blong tingting mo gat fet blong tekem aksen. Hem i lukluk nomo long ol sipsip blong Hem. Nao Sevya i wantem Pita tu blong mekem wanem Hem i wantem sapos Hem i stap. Hem i askem Pita blong kam wan man blong lukaot long sipsip.
Las Epril Presiden Russell M. Nelson i givim semfala invitesen long yumi blong givim kakae long ol sipsip blong Papa blong yumi long wan moa tabu wei, mo blong yumi mekem tru long givhan wok.4
Blong akseptem, wetem strong tingting, invitesen ia blong mekem, yumi mas developem wan hat olsem blong hemia blong wan man blong lukaot long sipsip, mo save gud ol nid blong ol sipsip blong Lod. ?So olsem wanem nao bae yumi kam ol man blong lukaot long sipsip we Lod i nidim yumi blong kam olsem?
Semmak wetem evri nara kwestin, yumi save lukluk long Sevya blong yumi, Jisas Kraes—Gudfala Man Ia blong Lukaot long Sipsip. Ol sipsip blong Sevya, oli save olgeta mo oli kaontem olgeta; oli bin lukaotgud long olgeta, mo oli bin mekem olgeta oli kam tugeta i kam long grup blong ol pipol blong God.
Hem I Save Yumi mo I Kaontem Yumi
Taem yumi traehad blong biaen long eksampol blong Sevya yumi mas, faswan, save mo kaontem ol sipsip blong Hem. Oli bin putum long han blong yumi, nem blong sam man mo woman mo famli blong lukaot long olgeta, blong meksua se evriwan long ol sipsip blong grup blong ol pipol blong God, bae oli kaontem olgeta, mo i no gat wan we oli fogetem i stap. Blong kaontem, i no blong tekem namba nomo, be i blong mekem sua se wanwan i filim lav blong Sevya tru long wan narawan we i givim seves long bihaf blong Hem. Long wei ia, bae evriwan i luksave se Papa long Heven we i gat lav, i save olgeta.
Mi jes mitim nomo wan yang woman we oli bin askem hem blong givhan long wan sista we yia blong hem i faef taem moa long hem. Tugeta, tufala i faenemaot se tufala tugeta i laekem miusik. Taem yang woman ia i stap visit, oli singsing ol singsing tugeta, mo tufala i serem ol fevret wan blong tufala. Tufala i stap krietem mo mekem i kam strong, wan rilesensip we i blesem laef blong tufala tugeta.
Mi hop se olgeta we yu stap givhan long olgeta oli luk yu olsem wan fren mo luksave se tru long yu, olgeta oli gat wan fren, wan blong protektem olgeta mo wan we oli save toktok wetem—wan we i save long ol hadtaem blong olgeta mo sapotem olgeta long wanem oli hop mo wantem long laef.
I no longtaem i pas mi bin kasem wan wok blong givhan blong visitim wan sista we mi mo givhan sista kompanion blong mi i no save gud. Taem mi stap kaonsel wetem Jess, givhan sista kompanion blong mi we i gat 16 yia, hem i givim waes tingting ia: “Yumitu nid blong save gud hem.”
Mekem se kwiktaem mitufala i agri blong tekem wan selfi mo presentem mitufala long teks, we mitufala i luk se i stret blong mekem. Mi holem mobaelfon, mo Jess i prestem baten blong tekem foto. Fasfala givhan janis blong mitufala, i blong mitufala i save mitufala faswan.
Long fas visit blong mitufala, mitufala i askem sista ia sapos i gat eni samting we mitufala i save putum long ol prea blong mitufala long bihaf blong hem. Hem i serem wan sore jalenj blong hemwan, mo talem se bae i laekem tumas blong mitufala i prea from hem. Ones fasin mo tras blong hem, i krietem strong lav bitwin mifala. Hem i wan swit janis blong save tingbaot hem long evri dei prea blong mi.
Taem bae yu stap prea, bae yu filim lav we Jisas Kraes i gat long olgeta we yumi stap givhan long olgeta. Serem lav ia wetem olgeta. ?Wanem gudfala wei moa i stap blong lukaot long sipsip blong Hem bitim blong helpem olgeta blong filim lav blong Hem—tru long yu?
Luklukaotem Gud Olgeta.
Wan nambatu wei blong developem hat blong wan man blong lukaot long sipsip, i blong luklukaotem gud ol sipsip blong Hem. Olsem ol memba blong Jos blong Jisas Kraes blong Ol Lata-dei Sent, yumi save muvum, fiksim, riperem, mo bildimbak kolosap eni samting. Yumi kwik blong lukluk long nid wetem wan han blong help o wan plet blong kuki. ?Be i gat moa i stap blong mekem?
?Be ol sipsip ia oli save se yumi stap luklukaotem gud long olgeta wetem lav mo yumi bae yumi tekem aksen blong help—be i no wet blong oli askem yumi?
Long Matiu 25 yumi ridim:
“Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem. Yufala i kam tekem ples ya blong yufala, …
“From we taem we mi mi hanggri, yufala i givim kakae long mi, mo taem we mi mi tosta, yufala i givim wota long mi. Taem we mi mi strenja, yufala i tekem mi mi go long haos blong yufala …
“Nao bae ol stret man ia bae oli talem long mi se, ‘?Masta, mifala i luk yu wataem we yu yu hanggri nao mifala i givim kakae long yu? ?No yu yu tosta nao mifala i givim wota long yu?
“Mifala i luk yu wataem we yu yu strenja afta mifala i tekem yu kam long haos blong mifala?”5
Ol brata mo sista. Ki toktok, hem i, luk. Olgeta we oli stret mo gud oli bin luk olgeta long nid from olgeta i se oli bin luklukaotem gud olgeta mo luksave nid. Yumi tu, yumi save gat wan ae we i lukaot gud, blong i save help mo givim kamfot, blong selebret, mo tu, blong drim. Taem yumi stap tekem aksen, yumi save se bae yumi save kasem promes we i stap long Matiu: “Taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.”6
Wan fren—bae yumi singaotem Jon—i serem wanem i save hapen taem yumi luksave nid blong narawan we ol man oli no luksave: “Wan sista long wod blong mi i traem blong kilimded hemwan. Afta long tu manis, mi faenemaot se i no gat wan long kworom blong mi i visitim man blong hem blong tokbaot sapraes nogud eksperiens ia. Sore tu we, mi tu, mi no bin mekem. Long en, mi askem man blong hem blong go lanj. Hem i wan man blong sem, hem i no open tumas. Be taem mi talem: ‘Waef blong yu i traem kilimded hemwan. Hem mas hevi tumas long yu. ?Yu wantem tokbaot?’ Hem i krae we i no holemtaet hem. Storian blong mitufala i givim plante kamfot mo developem wan naesfala filing blong kam tugeta mo gat tras long kwiktaem nomo.”
Jon i ademap, “Mi ting se fasin blong yumi i blong tekem kuki nomo be i no blong faenemaot hao blong handelem situesen ia long wan ones wei mo lav.”7
Ol sipsip blong yumi, ating oli stap harem nogud, oli lus, o iven oli disaed blong go lus; olsem man blong lukaot long sipsip, yumi save stap olsem ol faswan blong luk nid blong olgeta. Yumi save lisin mo soem lav we i no jajem man, mo givim hop mo help wetem gudfala jajmen blong Tabu Spirit.
Ol sista mo brata, wol ia i fulap wetem hop mo glad from ol smol aksen blong kaen fasin we yumi stap mekem. Taem yu stap lukaotem blong kasem daereksen blong Lod blong save wei blong soem lav blong Hem mo luk ol nid blong olgeta we yu stap givhan long ol, ol ae blong yu bae oli open. Ol tabu wok blong givhan oli givim yumi tabu raet blong kasem insperesen. Yu save lukaotem insperesen wetem tras.
