Ang imo lawas sagrado

1 Mga Taga-Corinto 6:18–20

Ang imo lawas isa ka dalayawon nga regalo halin sa imo Amay nga Langitnon. Ginhatag Niya ini sa imo para buligan ka nga mangin mas pareho sa Iya. Ang pag-angkon sang lawas nagahatag sa imo sang mas dako nga gahum para gamiton ang imo kahilwayan sa pagpili. Ang ginpanumbalik nga ebanghelyo ni Jesucristo makabulig sa imo nga tulukon ang imo lawas halin sa perspektibo sang Dios. Kag nagahatag ina sang dako nga kinalain sa imo mga pagpili nahanungod sa kon ano ang imo himuon sa imo lawas kag kon paano ini amligan.

Wala katapusan nga mga kamatuoran

Ang imo lawas sunod sa imahe sang Dios—ang pinakamahimayaon, harianon nga Tinuga sa uniberso. Ginakumparar sang balaan nga mga kasulatan ang aton mga lawas sa balaan nga templo, lugar kon sa diin nagaestar ang Espiritu. Siyempre, ang imo lawas indi perpekto sa karon. Pero ang imo mga eksperiyensya bangud sa imo lawas makabulig sa imo nga maghanda sa pagbaton sa pila ka adlaw sang perpekto, nabanhaw, ginhimaya nga lawas.

Ang imo kalag ginabug-os sang imo lawas kag imo espiritu. Tungod sini, ang pisikal nga ikaayo kag espirituhanon nga ikaayo konektado. Ang Manluluwas nagpahayag sang Pulong sang Kaalam para magtudlo sang mga prinsipyo sa pag-atipan sang imo lawas—kag sa pagpromisa sang pisikal kag espituhanon nga mga bugay.

Ang sekswal nga mga balatyagon importante nga bahin sang plano sang Dios sa pagtuga sang malipayon nga mga pag-asawahay kag wala katapusan nga mga pamilya. Ini nga mga balatyagon indi sala—sagrado ang mga ini. Tungod ang sekswal nga mga balatyagon sagrado kaayo kag mabaskog kaayo, ginhatag Niya sa imo ang layi sang sekswal nga katinlo para buligan ka nga gamiton ining mga balatyagon suno sa Iya tuyo. Ang layi sang kaputli nagasiling nga aprubado sang Dios ang sekswal nga aktibidades sa tunga lamang sang lalaki kag babayi nga kasado. Madamo sa kalibutan ang wala nagasapak ukon nagayaguta pa gani sang layi sang Dios, pero ang Ginuo nagaagda sa aton nga mangin Iya mga disipulo kag magpangabuhi sang mas mataas sangsa iya sang kalibutan.

Mga Imbitasyon

Tratuha ang imo lawas—kag ang lawas sang iban—nga may respeto. Sa imo paghimo sang mga desisyon parte sa imo pamayo, estilo sang buhok, kag hitsura, pamangkuta ang imo kaugalingon, “Ginatahod ko bala ang akon lawas bilang sagrado nga regalo halin sa Dios?” Gusto sang Amay nga Langitnon nga makita naton ang kada isa sa kon sin-o gid kita: indi lang pisikal nga mga lawas kundi Iya pinalangga nga kabataan nga may diosnon nga kapalaran. Likawi ang mga estilo nga nagapalutaw ukon nagatawag sang sobra nga atensyon sa imo pisikal nga lawas imbes nga sa kon sin-o ka bilang anak sang Dios nga may wala katapusan nga bwas-damlag. Tugoti ang moral nga katinlo kag pagpalangga sa Dios nga maggiya sa imo mga pagpili. Magpangayo sang laygay sa imo mga ginikanan.

Himoa ang mga butang nga makapabakod sang imo lawas—indi ang makasakit ukon makahalit sini. Gamita nga may kalipay ang madamo nga maayo nga mga butang nga ginhatag sang Dios. Pero tandai nga ang makahulubog nga ilimnon, tabako, kape, tsa, kag iban pa nga makahalalit nga mga butang indi para sa imo lawas ukon sa imo espiritu. Bisan ang makapaayo nga mga butang, pareho sang ginaresita nga mga bulong, pwede makahalit kon indi paggamiton sang husto.

Halungi ang pagpakighilawas kag sekswal nga mga balatyagon nga sagrado. Indi ini dapat mangin topiko sa lahug-lahog ukon kalingawan. Kon wala pa makasal ang lalaki kag babayi, sala ang pagtandog sang pribado, sagrado nga mga parte sang lawas sang lain nga tawo bisan pa nga may bayo. Sa imo pagpili kon ano ang imo himuon, tulukon, basahon, pamatian, pamensaron, i-post, ukon i-text, likawi ang bisan ano nga hungod nga nagapukaw sang lawasnon nga kaibog sa iban ukon sa imo kaugalingon. Nagalakip ini sang bisan ano nga klase sang pornograpiya. Kon may mga sitwasyon ukon aktibidades nga nagapakusog pa gid sang tentasyon, likawi ang mga ini. Nakahibalo ka kon ano ina nga mga sitwasyon kag aktibidades. Kag kon indi ka sigurado, ang Espiritu, ang imo mga ginikanan, kag ang imo mga lider makabulig sa imo sa paghibalo. Ipakita sa imo Amay sa Langit nga imo ginatahod kag ginarespeto ang sagrado nga gahum sa pagtuga sang kabuhi.

Ginpromisa nga mga bugay

Ang imo respeto sa kaugalingon kag sa iban magadako samtang imo ginatahod ang imo lawas sa imo panggawi, hitsura, kag pamayo.

Ang Ginuo nagpromisa sang dalagko nga mga manggad sang kaalam sa mga nagasunod sang Pulong sang Kaalam. Ang maayo nga panglawas, nga wala sang adiksyon, nagapadako man sang imo ikasarang sa pagbaton sang personal nga rebelasyon, sa pagpanumdom sing maathag, kag pagserbisyo sa Ginuo.

Ang pagpangabuhi sang layi sang sekswal nga katinlo nagadala sang pagdayaw sang Dios kag personal nga espirituhanon nga gahum. Kon kasado ka na, ining layi magadala sang mas dako nga pagpalangga, pagsalig, kag pag-isa sa inyo pag-asawahay. Ang pagtuman sining layi magapatigayon sa imo nga mag-uswag sa wala katapusan kag mangin mas pareho sa imo Amay nga Langitnon. Ang imo kompiyansa magadako samtang nagapangabuhi ka bilang disipulo ni Jesucristo.

Mga pamangkot kag mga sabat

Ano ang sulundan sang Ginuo parte sa pamayo, pamustura, tattoo, kag mga tuhog. Ang sulundan sang Ginuo amo nga imo tahuron ang kasagrado sang imo lawas, bisan pa nga nagakahulugan ina nga mangin lain ka sa kalibutan. Tugoti ining kamatuoran kag ang Espiritu nga mangin imo giya sa paghimo sang mga desisyon—ilabi na gid ang mga desisyon nga may malawig nga epekto sa imo lawas. Mangin maalam kag matinuohon, kag magpangayo sang laygay sa imo mga ginikanan kag mga lider.

Paano ko malampuwasan ang mga tentasyon kag malaw-ay nga mga pangginawi? Ang Amay nga Langitnon kag si Jesucristo may gahum para buligan ka. Pun-a ang imo kabuhi sang mga butang nga nagaagda sinang gahum sa imo kabuhi, pareho sang pagpangamuyo, pagtuon sang balaan nga kasulatan, kag pagserbisyo sa iban. Magliso kay Jesucristo kag sa Iya ebanghelyo kag madiskubrehan mo nga ang mga kahuyang mahimo nga mangin mga kusog. Magpangayo sang bulig sa mga ginikanan, mga lider, kag propesyunal nga mga manuglaygay kon kinahanglanon. Sa mga nagaantos sang adiksyon, ang Simbahan nagatanyag sang programa para malampuwasan ang adiksyon. Mga bugay ini nga ginahatag sang Simbahan sang Manluluwas para buligan ka nga mabawi ang kontrol sa imo kabuhi. Kinahanglan ini sang tiyempo, gani mangin mapinasensyahon, kag indi mag-ampo.

Nagakaluyag ako sa mga tawo nga pareho sa akon sang gender. Paano ko gamiton ining mga sulundan sa akon kaugalingon? Ang pagbatyag sang atraksyon sa kapareho nga lalaki ukon babayi indi sala. Kon may amo ka sini nga mga balatyagon kag wala mo ini ginasagod ukon ginaaktohan, ginapangabuhi mo ang sagrado nga layi sang sekswal nga katinlo sang Amay nga Langitnon. Pinalangga ka nga anak sang Dios kag disipulo ni Jesucristo. Tandai nga naintiendihan sang Manluluwas ang tanan mo nga nagakaeksperiyensyahan. Paagi sa imo koneksyon sa kasugtanan sa Iya, makakita ka sang kusog para tumanon ang mga kasuguan sang dios kag mabaton ang gahum sang Iya mga promisa. Magsalig sa Iya kag sa Iya ebanghelyo.

Gin-abuso ako sadto, kag nahuya ako. May sala bala ako sa sini? Ang pagkabiktima sa bisan ano nga pagpang-abuso ukon pagpanghimulos wala nagapakasala sa imo. Palihog indi ka magbatyag nga sala mo ini ukon magkahuya. Palangga ka sang Manluluwas. Gusto ka Niya buligan, paayuhon, kag hatagan ka sang kalinong. Ang propesyunal nga mga manuglaygay, ang mga miyembro sang imo pamilya, kag ang imo mga lider makabulig man.

Tan-awa sa Genesis 1:27 (gintuga kita sa imahe sang Dios); Juan 14:18 (ang Manluluwas nagpromisa sang kasulhayan); Mga Taga-Filipos 4:7 (ang kalinong sang Dios indi lubos nga maintiendihan); Doktrina kag mga Kasugtanan 88:15 (ang espiritu kag lawas amo ang kalag); 89 (ang Pulong sang Kaalam); 121:45 (ang matinlo nga panghunahuna nagadala sang mas dako nga kompiyansa).

Mga pamangkot para sa temple recommend

Ang Ginuo nagsiling nga ang tanan nga butang dapat “himuon sa katinlo” sa Iya atubang (Doktrina kag mga Kasugtanan 42:41). Ginatinguhaan mo bala ang moral nga katinlo sa imo kaisipan kag pamatasan? Ginatuman mo bala ang layi sang kaputli?

Naintiendihan mo bala kag ginasunod ang Pulong sang Kaalam?

Ang pag-atipan sang imo lawas nagalakip sang pag-atipan sa imo mental kag emosyonal nga ikaayo.

Normal lang nga makabatyag sang kasubo ukon kakulba sing panalagsa. Kon indi mo masarangan kag malampuwasan ina nga mga pamatyag, basi senyales ina sang mental ukon emosyunal nga mga kabudlayan nga nagakinahanglan sang bulig sang ginikanan, lider, doktor, ukon propesyunal nga manuglaygay. Ang ina nga bulig mahimo nga bugay halin sa imo mapinalanggaon nga Amay sa Langit. Kon nagapamensar ka nga halitan ang imo kaugalingon ukon tapuson ang imo kaugalingon nga kabuhi, magpangayo gilayon sang bulig. Tandai, ginapalangga ka, ginahatagan bili, kag ginakinahanglan. Bisan ano ang imo emosyunal ukon mental nga mga kabudlayan, magpangayo sang kalinong kay Jesucristo kag sa Iya ebanghelyo.