Palanggaa ang Dios, palanggaa ang imo mga kaingod

Mateo 22:37–40

Para buligan ka sa paghimo sang maayo nga mga pagpili, nagahatag ang Dios sang mga kasuguan. Ginahimo Niya ini tungod palangga ka Niya. Kag ang pinakamanami nga rason sa pagtuman sang mga kasuguan sang Dios amo nga palangga mo Sia. Pagpalangga ang sentro sang mga kasuguan sang Dios.

Wala katapusan nga mga kamatuoran

Palangga ka sang Dios. Sia ang imo Amay. Ang Iya perpekto nga pagpalangga mahimo nga makainspirar sa imo nga palanggaon Sia. Kon ang imo pagpalangga sa Amay nga Langitnon amo ang pinakaimportante nga impluwensya sa imo kabuhi, madamo kaayo nga mga desisyon ang mangin mas mahapos himuon.

Ang duha ka pinakadako sa tanan nga mga kasuguan, gintudlo ni Jesus, amo nga higugmaon ang Dios kag higugmaon ang imo kaingod. Kag sin-o ang imo kaingod? Ang tanan! Ang tanan nga gintudlo sa balaan nga mga kasulatan kag sang mga propeta naangot sa sining duha ka mga kasuguan.

Ang tanan nga tawo imo mga utod nga lalaki kag babayi—lakip na, siyempre, ang mga tawo nga lain sa imo ukon wala nagaugyon sa imo. Gusto sang Amay nga Langitnon nga ang Iya mga kabataan magpinalanggaanay Kon ginaalagaran mo ang Iya mga anak, ginaalagaran mo Sia.

Mga Imbitasyon

Ipakita ang pagpalangga sa Dios paagi sa pagtuman sang Iya mga kasuguan. Halimbawa, paagi sa pagtipig nga balaan sang Adlaw nga Inugpahuway, lakip na ang tampad nga paghanda para sa kag pag-ambit sang sakramento, ginapakita mo sa Dios nga handa ka nga ihalad ang isa ka adlaw kada semana para sa Iya. Sa imo pagpuasa kag pagbayad sang ika-pulo kag mga halad, ginapakita mo sa Dios nga ang Iya buluhaton mas importante para sa imo sangsa materyal nga mga butang. Kon ginagamit mo ang mga ngalan sang Dios kag ni Cristo nga may pagtahod, indi sa wala pulos ukon kaswal nga paagi, ginapakita mo nga nagapasalamat ka sa tanan nga Ila ginhimo para sa imo.

Kabiga ang tanan bilang anak sang Dios. Bilang disipulo ni Jesucristo, pwede ka magpanguna sa pagtrato sang mga tawo sa tanan nga rasa kag relihiyon kag bisan ano nga mga grupo nga may pagpalangga, respeto, kag paglakip—ilabi na sa mga nangin biktima sang mapintas nga mga tinaga kag mga aksyon. Maglab-ot sa mga nagabatyag nga nagaisahanon, napain, ukon wala sang makadtuan. Buligi sila nga mabatyagan ang pagpalangga sang Amay nga Langitnon paagi sa imo.

Siguroha nga ang imo lenggwahe nagasalamin sang gugma para sa Dios kag sa iban—kon nagaistorya sa sa personal man ukon online. Maghambal sang mga butang nga makaalsa—indi sang makatuga sang pagbinahinbahin, makasakit, ukon makasaklaw, bisan pa lahog lang. Ang imo mga tinaga gamhanan. Gamita ang gahum sini sa kaayuhan.

Ang pagpalangga sang tanan nga kabataan sang Dios nagasugod sa balay. Himoa ang imo bahin para himuon ang inyo balay nga lugar kon sa diin ang tanan makabatyag sang pagpalangga sang Manluluwas.

Ginpromisa nga mga bugay

Ang imo relasyon sa Dios magadalom samtang ginapahayag mo ang imo pagpalangga paagi sa pagtuman sang Iya mga kasuguan kag pagtuman sang imo mga kasugtanan upod sa Iya.

Ang imo relasyon sa iban magadalom samtang imo ginapahayag ang imo pagpalangga paagi sa Cristohanon nga pag-alagad. Makakita ka sang kalipay sa paghimo sang kalibutan nga mas mapinalanggaon nga lugar.

Mga pamangkot kag mga sabat

Paano ko mabatyagan ang pagpalangga sang Dios? Ang pagpalangga sang Amay nga Langitnon ara lang pirme. Istoryaha Sia pirme paagi sa pangamuyo. Isugid ang imo mga nabatyagan sa Iya, kag pamatii ang mga pagpabatyag halin sa Iya. Basaha ang Iya mga pulong sa balaan nga mga kasulatan. Panumduma ang tanan nga Iya ginhimo para sa imo. Maghatag tiyempo sa pagkadto sa mga lugar kag mga aktibidades kon sa diin ara ang Iya Espiritu.

Ginapaabot bala sang Ginuo nga palanggaon ko ang tanan, bisan pa ang mga nagahimo sa akon sang malain? Ginapaabot sang Ginuo nga palanggaon mo ang imo mga kaaway kag ipangamuyo ang mga nagahimo sa imo sang malain. Pero, wala ina nagakahulugan nga dapat ka magtiner sa sitwasyon nga nagahatag sa imo sang emosyunal, pisikal, ukon espirituhanon nga halit. Magbutang sang mga limitasyon para amligan ang imo kaugalingon. Kon gina-bully ka ukon ginaabuso—ukon may nahibal-an ka nga nagakatabo ini sa isa ka tawo—makighambal sa masaligan nga hamtong.

San-o kag paano bala ako magpangilala sa mga miyembro sang opposite sex? Ang pinakamaayo nga pagpangilala sa iban amo ang paagi sa tunay nga pagpakig-abyan. Samtang hubin ka pa, magtukod sang maayo nga pagpakig-abyan sa madamo nga tawo. Sa iban nga mga kultura, ang mga lamharon nagapakig-abyan sa mga miyembro sang opposite sex paagi sa mapuslanon nga pang-grupo nga aktibidades . Para sa imo emosyunal kag espirituhanon nga pagtubo kag proteksyon, ang tinag-isaisa nga mga aktibidades dapat ipaiway tubtob nga maghamtong ka na—ang edad nga 16 maayo nga balasehan. Makighambal sa imo ginikanan kag mga lider. Ihulat ang seryoso nga pagpakigrelasyon kon mas dako ka na. Magkig-upod sa mga makabulig sa imo nga tumanon ang imo mga pangako kay Jesucristo.

Ano ang pwede ko himuon kon ang amon balay indi lugar sang pagpalanggaanay? Ang imo Manluluwas nakahibalo sang imo sitwasyon, kag palangga ka Niya. Mangin pasensyoso, padayuna sa pagtuman ang mga kasuguan sang Dios, kag mangin maayo nga ehemplo sa imo pamilya. Magtukod sang mga kaangtanan sa imo pamilya sa ward. Handai na subong ang pagpasad sang imo pamilya nga natukod sa mga pinanudlo ni Jesucristo.

Tan-awa sa Isaias 58:3–11 (mga katuyuan sang puasa); 58:13–14 (mga bugay sang pagtahod sang Adlaw nga Inugpahuway); Malaquias 3:8–10 (mga bugay sang pagbayad sang ika-pulo); Lucas 6:27–28 (palanggaa ang imo mga kaaway); 10:25–37 (sin-o ang akon kaingod?); Juan 3:16–17 (palangga kita sang Dios, gani Iya ginpadala ang Iya Anak); 14:15 (ginatuman naton ang mga kasuguan tungod palangga naton ang Dios); 1 Juan 4:19 (palangga naton ang Dios kay palangga Niya kita); Mosias 2:17 (kon nagaalagad kita sa iban, nagaalagad kita sa Dios).

Mga pamangkot para sa temple recommend

Ginasunod mo bala ang mga pinanudlo sa Simbahan ni Jesucristo sa imo pribado kag pang-publiko nga pangginawi upod sa mga miyembro sang imo pamilya kag sa iban?

Ginatinguhaan mo bala nga tipigan nga balaan ang Adlaw nga Inugpahuway, pareho sa puluy-an kag sa simbahan; nagatambong sa imo mga miting; nagahanda para sa kag nagaambit sang sakramento nga takos; kag nagapangabuhi nga suno sa mga layi kag mga kasuguan sang ebanghelyo?

Nagabayad ka bala sang bug-os nga ika-pulo?