Ko Hono Fakaʻaongaʻi e Ngaahi Konga naʻe Filifili mei he Tohi Tuʻutuʻuni Fakakātoá

Ko e Ngaahi Konga naʻe Filifili mei he Tohi Tuʻutuʻuni Fakakātoá ko ha fakatahatahaʻi ia ʻo e ngaahi fakahinohino mahuʻinga taha mei he tohi kakató, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku fakataumuʻa ia maʻá e kau taki ʻoku:

• Teʻeki ke nau maʻu kakato e tohi tuʻutuʻuní ʻi he lea fakafonua ʻoku nau fiemaʻú.

• Lava ke ʻaonga ki ai ha tatau fakanounou ʻo e Tohi Tuʻutuʻuni Fakakātoá.

Ko e fakafika ʻo e vahé, kongá, mo e konga iiki ʻoku fakaʻaongaʻi ʻi he Ngaahi Konga naʻe Filifili mei he Tohi Tuʻutuʻuni Fakakātoá ʻoku tatau ia mo e fakafika ʻi he Tohi Tuʻutuʻuni Fakakātoa kakató. ʻOku faingofua heni hono fakafekauʻaki mo fakafehoanaki kinauá.

ʻE ʻi ai e taimi ʻe niʻihi ʻe hiki fakalaka ai ʻa e fakafika ʻi he Ngaahi Konga naʻe Filifili mei he Tohi Tuʻutuʻuni Fakakātoá ʻi he fakafika ʻo e ngaahi konga pe konga iiki ʻi he tohi tuʻutuʻuni kakató. Ko hono ʻuhingá ʻoku ʻi he tohi tuʻutuʻuni ko ʻeni kuo fakanounouʻí ʻa e fakamatala pē ʻoku mahuʻinga taha mei he tohi tuʻutuʻuni kakató.

Neongo ʻoku ʻomi ʻe he Ngaahi Konga naʻe Filifili mei he Tohi Tuʻutuʻuni Fakakātoá ʻa e tali ki he ngaahi fehuʻi ʻoku lahi hono ʻeke ʻe he kau takí, ka ʻe ngalingali ʻe ʻi ai ha ngaahi fehuʻi ʻa e kau takí ʻoku ʻikai ʻasi pe tali kakato ai. ʻI he ngaahi tūkunga peheé, ʻe lava ke vakai ʻa e kau takí ki he Tohi Tu‘utuʻuni Fakakātoa kakató kapau ʻoku maʻu ia ʻi ha lea fakafonua ʻoku nau lava ʻo fakaʻaongaʻi. ʻE lava foki e kau takí ʻo talatalaifale mo ʻenau maʻu mafai pule ʻuluakí ki ha fakahinohino.

ʻOfa ke faitāpuekina kimoutolu ʻe he ʻOtuá ʻi hoʻomou kau fakataha mo Ia ʻi he ngāue ʻo e fakamoʻuí mo e hakeakiʻí maʻa ʻEne fānaú.

Ko e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá