Maglakat sa kasanag sang Dios

Mga Taga-Galacia 5:25

Makahimo ka sang mas maayo nga mga pagpili kon makita mo ang mga bagay sing maathag. Amo ina kon ngaa importante kaayo ang kasanag: ginapahapos sang kasanag nga makita ang husto nga dalan. Ginhatagan ka sang Amay nga Langitnon sang kahigayunan nga magamit ang langitnon nga kasanag—ang dulot sang Balaan nga Espiritu—para buligan ka nga makita sing maathag kon ano ang maayo kag malain, husto kag sala.

Wala katapusan nga mga kamatuoran

Sa bunyag nagasulod ka sa malipayon nga pagpakighisugot sa Amay nga Langitnon kag kay Jesucristo. Sa templo, magahimo ka sang dugang nga mga kasugtanan nga makapabakod sina nga kaangtanan. Tagsa ka semana sa tion sang sakramento, ginapabakod mo ang imo mga kasugtanan. Ginapahayag mo ang imo kahanda sa pagtuman sang mga kasuguan, kag ginabugayan ka sang Ginuo sang oportunidad nga maangkon ang Balaan nga Espiritu bilang imo pirme nga kaupod. Isa ini sa Iya pinakadako nga mga bugay sa imo.

Ang paghimo sang maayo nga mga pagpili nagapauswag sang imo ikasarang nga mabatyagan ang Espiritu. May madamo nga maayo kag mapuslanon nga mga butang sa sining kalibutan. Pareho sang imo lawas nga maapektuhan sang imo ginakaon kag ginainom, ang imo kaisipan kag espiritu nagakaapektuhan man sing dako sang imo ginabasa, ginatan-aw, kag ginapamatian.

Mga Imbitasyon

Hatagi ang Ginuo sang tiyempo adlaw-adlaw. Magtuon parte sa Iya. Panumduma Sia pirme. Magpangamuyo sa imo Amay nga Langitnon. Tun-i ang balaan nga mga kasulatan kag ang mga pulong sang buhi nga mga propeta. Dayon tinguhai nga ipangabuhi ang imo natun-an.

Pangitaa inang nagapaalsa, nagainspirar, kag nagaagda sang Espiritu. Samtang nagahimo ka sang mga pagpili kon ano ang lantawon, basahon, pamatian, ukon entrahan, pamensara kon ano ang mabatyagan mo sa mga ini. Nagaagda bala ini sang maayo nga panghunahuna? Palayui ang bisan ano nga nagayaguta sa sagrado nga mga bagay ukon inang mga imoral. Indi mag-entra sa bisan ano nga nagasablag sa imo panghunahuna kag pagbatyag sang Espiritu, pareho sang kapintas, makahulubog nga ilimnon, kag makahalalit nga droga. Mangin maisog sa pagpatay sang video ukon hampang, pagbaya sang sine ukon sinaot, pag-ilis sang imo musika ukon pagtalikod sa bisan ano nga wala nagahisanto sa Espiritu.

Gamita ang social media para mag-alsa. Ang social media isa ka mabaskog nga kasangkapan sa pagpakig-angot. Kon gamiton mo ini, magtutok sa kasanag, pagtuo, kag kamatuoran. Indi pag-ikumparar ang imo kabuhi sa kon anong daw ara sa iban. Panumduma nga ang imo balor nagahalin sa imo pagka-anak sang langitnon nga ginikanan, indi tungod sa social media.

Magpangita sang mapuslanon nga mga eksperiyensya kag matuodtuod kag nagadugay nga mga relasyon. Halungi nga ang imo paggamit sang teknolohiya kag media wala nagabaylo sang paghatag sang tiyempo sa pagpakig-upod personal sa pamilya kag mga abyan. Ang social media kag iban pa nga teknolohiya nagakuha sang dako nga parte sang imo oras nga wala man sang maayo nga balik. Magpahuway sa paggawi online, kag makig-angot sa mga tawo sa tunay nga kabuhi.

Ginpromisa nga mga bugay

Mangin kaupod mo ang Espiritu pirme. Ang Balaan nga Espiritu magasaksi sa imo parte sa Amay nga Langitnon kag kay Jesucristo. Paumpawan ka Niya, giyahan, paandaman, kag pakabalaanon. Buligan ka Niya nga makilala ang kamatuoran kag makita ang kaayo sa kalibutan.

Mga pamangkot kag mga sabat

Paano ko mahibaloan nga nabatyagan ko ang Balaan nga Espiritu? Ang pagtuon nga kilalahon ang Espiritu nagakinahanglan sang oras, paghanas, kag pasensya. Nagahambal Sia sa lainlain nga mga tawo sa lainlain nga paagi. Indi pagbale-walaa ang simple nga mga butang—ang malinong nga pamatyagan kon mabatian mo ang testimonya sang isa ka tawo ukon ang indi mahim-os nga pamatyagan pagkatapos maghimo sang sala nga pagpili. Pangitaa sa balaan nga mga kasulatan ang lainlain nga paagi nga nagapakighambal ang Espiritu, pangamuyoi ini, kag padayon nga magpangita sang mga oportunidad para mabatyagan ang Espiritu.

Ano ang pornograpiya? Ngaa likawan ko ini? Ang pornograpiya isa ka representasyon, sa litrato ukon sa tinaga, nga gindisenyo para pukawon ang sekswal nga mga balatyagon. Ang pornograpiya may madamo nga porma, lakip na sa mga video, litrato, libro, kag musika. Mahimo man nga mga mensahe ini ukon mga imahe nga ginapasa-pasa sang kaabyanan. Ang pornograpiya wala nagarespeto sang mga butang nga sagrado—ang aton pisikal nga mga lawas kag sekswal nga mga balatyagon. Mahimo nga makasalapo ka sang pornograpiya nga indi hungod. Kon makasalapo ka sang pornograpiya sing hungod ukon indi hungod, magpalayo gilayon. Pwede ka man makighambal sa isa ka ginikanan ukon iban pa nga ginasaligan mo nga hamtong. Ang hungod nga pagtan-aw sang pornograpiya sala kag nagahalit sa imo ikasarang nga mabatyagan ang Espiritu. Ginapaluya sini ang imo kontrol-sa-kaugalingon kag ginaguba ang imo panan-aw sa imo kaugalingon kag sa iban. Si Jesucristo may gahum para buligan ka nga mapakigbatuan ang pornograpiya kag maghinulsol. Magliso padulong sa Iya; magtalikod sa kadulom. Ang imo bishop makabulig sa imo nga makabaton sang kusog kag kapatawaran paagi sa Manluluwas.

Tan-awa sa Amos 5:14 (pangitaa ang maayo); Mga Taga-Galacia 5:22–23 (ang mga bunga sang Espiritu); Moroni 7:18–19 (ang kasanag ni Cristo); Doktrina kag mga Kasugtanan 6:23 (ang Ginuo nagahambal sang kalinong); 20:77, 79 (ang pang-sakramento nga mga pangamuyo).

Mga pamangkot para sa temple recommend

Ang Ginuo nagsiling nga ang tanan nga butang dapat “himuon sa katinlo” sa Iya atubang (Doktrina kag mga kasugtanan 42:41). Ginatinguhaan mo bala ang moral nga katinlo sa imo kaisipan kag pamatasan? Ginatuman mo bala ang layi sang kaputli?

Ginatinguhaan mo bala nga tipigan nga balaan ang Adlaw nga Inugpahuway, pareho sa puluy-an kag sa simbahan; nagatambong sa imo mga miting; nagahanda kag nagaambit sang sakramento nga takos; kag nagapangabuhi nga suno sa mga layi kag mga kasuguan sang ebanghelyo?

Ano ang himuon sa sina nga tion

Kon nagakatentar ka sa paggamit sang media ukon teknolohiya sa indi maayo nga pamaagi—kon ginatabog man sini ang Espiritu ukon bisan nagakausik lang ang imo oras—tilawi ining masunod:

1. Akoa kon ano gid ina sia. Kilalaha kon ano ang ginatentar sa imo nga himuon. Pwede mo man gani ihambal sing makusog—halimbawa, “Ining imahe pornograpiya” “Indi gid ini husto,” ukon “Mahimo nga makasakit ini sang balatyagon sang iban.”

2. Isli ang kon ano nga imo ginahimo sang mas maayo nga pagpili. Magpalayo, magsaylo sa lain nga kuwarto ukon maggwa ka sa balay. Magtutok sa maayo nga butang.

3. Makig-angot sa tawo ukon bagay nga nanamian mo kag ginarespeto—pwede nga miyembro sang pamilya, mabinuligon nga abyan, ukon sa imo paborito nga balaan nga kasulatan. Ilabi sa tanan, makig-angot sa imo Amay nga Langitnon, kag magpangamuyo para sa kusog.

Para sa dugang nga bulig, tan-awa sa “Media Safety [Kahilwayan sa Media]” sa Librarya sang Ebanghelyo.