“Ki Hono Fakamālohia ʻo e Toʻu Tupú: Ko ha Makasini Foʻou maʻá e Toʻu Tupú,” Sānuali 2021.
Ki Hono Fakamālohia ʻo e Toʻu Tupú: Ko ha Makasini Foʻou maʻá e Toʻu Tupú
Ko Hono Maʻu ʻo e Fiefiá ʻia Kalaisí
Ko ha Makasini Fakaemāmani Lahi ʻa e Toʻu Tupú Maʻau Pē!
Ko e makasini Ki Hono Fakamālohia ʻo e Toʻu Tupú ko ha makasini ʻoku fakataumuʻa pē maʻá e toʻu tupú. Te tau maʻu ʻi he pulusinga takitaha ha ngaahi pōpoaki fakalaumālie mo langaki mo‘ui mei he Kau ʻAposetoló mo e kau taki kehe ʻo e Siasí, ngaahi fakamoʻoni mo e aʻusia mei he toʻu tupu ʻi he funga ʻo e māmaní, ngaahi ʻekitivitī fakafiefia, mo ha meʻa lahi ange. Te ke lava ʻo maʻu ʻi he peesi takitaha ha ueʻi fakalaumālie mo ha mālohi te ne lava ʻo tokoniʻi koe ke ke maʻu ʻa e fiefiá ʻi hoʻo hoko ko ha ākonga ʻo Sīsū Kalaisí.
Tokoni ki he Haʻu, ʻo Muimui ʻIate Aú
ʻOku lahi ha ngaahi fakamatala mo e ʻekitivitī ʻi he Ki Hono Fakamālohia ʻo e Toʻu Tupú ʻoku poupouʻi ai hoʻo ako e folofola ʻoku fakamatala ki ai ʻi he Haʻu, ʻo Muimui ʻIate Au ʻi he māhina takitaha. ʻE lava ke tokoni ʻeni ke fakamālohia hoʻo ako folofola fakataautaha mo fakafāmilí pea fakafehokotaki koe mo e toʻu tupu ʻi he funga ʻo e māmaní ʻi heʻenau ako e folofola tatau. ʻOku tatau ai pē pe ʻokú ke nofo ʻi fē, ʻe ueʻi fakalaumālie mo tokoniʻi koe ʻe he ngaahi fakamatala ko ʻení ʻi hoʻo feinga ke moʻui ʻaki e meʻa ʻokú ke ako mei he folofolá he ʻaho takitaha!
ʻOmi Hoʻo Talanoá Kiate Kimautolu
ʻOku fie fangongo ʻa e Ki Hono Fakamālohia ʻo e Toʻu Tupú meiate koe! Te ke lava ʻo tokoni ke faitāpuekina e toʻu tupu hangē ko koé ʻi he funga ʻo e māmaní. ʻE lava ke ueʻi fakalaumālie ʻa e toʻu tupú ʻi he feituʻu kotoa pē ʻi hoʻo vahevahe ho ngaahi aʻusiá.
Kātaki ʻo ʻomi ha niʻihi ʻo e ngaahi meʻá ni:
-
ko ha taimi kuó ke moʻui faivelenga ʻaki ai e ongoongoleleí, neongo ʻene faingataʻá
-
ko ha faingataʻa naʻe tokoni ai hoʻo tui ki he ʻOtuá ke ke lavaʻi ia
-
ngaahi fakakaukau pe ʻoku fēfē hoʻo hoko ko ha mēmipa ʻo e Siasi ʻo Sīsū Kalaisí ʻi he feituʻu ʻokú ke nofo aí
-
ko ha aʻusia ne fakahaaʻi atu ai ʻe ha taha ʻa e ʻofa faka-Kalaisi moʻoní
-
ko hoʻo fakamoʻoní
-
ko ha toe talanoa pē ʻokú ne fakahaaʻi e founga kuo faitāpuekina ai ʻe he ongoongoleleí hoʻo moʻuí
ʻOmi hoʻo talanoá ki he ftsoy@ChurchofJesusChrist.org.
Ngaahi Fakamatala Fakaʻilekitulōnika Lahi Ange
Naʻá ke ʻilo nai ʻoku pulusi ʻe he Ki Hono Fakamālohia ʻo e Toʻu Tupú ha kanotohi lahi ange ʻi he meʻa te ke maʻu ʻi he makasini kuo pākí? ʻE lava ke maʻu ʻa e ʻū fakamatala fakaʻilekitulōniká ʻi he ChurchofJesusChrist.org pe ʻi he polokalama Gospel Library.
Ki ha ngaahi meʻa fakafiefia mo langaki moʻui ange, ʻahiʻahiʻi ʻa e polokalama Gospel Living! ʻOku ʻi ai ha konga ai ʻoku lahi ai e fanga kiʻi sivi, vitiō, fanga kiʻi tokoni ki he ako folofolá, ʻū fakatātā-teuteú, mo ha ngaahi meʻa lahi ange.
Vakai “Ngaahi Polokalama Fakaʻilekitulōnika ke Fili Mei Ai” ki ha fakamatala lahi ange ʻi he ngaahi meʻa fakaʻilekitulōnika maʻá e toʻu tupú.