Appendix A

N̄an Pāāren ro—Kōpooj Ajri ro Nejum̧ n̄an juon Mour Ejjeļo̧k Jem̧ļo̧k ilo Iaļen Bujen in an Anij

Kōnke Ej iakwe eok, lōke eok, im ejeļā jon̄am̧, Jemedwōj Ilan̄ ekar lewaj n̄an eok iien em̧m̧an n̄an jipan̄ ajri ro nejum̧ deļon̄ im wōnm̧aanļo̧k wōt ilo iaļan bujen eo An, iaļ eo ej n̄an mour indeeo (lale Katak im Bujen Ko 68:25-28). Menin ekoba jipan̄ kepooj er n̄an kōm̧m̧an im kōjparok bujen ko rekwojarjar, āinwōt bujen peptaij im bujen ko rej kōm̧m̧ani ilo tampeļ eo. Jān bujen kein, ajiri ro nejim naaj liāp er make n̄an Rilo̧mo̧o̧r, Jisōs Kraist.

Elōn̄ wāween ko rellōn̄ n̄an kepooj ajri ro nejum̧ ilo iaļ in ilo iaļan bujen in, im Jemedwōj Ilan̄ enaaj jipan̄ eok loe wāween eo em̧m̧antata n̄an jipan̄ er. Ilo am̧ kappukot im̧we, keememej bwe ejjab aolep katak rej waļo̧k ilo iien katak ko em̧ōj jikejuuļi. Ilo m̧ool, m̧ōttan eo me ej kōm̧m̧an bwe ekkatak ilo m̧ōko en kajoor ej ilo iien eo em̧m̧an n̄an ekkatak ilo waanjon̄ak im ilo iien ko redik im reļam waan—kain ko me ekkā aer waļo̧k ilo mour jān raan n̄an raan. Āinwōt ļoore iaļan bujen eo ej juon jerbal emakijkij ad kōm̧m̧an, ebōk aolepen mour in n̄an wōnmaanļo̧k kake, kōn menin ejjeļo̧k oktak jān ad ekkatak kōn iaļan bujen eo. (Lale “Home and Family,” Teaching in the Savior’s Way [2022], 30–31.)

Ewōr jet bun̄tōn ko n̄an kepooj ajiri ro nejid n̄an mour indeeo ilo iaļan bujen ippān Anij.

Itulaļ rej jet iaan aitia ko n̄an jipan̄ ajri ro ekkatak im etali al ko: Kwomaron̄ lo kakkobaba in ļōmņak ko n̄an katakin ajri in Būraimere ro reddik ilo “Appendix B: N̄an Būraimere—Kōpooj Ajri ro Nejid n̄an Mour Indeeo ilo Iaļan Bujen eo an Anij.”

Peptaij im Kapene

Nipai ekar kwaļo̧k bwe “kōjām eo [jej] aikuj deļo̧n̄ ie” iaļan bujen eo “ej ukeļo̧k im peptaij kōn dān” (2 Nipai 31:17). Kijejeto eo am̧ n̄an jipan̄ ajri ro nejum̧ kōppopo n̄an peptaij im kapen emaron̄ jino kapen neer ilo iaļ eo. Kijejeto kein rej ijjino kōn katakin kōn tōmak ilo Jisōs Kraist im ukweļo̧k. Rej barāinwōt kobaik katak kōn wāween kōkāāl bujen peptaij ko ilo ad bōk kwojkwoj eo kajjojo wiik.

Errein jet iaan kein katakin ko me remaron̄ jipan̄ eok: 2 Nipai 31; special issue an eo Jera māākjiin kōn peptaij; Gospel Topics, “Baptism,” Gospel Library.

• Jabdewōt iien ewōr am̧ en̄jake eo ej kōkajoor tōmak eo am̧ jān Jemedwoj Ilan̄ im Jisōs Kraist, kwaļo̧k n̄an ajiri eo nejim. Jipan̄ e ļaddik ak leddik eo meļeļe ke tōmak ej juon men enaaj kajoor im kajoorļo̧k wōt ilo an eddōkļok ilo aolepen mour in. Ta jet iaan men ko ajri eo nejim emaron̄ kōm̧m̧ane n̄an kaddōkļo̧k tōmak ilo Kraist m̧okta jān an peptaij?

• Eļan̄n̄e ajiri eo nejim ej kōm̧m̧an juon kālet ebōd, kōnono n̄an e kōn m̧ōņōņō kōn menin letok eo an ukweļo̧k. Im n̄e kwoj kōm̧m̧ane kālet eo ebōd, kwaļo̧k kake m̧ōņōņō eo kwoj en̄jake n̄e kwoj ukweļok. Kwaļo̧k am̧ naan in kamool bwe kōnke Jisōs Kraist ekar en̄taan im mej kōn jerawiwi ko ad, E ekar letok n̄an kōj kajoor eo n̄an oktak. N̄e ajiri eo nejim ej pukot jeorļok bwōd, jeorļok an bwōd ilo ejeļo̧k wōņeen im m̧ōņōņō.

• Ba n̄an ajri ro nejim kōn iien peptaij eo am̧. Kwaļok pija ko im kwaļok kōn iien lem̧ōņōņō ko. Kōnono kōn kar en̄jake eo am̧, elmen an kar bujen peptaij eo am̧ kar jipan̄ eok jeļā eļapļo̧k kōn Jisōs Kraist, im elmen aer wōnm̧aanļo̧k wōt im kōjeram̧m̧an mour eo am̧. Rōjan̄ ajiri eo nejim n̄an kajjitōk kajjitōk ko.

• Eļan̄n̄e ewōr juon ej peptaij ilo baam̧le eo am̧ ak ilo ward eo am̧, bōk ajiri eo bwe en lale. Kōnono ippān doon kōn ta eo kwe kab ajiri eo nejim ar loe im en̄jake. Eļan̄n̄e emaron̄, kōnono ippān armej eo em̧ōj an peptaij im kajitōk kajitōk ko āinwōt in: “Elmen am̧ kar kōm̧m̧an kālet in? Elmen am̧ kar kōppopo?”

• N̄e kwoj lo bwe ajri eo nejim ej kōm̧m̧ane juon men ekar kallim̧ur n̄an kōm̧m̧ane, ņōbar ilo m̧ool. Kwaļo̧k n̄ane ke dāpij kallim̧ur ko renaaj jipan̄ kōj kōjparok bujen ko jej kōm̧m̧ani n̄e jej peptaij. Ta eo jej kallim̧ur ippān Anij n̄e jej peptaij? Ta eo E ej kallim̧ur kōj kake? (lale Mosaia 18:8–10, 13).

• Eļan̄n̄e kwe im ajiri eo nejim ewōr ami en̄jake ekwojarjar ippān doon (āinwōt ilo im̧ōn jar eo, ilo iien riiti jeje ko rekwojarjar, ak ilo iien eo komiro ej jerbal in jipan̄ n̄an juon), ba n̄an e kōn en̄jake eo an jetōb ak im̧we ko kwoj en̄jaki. Kajjitōk ippān ajiri eo nejim n̄an kwaļo̧k elmen an en̄jake. Je wāween ko rokkotaktak me Jetōb emaron̄ kōnono n̄an armej ro, ekoba wāween ko E ej kōnono n̄an eok make. Jipan̄ ajri ro nejim kile iien ko emaron̄ en̄jake im̧we eo an Jetōb Kwojarjar.

• Alooj ippān doon jejjo bitio ko ilo Gospel Library eo ņa etan “Hear Him!” Kōnono kōn wāween ko rokkotaktak me rijerbal ro an Irooj rej ron̄ Ainikien. Kajjitōk ippān ajiri eo nejim bwe en jin̄aik juon pija ak kōm̧m̧ane juon bitio kōn elmen an ron̄ ainikien Rilo̧mo̧o̧r eo.

• Kōnono kōn elmen am̧ kar erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata kar kōjeram̧m̧an eok. Elmen am̧ epaake Jemedwoj Ilan̄ im Jisōs Kraist āinwot am̧ kar jipan̄ ro jet im an ro jet kar jipan̄ eok? Jipan̄ ajiri ro ļōmņak kōn waween ko n̄an jipan̄ im kōkajoorļo̧k ro jet āinwot juon membōr ilo Kabun̄ in.

• Kōm̧m̧an bwe iien kwojkwoj eo en juon iien ekwojarjar im elemōņōņō n̄an baamle eo am̧. Jipan̄ ajiri eo nejim karōk wāween n̄an mije Jisōs Kraist ilo iien kwojkwoj eo. Ewi wāween ad kwaļo̧k ke kwojkwoj eo ekwojarjar n̄an kōj?

• Aolep māākjiin ko rededelo̧k in, Eo Jera ekoba ennaan ko, bwebwenato ko, im m̧akūtkūt ko n̄an jipan̄ ajri ro kōppopo n̄an peptaij im kapene. Kōtļo̧k bwe ajri eo en kālet jet n̄an riiti im lem̧ōņōņō ippam̧ kaki. (Lale barāinwōt collection eo “Preparing for Baptism” ilo jekjōn eo an ajri ilo Gospel Library eo.)

  

  Nipai ekar kwaļo̧k bwe “kōjām eo [jej] aikuj deļo̧n̄ ie” iaļan bujen eo “ej ukeļo̧k im peptaij kōn dān” (2 Nipai 31:17).

Kajoor eo an Priesthood, Mālim, im Ki ko

Priesthood ej mālim im kajoor eo an Anij eo me E ej kōjeram̧m̧an ajiri ro Nejin kake. Priesthood eo an Anij ej pād laļ in rainin ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Aolep membōr ro me rej kōjparok bujen ko aer rej jeraam̧m̧an kōn kajoor in priesthood eo an Anij ilo m̧oko m̧weer n̄an kōkajoor er make im baam̧le ko aer (lale Bok in Bōk Meļeļe Eļap; Jerbal ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata, 3.5, Gospel Ļāibrāre eo). Kajoor in enaaj jipan̄ membōr ro n̄an kōm̧m̧ane jerbal in lo̧mo̧o̧r im mour āinwōt Anij ilo mour ko aer make im baam̧le ko (lale Bok in Bōk Meļeļe Eļap,2.2).

Jej bōk kain̄i kein kōn mālim eo an priesthood. Eļan̄n̄e m̧aan im kōrā ro rej kōm̧m̧ane jerbal in kūr ko ilo Kabun̄ in, rej kōm̧m̧ane kōn mālim eo an priesthood, ium̧win tōl eo an ro rej kabwijer priesthood ki ko. Aolep ro nejin Jemedwōj Ilan̄—leddik ro Nejin im ļaddik ro Nejin—renaaj jeram̧m̧an ilo an ļapļo̧k aer meļeļe kōn priesthood eo.

N̄an katak eļapļo̧k kōn priesthood, lale Russell M. Nelson, “Mennin Aorōk ko ilo Jetōb,” Liaona, Nob. 2019, 76–79; Russell M. Nelson, “The Price of Priesthood Power,” Liahona, May 2016, 66–69; “Pedped in Katak ko an Priesthood,” jepta 3 ilo Bok in Bōk Meļeļe Eļap.

• Kōm̧m̧an bwe kain̄i ko an priesthood ren pād ilo mour ko an baam̧le eo am̧. N̄an waanjon̄ak, jipan̄ ajri ro nejim kōppopo ilo jetōb n̄an kwojkwoj eo kajjojo wiik. Rōjan̄ ajiri ro nejim n̄an pukōt kōjeram̧m̧an eo an priesthood eļan̄n̄e ajiri eo ej nan̄inmej ak aikuj kaeņōm̧m̧an ak tōl. Kōm̧m̧an bwe en juon iminene n̄an kwaļok iaļ ko Irooj ej kōjeram̧m̧an baam̧le eo kōn kajoor eo an priesthood.

