Rave i te mau mā’itira’a fa’auruhia

I roto i te Nō te pūai o te feiā ’āpī, e ’ite ’oe i te mau ha’api’ira’a a Iesu Mesia ’e a tāna mau peropheta. I teie mau parau mau ’ei arata’i, e nehenehe tā ’oe e rave i te mau mā’itira’a fa’auruhia ’o tē ha’amaita’i ia ’oe i teienei ’e i roto i te tau mure ’ore.

’O Iesu Mesia te ’ē’a e tae atu ai i te ’oa’oa mure ’ore. ’A fa’a’ohipa ai ’oe i tō ’oe ti’amāra’a nō te mā’iti ’ia pe’e ia Iesu Mesia, tei ni’a ïa ’oe i te ē’a e arata’i atu i te ’oa’oa mure ore. ’A fa’ariro ia Iesu Mesia ’ei fāito nō ’oe, ’ei niu ’ōfa’i pāpū. ’A ha’amau i tō ’oe orara’a i ni’a i tāna mau ha’api’ira’a, ’e ’a hi’opo’a i tā ’oe mau mā’itira’a ’ia au i te reira. Te mau fafaura’a tā ’oe e rave i te bāpetizora’a, i te taime nō te ’ōro’a mo’a, ’e i roto i te hiero, e mau ’ōfa’i patu ïa nō tō ’oe niu pāpū i roto i te Mesia. E fa’aruru noa ā ’oe i te mau fifi ’e te mau fa’ahemara’a, e tauturu rā te Metua i te ao ra ’e te Fa’aora ia ’oe i roto i te reira mau fifi ato’a.

E tamari’i herehia ’oe nā te Atua. Maoti tāna fa’anahora’a rahi nō te ’oa’oa e ti’a ai ’ia ’oe ’ia tupu i te rahi i te pae vārua ’e ’ia fa’atupu i tō ’oe fāito pūai hanahana. Terā ïa te tumu ’oia i tono ai ia Iesu Mesia nō te riro ’ei Fa’aora nō ’oe.

Tei ni’a te ti’aturi o te Metua i te Ra’i ia ’oe. E mau ha’amaita’ira’a rahi tāna i hōro’a ia ’oe, mai te ’īra’a o te ’evanelia ’e te mau ’ōro’a mo’a ’e te mau fafaura’a ’o tē ru’uru’u ia ’oe iāna ra, ’e ’o tē fa’atae i tōna mana i roto i tō ’oe orara’a. I te reira mau ha’amaita’ira’a tē vai ato’a ra te tahi atu hōpoi’a. ’Ua ’ite ’oia ē, e haere ia ’oe e fa’atupu i te tahi ’ohipa ta’a ’ē i roto i te ao nei, e tītauhia ïa i te rahira’a taime, ’ia ta’a ’ē tā ’oe mau peu i tā tō te ao nei. ’A imi i te arata’ira’a a tō Metua i te ao ra ’a rave ai i te mau mā’itira’a. E ha’amaita’i ’oia ia ’oe i te fa’aurura’a nā roto i te Vārua Maita’i.

E ’ere te fā o te Nō te pūai o te feiā ’āpī i te hōro’ara’a ia ’oe i te « ’ē » ’e te « ’aita » nō ni’a i te mau huru mā’itira’a ato’a tā ’oe e ’ite atu. ’Aita, tē ani manihini nei rā te Fatu ia ’oe ’ia ora ’ia au i te hō’ē haere’a teitei a’e ’e te mo’a a’e—Tōna haere’a. E ha’api’i teie buka iti ia ’oe i tōna haere’a. E fa’ata’a te reira i te mau parau mau tāna i heheu mai. ’A fa’ariro i teie mau parau mau ’ei arata’i nō ’oe nō te rave i te mau mā’itira’a—te mau mā’itira’a rarahi, mai te ravera’a i te mau fafaura’a i roto i te hiero ’e te tāvinira’a i te hō’ē misiōni, ’e tae noa atu te mau mā’itira’a tāmahana, mai te huru ’oe e rave i te ta’ata ’aore rā te huru ’oe e fa’anaho i tō ’oe taime.

E nehenehe te ta’ata e tauturu ia ’oe, tei ia ’oe iho rā tō ’oe tupura’a pae vārua. Tei roto ia ’ōrua te Fatu. ’Ua ’ite ’oia i tō ’ā’au, ’e ’o ’oia ana’e te ha’avā hope’a. ’A fa’aitoito roa i te ha’amaita’i ia ’oe i te mahana tāta’itahi, ’a ha’apa’o i te mau fa’auera’a a te Atua ’e ’a fa’atura i tā ’oe mau fafaura’a, ’e ’a tauturu ia vetahi ’ē ’ia ha’afātata atu ā i te Fa’aora.

Hi’o Mosia 4:29–30 (’ua rahi roa ’ino te ’ohipa e hara ai tātou, nō reira e tītauhia ’ia ha’apa’o maita’i tātou ia tātou iho) ; Helamana 5:12 (ha’amau i tō ’oe niu i ni’a i te Mesia) ; Te Ha’api’ira’a Tumu ’e te mau Fafaura’a 45:57 (’a rave i te Vārua mo’a ’ei arata’i nō ’oe) ; 82:15 (ru’uru’u ia ’oe i te Fatu nā roto i te mau fafaura’a).

E mea nāhea teie buka

E toru tuha’a nō te tumu parau tāta’itahi :

1. Te mau parau mau mure ’ore, ’aore rā te ha’api’ira’a tumu nō te ’evanelia a Iesu Mesia i fa’aho’i-fa’ahou-hia mai

2. Te mau tītaura’a manihini ’ia ’ohipa mai te au i terā mau parau mau

3. Te mau ha’amaita’ira’a i parauhia e te Fatu i te feiā e ora nei i tāna mau ha’api’ira’a