ការងារបម្រើជួយពង្រឹងដល់កូរ៉ុមបព្វជិតភាពមិលគីស្សាដែក និង សមាគមសង្គ្រោះ

សំណួរដែលចោទសួរញឹកញាប់

ការងារបម្រើជួយពង្រឹងដល់កូរ៉ុមបព្វជិតភាពមិលគីស្សាដែក និង សមាគមសង្គ្រោះ

លិខិតគណៈប្រធានទីមួយចុះថ្ងៃទី ២ ខែ មេសា ឆ្នាំ ២០១៨៖ ការងារបម្រើជាមួយកូរ៉ុមបព្វជិតភាពមិលគីស្សាដែក និង សមាគមសង្គ្រោះដែលបានពង្រឹង

ការងារបម្រើ ជាមួយកូរ៉ុមបព្វជិតភាពមិលគីស្សាដែក និង សមាគមសង្គ្រោះដែលបានពង្រឹង ៖ សំណួរបន្ថែមទៀតដែលគេចោទសួរញឹកញាប់

ការងារបម្រើ និងជីវិតរបស់ព្រះយេស៊ូវ បង្ហាញនូវគំរូនៃព្រះបញ្ញត្តិធំៗចំនួនពីរគឺ ៖ « ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង » និង « ត្រូវឲ្យស្រឡាញ់អ្នកជិតខាងដូចខ្លួនឯង » ( ម៉ាថាយ ២២:៣៧, ៣៩ ) ។ ក្នុងនាមជាសមាជិកក្នុងសាសនាចក្ររបស់ព្រះអង្គសង្គ្រោះ ដែលយើងពិតជាមានបំណងប្រាថ្នាធ្វើជាសិស្សរបស់ទ្រង់ យើងគួរតែធ្វើតាមឱវាទរបស់ទ្រង់ ឲ្យស្រឡាញ់ ហើយបម្រើព្រះវរបិតាយើងដែលគង់នៅស្ថានសួគ៌ និងបុត្រាបុត្រីរបស់ទ្រង់ ។ ព្រះអង្គសង្គ្រោះបានមានព្រះបន្ទូលថា « បើសិនជាអ្នកស្រឡាញ់យើង ចូរបម្រើយើង » ( គ និង ស ៤២:២៩ ) ។ ស្ដេចបេនយ៉ាមីនបានបង្រៀនថា « កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។ អាលម៉ាបានសង្ខេបកាតព្វកិច្ចរបស់យើងដោយកត់សម្គាល់ថា « ហេតុដូច្នេះហើយ ពួកគេបានថែទាំប្រជាជន ហើយបានផ្ដល់ដល់គេនូវអ្វីៗដែលទាក់ទងទៅនឹងសេចក្ដីសុចរិត » ( ម៉ូសាយ ២៣:១៨ ) ។

ដើម្បីជួយយើងក្នុងការឆ្លើយតបទៅនឹងការត្រាស់បង្គាប់ដ៏ទេវភាពឲ្យមើលថែ ហើយបម្រើមនុស្សដទៃ នោះគណៈប្រធានទីមួយបានប្រកាសការកែប្រែដូចខាងក្រោមនេះ ដែលត្រូវបានធ្វើឡើងដើម្បីផ្ដោតកិច្ចខិតខំរបស់កូរ៉ុមបព្វជិតភាពមិលគីស្សាដែក និង សមាគមសង្គ្រោះទៅលើការងារបម្រើដូចដែលព្រះអង្គសង្គ្រោះបានធ្វើ ។ ការកែប្រែទាំងនេះរួមមានដូចខាងក្រោមនេះ ៖

នៅកម្រិតវួដ, មានកូរ៉ុមបព្វជិតភាពមិលគីស្សាដែកមួយ ។
នៅកម្រិតស្តេក, មានកូរ៉ុមសង្ឃជាន់ខ្ពស់មួយ ។
ការងារបម្រើជំនួសឲ្យការបង្រៀនតាមផ្ទះ និងការបង្រៀនសួរសុខទុក្ខ ។
ការដាក់បញ្ចូលយុវវ័យនៅក្នុងការងារបម្រើ ។

នៅក្នុងការគាំទ្រដល់ការកែប្រែនេះ វួដ និង ស្តេក ឈប់ធ្វើការប្រជុំក្រុមប្រឹក្សាប្រតិបត្តិបព្វជិតភាពទៀតហើយ ។ ប្រសិនបើមានបញ្ហាពិសេសណាមួយក្នុងវួដកើតឡើង ដូចជា បញ្ហាលំបាករបស់គ្រួសារមួយ ឬបញ្ហាខាងសុខុមាលភាពខុសប្រក្រតី នោះរឿងនោះគួរតែត្រូវបានលើកឡើងនៅក្នុងការប្រជុំគណៈប៊ីស្សពបន្ថែមទៀត ។ បញ្ហាដែលមិនសូវមានរំញោចខ្លាំងផ្សេងៗទៀត អាចត្រូវបានដោះស្រាយនៅក្នុងក្រុមប្រឹក្សាវួដ ។ ការប្រជុំមួយដែលធ្លាប់បានហៅថា « ការប្រជុំគណៈកម្មការប្រតិបត្តិបព្វជិតភាពស្តេក » ត្រូវបានហៅថា « ការប្រជុំក្រុមប្រឹក្សាជាន់ខ្ពស់ » ( សូមមើលសំណួរទី៧ និង ទី១៥ ខាងក្រោម ) ។

នៅកម្រិតវួដ, មានកូរ៉ុមបព្វជិតភាពមិលគីស្សាដែកមួយ

ប្រធាន រ័សុល អិម ណិលសុន បានបង្រៀនថា « វិវរណៈមិនចាំបាច់កើតឡើងទាំងអស់ក្នុងពេលតែមួយទេ ។ វាអាចកើនឡើងតាមកម្រិត » ។^១ ព្រឹត្តិការណ៍លាតត្រដាងនានាអំពីកូរ៉ុមបព្វជិតភាព និង ការយល់ដឹងមួយអំពីកូនសោបព្វជិតភាព ផ្ដល់ឲ្យនូវលំនាំមួយនៃវិវរណៈដែលកើនឡើងតាមកម្រិត ។ ពេញមួយប្រវត្តិសាសនាចក្រ ព្រះអម្ចាស់បានត្រាស់សម្ដែងអំពីព្រះឆន្ទៈទ្រង់មួយបន្ទាប់ម្ដងៗ ដោយប្រទានពរដល់បុត្រាបុត្រីទ្រង់បន្តិចម្ដងៗ ឲ្យមាននូវការយល់ដឹងអំពីរបៀបអនុវត្តគោលការណ៍នានានៃដំណឹងល្អទៅក្នុងស្ថានភាពបច្ចុប្បន្ន ( សូមមើល គ និង ស ៤៦:១៥–១៦ ) ។

អស់រយៈពេលច្រើនឆ្នាំ គណៈប្រធានទីមួយ និងកូរ៉ុមនៃពួកសាវកដប់ពីរនាក់ បានពិចារណាអំពីការកែប្រែដែលមានពិពណ៌នាខាងក្រោមនេះ ។ មានតែតាមរយៈការអធិស្ឋានយ៉ាងច្រើន ការសិក្សាអំពីមូលដ្ឋានគ្រឹះនៃកូរ៉ុមបព្វជិតភាពយោងទៅតាមព្រះគម្ពីរដោយប្រុងប្រយ័ត្ន ការមូលមតិគ្នារបស់ថ្នាក់ដឹកនាំជាអធិបតីក្នុងសាសនាចក្រ និងការបញ្ជាក់ថា នេះគឺជាព្រះឆន្ទៈរបស់ព្រះអម្ចាស់ប៉ុណ្ណោះ ទើបថ្នាក់ដឹកនាំបានឆ្ពោះទៅមុខជាមួយនឹងការរៀបចំកូរ៉ុមនៅកម្រិតវួដ និងស្តេកឡើងវិញ ដោយធ្វើឲ្យមានការបោះជំហានមួយទៀតនេះនៅក្នុងការលាតត្រដាងអំពីការស្ដារឡើងវិញ ។

១. តើមានការកែប្រែអ្វីខ្លះសម្រាប់ក្រុមសង្ឃជាន់ខ្ពស់វួដ និង កូរ៉ុមអែលឌើរ ?

ឥឡូវនេះ សមាជិកក្នុងកូរ៉ុមអែលឌើរ និង ក្រុមសង្ឃជាន់ខ្ពស់នឹងត្រូវបានដាក់បញ្ចូលទៅជាកូរ៉ុមតែមួយដែលមានគណៈប្រធានតែមួយ ។ បើចំនួន និងសាមគ្គីភាពកើនឡើង កូរ៉ុមនេះនឹងត្រូវបានចាត់តាំងជា « កូរ៉ុមអែលឌើរ » ចំណែកឯក្រុមសង្ឃជាន់ខ្ពស់វួដឈប់មានទៀតហើយ ។

កូរ៉ុមអែលឌើររួមបញ្ចូលអែលឌើរ និង អ្នកត្រៀមកាន់តំណែងអែលឌើរទាំងអស់នៅក្នុងវួដ និង សង្ឃជាន់ខ្ពស់ដែលមិនកំពុងបម្រើនៅក្នុងគណៈប៊ីស្សព នៅក្នុងគណៈប្រធានស្តេក ក្រុមប្រឹក្សាជាន់ខ្ពស់ ឬជាលោកអយ្យកោដែលកំពុងបំពេញមុខងារ ។

២. តើគណៈប្រធានកូរ៉ុមអែលឌើរត្រូវបានបង្កើតឡើងតាមរបៀបណា ?

ដោយមានជំនួយពីទីប្រឹក្សារបស់លោក ប្រធានស្តេកនឹងដោះលែងថ្នាក់ដឹកនាំក្រុមសង្ឃជាន់ខ្ពស់ និង គណៈប្រធានកូរ៉ុមអែលឌើរបច្ចុប្បន្ន ។ បន្ទាប់មក ប្រធានស្តេកនឹងហៅប្រធានកូរ៉ុមអែលឌើរថ្មីមួយរូបនៅក្នុងវួដនីមួយៗឲ្យបម្រើ ហើយប្រធានស្តេក ឬទីប្រឹក្សាមួយរូបនៅក្នុងគណៈប្រធានស្តេក ឬក្រុមប្រឹក្សាជាន់ខ្ពស់មួយរូបដែលត្រូវបានចាត់តាំង នឹងហៅទីប្រឹក្សាដែលត្រូវបានផ្ដល់អនុសាសន៍ឲ្យបម្រើនៅក្នុងគណៈប្រធានកូរ៉ុមអែលឌើរ ។ គណៈប្រធានកូរ៉ុមអែលឌើរថ្មីអាចរួមបញ្ចូលពួកអែលឌើរ និងពួកសង្ឃជាន់ខ្ពស់ ដែលមានវ័យ និងបទពិសោធន៍ផ្សេងៗគ្នា ឲ្យបម្រើជាមួយគ្នានៅក្នុងគណៈប្រធានកូរ៉ុមមួយ ។ អែលឌើរ ឬសង្ឃជាន់ខ្ពស់មួយរូបអាចបម្រើជាប្រធានកូរ៉ុម ឬជាទីប្រឹក្សា ។^២

៣. តើនរណាជាអ្នកដឹកនាំកិច្ចការប្រធានកូរ៉ុមអែលឌើរ ?

ប្រធានកូរ៉ុមអែលឌើរ មានការទទួលខុសត្រូវដោយផ្ទាល់ចំពោះប្រធានស្តេក ដែលផ្ដល់ការបំពាក់បំប៉ន និងការដឹកនាំមកពីគណៈប្រធានស្តេក និងតាមរយៈក្រុមប្រឹក្សាជាន់ខ្ពស់ ។ ក្នុងនាមជាសង្ឃជាន់ខ្ពស់ធ្វើអធិបតីនៅក្នុងវួដ ប៊ីស្សពក៏ជួបប្រជុំជាទៀងទាត់ជាមួយប្រធានកូរ៉ុមអែលឌើរផងដែរ ។ ប៊ីស្សពផ្ដល់ការប្រឹក្សាជាមួយគាត់ ហើយផ្ដល់ការដឹកនាំត្រឹមត្រូវ ទាក់ទងទៅនឹងរបៀបបម្រើ ហើយផ្ដល់ពរដល់សមាជិកវួដឲ្យបានល្អបំផុត ដោយធ្វើការចុះសម្រុងជាមួយនឹងអង្គការទាំងអស់របស់វួដ ។ ( សូមមើល ក្បួនខ្នាតភាគ ២ ចំណុច ៧.៣.១ )

៤. តើការកែប្រែនៅក្នុងរចនាសម្ព័ន្ធកូរ៉ុមនេះ ផ្លាស់ប្ដូរតំណែងបព្វជិតភាពដែលសមាជិកកូរ៉ុមកាន់ដែរឬទេ ?

អត់ទេ ។ អែលឌើរនៅតែជាអែលឌើរ ហើយសង្ឃជាន់ខ្ពស់នៅតែជាសង្ឃជាន់ខ្ពស់ ស្របទៅតាមតំណែងបព្វជិតភាពរបស់ពួកគេ ។ ទោះជាយ៉ាងណាក៏ដោយ អែលឌើរបន្តត្រូវបានតែងតាំងជាសង្ឃជាន់ខ្ពស់ នៅពេលពួកគេត្រូវបានហៅឲ្យបម្រើនៅក្នុងគណៈប្រធានស្តេក សង្ឃជាន់ខ្ពស់ ឬគណៈប៊ីស្សព—ឬនៅពេលផ្សេងទៀតដែលត្រូវបានកំណត់ដោយគណៈប្រធានស្តេក តាមរយៈការពិចារណាប្រកបដោយការអធិស្ឋាន និងការបំផុសគំនិត ។

៥. តើវួដមួយអាចមានកូរ៉ុមអែលឌើរច្រើនជាងមួយដែរឬទេ ?

ប្រាកដណាស់ ។ នៅក្នុង គោលលទ្ធិ និង សេចក្ដីសញ្ញា ១០៧:៨៩ នៅពេលវួដមួយមានចំនួនអ្នកកាន់បព្វជិតភាពមិលគីស្សាដែកសកម្មច្រើនជាងតាមធម្មតា នោះថ្នាក់ដឹកនាំអាចរៀបចំកូរ៉ុមអែលឌើរច្រើនជាងមួយ ។ នៅក្នុងករណីនេះ កូរ៉ុមនីមួយៗគួរតែមានតុល្យភាពសមហេតុផលមួយទាក់ទងទៅនឹងអាយុ បទពិសោធន៍ ព្រមទាំងតំណែងបព្វជិតភាព និងភាពរឹងមាំ ។

៦. តើសមាជិកនៃគណៈប្រធានព្រះវិហារបរិសុទ្ធ បេសកកម្ម និងមជ្ឈមណ្ឌលបំពាក់បំប៉នអ្នកផ្សព្វផ្សាយសាសនាស្ថិតនៅក្នុងកូរ៉ុមមួយណា ?

បងប្អូនប្រុសទាំងនេះគឺជាសមាជិកនៃកូរ៉ុមអែលឌើរវួដរបស់ពួកគេ ។

នៅកម្រិតស្តេក, មានកូរ៉ុមសង្ឃជាន់ខ្ពស់មួយ

៥. តើមានការកែប្រែអ្វីខ្លះ សម្រាប់កូរ៉ុមសង្ឃជាន់ខ្ពស់ស្តេក ?

គណៈប្រធានស្តេកបន្តបម្រើជាគណៈប្រធានកូរ៉ុមសង្ឃជាន់ខ្ពស់ស្តេក ។ សមាជិកក្នុងកូរ៉ុមនោះគឺមានតែសង្ឃជាន់ខ្ពស់ទាំងឡាយណា ដែលកំពុងបម្រើនៅក្នុងគណៈប្រធានស្តេក គណៈប៊ីស្សព ក្រុមប្រឹក្សាជាន់ខ្ពស់ និង លោកអយ្យកោស្តេកដែលកំពុងបំពេញមុខងារប៉ុណ្ណោះ ។ ស្មៀន និងលេខាប្រតិបត្តិវួដ និងស្តេក ពុំមែនជាសមាជិកក្នុងកូរ៉ុមសង្ឃជាន់ខ្ពស់ទេ ។

ជាទូទៅ សមាជិកក្នុងកូរ៉ុមសង្ឃជាន់ខ្ពស់ស្តេក នឹងជួបប្រជុំជាមួយកូរ៉ុមអែលឌើរ ប្រសិនបើមិនត្រូវបានចាត់តាំងឲ្យទៅកន្លែងផ្សេងទៀតទេនោះ ។

៧. តើកូរ៉ុមសង្ឃជាន់ខ្ពស់ស្តេកមានតួនាទីអ្វីខ្លះ ?

នៅក្នុងតួនាទីជាអធិបតីរបស់ពួកលោក ប្រសិនបើចាំបាច់ គណៈប្រធានស្តេកជួបប្រជុំជាមួយសមាជិកកូរ៉ុមសង្ឃជាន់ខ្ពស់ស្តេក ដើម្បីផ្ដល់ការបំពាក់បំប៉ន និងដើម្បីជួយដល់សមាជិកកូរ៉ុមនៅក្នុងការបម្រើរបស់ពួកគេ ។ ការប្រជុំទាំងឡាយរបស់ស្តេកដែលមានស្រាប់ បានពន្យល់នៅក្នុង ក្បួនខ្នាតភាគ ២ ចំណុច ១៨.៣ បន្តជាមួយនឹងការកែប្រែដូចខាងក្រោម ៖

ការប្រជុំគណៈកម្មការប្រតិបត្តិបព្វជិតភាពស្តេក ត្រូវបានហៅថា « ការប្រជុំក្រុមប្រឹក្សាជាន់ខ្ពស់ » ។
ការប្រជុំប្រចាំឆ្នាំសម្រាប់សង្ឃជាន់ខ្ពស់ ដែលត្រូវបានតែងតាំងទាំងអស់នៅក្នុងស្តេក ឈប់មានទៀតហើយ ។ ទោះជាយ៉ាងណាក៏ដោយ គណៈប្រធានស្តេកធ្វើការប្រជុំប្រចាំឆ្នាំសម្រាប់កូរ៉ុមសង្ឃជាន់ខ្ពស់ស្តេក ។

៩. តើអ្វីដែលជាគោលបំណងនៃការកែប្រែកូរ៉ុមបព្វជិតភាពមិលគីស្សាដែក ?

ការមានកូរ៉ុមបព្វជិតភាពមិលគីស្សាដែកតែមួយនៅក្នុងវួដ ជួយបង្រួបបង្រួមអ្នកកាន់បព្វជិតភាពឲ្យសម្រេចបានរាល់ទិដ្ឋភាពនៃកិច្ចការនៃសេចក្ដីសង្គ្រោះ រួមមាន កិច្ចការព្រះវិហារបរិសុទ្ធ និងពង្សប្រវត្តិ ដែលកាលពីមុនត្រូវបានសម្របសម្រួលដោយអ្នកដឹកនាំក្រុមសង្ឃជាន់ខ្ពស់ ។ វាអនុញ្ញាតឲ្យសមាជិកកូរ៉ុមគ្រប់វ័យ និងគ្រប់ជីវប្រវត្តិ ទទួលបានប្រយោជន៍ពីទស្សនវិស័យ និងបទពិសោធន៍នានាពីអ្នកទាំងឡាយណាដែលមានស្ថានភាពជីវិតខុសៗគ្នា ។ វាក៏ផ្ដល់ឱកាសបន្ថែមដល់អ្នកកាន់បព្វជិតភាពមិលគីស្សាដែកដែលមានបទពិសោធន៍ដើម្បីផ្ដល់ការប្រឹក្សាដល់អ្នកដទៃ រួមមាន អ្នកត្រៀមកាន់តំណែងអែលឌើរ សមាជិកថ្មី យុវមជ្ឈិមវ័យ និងអ្នកដែលត្រឡប់មកសកម្មក្នុងសាសនាចក្រវិញ ។

ការកែប្រែទាំងនេះជួយកូរ៉ុមអែលឌើរ និងសមាគមសង្គ្រោះសហប្រតិបត្តិការកិច្ចការរបស់ពួកគេ ។ វាក៏ជួយសម្រួលដល់ការសហប្រតិបត្តិការរបស់កូរ៉ុម ជាមួយនឹងគណៈប៊ីស្សព និងក្រុមប្រឹក្សាវួដផងដែរ ។ ហើយវាអនុញ្ញាតឲ្យប៊ីស្សពបែងចែកការទទួលខុសត្រូវបានកាន់តែច្រើនដល់កូរ៉ុមអែលឌើរ និងប្រធានសមាគមសង្គ្រោះ ដើម្បីឲ្យលោក និងទីប្រឹក្សារបស់លោក អាចផ្ដោតសំខាន់ទៅលើកាតព្វកិច្ចចម្បងៗរបស់ពួកលោក—ជាពិសេសការធ្វើជាអធិបតីលើបព្វជិតភាពអើរ៉ុន និងយុវនារី ។

១០. នៅក្នុងស្ដេកមួយ តើពួកសង្ឃជាន់ខ្ពស់ដែលបម្រើនៅក្នុងគណៈប្រធានសាខាគឺជាសមាជិកនៃកូរ៉ុមនៃសង្ឃជាន់ខ្ពស់ឬទេ ?

អត់ទេ ។ ពួកសង្ឃជាន់ខ្ពស់ដែលបម្រើនៅក្នុងគណៈប្រធានសាខានៅក្នុងស្ដេកមួយពុំមែន ជាសមាជិកនៃកូរ៉ុមសង្ឃជាន់ខ្ពស់នោះទេ ។ សមាជិកនៃកូរ៉ុមសង្ឃជាន់ខ្ពស់គឺជាអស់អ្នកដែលមានការហៅបម្រើនៅក្នុងគណៈប្រធានស្ដេក នៅក្នុងគណៈប៊ីស្សព នៅក្នុងក្រុមប្រឹក្សាជាន់ខ្ពស់ និងជាលោកអយ្យកោដែលកំពុងបំពេញមុខងារប៉ុណ្ណោះដែលតម្រូវឲ្យពួកគាត់ជាសង្ឃជាន់ខ្ពស់ ។

១១. តើពួកអែលឌើរដែលកំពុងបម្រើនៅក្នុងគណៈប៊ីស្សព ( ឧទាហរណ៍ នៅក្នុងស្ដេកយុវមជ្ឈិមវ័យនៅលីវ ) ជាសមាជិកនៃកូរ៉ុមសង្ឃជាន់ខ្ពស់ឬទេ ?

អត់ទេ ។ ពួកអែលឌើរដែលកំពុងបម្រើនៅក្នុងគណៈប៊ីស្សពពុំមែនជាសមាជិកនៃកូរ៉ុមសង្ឃជាន់ខ្ពស់នោះទេ ។

១២. តើការងារបម្រើអនុវត្តចំពោះសមាជិកនៃកូរ៉ុមសង្ឃជាន់ខ្ពស់យ៉ាងដូចម្ដេច ?

នៅក្រោមការដឹកនាំរបស់ប៊ីស្សពរបស់ពួកគាត់ ដែលជាសង្ឃជាន់ខ្ពស់ជាអធិបតីនៅក្នុងវួដ នោះសមាជិកនៃកូរ៉ុមសង្ឃជាន់ខ្ពស់ និងគ្រួសាររបស់ពួកគេនឹងមានបងប្អូនប្រុសស្រីដែលផ្ដល់ការងារបម្រើចាត់ឲ្យទៅគ្រួសារពួកគាត់ដោយកូរ៉ុមអែលឌើរ និងសមាគមសង្រ្គោះរបស់ពួកគាត់ ។

ដោយសារតែគណៈប្រធានស្ដេក និងគណៈប៊ីស្សពមានការទទួលខុសត្រូវចំពោះសមាជិកទាំងអស់នៅក្នុងស្ដេក និងវួដ នោះបងប្អូនប្រុសទាំងនេះ ជាទូទៅពុំត្រូវបានចាត់តាំងឲ្យធ្វើជាបងប្អូនប្រុសដែលផ្ដល់ការងារបម្រើចំពោះបុគ្គល ឬក្រុមគ្រួសារជាក់លាក់ណាមួយនោះទេ ។ ទីប្រឹក្សាជាន់ខ្ពស់ និងលោកអយ្យកោដែលកំពុងបំពេញមុខងារអាចត្រូវបានចាត់ អាស្រ័យទៅលើស្ថានភាពក្នុងតំបន់ដែលបានកំណត់ដោយប្រធានស្ដេក ។ បើពួកគាត់ត្រូវបានចាត់តាំង នោះនឹងជាការចាត់តាំងមកពីប្រធានកូរ៉ុមអែលឌើររបស់ពួកគាត់ដែលស្ថិតនៅក្រោមការដឹកនាំរបស់ប៊ីស្សពក្នុងវួដរបស់ពួកគាត់ ។

បន្ថែមពីលើការទទួលខុសត្រូវសំខាន់ៗដទៃទៀតដូចជាសង្ឃជាន់ខ្ពស់ជាអធិបតី និងចៅក្រមនៃអ៊ីស្រាអែល ប៊ីស្សពមានការទទួលខុសត្រូវជាក់លាក់មួយ ព្រមជាមួយនឹងទីប្រឹក្សារបស់ពួកគាត់ ដើម្បីមើលថែដល់យុវវ័យ ។ គោលលទ្ធិ និង សេចក្ដីសញ្ញា ១០៧:១៥ ចែងថា « គណៈប៊ីស្សពគឺជាគណៈប្រធាននៃបព្វជិតភាព [ អើរ៉ុន ] នេះ ហើយកាន់កូនសោទាំងឡាយ ឬសិទ្ធិអំណាចនៃរបស់ដដែល » ។ ក្បួនខ្នាតភាគ ១ ២.២ បានចែងថា « សមាជិកនៃគណៈប៊ីស្សព មើលថែ និងចិញ្ចឹមបីបាច់ដល់យុវជន និងយុវនារីនៅក្នុងវួដ » ។

ស្រដៀងគ្នានេះផងដែរ ប្រធានស្ដេកគឺជាសង្ឃជាន់ខ្ពស់ជាអធិបតីក្នុងស្ដេកគឺជា « អ្នកដឹកនាំខាងវិញ្ញាណដ៏សំខាន់នៅក្នុងស្តេក » (ក្បួនខ្នាតភាគ ១ ១.១.១ ) និង « ធ្វើជាអធិបតីលើកិច្ចការនៃសេចក្តីសង្គ្រោះ » (ក្បួនខ្នាតភាគ ១ ១.១.២ ) ។

ការងារបម្រើជំនួសឲ្យការបង្រៀនតាមផ្ទះ និងការបង្រៀនសួរសុខទុក្ខ

អស់រយៈពេលច្រើនឆ្នាំហើយ គ្រូបង្រៀនតាមផ្ទះ និង គ្រូបង្រៀនសួរសុខទុក្ខ បានឆ្លើយតបចំពោះការចាត់តាំងឲ្យចុះសួរសុខទុក្ខតាមផ្ទះរបស់សមាជិកម្នាក់ៗជារៀងរាល់ខែ នាំយកសារលិខិតមួយទៅជាមួយ និងជួយ ប្រសិនបើចាំបាច់ ។ មានការបម្រើដ៏លះបង់ និងដោយពុំគិតពីខ្លួនឯងអស់ជាច្រើនម៉ោង ត្រូវបានផ្ដល់ឲ្យនៅក្នុងកិច្ចការដ៏អស្ចារ្យនេះ ។

ដោយស្ថាបនានៅលើការលះបង់នោះ ឥឡូវនេះ ថ្នាក់ដឹកនាំសាសនាចក្រ ស្នើឲ្យសមាជិកបង្កើនការផ្ដោតរបស់ពួកគេទៅលើការមើលថែដូចជាព្រះគ្រីស្ទបានធ្វើទៅដល់មនុស្សដទៃ ទាំងខាងវិញ្ញាណ និងខាងសាច់ឈាម ( សូមមើល ក្បួនខ្នាតភាគ ២ ចំណុច ៣.២.៣ ) ។ ដើម្បីសង្កត់ធ្ងន់ទៅលើការមើលថែនោះ ឥឡូវនេះ កម្មវិធីការបង្រៀនតាមផ្ទះ និងការបង្រៀនសួរសុខទុក្ខកាលពីមុននោះ មានកិច្ចខិតខំដូចគ្នា ដែលត្រូវបានហៅថា « ការងារបម្រើ » ដែលត្រូវបានមើលខុសត្រូវដោយគណៈប្រធានកូរ៉ុមអែលឌើរ និងសមាគមសង្គ្រោះ នៅក្រោមការដឹកនាំរបស់ប៊ីស្សព ។

១៣. តើ « ការងារបម្រើ » គឺជាអ្វី ?

ព្រះអង្គសង្គ្រោះបានបង្ហាញជាគំរូអំពីអត្ថន័យនៃការងារបម្រើ នៅពេលទ្រង់បម្រើចេញពីសេចក្ដីស្រឡាញ់ចំពោះព្រះវរបិតាទ្រង់ និងចំពោះបុគ្គលម្នាក់ៗ ( សូមមើល យ៉ូហាន ១៥:៩–១០ ) ។ ទ្រង់ស្រឡាញ់ បង្រៀន អធិស្ឋានសម្រាប់មនុស្សដទៃ លួងលោមចិត្ត ហើយប្រទានពរដល់មនុស្សជុំវិញទ្រង់ ដោយអញ្ជើញមនុស្សទាំងអស់ឲ្យដើរតាមទ្រង់ ( សូមមើល ម៉ាកុស ៨:៣៤ ) ។ នៅពេលសមាជិកសាសនាចក្រផ្ដល់ការងារបម្រើ ពួកគេព្យាយាមបម្រើដោយប្រកបដោយការអធិស្ឋានដូចជាទ្រង់បានធ្វើ—ដើម្បី « កម្សាន្ដទុក្ខដល់អស់អ្នកណាដែលកំពុងត្រូវការកម្សាន្ដទុក្ខ » « មើលការខុសត្រូវលើសាសនាចក្រជានិច្ច ហើយនៅជាមួយ និងចម្រើនកម្លាំងពួកគេ » « ទៅផ្ទះនៃសមាជិកម្នាក់ៗ ដើម្បីសួរសុខទុក្ខ » និងជួយមនុស្សម្នាក់ៗឲ្យក្លាយជាសិស្សពិតរបស់ព្រះយេស៊ូវគ្រីស្ទ ( ម៉ូសាយ ១៨:៩, គ និង ស ២០:៥១, ៥៣ សូមមើលផងដែរ យ៉ូហាន ១៣:៣៥ ) ។

នៅពេលសមាជិកផ្ដល់ការងារបម្រើ ពួកគេសម្រេចអំពីភាពញឹកញាប់ និងរបៀបនៃការទាក់ទងដែលពួកគេមានជាមួយមនុស្សទាំងឡាយណាដែលពួកគេមើលថែ តាមរយៈការទំនាក់ទំនង និងការបំផុសគំនិត ។ ពួកគេប្រឹក្សា ហើយរាយការទៅកាន់ថ្នាក់ដឹកនាំរបស់ពួកគេយ៉ាងហោចណាស់ មួយត្រីមាសម្ដង អំពីការបម្រើរបស់ពួកគេ និងអំពីសេចក្ដីត្រូវការ និងភាពរឹងមាំនៃអ្នកទាំងឡាយណាដែលពួកគេត្រូវបានអញ្ជើញឲ្យមើលថែនោះ ។ ថ្នាក់ដឹកនាំរាយការការសម្ភាសអំពីការងារបម្រើទាំងនេះរាល់ត្រីមាស ព្រោះពួកគេឈប់រាយការចំនួននៃការសួរសុខទុក្ខ ឬចំនួននៃការទាក់ទងដែលទាក់ទងទៅកាន់បុគ្គល និងក្រុមគ្រួសារទៀតហើយ ។ លើសពីនេះទៅទៀត តាមរយៈបណ្ដាញបព្វជិតភាពមួយទៅកាន់សមាជិកម្នាក់ៗ នោះបងប្អូនប្រុសស្រីដែលផ្ដល់ការងារបម្រើ បង្កើតបណ្ដាញទំនាក់ទំនងមួយ ដែលថ្នាក់ដឹកនាំអាចប្រើនៅពេលមានហានិភ័យ ឬអាសន្ន ។

១៤. តើបងប្អូនដែលផ្ដល់ការងារបម្រើត្រូវបានហៅថាជាអ្វី ?

អ្នកកាន់បព្វជិតភាពត្រូវបានហៅថា « បងប្អូនប្រុសដែលផ្ដល់ការងារបម្រើ » រីឯបងប្អូនស្ត្រីសមាគមសង្គ្រោះត្រូវបានហៅថា « បងប្អូនស្រីដែលផ្ដល់ការងារបម្រើ » ។ ជាទូទៅ ពួកគេត្រូវបានហៅតាមឈ្មោះរបស់ពួកគេដូចជា ៖ « បងប្រុស ចូនស៍ » និង « បងស្រី ស្ម៊ីធ » ។ ពួកគេពុំត្រូវបានហៅថាជា « អ្នកផ្ដល់ការងារបម្រើ » នោះទេ ។

១៥. តើការងារបម្រើមានលក្ខណៈស្រដៀងគ្នា និងខុសគ្នាពីការបង្រៀនតាមផ្ទះ និងការបង្រៀនសួរសុខទុក្ខយ៉ាងដូចម្ដេច ?

ការងារបម្រើមានលក្ខណៈស្រដៀងគ្នាទៅនឹងការបង្រៀនតាមផ្ទះ និងការបង្រៀនសួរសុខទុក្ខ ត្រង់ថាគ្រួសារនីមួយៗ នឹងមានបងប្អូនប្រុសកាន់បព្វជិតភាព—បងប្អូនប្រុសដែលផ្ដល់ការងារបម្រើ—ដើម្បីបម្រើ ហើយមើលថែក្រុមគ្រួសារ ឬបុគ្គលទាំងឡាយដែលរស់នៅទីនោះ ( សូមមើល គ និង ស ២០:៤៧, ៥៩ ) ។ បងប្អូនស្រីមជ្ឈិមវ័យម្នាក់ៗនឹងមានសមាជិកសមាគមសង្គ្រោះ—បងប្អូនស្រីដែលផ្ដល់ការងារបម្រើ—បម្រើ ហើយមើលថែដល់គាត់ ដើម្បីពង្រឹងបន្ថែមទៅលើការគូសបញ្ជាក់អំពីការងារបម្រើ ដែលចែកចាយដោយគណៈប្រធានសមាគមសង្គ្រោះ កាលពីដើមខែមករា ឆ្នាំ ២០១៨ ( សូមមើល « Keep in Touch with Her Anytime, Anywhere, Any Way » Ensign ឬ Liahona ខែ មករា ឆ្នាំ ២០១៨ ទំព័រ ៧ ) ។

លើសពីនេះទៅទៀត មានតម្រូវការនៃការបង្រៀនតាមផ្ទះ និង ការបង្រៀនសួរសុខទុក្ខមួយចំនួន ត្រូវបានកែប្រែដើម្បីជួយសមាជិកឲ្យផ្ដល់ការងារបម្រើ ដោយផ្ដោតយកចិត្តទុកដាក់កាន់តែខ្លាំងទៅលើការបំពេញតាមសេចក្ដីត្រូវការ ។ ការទាក់ទងពុំចាំបាច់ត្រូវតែជាការចុះសួរសុខទុក្ខជាផ្លូវការជានិច្ចកាលដូចកាលពីមុនទៀតឡើយ ។ វាអាចធ្វើនៅផ្ទះ នៅព្រះវិហារ ឬនៅកន្លែងណាក៏បានដែលមានសុវត្ថិភាព ងាយស្រួល និងអាចធ្វើដំណើរទៅដល់ ។ អែលឌើរ ជែហ្វ្រី អ័រ ហូឡិន បានបង្រៀនថា « [ អ្វី ] ដែលសំខាន់បំផុតគឺរបៀបដែលអ្នកផ្ដល់ពរ និងមើលថែដល់អ្នកទាំងឡាយ ដែលស្ថិតនៅក្រោមការមើលខុសត្រូវរបស់អ្នក ដែលពុំចាំបាច់មានកាលវិភាគ ឬទីតាំងជាក់លាក់នោះទេ ។ អ្វីដែលសំខាន់គឺថា បងប្អូនស្រឡាញ់មនុស្សរបស់បងប្អូន ហើយកំពុងបំពេញតាមព្រះបញ្ញត្តិឲ្យ ‹ មើលការខុសត្រូវលើសាសនាចក្រជានិច្ច › » ។^៣

និយាយជារួម ការងារបម្រើត្រូវបានដឹកនាំដោយព្រះវិញ្ញាណ វាមានភាពបត់បែន ហើយកែប្រែឲ្យស្របទៅនឹងសេចក្ដីត្រូវការរបស់សមាជិកម្នាក់ៗ ។

១៦. តើការងារបម្រើត្រូវបានដឹកនាំដោយព្រះវិញ្ញាណតាមរបៀបណា ?

នៅពេលសមាជិកផ្ដល់ការងារបម្រើ ពួកគេស្វែងរកការបំផុសគំនិតដើម្បីដឹងពីរបៀបឈោងទៅជួយមនុស្សដទៃ ហើយបំពេញតាមសេចក្ដីត្រូវការរបស់ពួកគេ ។ តើការសួរសុខទុក្ខដែលបានដាក់កាលវិភាគ និងការទូរសព្ទជាទៀងទាត់ ទៅកាន់បងស្រីចំណាស់ម្នាក់ដែលរស់នៅតែឯង នឹងអាចផ្ដល់ទំនាក់ទំនងដែលគាត់ត្រូវការឬទេ ? តើការអញ្ជើញដល់យុវមជ្ឈិមវ័យមិនសូវសកម្មម្នាក់ ឲ្យចូលរួមក្នុងគម្រោងសហគមន៍ នឹងក្លាយជាការទាក់ទងដែលមានប្រសិទ្ធភាពបំផុតឬទេ ? តើការជួយឧបត្ថម្ភដល់ការប្រកួតកីឡាបាល់ទាត់របស់យុវវ័យ នឹងជួយដល់យុវវ័យ ព្រមទាំងមាតាបិតារបស់ពួកគេឬទេ ? តើការផ្ញើសារជាបទគម្ពីរដែលពេញដោយក្ដីសង្ឃឹមទៅកាន់នរណាម្នាក់ នឹងអាចជួយសម្រាលបន្ទុករបស់គាត់ឬទេ ? តើលិខិតតូចៗ ឬកាតជូនពរ ឬអ៊ីម៉ែល បង្ហាញពីការខ្វាយខ្វល់ដ៏មានប្រសិទ្ធភាពឬទេ ? តើព្រះអង្គសង្គ្រោះបានត្រាស់បង្គាប់ពួកអ្នកបម្រើរបស់ទ្រង់ឲ្យធ្វើអ្វីខ្លះ ? ការស្វែងរកចម្លើយដ៏បំផុសគំនិតចំពោះសំណួរដូចនេះ និងការប្រើប្រាស់គ្រប់វិធីសាស្ត្រដែលមានដើម្បីទាក់ទងដល់មនុស្សទាំងឡាយណា ដែលពួកគេត្រូវបានចាត់តាំងឲ្យមើលថែ គឺជាចំណុចសំខាន់នៃការងារបម្រើដ៏បំផុសគំនិត ។ ដើម្បីផ្ដល់ការបម្រើដូចព្រះគ្រីស្ទ បងប្អូនប្រុសដែលផ្ដល់ការងារបម្រើ និងបងប្អូនស្រីដែលផ្ដល់ការងារបម្រើ មិនអាចពឹងផ្អែកទៅលើការសួរសុខទុក្ខតាមទម្លាប់ ឬសារលិខិតដែលបានរៀបចំទុកជាមុនទៀតទេ ផ្ទុយទៅវិញ ពួកគេស្វែងរកការបំផុសគំនិត និងការប្រឹក្សាជាមួយសមាជិកគ្រួសារ ដើម្បីមើលថែដល់អស់អ្នកទាំងឡាយណាដែលពួកគេត្រូវបានចាត់តាំងឲ្យមើលថែ—ដោយប្រើប្រាស់ពេលវេលា និងធនធាននានាដែលពួកគេមាន ។

១៥. តើការងារបម្រើអាចបត់បែនបានតាមរបៀបណា ?

បងប្អូនប្រុសដែលផ្ដល់ការងារបម្រើ និង បងប្អូនស្រីដែលផ្ដល់ការងារបម្រើ មានឱកាសធ្វើកិច្ចការទាំងឡាយណាដែលមានប្រសិទ្ធភាពបំផុត ។ មនុស្សទាំងឡាយដែលពួកគេត្រូវបានអញ្ជើញឲ្យមើលថែ អាចនឹងត្រូវការការយកចិត្តទុកខុសៗគ្នា ។ ពេលធ្វើការជាមួយគណៈប៊ីស្សព និងក្រុមប្រឹក្សាវួដ នោះគណៈប្រធានកូរ៉ុមអែលឌើរ និងសមាគមសង្គ្រោះ ជូនដំណឹងអំពីអាទិភាពទាំងឡាយទៅកាន់បងប្អូនប្រុសស្រីដែលផ្ដល់ការងារបម្រើ ដើម្បីឲ្យពួកគេអាចដឹងថាតើនរណាអាចនឹងត្រូវការពួកគេខ្លាំងបំផុត ។ ជាញឹកញាប់ អាទិភាពខ្ពស់បំផុតត្រូវបានផ្ដល់ឲ្យដល់សមាជិកថ្មី សមាជិកមិនសូវសកម្មដែលងាយនឹងទទួលយកការប្រឹក្សាពីយើង និងអ្នកដទៃទៀតដូចជាឪពុក/ម្ដាយទោល ស្ត្រីមេម៉ាយ និងបុរសពោះម៉ាយ ។ ថ្នាក់ដឹកនាំអាចចាត់តាំងអ្នកដឹកនាំយុវវ័យម្នាក់ឲ្យទៅកាន់ក្រុមគ្រួសារមួយ ដែលមានយុវជន ឬយុវនារីដែលកំពុងជួបឧបសគ្គ ហើយពួកលោកចាត់តាំងភ្លាមៗឲ្យបងប្អូនប្រុសនិងបងប្អូនស្រីដែលផ្ដល់ការងារបម្រើទៅកាន់អ្នកប្រែចិត្តជឿថ្មី ។ ពួកលោកអាចចាត់តាំងនរណាក៏បាននៅក្នុងកូរ៉ុមអែលឌើរ—ជាសង្ឃជាន់ខ្ពស់ និងជាអែលឌើរ—ឲ្យធ្វើការងារបម្រើនោះ ។

បើសមរម្យ គូស្វាមីភរិយាមួយគូ អាចត្រូវបានចាត់តាំងឲ្យមើលថែក្រុមគ្រួសារមួយ ឬបុគ្គលម្នាក់ ។ លើសពីនេះទៅទៀត ក្រុមឡូរ៉ល និង ក្រុមម៉ៃម៉េត អាចធ្វើការរួមចំណែកដ៏សំខាន់ៗ ដោយការបម្រើជាដៃគូជាមួយបងប្អូនស្រីសមាគមសង្គ្រោះ ក៏ដូចគ្នាចំពោះពួកសង្ឃ និង គ្រូធ្វើដែរ ដោយធ្វើការបម្រើជាមួយអ្នកកាន់បព្វជិតភាពមិលគីស្សាដែក ( សូមមើល សំណួរទី ២២ ខាងក្រោម ) ។

១៨. តើការងារបម្រើត្រូវបានកែប្រែឲ្យស្របទៅនឹងសេចក្ដីត្រូវការរបស់សមាជិកម្នាក់តាមរបៀបណា ?

បងប្អូនប្រុសដែលផ្ដល់ការងារបម្រើ និង បងប្អូនស្រីដែលផ្ដល់ការងារបម្រើ ព្យាយាមធ្វើអ្វីៗដែលបំពេញតាមសេចក្ដីត្រូវការរបស់បុគ្គលទាំងឡាយយ៉ាងខ្លាំងបំផុត ។ រាល់ទម្រង់នៃការទំនាក់ទំនងគឺមានដើម្បីឆ្លើយតបទៅនឹងការបំផុសគំនិតពីព្រះវិញ្ញាណបរិសុទ្ធ ហើយបំពេញតាមសេចក្ដីត្រូវការនៃអស់អ្នកទាំងឡាយណាដែលពួកគេបម្រើ ។ ការបំពេញតាមសេចក្ដីត្រូវការទាំងនោះចាប់ផ្ដើមជាមួយនឹងការពិចារណាប្រកបដោយការអធិស្ឋាន និងការមានការសន្ទនាប្រាប់អំពីព័ត៌មានជាមួយក្រុមគ្រួសារ និងបុគ្គលទាំងឡាយដែលពួកគេត្រូវបានចាត់តាំងឲ្យមើលថែ ។ នៅក្នុងការសន្ទនានោះ និងក្នុងការទាក់ទងជាបន្តបន្ទាប់ ពួកគេស្ដាប់អស់អ្នកទាំងឡាយដែលពួកគេផ្ដល់ការងារបម្រើ ដើម្បីពួកគេអាចយល់អំពីរបៀបបម្រើឲ្យបានល្អបំផុត ដឹងថាតើត្រូវទំនាក់ទំនងញឹកញាប់ប៉ុណ្ណា និងដោយប្រភេទណា ព្រមទាំងដឹងពីសេចក្ដីត្រូវការ និងមាតិកានៃសារលិខិតដែលពួកគេចែកចាយ ។ អស់់អ្នកទាំងឡាយដែលផ្ដល់ការងារបម្រើត្រូវប្រាកដថា រាល់ទំនាក់ទំនងទៅកាន់សមាជិកក្រុមគ្រួសារណាមួយត្រូវតែធ្វើដោយសមរម្យ ។

បងប្អូនប្រុស និងបងប្អូនស្រីដែលផ្ដល់ការងារបម្រព្យាយាមជួយបុគ្គល និងគ្រួសារទាំងឡាយឲ្យរៀបចំខ្លួនដើម្បីទទួលពិធីបរិសុទ្ធបន្ទាប់ៗទៀតរបស់ពួកគេ ឲ្យគោរពតាមសេចក្ដីសញ្ញាដែលពួកគេបានធ្វើ ហើយក្លាយជាមនុស្សមានភាពខ្លួនទីពឹងខ្លួន ។ ការជួយប្រភេទនេះរួមទាំងការចែកចាយសារលិខិតខាងវិញ្ញាណ បានជួយរៀបចំតាមបុគ្គល ឬគ្រួសារ ទោះបីជាការងារបម្រើពុំមែនជាការចាត់តាំងដែលផ្ដោតសំខាន់ជាពិសេសទៅលើការចែកចាយសារលិខិតក៏ដោយ ។ ទស្សនាវដ្ដី លីអាហូណា និង Ensign នឹងពុំមានសារលិខិតជាក់លាក់ដើម្បីប្រើប្រាស់នៅក្នុងការទាក់ទងផ្ដល់ការងារបម្រើទៀតឡើយ ។

១៩. តើថ្នាក់ដឹកនាំបព្វជិតភាពមិលគីស្សាដែក និងសមាគមសង្គ្រោះ បង្រួបបង្រួមការងាររបស់ពួកគាត់តាមរបៀបណា ?

សមត្ថភាពកាន់តែប្រសើរឡើងដើម្បីផ្ដល់ការងារបម្រើដល់មនុស្សដទៃ គឺជាសមិទ្ធិផលមួយនៃកម្លាំងកាន់តែរឹងមាំរបស់កូរ៉ុមបព្វជិតភាពដែលបានរៀបចំរចនាសម្ព័ន្ធឡើងវិញ តាមដែលយើងចង់បាន និងតាមធម្មតា រីឯសមាគសង្គ្រោះទទួលបានសាមគ្គីភាពជាសមិទ្ធិផលផងដែរ ។ ការងារបម្រើបានក្លាយទៅជាកិច្ចខិតខំសហប្រតិបត្តិការមួយ ក្នុងការបំពេញកាតព្វកិច្ចបព្វជិតភាពដើម្បី « ទៅផ្ទះនៃសមាជិកម្នាក់ៗ ដើម្បីសួរសុខទុក្ខ » និងដើម្បី « មើលការខុសត្រូវលើសាសនាចក្រជានិច្ច ហើយនៅជាមួយ និងចម្រើនកម្លាំងពួកគេ » និងជាគោលបំណងរបស់សមាគមសង្គ្រោះដើម្បី « បង្កើនសេចក្ដីជំនឿលើព្រះវរបិតាសួគ៌ និងព្រះយេស៊ូវគ្រីស្ទ និងដង្វាយធួនរបស់ទ្រង់ ពង្រឹងបុគ្គលទាំងឡាយ ក្រុមគ្រួសារ និងគេហដ្ឋាន តាមរយៈពិធីបរិសុទ្ធ និងសេចក្ដីសញ្ញានានា ហើយធ្វើការដោយសាមគ្គីភាពដើម្បីអស់អ្នកទាំងឡាយណាដែលខ្វះខាត » ( គ និង ស ២០:៤៧, ៥៣, ក្បួនខ្នាតភាគ ២ ចំណុច ៩.១.១ ) ។

ការធ្វើការជាមួយគ្នា និងនៅក្រោមការដឹកនាំរបស់ប៊ីស្សព គណៈប្រធានកូរ៉ុមអែលឌើរ និងសមាគមសង្គ្រោះ មានឱកាសទទួលបានការបំផុសគំនិត បានរៀបចំ ហើយបានធ្វើសហប្រតិបត្តិការនៅពេលពួកគេព្យាយាមមើលការខុសត្រូវ និងមើលថែដល់បុគ្គលម្នាក់ៗ និងក្រុមគ្រួសារនីមួយៗ ។ ការសហប្រតិបត្តិការរួមមានការធ្វើការជាមួយគ្នាតាមរបៀបដូចខាងក្រោម ៖

គណៈប្រធានកូរ៉ុមអែលឌើរផ្ដល់អនុសាសន៍លើការចាត់តាំងការងារបម្រើសម្រាប់បុគ្គលម្នាក់ៗ និងគ្រួសារទាំងឡាយនៅក្នុងវួដ ។ គណៈប្រធានសមាគមសង្គ្រោះផ្ដល់អនុសាសន៍លើការចាត់តាំងការងារបម្រើ សម្រាប់បងប្អូនស្រីសមាគមសង្គ្រោះ ។ នៅទីណាដែលមានសេចក្ដីត្រូវការពិសេស គណៈប្រធានកូរ៉ុមអែលឌើរ និង សមាគមសង្គ្រោះ អាចពិភាក្សាអំពីការចាត់តាំងជាក់លាក់ពីមុនការចាត់តាំងទាំងនោះត្រូវបានធ្វើសេចក្ដីសម្រេច ។
គណៈប្រធានកូរ៉ុមអែលឌើរ និងសមាគមសង្គ្រោះ ផ្ដល់អនុសាសន៍លើការចាត់តាំងការងារបម្រើនានាទៅកាន់ប៊ីស្សពសុំការការអនុមតិពីលោក ។
ប្រសិនបើចាំបាច់ បងប្អូនប្រុសនិង បងប្អូនស្រីដែលផ្ដល់ការងារបម្រើ អាចពិភាក្សាអំពីកាលៈទេសៈពិសេសៗរបស់បុគ្គលទាំងឡាយ ហើយបើចាំបាច់ សូមទាក់ទងទៅកាន់ថ្នាក់ដឹកនាំកូរ៉ុម ឬសមាគមសង្គ្រោះរបស់ពួកគេ ដើម្បីបានជំនួយ និងធនធានបន្ថែម ។
គណៈប្រធានកូរ៉ុមអែលឌើរ និងសមាគមសង្គ្រោះ ជួបប្រជុំគ្នារាល់ត្រីមាស ដើម្បីពិភាក្សាអំំពីសេចក្ដីត្រូវការរបស់បុគ្គលម្នាក់ៗ និងគ្រួសារទាំងឡាយ ដែលបានដឹងតាមរយៈការសម្ភាសអំពីការរងារបម្រើ ។
បន្ទាប់ពីការប្រជុំនោះ ប្រធានកូរ៉ុមអែលឌើរ និងសមាគមសង្គ្រោះ ជួបគ្នារាល់ត្រីមាស ជាមួយប៊ីស្សពដើម្បីដឹងពីសេចក្ដីត្រូវការរបស់បុគ្គលម្នាក់ៗ និងគ្រួសារទាំងឡាយ ។
ប្រសិនបើចាំបាច់ ថ្នាក់ដឹកនាំកូរ៉ុមអែលឌើរ និងសមាគមសង្គ្រោះ ប្រឹក្សាជាមួយក្រុមប្រឹក្សាវួដ អំពីភាពរឹងមាំ និង សេចក្ដីត្រូវការ ដែលបានប្រាប់ឲ្យដឹងនៅក្នុងការសម្ភាសអំពីការរងារបម្រើ រួចដាក់ផែនការ ហើយអនុមតិដើម្បីបម្រើ ហើយផ្ដល់ពរដល់សមាជិកវួដ ។

ដើម្បីសម្រួលដល់សហប្រតិបត្តិការនេះ វួដផ្ដោតសំខាន់ទៅលើការប្រជុំក្រុមប្រឹក្សាវួដ ហើយពុំចាំបាច់ធ្វើការប្រជុំគណៈកម្មការប្រតិបត្តិបព្វជិតភាពទៀតទេ ។ កាលពីមុន កិច្ចការដែលមាននៅក្នុងរបៀបវារៈ ត្រូវបានពិភាក្សានៅក្នុងការប្រជុំគណៈកម្មការប្រតិបត្តិបព្វជិតភាពតែឥឡូវត្រូវបានយកមកពិភាក្សា នៅក្នុងការប្រជុំគណៈប៊ីស្សព ក្រុមប្រឹក្សាវួដ ឬការប្រជុំប្រចាំត្រីមាសរបស់ប៊ីស្សព ប្រធានកូរ៉ុមអែលឌើរ និងរបស់ប្រធានសមាគមសង្គ្រោះបន្ថែមទៀត បើចាំបាច់ ។

២០. តើសមាជិកទទួលបានការចាត់តាំងការងារបម្រើរបស់ពួកគេតាមរបៀបណា ?

ថ្នាក់ដឹកនាំជួបប្រជុំជាមួយបងប្អូនប្រុស ស្រីដែលផ្ដល់ការងារបម្រើ—យកល្អធ្វើការជាដៃគូនឹងគ្នា—ដើម្បីបែងចែកការចាត់តាំងជាមួយពួកគេ ហើយប្រឹក្សាដល់ពួកគេអំពីភាពរឹងមាំ សេចក្ដីត្រូវការ និងឧបសគ្គនានារបស់អ្នកទាំងឡាយណាដែលពួកគេផ្ដល់ការងារបម្រើនោះ ។ កិច្ចសន្ទនានេះអាចកើតមានឡើងនៅក្នុងការសម្ភាសអំពីការងារបម្រើ ( សូមមើល សំណួរទី ២០ ខាងក្រោម ) ឬនៅពេលណាដែលចាំបាច់ ។

១៧. តើតួនាទីនៃការសួរសុខទុក្ខដល់ផ្ទះមានអ្វីខ្លះ ?

ដោយសារចំនួនចុះសួរសុខទុក្ខ ចម្ងាយផ្លូវ សុវត្ថិភាព និងការពិចារណាលើកត្តាផ្សេងៗទៀត នោះការសួរសុខទុក្ខដល់ផ្ទះនីមួយជារៀងរាល់ខែ អាចនឹងពិបាកនឹងធ្វើបាន ឬអនុវត្តបាន ប៉ុន្ដែការចុះសួរសុខទុក្ខផ្ទាល់មានសារៈសំខាន់ នៅពេលដែលយើងអាចធ្វើវាបាននោះ ។ ដើម្បីបម្រើដូចជាព្រះអង្គសង្គ្រោះបានធ្វើ បងប្អូនប្រុសស្រីដែលផ្ដល់ការងារបម្រើ ពិចារណាអំពីលទ្ធភាពទាំងអស់ដែលអាចធ្វើទៅបានដើម្បីធ្វើការមើលថែ ហើយទាក់ទងទៅកាន់អស់អ្នកដែលពួកគេត្រូវបានចាត់តាំងឲ្យមើលថែ ។

២២. តើការងារបម្រើតែងតែមានដាក់បញ្ចូលការចែកចាយសារលិខិតជានិច្ចឬទេ ?

អត់ទេ ។ នៅពេលបងប្អូនប្រុសស្រីដែលផ្ដល់ការងារបម្រើ បានដឹងអំពីមនុស្សដែលពួកគេត្រូវមើលថែហើយ ពួកគេត្រូវដឹងអំពីសេចក្ដីត្រូវការរបស់មនុស្សទាំងនោះ រួចហើយព្រះវិញ្ញាណបរិសុទ្ធអាចបំផុសគំនិតពួកគេឲ្យបង្រៀនគោលការណ៍មួយនៃដំណឹងល្អ ។ ឪពុកម្ដាយក៏អាចស្នើឲ្យមានប្រធានបទជាក់លាក់មួយសម្រាប់គ្រួសារគាត់ដែរ ។ ប៉ុន្តែ « សារលិខិត » ដ៏ប្រសើរបំផុត គឺការមើលថែ និង សេចក្ដីមេត្តាករុណា ។

២៣. តើបងប្អូនស្រីដែលផ្ដល់ការងារបម្រើ ផ្ដល់ព័ត៌មានលម្អិតអំពីកិច្ចខិតខំរបស់ពួកគេតាមរបៀបណា ?

ថ្នាក់ដឹកនាំពុំប្រមូលរបាយការណ៍អំពីក្រុមគ្រួសារ និងបុគ្គលទាំងឡាយ ដែលត្រូវបានទៅសួរសុខទុក្ខអំឡុងខែទៀតហើយ ។ ជំនួសមកវិញ បងប្អូនប្រុសស្រីដែលផ្ដល់ការងារបម្រើ មានឱកាសប្រឹក្សាជាមួយថ្នាក់ដឹកនាំកូរ៉ុមអែលឌើរ និងសមាគមសង្គ្រោះ អំពីស្ថានភាពនៃអស់អ្នកទាំងឡាយដែលពួកគេបម្រើ និងអំពីកិច្ចខិតខំនៃការងារបម្រើរបស់ពួកគេដែលកំពុងតែបន្តទៅមុខ ។ ការប្រឹក្សាជាមួយគ្នានេះធ្វើឡើងយ៉ាងហោចណាស់រាល់ត្រីមាស នៅក្នុងការសម្ភាសអំពីការងារបម្រើ និងពេលណាបន្ថែមទៀត នៅពេលដែលចាំបាច់ត្រូវជូនដំណឹង ។

២៤. តើការសម្ភាសអំពីការងារបម្រើគឺជាអ្វី ?

ការសម្ភាសអំពីការងារបម្រើត្រូវបានធ្វើឡើង (១) ដើម្បីប្រឹក្សាអំពីភាពរឹងមាំ សេចក្ដីត្រូវការ និងឧបសគ្គនានារបស់គ្រួសារ និងបុគ្គលទាំងឡាយដែលត្រូវបានចាត់តាំងឲ្យទៅ (២) ដើម្បីកំណត់ថាតើសេចក្ដីត្រូវការណាខ្លះ ដែលកូរ៉ុម និង សមាគមសង្គ្រោះ ឬក្រុមប្រឹក្សាវួដអាចជួយបាន និង (3) ដើម្បីរៀនពីថ្នាក់ដឹកនាំ និងដើម្បីទទួលការលើកទឹកចិត្តក្នុងកិច្ចខិតខំធ្វើការងារបម្រើ ។

យ៉ាងហោចណាស់ រាល់ត្រីមាស បងប្អូនប្រុសស្រីដែលផ្ដល់ការងារបម្រើ ជួបប្រជុំជាមួយអ្នកដឹកនាំម្នាក់នៃកូរ៉ុមអែលឌើរ ឬសមាគសង្គ្រោះនៅក្នុងការសម្ភាសអំពីការងាររបម្រើមួយ យកល្អជួបដោយផ្ទាល់ និងជាមួយដៃគូរបស់ពួកគេ ។ គូស្វាមីភរិយាដែលផ្ដល់ការងារបម្រើជាមួយគ្នា អាចជួបប្រជុំជាមួយថ្នាក់ដឹកនាំកូរ៉ុមអែលឌើរ ឬសមាគមសង្គ្រោះ ឬទាំងពីរ ។ នៅចន្លោះការសម្ភាសនោះ បើចាំបាច់ បងប្អូនប្រុសស្រីដែលផ្ដល់ការងារបម្រើ ផ្ដល់ទំនាក់ទំនងអំពីព័ត៌មានដទៃទៀត—ដោយផ្ទាល់ ឬតាមរយៈទូរសព្ទ ផ្ញើសារ អ៊ីម៉ែល ឬមធ្យោបាយផ្សេងៗទៀត ។ ពួកគេចែកចាយព័ត៌មានសម្ងាត់តែជាមួយប្រធានកូរ៉ុមអែលឌើរ ឬប្រធានសមាគសង្គ្រោះប៉ុណ្ណោះ—ឬដោយផ្ទាល់ជាមួយប៊ីស្សព ។

២៥. តើថ្នាក់ដឹកនាំរក្សាកំណត់ត្រានៃការសម្ភាសអំពីការងារបម្រើតាមរបៀបណា ?

គណៈប្រធានកូរ៉ុមអែលឌើរ និង សមាគមសង្គ្រោះ រក្សាកំណត់ត្រានៃការសម្ភាស ដែលពួកគាត់មានជាមួយនឹងបងប្អូនប្រុសស្រីដែលផ្ដល់ការងារបម្រើ ។ ថ្នាក់ដឹកនាំប្រាប់អំពីខែធ្វើការសម្ភាស និងសមាសភាពដែលត្រូវចូលរួម ។ ពួកគេរាយការដៃគូម្ដងមួយៗ យ៉ាងហោចណាស់ សមាជិកម្នាក់នៃដៃគូនោះត្រូវបានសម្ភាសអំឡុងពេលត្រីមាស ។

ត្រឹមថ្ងៃទី ១ ខែ សីហា ឆ្នាំ ២០១៨ នឹងធ្វើបច្ចុប្បន្នភាពលើ LDS Tools និង Leader and Clerk Resources នៅលើគេហទំព័រ LDS.org ហើយនឹងមានសម្រាប់របាយការណ៍នេះ ។ ការផ្លាស់ប្ដូរក្នុងរបាយការណ៍ប្រចាំត្រីមាស ក៏នឹងមានឲ្យប្រើប្រាស់នៅពាក់កណ្ដាលឆ្នាំ ២០១៨ ផងដែរ ។ សេចក្ដីលម្អិតបន្ថែមសម្រាប់ថ្នាក់ដឹកនាំ និង ស្មៀន នឹងត្រូវបានផ្ដល់ឲ្យនៅក្នុងសេចក្ដីជូនដំណឹងចេញពីទីស្នាក់ការកណ្តាលរបស់សាសនាចក្រក្នុងពេលខាងមុខ ។

២៦. តើអ្វីទៅជាតួនាទីនៃអ្នកសម្របសម្រួលការងារបម្រើ និងអ្នកគ្រប់គ្រង ?

ការហៅបម្រើខាងអ្នកសម្របសម្រួល ការងារបម្រើ និងអ្នកគ្រប់គ្រងការងារបម្រើឈប់មានទៀតហើយ ។ អស់អ្នកដែលត្រូវបានហៅមកកាន់តំណែងទាំងនេះគួរតែត្រូវបានដោះលែង ។

២៥. តើនរណាដឹកនាំការសម្ភាសអំពីការងារបម្រើ ?

សមាជិកនៃគណៈប្រធានកូរ៉ុមអែលឌើរ និងសមាគមសង្រ្គោះម្នាក់ៗដឹកនាំការសម្ភាសអំពីការងារបម្រើ ។ សូម្បីតែនៅក្នុងវួដធំមួយ ថ្នាក់ដឹកនាំនឹងឃើញថា ការសម្ភាសមានការគ្រប់គ្រងល្អ នៅពេលការសម្ភាសមួយចំនួនត្រូវបានធ្វើឡើងរាល់សប្ដាហ៍ដោយសមាជិកនៃគណៈប្រធាននីមួយៗ ។ ការសសម្ភាសអំពីការបម្រើពុំចាំបាច់មានរយៈពេលវែងទើបមានប្រសិទ្ធភាពនោះទេ ។

២៨. តើនៅពេលណាក្នុងអំឡុងត្រីមាសដែលថ្នាក់ដឹកនាំធ្វើការសម្ភាសអំពីការងារបម្រើ ?

ការសម្ភាសអំពីការបម្រើអាច និងគួរតែធ្វើឡើង ក្នុងរយៈពេលពីដើមត្រីមាសដល់ចុងត្រីមាសនីមួយៗ—ដែលពុំចាំបាច់ចាំដល់សប្ដាហ៍ចុងក្រោយ ឬខែចុងក្រោយក្នុងត្រីមាសនោះទេ ។ នៅពេលថ្នាក់ដឹកនាំធ្វើការសម្ភាសជាទៀងទាត់ នោះពួកគាត់នឹងឃើញថា ពួកគាត់អាចសម្រេចគោលបំណងនៃការងារបម្រើទាំងខាងវិញ្ញាណ និងខាងសាច់ឈាម ។

ការដាក់បញ្ចូលយុវវ័យនៅក្នុងការងារបម្រើ

២៩. តើយុវវ័យអាចត្រូវបានដាក់បញ្ចូលទៅក្នុងការចាត់តាំងការងារបម្រើយ៉ាងដូចម្ដេច ?

ថ្នាក់ដឹកនាំអាចជ្រើសរើសដើម្បីចាត់តាំងក្រុមឡូរ៉ល និង ក្រុមម៉ៃម៉េតឲ្យធ្វើជាដៃគូជាមួយបងប្អូនស្រីសមាគមសង្គ្រោះ ហើយសង្ឃ និង គ្រូ ឥឡូវត្រូវបានចាត់តាំងឲ្យធ្វើជាដៃគូជាមួយអ្នកកាន់បព្វជិតភាពមិលគីស្សាដែក ។ យុវវ័យចែកចាយអំណោយទានពិសេសរបស់ពួកគេ ហើយរីកចម្រើនខាងវិញ្ញាណ នៅពេលពួកគេបម្រើជាមួយមជ្ឈិមវ័យនៅក្នុងកិច្ចការនៃសេចក្ដីសង្គ្រោះ និងនៅពេលពួកគេប្រឹក្សាអំពីការបម្រើនោះនៅក្នុងការសម្ភាសអំពីការងារបម្រើ ។ លើសពីនេះទៅទៀត ការដាក់បញ្ចូលយុវវ័យនៅក្នុងការចាត់តាំងការងារបម្រើ វាជួយបង្កើនភាពលូតលាស់នៃការមើលថែមនុស្សដទៃ តាមរយៈការបង្កើនចំនួនសមាជិកដែលចូលរួម ។ វាក៏អាចសម្រួល ហើយពង្រឹងកិច្ចខិតខំទាំងនេះនៅក្នុងក្រុមគ្រួសារ នៅពេលម្ដាយ និងកូនស្រី—ឪពុក និងកូនប្រុស—បម្រើជាមួយគ្នាដែរ ។

៣០. តើយុវវ័យគួរតែមានបងប្អូនប្រុសស្រីដែលផ្ដល់ការងារបម្រើ ត្រូវបានចាត់តាំងដល់ពួកគេឬទេ ?

អត់ទេ ។ យុវជន និងយុវនារី ត្រូវបានផ្ដល់ការងារបម្រើដោយអស់អ្នកដែលផ្ដល់ការងារបម្រើដល់ក្រុមគ្រួសាររបស់ពួកគេ ហើយក៏ត្រូវបានមើលថែដោយថ្នាក់ដឹកនាំបព្វជិតភាពអើរ៉ុន និងថ្នាក់ដឹកនាំយុវនារីផងដែរ ។

៣១. តើយុវជន និងយុវនារីអាចត្រូវបានចាត់ឲ្យផ្ដល់ការងារបម្រើជាមួយនឹងដៃគូដែលជាមជ្ឈិមវ័យបានដែរឬទេ ?

ប្រាកដណាស់ ។ តាមសេចក្ដីណែនាំនៅក្នុងឯកសារថ្មីៗអំពី « ការការពារ និងការឆ្លើយតបចំពោះការបំពាន » អនុញ្ញាតឲ្យមជ្ឈិមវ័យអាចត្រូវបានចាត់តាំងឲ្យធ្វើជាដៃគូផ្ដល់ការងារបម្រើជាមួយយុវវ័យបាន ។ « ការងារបម្រើ » ពុំត្រូវបានចាត់ទុកថា ជា « សកម្មភាព » មួយ ឬ « ថ្នាក់រៀន » មួយដូចបានយោងនៅក្នុងសេចក្ដីណែនាំទាំងនោះទេ ។

ថ្នាក់ដឹកនាំគួរតែប្រើការវិនិច្ឆ័យដ៏បំផុសគំនិតនៅពេលធ្វើការចាត់តាំងយុវវ័យឲ្យធ្វើជាដៃគូផ្ដល់ការងារបម្រើនោះ ។ ដៃគូដែលជាមជ្ឈិមវ័យគួរតែចៀសវាងពីស្ថានភាពដែលអាចធ្វើឲ្យមានការភាន់ច្រឡំ ។ ពួកគេគួរតែអនុវត្តការមើលថែដែលទាក់ទងទៅនឹងស្ថានភាពជួបគ្នាផ្ទាល់នៅដាច់ពីគេឯងដើម្បីឲ្យយុវវ័យមានបទពិសោធន៍សុវត្ថិភាព និងជារង្វាន់ជាមួយនឹងការងារបម្រើ ។ បន្ថែមពីលើនោះ ដោយភាពវាងវៃពុំគួរចាត់តាំងយុវវ័យឲ្យទៅផ្ទះ ឬគ្រួសារដែលមានស្ថានភាពលំបាកនោះឡើយ ។

៣២. តើពួកម៉ៃម៉េត និង ឡូរ៉លទាំងអស់ គួរតែមានការចាត់តាំងផ្ដល់ការងារបម្រើឬទេ ?

ម៉ៃម៉េត និង ឡូរ៉ល អាចត្រូវបានអញ្ជើញឲ្យផ្ដល់ការងារបម្រើ ។ ឪពុកម្ដាយ និងថ្នាក់ដឹកនាំប្រឹក្សាជាមួយនឹងយុវនារីម្នាក់ៗ ហើយបើស្ថានភាពរបស់គាត់អាចធ្វើបាន ហើយគាត់មានឆន្ទៈដើម្បីបម្រើ នោះគាត់អាចទទួលបាននូវការចាត់តាំងផ្ដល់ការងារបម្រើមួយ ។ យុវនារីបម្រើជាដៃគូទៅនឹងបងប្អូនស្រ្តីសមាគមសង្គ្រោះ ។

៣៣. តើនរណាទាក់ទងការចាត់តាំងការងារបម្រើទៅឲ្យយុវវ័យ ?

ពេលមានការអនុមតិមកពីប៊ីស្សព នោះសមាជិកមួយរូបនៃគណៈប្រធានសមាគមសង្គ្រោះផ្ដល់ការចាត់តាំងការងារបម្រើដល់ពួកម៉ៃម៉េត និងឡូរ៉ល ។ ហើយនៅពេលមានការអនុមតិមកពីប៊ីស្សព នោះសមាជិកមួយរូបនៃគណៈប្រធានកូរ៉ុមអែលឌើរផ្ដល់ការចាត់តាំងការងារបម្រើទៅដល់ពួកគ្រូនិងពួកសង្ឃ ។

កូរ៉ុម និងសមាគមសង្រ្គោះ

៣៤. តើការផ្ដោតយកចិត្តទុកដាក់របស់កូរ៉ុមអែលឌើរ និងសមាគមសង្រ្គោះពង្រឹងដល់តួនាទីរបស់ប៊ីស្សព និងក្រុមប្រឹក្សាវួដដែរឬទេ ?

ប្រាកដណាស់ ។ ប៊ីស្សពគឺជាគឺជាសង្ឃជាន់ខ្ពស់ជាអធិបតី និង « ផ្តល់ការណែនាំ និងការប្រឹក្សាដល់ពួកអ្នកដឹកនាំដទៃទៀតនៅក្នុងវួដ » (ក្បួនខ្នាតភាគ ១២.១.១ ) ។ គាត់ពិនិត្យមើល ហើយអនុមតិទៅលើការចាត់តាំងការងារបម្រើ ។ នៅក្រោមការដឹកនាំរបស់ប៊ីស្សព ក្រុមប្រឹក្សាវួដបន្ដស្ថិតនៅក្នុងតួនាទីដ៏សំខាន់របស់ខ្លួនដើម្បី « ជួយដល់បុគ្គលម្នាក់ឲ្យស្ថាបនាទីបន្ទាល់ ទទួលពិធីបរិសុទ្ធនៃការសង្រ្គោះ រក្សាសេចក្តីសញ្ញាទាំងឡាយ ហើយប្រែក្លាយជាអ្នកដើរតាមដែលបានតែងតាំងរបស់ព្រះយេស៊ូវគ្រីស្ទ » (ក្បួនខ្នាតភាគ ២៤.៤ ) ។ កូរ៉ុម និងសមាគមសង្រ្គោះដែលបានពង្រឹង—មានប្រធានរបស់ពួកគេជាតំណាង ដែលជាសមាជិកនៃក្រុមប្រឹក្សាវួដ—នឹងជួយបង្កើនប្រសិទ្ធភាពនៃក្រុមប្រឹក្សានោះ ។

៣៥. តើគណៈប្រធានកូរ៉ុមអែលឌើរគួរសួរសុខទុក្ខ ឬសម្ភាសសមាជិកកូរ៉ុមមួយឆ្នាំម្ដង ( សូមមើលក្បួនខ្នាតភាគ ២ ៧.៣.២ )—បន្ថែមពីលើការធ្វើការសម្ភាសអំពីការងារបម្រើប្រចាំត្រីមាសដែរឬទេ ?

ប្រាកដណាស់ ។ ជាចំណែកនៃការទទួលខុសត្រូវទាំងអស់របស់ពួកគាត់ គណៈប្រធានកូរ៉ុមអែលឌើរ គួរតែសម្ភាសសមាជិកកូរ៉ុមទាក់ទងនឹងកាតព្វកិច្ចបព្វជិតភាពទាំងអស់—រួមទាំងសុខុមាលភាពរបស់អ្នកកាន់បព្វជិតភាព ភរិយារបស់គាត់ និងគ្រួសាររបស់គាត់—យ៉ាងហោចណាស់មួយឆ្នាំម្ដង ។ ការសម្ភាសទាំងនេះអាចធ្វើឡើងក្នុងរយៈពេលពីដើមឆ្នាំដល់ចុងឆ្នាំ ។ ការពិភាក្សានេះពុំគួរដាក់បញ្ចូលជាមួយនឹងការសម្ភាសអំពីការងារបម្រើដែលមានដៃគូមកសម្ភាសជាមួយគ្នាផងដែរនោះទេ ។

៣៦. តើនរណាអាចជួយគណៈប្រធានកូរ៉ុមអែលឌើរ និងសមាគមសង្រ្គោះសម្រេចបានជោគជ័យក្នុងកិច្ចការនៃសេចក្ដីសង្គ្រោះ ?

គណៈប្រធានកូរ៉ុមអែលឌើរ និងសមាគមសង្គ្រោះអាចរៀបចំសមាជិកដើម្បីជួយសម្រេចបាននូវកិច្ចការនេះតាមសេចក្តីត្រូវការ ។ ឧទាហរណ៍ ពួកគាត់អាចហៅសមាជិកឲ្យដឹកនាំ និងជួយជាមួយនឹងកិច្ចការដូចជា ការបម្រើ កិច្ចការពង្សប្រវត្តិ និងព្រះវិហារបរិសុទ្ធ ការចែកចាយដំណឹងល្អ និងខាងសុខុមាលភាព ។

៥. តើវួដមួយអាចមានកូរ៉ុមអែលឌើរ ឬសមាគមសង្គ្រោះច្រើនជាងមួយដែរឬទេ ?

ប្រាកដណាស់ ។ នៅក្នុង គោលលទ្ធិ និង សេចក្ដីសញ្ញា ១០៧:៨៩ នៅពេលវួដមួយមានចំនួនអ្នកកាន់បព្វជិតភាពមិលគីស្សាដែកសកម្មច្រើនជាងធម្មតា នោះថ្នាក់ដឹកនាំអាចរៀបចំកូរ៉ុមអែលឌើរច្រើនជាងមួយ ។ ក្នុងករណីបែបនេះ កូរ៉ុមនីមួយៗគួរមានតុល្យភាពសមហេតុផលមួយទាក់ទងនឹងអាយុ បទពិសោធន៍ តំណែង និងភាពរឹងមាំនៃបព្វជិតភាព ។ គោលការណ៍ស្រដៀងគ្នានេះអនុវត្តចំពោះសមាគមសង្គ្រោះផងដែរ ។

៣៨. តើប្រធានកូរ៉ុមអែលឌើរ និងសមាគមសង្រ្គោះអាចហៅទីប្រឹក្សាបន្ថែមដើម្បីជួយនៅក្នុងការងារបម្រើបានឬទេ ?

អត់ទេ ។ ប្រធានមួយរូបមានទីប្រឹក្សាពីររូប ។ បើអ្នកដឹកនាំរកឃើញថា ត្រូវការជំនួយបន្ថែម នោះពួកគេអាចប្រឹក្សាជាមួយនឹងប៊ីស្សពរបស់ពួកគេអំពីការហៅលេខាដែលផ្ដល់ការងារបម្រើម្នាក់ ឬច្រើនបាន ។ លេខាដែលផ្ដល់ការងារបម្រើទាំងនេះអាចត្រូវបានចាត់តាំង ឧទាហរណ៍ឲ្យដាក់កាលវិភាគការសម្ភាសអំពីការងារបម្រើ និងឲ្យជួយរៀបចំរបាយការណ៍នៃការសម្ភាសប្រចាំត្រីមាស ។