• Ilo am̧ riiti eoon kein, lale iien ko rem̧m̧an n̄an kōnono kōn wāween an Anij kōjeram̧m̧an armej ro kōn kajoor eo An. Kwaļo̧k en̄jake ko am̧ make kōn iien eo Anij ekar kōjeram̧m̧an eok kōn Priesthood eo An. N̄an waanjon̄ak kōn kōjeram̧m̧an ko jej būki jān Anij jān priesthood eo, lale Bok in Bōk Meļeļe Eļap, 3,2,3,5.

• Katak lain in mālim eo an priesthood kōn juon armej ilo baamle eo am̧. (Eo ej kabwijer Melkesidek Priesthood emaron̄ bōk kape in lain in mālim eo ilo an jilkinļok email n̄an [e-mail]; bar lale “Request a Priesthood Line of Authority” ilo Help Center ChurchofJesusChrist.org.) Kōnono kōn etke eaorōk n̄an jeļā bwe mālim eo an priesthood ej itok jān Jisōs Kraist Emake. Etke E ej jeere mālim in ippād?

• Katakin ajiri eo nejim bwe ālikin peptaij, enaaj bōk kajoor eo an priesthood ilo an kōjparok bujen in peptaij. Etale ippān doon ennaan eo an Būreejtōn Russell M. Nelson “Mennin Aorōk ko ilo Jetōb” (Liaona, Nob. 2019, 76–79). Ba n̄an ajiri eo nejim elmen an kain̄i ko boktok kajoor n̄an mour eo am̧. N̄an juon elaajrak in jet wāween ko jej jeram̧m̧an kōn kajoor eo an Priesthood, lale Bok in Bōk Meļeļe Eļap,3.5.

• Kōnono kōn kajjitōk in “Ta eo juon rijerbal an Irooj ej āinwōt?” Riit ippān doon Katak im Bujen ko 121: 36-42, im pukot uwaak ko. Jabdewōt iien kwoj kile an ajri eo nejim (ak bar juon armej) mour kōn juon iaan katak ko ak waanjon̄ak ko ilo eoon kein, kwaļo̧k ki ļo̧k.

• Eļan̄n̄e kwe im ajiri eo nejim ej kōjerbale ki n̄an kōpeļļo̧ke juon kōjem ak kajoe juon wa, bōjrak jidik im keidi ki ko n̄an ki ko me ritōl ro an priesthood ro rej kabwijeri. (N̄an meļeļe eo kōn priesthood ki ko, lale Bok in Bōk Meļeļe Eļap, 3.4.1). Ta ko priesthood ki ko rej “kōpeļļoke” ak “jinoe” n̄an kōj? Lale barāinwōt Gary E. Stevenson, “Where Are the Keys and Authority of the Priesthood?,” Liaona, Māe 2016, 29–32; “Where Are the Keys?” (pija in alooj eo), Gospel Ļaibrāre.

• Ilo aer kōjeņoļo̧k eok n̄an juon kūr, kajjitōk ippān ajri eo nejum n̄an pād, n̄e emaron̄. Kōtļo̧k bwe ajri eo nejim en lale am̧ kakūrm̧ool kūr eo am̧. Kwomaron̄ pukot wāween ko rekkar bwe en emaron̄ jipan̄ eok. Kōmeļeļeik wāween am̧ en̄jake kajoor eo an Irooj ilo kūr eo am̧.

Etal n̄an Tampeļ—Peptaij eo im Kapene eo n̄an ro Remej

Tampeļ ko ej m̧ōttan karōk eo an Jemedwōj Ilan̄ n̄an ro Nejin. Ilo tampeļ ko, jej kōm̧m̧an bujen kwojarjar ippān Jemedwōj Ilan̄ ilo ad bōk kwonaad ilo kain̄i ko rekwojarjar, eo me aolepen enaaj jitōn̄ļo̧k Jisōs Kraist. Jemedwōj Ilan̄ ekar kōpooj juon iaļ n̄an aolep ajri ro Nejin n̄an kōm̧m̧an bujen ko im bōk kwonaad ilo kain̄i ko, ekoba ro rekar jab būki ilo mour in. Ilo jinoin juon iiō me ej jejjet 12 an iiō, ajiri eo nejim erūtto kiiō n̄an peptaij im kapene ilo tampeļ n̄an ro nukuier remej.

• En ekkā am̧ etaļ n̄an tampeļ ekkar n̄an jekjek ko kwoj pād ie. Kōnono ippān ajiri eo etke kwoj etal im elmen an tampeļ eo jipan̄ eok epaakeļo̧k Jemedwoj Ilan̄ im Jisōs Kraist.

• Etale im kōnono kajjitōk ko n̄an bōk mālim n̄an deļon̄e tampeļ ippān doon. Kōnono n̄an ajri eo nejim kōn ta eo ej waļo̧k ilo iien intōrpiu eo n̄an bōk mālim n̄an deļon̄e tampeļ. Kwaļo̧k etke eaorōk n̄an bōke juon pepa in mālim n̄an deļo̧n̄e tampeļ n̄an kwe.

• Riit ippān doon Malakai 4:6. Kōnaan kōn wāween am̧ ukōt būruom̧ n̄an ro jibūm̧ im jim̧aam̧. Katak eļapļok kōn ro jibūd im jimaad ilo am̧ kappukot menmenbwij ippān doon ilo FamilySearch.org Pukōt jibūd im jim̧aad ro rej aikuj peptaij im kapene. Juon ward tampeļ im baam̧le menmenbwij rijipan̄ remaron̄ jipan̄ eok.

• Etale ippān doon jet kein jipan̄ ko ņae etan “Temple” ilo jekjen eo an ajiri ilo Gospel Library. (Lale barāinwōt “Preparing Your Child for Temple Baptisms and Confirmations” on ChurchofJesusChrist.org.)

Bōk juon Kōjeram̧m̧an an Petriak

Juon kōjeram̧m̧an an petriak emaron̄ juon kein jipan̄ ilo tōl, aeņōm̧m̧an, im im̧we. Epād ie ko̧o̧njeļ eo ad make jān Jemedwōj Ilan̄ n̄an kōj im jipan̄ kōj meļeļe wōn kōj im un eo ad n̄an indeeo. Jipan̄ ajri eo nejim kōppopo n̄an bōk juōn kōjeraam̧m̧an an petriak ilo am̧ katakin aorōkin im ekwojarjar eo an kōjeraam̧m̧an an petriak.

N̄an katak eļapļo̧k, lale Unin Kōnono ko an gospel in, “Patriarchal Blessings, Gospel Library eo.

• Kwaļo̧k n̄an ajri eo nejim en̄jake eo am̧ ilo am̧ bōk juon kōjeraam̧m̧an an petriak. Kwomaron̄ kwaļok men ko āinwōt elmen am̧ kar kōppopo n̄an bōke, elmen an kar jipan̄ eok epaakeļo̧k Anij, im elmen am̧ kōjerbale kōjeram̧m̧an in ilo mour eo am̧. Kwomaron̄ barāinwōt kajjitōk ippān ajiri eo nejim n̄an kōnono ippān ro uwaan baam̧le ro me rekar bōk kōjeram̧m̧an an petriak.

• Bōk iien n̄an etale ippān doon jet iaan kein jipan̄ ko ilo Gospel Topics, “Patriachal Blessings.” N̄an ekkatak kōn bun̄tōn ko n̄an bōke kōjeraam̧m̧an an petriak, lale Bok in Bōk Meļeļe Eļap,18.17.

• Eļan̄n̄e ewōr ro nukum raar bōk kōjeraam̧m̧an eo an petriak, emaron̄ im̧we eok n̄an riiti jet iaer n̄an ajiri ro. N̄an kajjitōk kōjeraam̧m̧an ko an jibud im jimaad ro remej, deļon̄e ChurchofJesusChrist.org, jipeed e akkaun eo ilo ituanmooṇ ijo lōn̄ ilo screen eo, im kāālet “Patriarchal Blessing.”

• Ālkin an ajri eo nejim bōke kōjeraam̧m̧an an petriak, kajjitōk ippān jabdewōt uwaan baamle eo ro rekar pād n̄an rekoote en̄jake ko aer im kwaļo̧ki n̄an ajri eo nejim.

