Here i te Atua, here i tō ta’ata tupu

Mataio 22:37–40

Nō te tauturu ia ’oe ’ia rave i te mau mā’itira’a maita’i, ’ua hōro’a te Atua i te mau fa’auera’a. Tē nā reira nei ’oia nō te mea ’ua here ’oia ia ’oe. ’E te tumu maita’i roa a’e nō te ha’apa’o i te mau fa’auera’a a te Atua, ’o te herera’a ïa iāna. ’O te here i te pū o te mau fa’auera’a a te Atua.

Te mau parau mau mure ’ore

’Ua here te Atua ia ’oe. ’O ’oia tō ’oe Metua. E nehenehe tōna here fāito hope e fa’auru ia ’oe ’ia here iāna. I te taime ’o tō ’oe here i te Metua i te ao ra te mana fa’auru faufa’a roa a’e i roto i te orara’a, e ’ōhie a’e ïa te mau fa’aotira’a e rave rahi.

Nā fa’auera’a rahi roa a’e e piti tā Iesu i ha’api’i, ’oia ho’i ïa, e here i te Atua ’e e here i tō ta’ata tupu. ’E ’o vai ïa tō ta’ata tupu ? Te mau ta’ata ato’a ïa ! Te tahi atu mau mea i ha’api’ihia i roto i te mau pāpa’ira’a mo’a ’e nā te mau peropheta, ’ua tū’ati ïa i teie nā fa’auera’a e piti.

Te mau ta’ata ato’a e mau taea’e’e e mau tuahine nō ’oe—’oia ato’a ïa te mau ta’ata ta’a ’ē ia ’oe, ’aore rā ’o tei ’ore i ’āfaro ia ’oe. Tē hina’aro nei te Metua i te ao ra i tāna mau tamari’i ’ia here i te tahi ’e te tahi. ’Ia tāvini ’oe i tāna mau tamari’i, tē tāvini ra ïa ’oe iāna.

Te mau tītaura’a manihini

’A fa’a’ite i tō ’oe here i te Atua nā roto i te ha’apa’ora’a i tāna mau fa’auera’a. ’Ei hi’ora’a, nā roto i te ha’amo’ara’a i te mahana sābati, mai te fa’aineine-māite-ra’a ’e te ravera’a i te ’ōro’a mo’a, tē fa’a’ite ra ïa ’oe i te Atua ē, ’ua ineine ’oe i te ha’amo’a i te hō’ē mahana iāna ra. ’Ia ha’apae ’oe i te mā’a ’e ’ua ’aufau ’oe i te tuha’a ’ahuru ’e te mau ō, tē fa’aite ra ïa ’oe i te Atua ē, ia ’oe, e mea faufa’a a’e tāna ’ohipa i te mau mea mātēria. ’Ia fa’a’ohipa ’oe i te i’oa o te Atua ’e o te Mesia ma te mana’o tura, ’e ’aita roa atu e fa’ahiti faufa’a ’ore i te reira, ’aore rā ma te tāu’a ’ore, tē fa’a’ite ra ïa ’oe i tō ’ā’au mēhara nō te mau mea ato’a tā rāua i rave nō ’oe.

’A rave i te mau ta’ata ato’a mai te hō’ē tamari’i nā te Atua. ’Ei pipi nā Iesu Mesia, e nehenehe tā ’oe e ’ōmua i te ravera’a i te ta’ata nō te mau nūna’a ato’a ’e nō te mau ha’apa’ora’a fa’aro’o ato’a ’e te mau pupu, ma te here, te fa’atura ’e te fāri’ira’a—ia rātou iho ā rā e fa’aruru nei i te tahi taime i te mau parau ’e te mau ’ohipa fa’a’ino. ’A toro i te rima i te feiā e vai mo’emo’e ra, ’o tē vai ’ōtahi noa ma te rāve’a ’ore. ’A tauturu ia rātou ’ia putapū i te here o te Metua i te ao ra nā roto atu ia ’oe.

’A hi’o maita’i ē tē fa’a’ite ra tā ’oe mau parau i te here nō te Atua ’e nō te ta’ata—’ia paraparau tino ’oe i te ta’ata, ’aore rā nā ni’a i te tu’urēni. ’A parau i te mau parau fa’aitoito—’eiaha te parau vāvāhi ’e te fa’a’ino ’e te ha’amāuiui, noa atu ē e parau ha’uti noa. E nehenehe tā ’oe mau parau e riro ’ei parau pūai mau. ’A fa’ariro i te reira ’ei parau pūai mau nō te maita’i.

I te fare e ha’amata ai te herera’a i te mau tamari’i ato’a a te Atua. ’A rave i tā ’oe tuha’a nō te fa’ariro i tō ’oe utuāfare ’ei vāhi e putapū ai te mau ta’ata ato’a i te here o te Fa’aora.

Te mau ha’amaita’ira’a i parauhia

E hōhonu atu ā tō ’oe tā’amura’a i te Atua ’ia fa’a’ite atu ’oe i tō here nā roto i te ha’apa’ora’a i tāna mau fa’auera’a ’e te ha’apa’ora’a i tā ’oe mau fafaura’a iāna ra.

E hōhonu atu ā tō ’oe tā’amura’a ia vetahi ’ē ’ia fa’a’ite atu ’oe tō here nā roto i te tāvinira’a huru Mesia. E ’ite ’oe i te ’oa’oa i te fa’arirora’a i te ao nei ’ei vāhi nō te here rahi atu ā.

Uira’a ’e pāhonora’a

Nāhea vau e ’ite ai i te here o te Atua ? ’Ua māhorahora noa te here o te Metua i te ao ra. ’A paraparau pinepine iāna nā roto i te pure. ’A fa’a’ite iāna i te mau mana’o i roto ia ’oe, ’e ’a fa’aro’o i te mau mana’o e tae mai mai iāna ra. ’A tai’o i tāna mau parau i roto i te mau pāpa’ira’a mo’a. ’A feruri i te mau mea ato’a tāna i rave nō ’oe. ’A fa’ata’a i te taime nō te haere i te mau vāhi ’e i te mau ’ohipa i reira tōna Vārua e pārahi ai.

Tē tītau ra ānei te Fatu iā’u ’ia here i te mau ta’ata ato’a, noa atu ē e ta’ata tei rave ’ino iā’u ? Tē tītau nei te Fatu ia ’oe ’ia here i tō mau ’enemi ’e ’ia pure nō te feiā e hāmani ’ino ia ’oe. Terā rā, ’aita te reira e parau nei ē, e fa’aea noa i roto i terā vaira’a e māuiui ai i te pae manava, i te pae tino ’e i te pae vārua. ’A ha’amau i te tā’ōti’ara’a au maita’i nō te pāruru ia ’oe. Mai te mea tē fa’a’inohia ra ’oe ’e tē hāmani-’ino-hia ra—’aore rā ’ua ’ite ’oe ē, tē tupu ra te reira i ni’a i te tahi atu ta’ata—’a paraparau i te hō’ē ta’ata pa’ari pāpū.

E aha te taime ’e nāhea vau e ha’amātau ai i te ta’ata nō te tahi atu ’āpeni ? Te rāve’a maita’i a’e nō te ha’amātau i te ta’ata, ’o te auhoara’a mau ïa. I tō ’oe ’āpīra’a, ’a ha’amau i te auhora’a i te mau ta’ata e rave rahi. I roto i te tahi mau ta’ere, e ha’amātau te feiā ’āpī i te ta’ata nō te tahi atu ’āpeni nā roto i te tahi mau ’ohipa au e rave ’ei pupu. Nō tō ’oe maita’i pae manava ’e pae vārua, ’e ’ia ’ore te tahi fifi ’ia tupu, e fa’ataimehia te mau ’ohipa ’āpipiti ē pa’ari noa atu tō ’oe ferurira’a—i te 16 matahiti, e matahiti maita’i ïa. ’A paraparau i tō ’oe nā metua ’e te feiā fa’atere. ’A fa’aherehere i te tā’amura’a ia ’oe i te hō’ē noa ta’ata nō te matahiti pa’ari a’e. E haere nā muri i te ta’ata e tauturu ia ’oe ’ia ha’apa’o i tā ’oe parau fafau ia Iesu Mesia.

E aha tā’u e nehenehe e rave mai te mea e ’ere tō’u ’utuāfare i te vāhi nō te here ? ’Ua ’ite tō ’oe Fa’aora i tō ’oe vaira’a, ’e ’ua here ’oia ia ’oe. ’A fa’a’oroma’i, ’a tāmau noa i te ha’apa’o i te mau fa’auera’a a te Atua, ’e ’a riro ’ei hi’ora’a maita’i nō tō ’oe ’utuāfare. ’A ha’amau i te tā’amura’a i tō ’oe ’utuāfare pāroita. ’A fa’aineine i teienei i te ha’amau i tō ’oe iho ’utuāfare i ni’a i te niu nō te mau ha’api’ira’a a Iesu Mesia.

Hi’o Isaia 58:3–11 (te fā nō te ha’apaera’a mā’a) ; 58:13–14 (te mau ha’amaita’ira’a nō te ha’apa’ora’a i te Sābati) ; Malaki 3:8–10 (te mau ha’amaita’ira’a nō te ’aufaura’a i te tuha’a ’ahuru) ; Luka 6:27–28 (here i tō ’enemi) ; 10:25–37 (’o vai tō’u ta’ata tupu ?) ; Ioane 3:16–17 (’ua here te Atua ia tātou, ’ua tono mai ’oia i tāna Tamaiti) ; 14:15 (tē ha’apa’o nei tātou i te mau fa’auera’a nō te mea ’ua here tātou i te Atua) ; 1 Ioane 4:19 (’ua here tātou i te Atua nō te mea ’ua here ’oia ia tātou) ; Mosia 2:17 (’ia tāvini tātou ia vetahi ’ē, tē tāvini ra ïa tātou i te Atua).

Te mau uira’a nō te parau fa’ati’a nō te hiero

Tē pe’e ra ānei ’oe i te mau ha’api’ira’a a te ’Ēkālesia a Iesu Mesia i roto i tā ’oe mau peu i ni’a i te mau melo o tō ’oe ’utuāfare ’e i ni’a ia vetahi ’ē, i te vāhi ’ōmo’e ’e i te vāhi ta’ata ?

Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’amā i te ’ōro’a ’e i te ora i te orara’a e au i te mau ture ’e te mau fa’auera’a o te ’evanelia ?

E ta’ata ’aufau tuha’a ’ahuru ti’a ānei ’oe ?