Kabonganaakin Ake a Rineaki man te Aeniboki ni Kabuta

Ake a Rineaki man te Aeniboki ni Kabuta bon ikotan kaetieti aika moan baan te kakawaki ake a reke man bwaninin Te Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira. Boni ibukiia taan kairiiri ake:

• A tuai kona ni karekea bwaninin te aeniboki n aia taetae are a tangiria.

• A kona ni karekei kabwaiaia man kauarerekean rairan te Aeniboki ni Kabuta.

Nambwanakin te mwakoro n tiekition, ao tiabutiekition are a kabonganaaki inanon Ake a Rineaki man te Aeniboki ni Kabuta a booraoi ma nambwa ake a kabonganaaki ni bwaninin te Aeniboki ni Kabuta. Aio e kabebetea aron katauraoan rongorongo ao te kabootau imarenaia.

Kabonganaakin nambwa man Ake a Rineaki man te Aeniboki ni Kabuta n tabetai e na kona n eweka nambwan taian tiekition ke tiabutiekition inanon te aeniboki ae bwanin. Anne aron bukin kauarereken te aeniboki bwa e na tii kona ni karekei kanoana aika moan baan te kakawaki man te aeniboki ae bwanin.

Ma Ake a Rineaki man te Aeniboki ni Kabuta e katauraoi kaekaan titiraki aika okioki mairouia taan kairiiri, taan kairiiri tao a na iai aia titiraki ae e aki maroroakinaki ke n reke kaekaana ae bwanin. N aron kangaanga aikai, a kona taan kairiiri n taraa bwaninin te Aeniboki ni Kabuta ngkana e tauraoi n te taetae are a na kona ni kabongana. A kona naba taan kairiiri ni marooro ma mataniwi n tararua ake a kaan mangaiia ibukin te kairiiri.

E na kakabwaiai ngkami te Atua ngkai kam ikarekebai ma Ngaia n te mwakuri ni kamaiu ao te karietataaki ibukiia Natina.

Te Moan Beretitentii ao te Kooram n Abotoro n te Tengaun ma Uoman