Etal n̄an Tampeļ—Menin Letok Kwojarjar eo

Anij ekōņaan kakwojarjar, ak kōjeraam̧m̧an, aolep ajri ro Nejin ippān “kajoor jān ijo euteij” (Katak im Bujen ko 95:8). Jej etal n̄an tampeļ n̄an bōk menin letok kwojarjar eo ad make juon wōt kōttan, ak bujen eo jej kōm̧m̧āne ippān Anij im kajoor in jetōb eo Ej letok n̄an kōj ekoba menin letok kwojarjar eo emaron̄ kōjeraam̧m̧an kōj aolep raan ilo mour ko ad.

• Likūt juōn pijain tampeļ ilo m̧weo im̧ōm̧. Ba n̄an ajri eo nejim kōn en̄jake ko am̧ ilo tampeļ. En ekkā am̧ kōnono kōn iakwe eo am̧ n̄an Irooj im M̧weo Im̧ōn im bujen ko kwar kōm̧m̧ane ijōn.

• Kappukōt ippān doon temples.ChurchofJesusChrist.org. Riit ippān doon ennaan ko āinwōt “About the Temple Endowment” im “Prepare for the House of the Lord.” Kōtļo̧k bwe ajri eo nejim en kajjitōk jabdewōt kajjitōk kōn tampeļ eo. Kōn unin tōl ko kōn ta eo kwomaron̄ kōnono kake nabōj in tampeļ, lale ennaan eo an Elder David A. Bednar “Prepared to Obtain Every Needful Thing” (Ensign ak Liaona, Māe 2019, 101–4; lale eļaptata jekjen taitōļ eo “Home-Centered and Church-Supported Learning and Temple Preparation”).

• Ilo am̧ im ajri eo nejim bok kwonaam̧ ilo ak kam̧ool kain̄i ko jet (āinwōt kwojkwoj eo im kōjeraam̧m̧an eo an kōmour), bōk jidik iien n̄an kōnono kōn kōkaļļe ko ekoba ippān kain̄i ko. Ta eo kōkaļļe ko rej bōk jikin? Ewi wāween aer kam̧ool kōn Jisōs Kraist? Menin emaron̄ jipan̄ kōpooje ajiri eo n̄an lin̄uri kōkaļļe in melele eo an kain̄i ko an tampeļ, eo ej kam̧ool kōn Jisōs Kraist.

• Jipan̄ ajri eo kile elmen an dāpij bujen peptaij me ej kōmeļeļe ilo Mosaia 18:8–10, 13. Barāinwōt jipan̄ ajri eo nejim kile elmen an Irooj kōjeraam̧m̧ane. Kalek lōke eo an ajiri eo nejim n̄an dāpij bujen ko.

• Kōnono kake ilo alikkar im emakijkij kōn wāween bujen ko am̧ ilo tampeļ tōl jokālet ko am̧ im jipan̄ eok epaakeļo̧k Jisōs Kraist. Kwomaron̄ kōjerbal Bok in Bōk Meļeļe Eļap, 27,2, n̄an etale bujen ko jej kōm̧m̧ani ilo tampeļ.

Etal im Mijen

Elder David A. Bednar ekar katakin: “Men eo aorōktata kwomaron̄ kōm̧m̧an n̄an kōppopo n̄an juon kūr ej n̄an erom̧ juon mijinede m̧okta jān am̧ etal n̄an mijen. … Menin ejjab n̄an etal n̄an juon mijen; ijjeļo̧kin, menin ej n̄an erom̧ juon mijinede im jerbal ilo aolepen mour eo ad kōn aolepen būruōd, maron̄, ļōmņak, im kajoor. … Kwoj kōppopo ilo jerbal in mijinede ilo aolepen mour eo am̧” (“Becoming a Missionary,” Liahona, Nov. 2005, 45–46). En̄jake eo an ajri eo nejim n̄an erom̧ juon mijenede enaaj kōjeram̧m̧an e n̄an indeeo, ejjab ilo iien eo wōt enaaj etal im jerbal āinwōt juon mijinede.

