Հիսուս Քրիստոսը կօգնի ձեզ

Սաղմոս 147․3

Հիսուս Քրիստոսը ձեր ուժն է: Նա արել է անհրաժեշտ ամեն ինչ, որպեսզի դուք ուրախություն ունենաք այս կյանքում և ընդմիշտ: Ընտրելով Նրան և Նրա ավետարանը՝ դուք ընտրում եք հավերժական ուրախությունը:

Նույնիսկ, երբ փորձում եք անել հնարավոր ամեն ինչ՝ լավ ընտրություն կատարելու համար, երբեմն սխալներ կգործեք։ Դուք կանեք այնպիսի բաներ, որոնք կցանկանայիք, որ չանեիք: Բոլորի հետ է դա պատահում: Երբ դա տեղի է ունենում, հեշտ է հուսահատվել կամ մտածել՝ արդյո՞ք երբևէ կդադարեմ սխալներ գործել: Բայց կա լավ նորություն՝ հրաշալի, հուսադրող նորություն: Քանի որ Աստված սիրում է ձեզ, Նա ուղարկեց Իր Որդուն՝ Հիսուս Քրիստոսին, որն իր վրա վերցրեց ձեր մեղքերը, որպեսզի կարողանաք ապաշխարել և շարունակել առաջադիմել:

Հավերժական ճշմարտություններ

Հիսուս Քրիստոսը կարող է ուժ տալ ձեզ: Նա կարող է օգնել ձեզ փոխել ձեր ցանկությունները, ձեր մտքերը և ձեր գործողությունները: Երբ դուք անհանգստանում եք, վախենում կամ ինչ-որ կերպ պայքարում եք, Նա կմխիթարի ձեզ: Նա կօգնի ձեզ ձեր կյանքի բոլոր ոլորտներում:

Ապաշխարությունը պատիժ չէ մեղքի համար. դա այն ճանապարհն է, որով Փրկիչը մեզ ազատում է մեղքից: Ապաշխարել նշանակում է փոխվել՝ հեռանալ մեղքից և դառնալ դեպի Աստված: Դա նշանակում է կատարելագործվել և ներում ստանալ: Այս տեսակի փոփոխությունը մեկանգամյա իրադարձություն չէ. դա շարունակական գործընթաց է:

Հրավերներ

Ապաշխարեք: Ապավինեք Տիրոջը կատարելագործվելու ցանկությամբ: Եթե ինչ-որ սխալ բան եք արել, ազնվորեն ընդունեք դա Աստծո առաջ և, ըստ անհրաժեշտության, ձեր եպիսկոպոսի և այն մարդու առաջ, ում դուք գուցե վնասել եք: Ամեն ինչ արեք՝ իրավիճակը շտկելու համար:

Ուրախացեք ավելի լավ գործելու և ավելի լավ լինելու պարգևով: Նույնիսկ, երբ դա հեշտ չէ և ավելի երկար է տևում, քան կցանկանայիք, երբեք մի դադարեք փորձել: Շարունակեք աշխատել և վստահել Տիրոջը: Փրկիչը կօգնի ձեզ ճանապարհի ամեն քայլափոխին:

Խոստացված օրհնություններ

Հիսուս Քրիստոսը կների և կբժշկի ձեզ, երբ դուք ապաշխարեք: Նա ձեր մեղքը կփոխարինի խաղաղությամբ և ուրախությամբ: Նա այլևս չի հիշի ձեր մեղքերը: Նրա ուժով կմեծանա Նրա պատվիրանները պահելու ձեր ցանկությունը:

Նա կփոխի ձեր սիրտը և ձեր կյանքը: Դուք կամաց-կամաց կաճեք ու ավելի շատ կնմանվեք Նրան: Նրա հետ ունեցած ձեր ուխտի կապը ավելի մեծ հասանելիություն կբերի դեպի Նրա զորությունը:

Հարցեր և պատասխաններ

Ինչպե՞ս կարող եմ իմանալ, որ Աստված ներել է ինձ: Աստված խոստանում է, որ կների նրանց, ովքեր ապաշխարում են: Երբ դուք մխիթարություն եք զգում Հոգուց, կարող եք իմանալ, որ Փրկչի քավիչ զորությունը գործում է ձեր կյանքում:

Ես ե՞րբ ունեմ եպիսկոպոսի օգնության կարիքը՝ ապաշխարելու համար: Ձեր եպիսկոպոսը կրում է քահանայության բանալիներ և հոգևոր պարգևներ, որոնցով օգնում է ձեզ ապաշխարել: Դուք կարող եք ցանկացած պահի դիմել նրա օգնությանն ու խորհրդին: Եթե լուրջ սխալներ եք թույլ տվել, ինչպիսին է մաքրաբարոյության օրենքի խախտումը, հանդիպեք ձեր եպիսկոպոսի հետ: Նա ձեզ չի դատապարտի: Նա Հիսուս Քրիստոսի ներկայացուցիչն է և կօգնի ձեզ իմանալ, թե ինչպես լիովին ապաշխարել և ստանալ Փրկչի բժշկող ու ամրացնող զորությունը:

Ես փորձում եմ ապաշխարել, բայց շարունակում եմ նույն սխալները թույլ տալ: Ի՞նչ պետք է անեմ այժմ։ Լավ սովորությունները զարգացնելու և վատ սովորությունները վերացնելու համար ժամանակ է պահանջվում, այնպես որ մի հանձնվեք: Շրջվեք դեպի Քրիստոսը: Նրա շնորհը բավարար է: Կրկին փորձեք: Դուք երբեք մենակ չեք առաջադիմելու ձեր ջանքերում: Հիսուս Քրիստոսը միշտ ձեզ հետ է:

Տես Ենովս 1.6 (հանցանքը կարող է սրբվել), Մոսիա 4.3 (Սուրբ Հոգու միջոցով Աստված թույլ է տալիս իմանալ, որ դուք ներված եք), 26.30 (Փրկիչը ներում է այնքան հաճախ, որքան մենք ապաշխարում ենք), Եթեր 12.27 (Փրկչի շնորհը կարող է թույլ բաներն ուժեղ դարձնել)), Մորոնի 6.8 (նրանք, ովքեր ապաշխարում են, ներվում են), 10.32 (կատարյալ եղեք Քրիստոսում), Վարդապետություն և Ուխտեր 1.32 (Տերը ներում է նրանց, ովքեր ապաշխարում են), 58.42–43 (ապաշխարությունը ներառում է մեղքը խոստովանելը և թողնելը):

Տաճարային երաշխավորագրի հարցազրույցի հարցեր

Դուք ունե՞ք հավատք և վկայություն առ Աստված` Հավերժական Հայրը, Նրա Որդին` Հիսուս Քրիստոսը և Սուրբ Հոգին:

Դուք ունե՞ք վկայություն Հիսուս Քրիստոսի Քավության և որպես Փրկիչ ու Քավիչ Նրա դերի մասին: