E tauturu Iesu Mesia ia ’oe

Salamo 147:3

’O Iesu Mesia tō ’oe pūai. ’Ua rave ’oia i te mau mea ato’a tei tītauhia ’ia noa’a ia ’oe te ’oa’oa i roto i teie orara’a ē a muri noa atu. Nā roto i te mā’itira’a iāna ’e tāna ’evanelia, tē mā’iti ra ïa ’oe i te ’oa’oa mure ’ore.

Noa atu e tāmata roa ’oe i te rave i te mau mā’itira’a maita’i, i te tahi taime e hape ’oe. E rave ’oe i te tahi mau mea e tātarahapa ’oe. Mai te reira nō te mau ta’ata ato’a. ’Ia tupu ana’e te reira, e mea ’ōhie ’ia ha’aparuparu i te mana’o ’aore rā ’ia uiui ē, e tae ānei ’oe i terā fāito maita’i. E parau ’āpī ’oa’oa rā—e parau ’āpī fa’ahiahia e noa’a te ti’aturi ! Nō te here o te Atua ia ’oe, ’ua tono mai ’oia i tāna Tamaiti, ia Iesu Mesia, tei rave i ni’a iāna i tā ’oe mau hara ’ia ti’a ia ’oe ’ia tātarahapa ’e ’ia tāmau i te haere i mua.

Te mau parau mau mure ’ore

E nehenehe Iesu Mesia e ha’apūai ia ’oe. E nehenehe ’oia e tauturu ia ’oe ’ia taui i tō ’oe mau hia’ai, tō ’oe mau mana’o ’e tā ’oe mau ’ohipa e rave. ’Ia pe’ape’a ’oe ’aore rā ’ia mata’u ’aore rā ’ia fifi noa atu ’oe, e tāmāhanahana ’oia ia ’oe. E tauturu mai ’oia i roto i te mau mea ato’a o te orara’a.

E ’ere te tātarahapara’a i te fa’autu’ara’a nō te hara ; ’o te rāve’a ho’i e fa’ati’amā ai te Fa’aora ia ’oe i te hara. E tātarahapa ra, e taui ïa—e fāriu ’ē i te hara ma te fāriu i ni’a i te Atua. Te aura’a ra, e ha’amaita’i ia ’oe ’e e fāri’i i te fa’a’orera’a hara. E ’ere teie huru tauira’a i te tauira’a nō te hō’ē noa taime ; e ’ohipa tāmau rā.

Te mau tītaura’a manihini

Tātarahapa. ’A fāriu i ni’a i te Fatu ma te hia’ai e ha’amaita’i ia ’oe. ’Ia rave ana’e ’oe i te ’ohipa hape, ’a fā’i hua i te reira i mua i te Atua ’e, e mai te mea e tītauhia, i mua i tō ’oe episekōpo ’e te ta’ata ato’a tā ’oe i ha’apēpē. ’A fa’aitoito roa i te fa’atītī’aifaro i te mau mea.

’A ’oa’oa i te hōro’a nō te rave maita’i a’e ’e nō ha’amaita’i a’e ia ’oe. Noa atu ē, e ’ere i te mea ’ōhie ’e e mea maoro a’e i tā ’oe e hina’aro ra, ’eiaha roa atu e fa’aea i te tāmata. ’A tāmau noa i te ’ohipa ’e i te ti’aturi i te Fatu. E tauturu mai te Fa’aora i tō ’oe mau ta’ahira’a i ni’a i te ’ē’a.

Te mau ha’amaita’ira’a i parauhia

E fa’a’ore Iesu Mesia i te hara ma te fa’aora i tō ’oe māuiui ’a tātarahapa ai ’oe. E mono ’oia i tō ’oe mana’o hapa i te hau ’e te ’oa’oa. E’ita ’oia e ha’amana’o fa’ahou i tā ’oe mau hara. Nā roto i tōna pūai, e rahi atu ā tō ’oe hia’ai e ha’apa’o i tāna mau fa’auera’a.

E taui ’oia i tō ’oe ’ā’au ’e tō ’oe orara’a. E tupu marū noa mai ’oe i te rahi ma te riro rahi atu ā mai iāna te huru. Nā te tū’atira’a ’e te fafaura’a iāna e ha’amatara rahi a’e i tōna mana nō ’oe.

Uira’a ’e pāhonora’a

Nāhea vau i te ’ite ē ’ua fa’a’ore te Atua i tā’u hara ? ’Ua parau fafau te Atua ē, e fa’a’ore ’oia i te hara a te feiā e tātarahapa. ’Ia fāri’i ana’e ’oe i te tāmāhanahanara’a a te Vārua, e ’ite ’oe ē, tē ’ohipa ra te mana tāra’ehara a te Fa’aora i roto i tō ’oe orara’a.

E aha te taime e tītauhia te tauturu a te ’episekōpo nō te tātarahapa ? Tē mau nei tō ’oe ’episekōpo te mau tāviri nō te autahu’ara’a ’e te mau hōro’a pae vārua nō te tauturu ia ’oe ’ia tātarahapa. E nehenehe tā ’oe e tītau i tāna tauturu ’e te parau a’o i te mau taime ato’a. Mai te mea ’ua rave ’oe i te tahi hape teimaha, mai te ’ōfatira’a i te ture nō te vi’ivi’i ’ore, ’a fārerei i tō ’oe ’episekōpo. E’ita ’oia e fa’ahapa ia ’oe. E ti’a ’oia nō Iesu Mesia, ’e e tauturu mai ’oia ’ia ’ite nāhea i te tātarahapa hope roa ’e i te fāri’i i te mana fa’aora māuiui ’e te ha’apūai o te Fa’aora.

Tē tāmata nei au i te tātarahapa, terā rā, tē tāmau noa nei ā vau i te rave i terā mau hape. E aha tē rave i teienei ? Tītauhia te taime nō te ha’amau i te mau peu maita’i ’e nō te fa’aea i te mau peu ’ino, nō reira ’eiaha e fa’aru’e. ’A fāriu i ni’a i te Mesia. E nāva’i tōna aroha. ’A tāmata fa’ahou ā. E’ita roa atu ’oe e vai ’ōtahi i roto i tā ’oe mau tauto’ora’a nō te haere i mua. Tei pīha’i iho noa Iesu Mesia ia ’oe.

Hi’o Enosa 1:6 (e ti’a i te mana’o hapa ’ia horoi-’ē-hia) ; Mosia 4:3 (nā roto i te Vārua Maita’i, e fa’a’ite mai te Atua ē ’ua fa’a’orehia tā oe hara) ; 26:30 (e fa’aore te Fa’aora i te hara, pinepine noa atu tātou i te tātarahapa) ; Etera 12:27 (e ti’a i te maita’i rahi o te Fa’aora e fa’ariro i te mau mea paruparu ’ei mea pūai) ; Moroni 6:8 (te feiā e tātarahapa, e fa’a’orehia ïa tāna hara) ; 10:32 (’ei ha’amaita’i-roa-hia i te Mesia) ; Te Ha’api’ira’a Tumu ’e te mau Fafaura’a 1:32 (tē fa’a’ore nei te Fatu i te hara o te feiā e tātarahapa) ; 58:42–43 (tei roto it e tātarahapara’a te fā’ira’a ’e te fa’aru’era’a i te hara).

Te mau uira’a nō te parau fa’ati’a nō te hiero

E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; i tāna Tamaiti, ’o Iesu Mesia ; ’e i te Vārua Maita’i ?

E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?