Kam Insaed long Grup blong Ol Pipol blong God
Nambatri, hem i we yumi wantem ol sipsip blong yumi oli kam insaed long grup blong ol pipol blong God. Blong mekem olsem, yumi mas luk weaples oli stap long rod ia blong kavenan, mo rere blong wokbaot wetem olgeta long rod blong fet blong olgeta. Long yumi, hem i wan tabu janis ia blong kam blong save hat blong olgeta, mo daerektem olgeta blong lukluk i go long Sevya.
Sista Josivini long Fiji i gat hadtaem blong luk weaples blong go long fored long rod ia —wetem ae blong hem. Fren blong hem i luk Josivini i traehad blong luk gud ol skripja mo save ridim Hem i givim Josivini niu aeglas blong rid mo wan yelo pensel we hem i stap haelaetem evri ples we nem blong Jisas Kraes i kamaot long Buk blong Momon. Wanem i stat olsem wan tingting blong wantem tumas blong givhan mo help wetem skripja stadi, long en, Josivini i go long tempol blong fas taem, hemia 28 yia afta we hem i bin baptaes.
Nomata ol sipsip blong yumi oli strong o wik, oli glad o oli safa, yumi save mekemsua se i no gat wan i wokbaot hemwan. Yumi save lavem olgeta nomata wanem level long saed blong spirit oli stap long hem mo givim sapot mo leftemap tingting blong oli muv i go fored. Taem yumi stap prea mo lukaot blong andastanem hat blong olgeta, mi testifae se Papa long Heven bae i daerektem yumi mo Spirit blong Hem bae i go wetem yumi. Yumi gat janis ia blong stap “ol enjel raon long [olgeta]” taem Hem i stap go fastaem long olgeta8
Lod i stap invaetem yumi blong fidim ol sipsip blong Hem, blong luklukaotem gud grup blong Hem olsem we bae Hem i mekem. Hem i stap invaetem yumi blong stap ol man blong lukaot long sipsip long evri nesen, evri kantri. (Mo yes Elda Uchtdorf, mifala i lavem mo nidim ol Jemani dog blong lukaot sipsip.) Mo Hem i wantem tumas blong ol yang pipol blong Hem oli joen long wok ia.
Ol yut blong yumi oli sam long ol man blong lukaot long sipsip, we oli strong moa long evriwan. Olgeta, olsem we Presiden Russell M. Nelson i talem, “oli ol gudgudfala wan we Lod i eva sendem i kam long wol ia.” Olgeta oli ol “strong spirit,” “ol bes pipol” we oli folem Sevya.9 ?Traem tingbaot paoa ia we ol man blong lukaot long sipsip olsem olgeta bae oli tekem taem oli kea long ol sipsip blong Hem? Taem yumi stap mekem wok blong givhan wetem olgeta yut ia, yumi luk ol bigfala samting oli hapen.
!Ol yang woman mo ol yang man, mifala i nidim yufala! Sapos yu no gat wan wok blong givhan, toktok wetem Presiden blong Rilif Sosaeti o kworom presiden blong yu. Olgeta, bae oli glad taem yu yu wantem blong mekemsua se ol sipsip blong Hem, oli save olgeta mo kaontem olgeta, oli luklukaotem gud olgeta mo mekem oli kam stap long medel blong ol pipol blong God.
Taem dei ia bae i kam, we bae yumi nildaon long leg blong Sevya we yumi lavem tumas, we yumi bin givim kakae long ol pipol blong grup blong Hem, mi prea se bae yumi save ansa olsem we Pita i bin mekem: “Yes Masta. Yu yu save se mi mi lavem yu.”10 Olgeta ia, ol sipsip blong Yu, mifala i lavem olgeta, oli sef, oli stap hom. Long nem blong Jisas Kraes, amen.