N̄an ekkatak eļapļo̧k, lale Russell M. Nelson, “Kwaļo̧k Gospel in Aenōm̧m̧an eo,” Liaona,Māe 2022, 6–7; M. Russell Ballard, “Jerbal In Jipan̄ an Mijenede Ekar Kōjeraam̧m̧an Mour Eo Aō N̄an Indeeo,” Liaona, Māe 2022, 8–10; Missionary Preparation: Adjusting to Missionary Life, Gospel Ļaibrāre.

• Kwaļo̧k ekōjkan am̧ kwaļo̧k gospel eo ilo wāween ko rekkar. Aolep iien lale iien ko rem̧m̧an n̄an kwaļo̧k ippān ro jet en̄jake ko am̧ kōn Jemedwōj Ilan̄ im Rilo̧mo̧o̧r eo im kōjeraam̧m̧an ko kwoj būki āinwōt juon membōr in Kabun̄ eo An. Kūrtok ro jet n̄an kobatok ippān baamle eo ilo m̧ōn jar eo im m̧akūtkūt ko an baam̧le.

• Lale iien ko rem̧m̧an n̄an baamle eo n̄an bōk kwoņaer ippān mijinede ro. Kajjitōk ippāer n̄an katakin ro mōttam̧, ak kōtļo̧k er n̄an katakin armej ro ilo m̧weo imōm̧. Kajjitōk ippān mijenede ro kōn en̄jake ko aer me ewōr ippāer im elmen an jerbal in mijenede jipan̄ er epaakeļo̧k Jisōs Kraist. Barāinwōt kajjitōk ta eo rekar kōm̧m̧ane (ak rekar kōņaan kōm̧m̧ane) n̄an kōppopo n̄an erom̧ mijenede ro.

• N̄e kwar jerbal ilo juon mijen, kōnono ilo alikkar im emakijkij kōn en̄jake ko am̧. Ak kūrtok m̧ōttam̧ ak ro uwaan baam̧le eo am̧ me rekar mijen n̄an kōnono kōn en̄jake ko aer. Kwomaron̄ barāinwōt kōnono kōn wāween ko kwar kwaļo̧k kōn gospel eo ippān ro jet ilo mour eo am̧. Jipan̄ ajri eo nejim ļōmņak kōn wāween ko emaron̄ kwaļo̧k kōn gospel eo.

• Leļok n̄an ajiri ro iien ko rem̧m̧an n̄an katakin baam̧le eo am̧ pedped in katak ko an gospel. Ajiri eo emaron̄ bar kamelmel kwaļok kōn tōmak ko an ippān ro jet. N̄an waanjon̄ak, kwomaron̄ kwaļok kajjitōk ko āinwōt “Elmen ad kwaļo̧k kōn Bok in Mormon n̄an juon armej eo ejjan̄in kar ron̄ kake?” ak “Elmen ad kōm̧eļeļeik aikuj eo an Rilo̧mo̧o̧r n̄an juon armej eo ejjab Kūrijin?”

• Jipan̄ ajiri eo nejim bwe en em̧m̧an an kōnono ippān armej. Ta jet iaan wāween ko rem̧m̧an n̄an jino juon ekōnono? Rojan̄ ajri eo nejim n̄an ekkatak elmen n̄an ron̄jake ta ko ro jet rej ba, meļeļe ta eo ej pād būrueer, im kwaļo̧k m̧ool ko an gospel eo emaron̄ kōjeraam̧m̧an būrueer.

• Lale iien ko rem̧m̧an ko n̄an ajiri eo nejim n̄an ekkatak kōn m̧anit ko jet im tōmak ko. Jipan̄ er kile im kauteij em̧m̧an eo im m̧ool eo an katak ko ilo tōmak ko jet.

Etal n̄an Tampeļ—Liāp

Ilo tampeļ, ļāeo pālele im lieo pālele remaron̄ m̧are n̄an indeeo. Men in ej waļo̧k ilo kain̄i eo ņae etan liāp. Men̄e kain̄i in emaron̄ lōn̄ iiō ko retoļo̧k wōt n̄an ļaddik eo ak leddik eo nejim, dik, ļam waan, men ko ekkā am̧ kōm̧m̧ani ippān doon iiō ko emaron̄ jipan̄ ļeo ak lio kōppopo n̄an kōjeram̧m̧an in eaibojooj.

• Riit ippān doon “Baam̧le Eo: Juōn Naan in Kean̄ n̄an Laļ in” ilo Gospel Ļāibrāre eo. Ta eo naan in kean̄ in ej katakin kōn mōņōņō eo an baam̧le im kōn m̧are eo em̧m̧an. Ippān ajiri eo nejim, kāālet juon katak elaajrak ilo kean̄ in n̄an ekkatak. Kwomaron̄ pukot eoon ko rej ekkeijel n̄an pedped in katak eo ilo Guide to the Scriptures. Kwomaron̄ kōm̧m̧ani kōttōpar ko n̄an bōke katak eo eļapļo̧k ilo baam̧le eo am̧. Ilo am̧ jerbal e kōttōpar eo am̧, kōnono ippān doon kōn kijejeto eo an mour kōn katak ilo mour eo an baam̧le eo.

• Ippān ajri eo nejim, riiti ennaan eo an Būreejtōn Dieter F. Uchtdorf “In Praise of Those Who Save” (Ensign ak Liaona, Māe 2016, 77–80). N̄e kwonaaj tōpar jekjen eo etan “A Society of Disposables,” kwomaron̄ lale ta ko m̧weo m̧ōm̧ maron̄ joļo̧ki im ta ko rejjab. Kōnono kake elmen an oktak am̧ lale juon men eo kwoj kōņaan bwe en to an pād. Ta eo menin ej elmakot kōn elmen ad aikuj lale m̧are im jem̧jera eo an baam̧le ko. Bar ta ko jet jej ekkatak jān ennaan eo an Būreejtōn Uchtdorf kōn elmen an Rilo̧mo̧o̧r eo maron̄ jipan̄ kōj kalōk m̧are im baam̧le ko rekajoor?

• Eļan̄n̄e em̧ōj am̧ m̧are, kōnono ilo alikkar ippān ajiri eo nejim kōn men ko kwoj en̄jake kwoj kōm̧m̧an rem̧m̧an āinwōt juon ripālele, men ko kwoj ekkatak, im wāween ko kwoj kajjieon̄ n̄an kōkm̧anm̧anļo̧k. Eļan̄n̄e kwe im eo pāleem kar liāp ilo tampeļ, kwaļok n̄an ajiri eo ilo waanjon̄ak elmen am̧ niknik n̄an kōjparok bujen ko ippān doon im ippān Irooj. Ba n̄an ajri eo nejim elmen am̧ niknik n̄an kōm̧m̧an bwe Jemedwōj Ilan̄ im Rilo̧mo̧or ren ioļap in jem̧jerā eo am̧ im elmen Aer jipan̄ eok.

• Eļan̄n̄e kālet ko an baam̧le rej aikuj kōm̧m̧an, kōm̧m̧ani ko̧o̧ņjel im kōnono ko an baam̧le. Kōm̧m̧an bwe aolep naan ko an ro uwaan baam̧le eo ren ron̄ im kaorōke. Kōjerbale ekōnono kein āinwōt juon iien em̧m̧an n̄an kalōk ekōnono ko rem̧m̧an im jouj ilo jem̧jerā an baam̧le eo, men̄e aolep rej jab loe men ko ilo juon wōt wāween.

• Eļan̄n̄e ewōr jab errā ak pok ilo baam̧le eo, kwaļo̧k kijenmej im tūriam̧o. Jipan̄ ajri eo nejum loe bwe kabōjrak pok ko ilo wāween ko an Kraist emaron̄ jipan̄ e kōppopo n̄an juon m̧are elem̧ōņōņō. Riit ippān doon Katak im Bujen Ko 121: 41-42, im kōnono kōn ekōjkan an pedped in katak ko ilo eoon kein maron̄ kōjerbali n̄an m̧are.