“1. Plan blong God mo Rol blong Yu Insaed long Wok blong Hem blong Fasin blong Sevem Man mo Fasin blong Kam Olsem Wan God,” Ol Pat We Oli Jusumaot long Jeneral Hanbuk (2023).
“1. Wok Ia blong Fasin blong Sevem Man mo Fasin blong Kam Olsem Wan God,” Ol Pat We Oli Jusumaot long Jeneral Hanbuk
1.
Plan blong God mo Rol blong Yu Insaed long Wok blong Hem blong Fasin blong Sevem Man mo Fasin blong Kam Olsem Wan God
1.0
Fas Toktok
Oli bin singaotem yu blong wok o givim seves insaed long Jos Ia blong Jisas Kraes blong Ol Lata-dei Sent. Tangkyu long seves blong yu. Bambae yu blesem ol laef, mo bambae yu filim glad taem yu stap fetful blong givim seves.
Hanbuk ia, bambae i helpem yu blong lanem olgeta prinsipol we oli olsem hemia blong seves blong Kraes, mo blong yu andastanem ol responsabiliti blong yu. Bambae yu wok gud moa taem yu mekem seves blong yu insaed long Jos i wok saedsaed wetem wok blong God Papa mo Pikinini blong Hem, Jisas Kraes.
1.1
Plan blong God blong Stap Hapi
Papa long Heven i givim plan ia blong stap hapi blong mekem se yumi glad long evriwan long ol blesing blong Hem. Wok mo glori blong Hem, i blong “mekem man i nomo save ded mo i kasem laef we i no save finis” (Moses 1:39).
Jisas Kraes i stamba blong plan blong God. From lav ia blong Papa long Heven we i no gat en, Hem i bin sendem Pikinini blong Hem blong pemaot yumi long sin mo ded tru long sakrifaes blong Hem we i pem praes from yumi (luk long Jon 3:16). Tru long Atonmen blong Hem, Jisas Kraes i stap meksua se wanwan long yumi we i bon i kam long wol ia, bae i laef bakegen long ded mo i kasem wan bodi we bae i nomo save ded bakegen.
Blong kasem laef we i no save finis, yumi mas “kam long Kraes” (Moronae 10:32). Atonmen blong Sevya i mekem se i posibol blong yumi kam klin long sin mo mekem hat blong yumi i jenis blong mekem se yumi save kasem laef we i no save finis mo wan glad we i fulwan.
1.2
Wok blong God blong fasin blong sevem man mo fasin blong kam olsem wan god.
Taem yumi stap go long Kraes mo stap helpem ol narawan blong oli mekem semmak, yumi stap tekpat long wok ia blong God blong fasin blong sevem man, mo blong fasin blong kam olsem wan god. Wok ia, i gat tufala hae komanmen i lidim, we hem i blong lavem God mo lavem ol neba blong yumi (luk long Matiu 22:37–39).
Wok ia blong fasin blong sevem man mo fasin blong kam olsem wan god i lukluk nomo long fofala responsabiliti we God i givim blong mekem.
Hanbuk ia bambae i helpem yu blong andastanem ol fofala pat ia blong wok blong God. Tabu Spirit bae i soem rod long yu taem yu stap mekem pat blong yu blong mekem olgeta responsabiliti ia (luk long 2 Nifae 32:5).
1.2.1
Stap Laef Folem Gospel blong Jisas Kraes
Blong stap laef folem Gospel blong Jisas Kraes i minim tu blong:
-
Stap praktisim fet long Kraes, sakem sin evri dei, stap mekem ol kavenan wetem God taem yumi stap kasem ol odinens blong fasin blong sevem man mo fasin blong kam olsem wan god, mo stap strong kasem en taem yumi kipim olgeta kavenan ia (luk long 3.5.1).
-
Stap lanem mo tijim gospel blong Jisas Kraes long hom mo long Jos.
-
Stap dipen long yumiwan, o kam indipenden blong lukluk long evri samting we yumi nidim blong yumiwan mo blong famli blong yumi, tugeta, long saed blong spirit mo long saed blong laef long wol ia.
1.2.2
Stap Kea long Olgeta long Nid
Blong stap kea long olgeta we oli stap long nid, i minim tu blong:
-
Stap givim seves mo stap givhan long wanwan man, woman, famli mo komuniti.
-
Stap serem ol risos, wetem help blong Jos, long olgeta we oli stap long nid.
-
Stap helpem ol narawan blong oli kam blong dipen long olgetawan.
1.2.3
Stap Invaetem Evriwan blong Akseptem Gospel
Blong stap invaetem evriwan blong akseptem gospel, i minim tu blong:
-
Stap tekpat long misinari wok mo stap givim seves olsem misinari.
-
Stap helpem ol memba blong Jos we oli niu mo olgeta we oli stap kambak long Jos blong oli progres folem kavenan rod ia.
1.2.4
Stap Joenem Ol Famli blong Taem we I No Save Finis
Blong stap joenem ol famli blong taem we i no save finis, i minim tu blong:
-
Stap mekem ol kavenan taem yumi kasem ol tempol odinens blong yumiwan.
-
Blong stap faenemaot ol bubu blong yumi we oli ded mo blong stap mekem ol odinens long bihaf blong olgeta insaed long tempol blong mekem se oli save mekem ol kavenan wetem God.
-
Blong stap go long tempol oltaem, taem i posibol, blong wosipim God mo mekem ol odinens blong ol pikinini blong Hem.
1.3
Stamba Tingting blong Jos
Jisas Kraes i stanemap Jos blong Hem blong mekem se wanwan man, woman mo famli oli helpem God blong mekem wok blong Hem blong fasin blong sevem man mo fasin blong kam olsem wan god, i kam tru (luk long Efesas 4:11–13; luk tu long 2.2 insaed long hanbuk ia). Blong help blong mekem tabu stamba tingting ia i kamtru, Jos mo ol lida blong hem oli givim:
-
Atoriti mo ol ki blong prishud.
-
Ol kavenan mo ol odinens.
-
Daereksen we i kam long profet.
-
Ol skripja.
-
Stap lanem gospel mo tijing sapot.
-
Janis blong givim seves mo blong lidasip.
-
Wan komuniti blong Ol Sent.
1.3.1
Atoriti mo Ol Ki blong Prishud
Tru long prishud, God i mekem wok blong Hem blong fasin blong sevem man mo fasin blong kam olsem wan god, i hapen. I nid blong gat atoriti mo ol ki blong prishud blong lidim wok blong God long wol ia; atoriti mo ol ki ia, God i putumbak long Profet Josef Smit (luk long Doktrin mo Ol Kavenan 110:11–16; 112:30). Olgeta ki ia, ol lida blong Jos oli holem tedei. Ol lida ia oli singaotem mo givim raet long ol narawan blong help insaed long wok ia blong God (luk long Doktrin mo Ol Kavenan 107:8, 65–67
1.3.2
Ol Kavenan mo Ol Odinens
Insaed long plan ia blong Papa long Heven, yumi mekem ol kavenan taem yumi kasem ol odinens blong fasin blong sevem man mo fasin blong kam olsem wan god, olsem baptaes (luk long Jon 3:5; luk tu long japta 18 insaed long hanbuk ia). Olgeta kavenan mo odinens ia, oli wan mas blong yumi save kam moa olsem God mo gobak stap wetem Hem long ples we Hem i stap long hem (luk long Doktrin mo Ol Kavenan 84:19–22).
1.3.3
Daereksen we I Kam long Profet
Tru long ol profet we Hem i bin jusum, God i soemaot trutok mo i givim, tru long insperesen, ol toktok blong soem rod mo ol woning (luk long Amos 3:7; Doktrin mo Ol Kavenan 1:4). Help ia blong soem rod, i helpem yumi blong kam wokbaot insaed, mo stastap wokbaot long rod ia we i go kasem laef we i no save finis.
1.3.4
Ol Skripja
Anda long daereksen blong ol profet mo ol aposol blong Lod, Jos i givim mo i holemtaet toktok blong God olsem we yumi faenem insaed long ol tabu skripja. Ol skripja oli testifae abaot Kraes, oli tijim gospel blong Hem, mo oli helpem yumi praktisim fet long Hem (luk long Jekob 7:10–11; Hileman 15:7).
1.3.5
Stap Lanem Gospel mo Tijing Sapot
Jos i sapotem wanwan man, woman mo famli insaed long ol responsabiliti blong olgeta blong lanem ol trutok blong gospel mo tijim olgeta trutok ia long ol memba blong famli mo long ol narawan (luk long Doktrin mo Ol Kavenan 88:77– 78,118; luk tu long 2.2.3 insaed long hanbuk ia).
1.3.6
Janis blong Givim Seves mo blong Lidasip
Tru long ol koling mo ol asaenmen insaed long Jos, God i givim ol janis long ol memba blong oli givim seves mo blong oli lidim rod. Jos i givim fasin blong help blong kea long ol memba we oli stap long nid, mo blong givim yumaniterian help long ol narawan (luk long Mosaea 18:27–29).
1.3.7
Wan Komuniti blong Ol Sent
Olsem wan komuniti blong Ol Sent, ol memba blong Jos oli kam tugeta oltaem blong wosipim God mo blong tingbaot Sevya taem oli tekem mo kaekae sakramen (luk long Moronae 6:4–6; Doktrin mo Ol Kavenan 20:77). Ol memba oli stap kea tu mo oli stap givhan long wanwan long olgeta (luk long Efesas 2:19).
1.4
Rol blong Yu Insaed long Wok Ia blong God
Olsem wan lida insaed long Jos, oli singaotem yu blong tijim mo sapotem olgeta we yu stap wok blong olgeta taem oli helpem God long wok blong Hem blong fasin blong sevem man, mo fasin blong kam olsem wan god (luk long 1.2). Blong gat wan klia andastaning abaot wok ia blong God, o abaot wanem Hem i stap invaetem yumi blong mekem, mo abaot stamba tingting blong Jos blong Hem, bae i helpem yumi blong lukluk nomo long ol hadwok blong yumi blong tekem ol sol oli kam long Kraes.
Prea mo askem blong save olsem wanem bae yu save help blong mekem ol stamba tingting blong God i hapen insaed long laef blong olgeta we yu stap givim seves long olgeta. God bambae i daerektem yu tru long ol kwaet toktok blong Tabu Spirit (luk long 2 Nifae 32:5). Blong stap wok wetem Lod insaed long plantesen blong Hem bae i mekem se yu yu gat bigfala glad (luk long Jekob 5:70–72