Jisōs Kraist enaaj jipan̄ kwe

Sam ko 147:3

Jisōs Kraist ej am̧ kajoor. Em̧ōj an kōm̧m̧ane aolep men aikuji n̄an kwe n̄an bōk m̧ōņōņō ilo mour in im n̄an indeeo. Ilo am̧ kālet E im gospel eo An, kwoj kālet mōņōņō indeeo.

Men̄e kwoj kajjeon̄ jon̄an wōt am̧ maron̄ n̄an kōm̧m̧ani kālet ko rem̧m̧an, jet iien kwonaaj kōm̧m̧an bwōd. Kwonaaj kōm̧m̧ane men ko kwoj ļōmņak kwojan̄in kar kōm̧m̧ani. Aolep rej. N̄e menin ej waļo̧k, epidodo n̄an en̄jake buromōj ak ļōmņak eļan̄n̄e enaaj bwe jon̄an em̧m̧an eo ilo kwe. Ak ewōr nuuj em̧m̧an—aiboojoj, nuuj in kōjatdikdik! Kōnke Anij ej iakwe kwe, Ekar jilkintok Nejin, Jisōs Kraist, eo ekar bōk ioon Make am̧ jerawiwi bwe kwon ukweļo̧k im wōnm̧aanļo̧k wōt.

M̧ool ko indeeo

Jisōs Kraist emaron̄ kōkajoor kwe. Emaron̄ jipan̄ kwe ukōt ikideelel ko am̧, ļōmņak ko am̧, im kōm̧m̧an ko am̧. N̄e kwoj inepata, mijak, ak apan̄ ilo jabdewōt wāween, Enaaj kaenōm̧m̧an kwe. Enaaj jipan̄ kwe ilo aolep wāween ko ilo mour eo am̧.

Ukweļo̧k ejjab juon kaje kōn jerawiwi; ej wāween eo Rilo̧m̧o̧o̧r ej kōtļo̧k kōj jān jerawiwi. N̄an ukweļo̧k ej meļeļein n̄an oktak—n̄an eļļo̧k jān jerawiwi im wōnm̧aanļo̧k n̄an Anij. Ej meļeļein n̄an em̧m̧anļo̧k im bōk jeorļo̧k bōd. Oktak in ejjab juon kōttan in m̧akūtkūt; ej juon jerbal ej wōnm̧aanļo̧k wōt.

Kūr ko

Ukweļo̧k. Reiļo̧k n̄an Irooj kōn ikideelel eo n̄an em̧m̧anļo̧k. N̄e kwar kōm̧m̧an juon men ebōd, m̧ool ilo kwaļo̧k im̧aan Anij im, n̄e aikuj, n̄an bisop eo am̧ im jabdewōt eo kwomaron̄ kar kōjoreene. Kōm̧m̧ane jon̄an wōt am̧ maron̄ n̄an kōm̧m̧ane men ko rejim̧we.

Mōņōņō ilo menin letok eo n̄an kōm̧m̧an em̧m̧anļo̧k im n̄an em̧m̧anļo̧k. Men̄e ejjab pidodo im ebōk iien aitok jān ke kwar kōņaan, jab pojrak in kajjeon̄. Jerbal wōt im lōke ilo Irooj. Rilo̧mo̧o̧r enaaj jipan̄ kwe ilo kajjojo būntōn ko ilo iaļ eo.

Kōjeraam̧m̧an ko kar kallim̧ur kaki.

Jisōs Kraist enaaj jeorļo̧k bōd im kōmour kwe ilo am̧ ukweļo̧k. E enaaj joļo̧k ajļo̧k eo am̧ kōn aenōm̧m̧an im lan̄lōn̄. E epan bar keememej jerawiwi ko am̧. Ilo kajoor eo An, ikideelel eo am̧ n̄an kōjparok kien ko An enaaj lapļo̧k.

Enaaj ukōte buruōm̧ im mour eo am̧. Jidik kōn jidik, kwonaaj eddōkļo̧k im erom̧ āinwōt E. Bujen in kōneekjen eo am̧ Ippān enaaj boktok n̄an eok eļapļo̧k kajoor n̄an bōk jipan̄ jān kajoor eo An.

Kajjitōk ko im uwaak ko

Ewi wāween aō jeļā bwe em̧ōj an Anij jeorļo̧k aō bōd? Anij ekar kallim̧ur ke E enaaj jeorļo̧k bōd an ro rej ukweļo̧k. N̄e kwoj en̄jake jān Jetōb, komaron̄ jeļā bwe kajoor in pinmuur eo an Rilo̧mo̧o̧r eo ej jerbal ilo mour eo am̧.

N̄aat eo ij aikuji jipan̄ eo an bisop eo n̄an ukweļo̧k? Bisop eo ej kabwijer priesthood kii ko im menin letok ko an jetōb n̄an jipan̄ kwe ukweļo̧k. Kwomaron̄ kappukōt jipan̄ eo an im ko̧o̧njeļ ilo jabdewōt iien. N̄e kwar kōm̧m̧ane bōd ko reļļap, āinwōt ko̧kkure mour erreo, etal ippān bisop eo am̧. Eban kaje kwe. Ej juon eo ej pād ilo etan Jisōs Kraist im enaaj jipan̄ kwe jeļā lukkuun elmen lukkuun ukweļo̧k im bōke kōmour im kajoor eo an Rilo̧mo̧o̧r eo.

Ij kajjeon̄ in ukweļo̧k, ak ilakkar kōm̧m̧ane ejja bwōd ko wōt. Ta eo inaaj kōmm̧ane kiiō? Ebōk iien n̄an kōļapļo̧k imminene ko rem̧m̧an im joļo̧k men ko renana, kōn menin jab ebweer. Oktakļo̧k n̄an Kraist. An jouj ebwe. Bar kajjieon̄. Kwoj jab make iaam̧ ilo kijejeto ko am̧ n̄an wōnm̧aanļo̧k. Jisōs Kraist ej pād ippam̧ iien otemejej.

Lale Inos 1:6 (nana mour emaron̄ jakoļo̧k); Mosaia 4:3 (kōn Jetōb Kwojarjar, Anij ej kojeļļāik kwe bwe em̧ōj jeorļo̧k am̧ bōd); 26:30 (Rilo̧mo̧o̧r ekkut an jeorļo̧k ad bōd jon̄an wōt ad ukweļo̧k); Ether 12:27 (tūriam̧o eo an Rilo̧mo̧o̧r emaron̄ kōm̧m̧an m̧ōjno bwe ren erom̧ kajoor); Moronai 6:8 (ro rej ukweļo̧k rej jeorļo̧k aer bōd); 10:32 (kwon em̧m̧an n̄an Kraist); Katak im Bujen Ko 1:32 (Irooj ej jeorļo̧k bōd an ro rej ukweļo̧k); 58:42–43 (ukweļo̧k ekoba kwaļo̧k m̧ool im jolo̧k jerawiwi.).

Kajjitōk ko ikkijeen pepa in mālim in deļo̧n̄e tampeļ

Ewōr ke am̧ tōmak ilo im juon naan in kam̧ool kōn Anij, Jemed Indeeo, Nejin, Jisōs Kraist; im Jetōb Kwojarjar?

Ewōr ke am̧ juon naan in kam̧ool kōn Pinmuur eo an Kraist im kōn jerbal eo An āinwōt Rilo̧mo̧o̧r im Ripinmuur?