1.

iTuvatuva ni Kalou kei na Nomu iTavi ena Nona Cakacaka ni Veivakabulai kei na Bula Vakacerecerei

1.0

iVakamacala Taumada

O sa kacivi mo veiqaravi e Na Lotu i Jisu Karisito ni Yalododonu Edaidai. Vinaka vakalevu na nomuni veiqaravi. O ni na vakalougatataka na bula ka vakila na reki ni o veiqaravi ena yalodina.

Ena vukei iko na ivoladusidusi oqo mo vulica na ivakarau ni veiqaravi va-Karisito ka kila vakavinaka na nomu itavi. O na yaga sara vakalevu ni o veitaudonuitaka na nomu veiqaravi ena Lotu kei na cakacaka ni Kalou na Tamada kei na Luvena, o Jisu Karisito.

1.1

iTuvatuva ni Bula Marau ni Kalou

E vakarautaka na Tamada Vakalomalagi na ituvatuva ni bula marau me rawa ni da marautaka na Nona veivakalougatataki kece sara. Na Nona cakacaka kei na lagilagi o ya me “vakavuna na tawa mate rawa kei na bula tawamudu ni tamata” (Mosese 1:39).

O Jisu Karisito na itakele ni ituvatuva ni Kalou. Ena vuku ni nona loloma tawayalani vei keda na Tamada Vakalomalagi, a tala mai kina na Luvena me vueti keda mai na ivalavala ca kei na mate ena Nona isoro ni veivakaduavatataki (raica na Joni 3:16). Mai na Nona Veisorovaki, sa vakadeitaka kina o Jisu Karisito ni o keda yadua eda sucu mai ki vuravura eda na tucake tale mai na mate ka tawamate rawa.

Meda ciqoma na bula tawamudu, sa dodonu me da “lako mai vei Karisito” (Moronai 10:32). Na Nona Veisorovaki tale ga na iVakabula, sa rawa kina vei keda me da savai mai na ivalavala ca ka yaco me veisau na yaloda, me rawa ni da ciqoma na bula tawamudu kei na taucoko ni marau.

1.2

Nona Cakacaka ni Veivakabulai kei na Bula Vakacerecerei na Kalou

Ni da lako mai vei Karisito ka vukei ira eso tale mera kitaka vakakina, eda sa vakaitavi ena cakacaka ni Kalou ni veivakabulai kei na bula vakacerecerei. E dusimaki na cakacaka oqo mai na rua na ivunau levu meda lomana na Kalou ka lomani ira na kai noda (raica na Maciu 22:37–39).

Na cakacaka ni veivakabulai kei na bula vakacerecerei e vakanamata ena va na itavi lesi vakalou.

Nona Cakacaka ni Veivakabulai kei na Bula Vakacerecerei na Kalou

Eda lako mai vei Karisito ka veivuke ena cakacaka ni Kalou ena noda:

• Bulataka na kosipeli i Jisu Karisito.

• Veivukei vei ira na vakaleqai tu.

• Sureta na tamata kecega me ra ciqoma na kosipeli.

• Vakaduavatataka na matavuvale ki na bula tawamudu.

Na iVoladusidusi oqo ena vukei iko mo kila na ivakarau e va oqo ni cakacaka ni Kalou. Ena dusimaki iko na Yalo Tabu ni ko cakava na nomu itavi ena kena vakayacori taucoko (raica na 2 Nifai 32:5).

1.2.1.

Bulataki ni Kosipeli i Jisu Karisito

Na bulataki ni kosipeli i Jisu Karisito e oka kina na:

• Cakacakataki ni vakabauti Karisito, veivutuni e veisiga, veiyalayalati vata kei na Kalou ni da ciqoma na cakacaka vakalotu ni veivakabulai kei na bula vakacerecerei, ka vosota tiko me yacova na ivakataotioti ena kena rokovi na veiyalayalati o ya (raica na 3.5.1).

• Vulici kei na vakavulici ni kosipeli i Jisu Karisito e vale ka vakakina e valenilotu.

• Yaco me da bula rawati keda ena noda vakarautaka na veika me baleti keda kei na noda matavuvale, vakayalo ka vakayago.

1.2.2

Vukei Ira era Gadreva tu na Veivuke

Nodra vukei o ira era gadreva tu na veivuke e oka kina na:

• Veiqaravi kei na nodra qaravi na tamata yadua, matavuvale, kei na itikotiko raraba.

• Wasei na ivurevure, oka kina na veivuke ni Lotu, vei ira era gadreva tu na veivuke.

• Vukei ira na tamata mera bula rawati ira.

1.2.3

Sureta na Tamata Kecega mera Ciqoma na Kosipeli

Na sureti ira na tamata kecega mera ciqoma na kosipeli e oka kina na:

• Vakaitavi ena cakacaka ni kaulotu kei na veiqaravi vaka-daukaulotu.

• Vukei ira na lewenilotu vou kei ira era sa lesu tiko mai mera rawaka voli ena salatu ni veiyalayalati.

1.2.4

Vakaduavatataka me Tawamudu na Matavuvale

Na vakaduavatataki me tawamudu na matavuvale e oka kina na:

• Caka veiyalayalati ena noda ciqoma na noda dui cakacaka vakalotu ni valetabu.

• Kilai ira na tubuda era sa mate ka cakava na veicakacaka vakalotu ena vukudra ena valetabu me rawa ni ra veiyalayalati kei na Kalou.

• Gole vakawasoma ki na valetabu, ena veivanua e rawa kina, mo qaravi Kalou kina ka vakayacora na cakacaka vakalotu ena vukudra na Luvena.

1.3

Na iNaki ni Lotu

A tauyavutaka na Nona Lotu o Jisu Karisito me rawa kina vei ira na tamata yadua kei na matavuvale mera cakava na Nona cakacaka ni veivakabulai kei na bula vakacerecerei na Kalou (raica na Efeso 4:11–13; raica talega na 2.2 ena ivoladusidusi oqo). Me vukea na kena rawati na inaki vakalou oqo, sa vakarautaka na Lotu kei ira na kena veiliutaki na:

• Lewa kei na idola ni matabete.

• Veiyalayalati kei na cakacaka vakalotu.

• Veidusimaki vakaparofita.

• iVolanikalou.

• Veitokoni ena vulici kei na vakavulici ni kosipeli.

• Madigi ni veiqaravi kei na veiliutaki.

• E dua na iSoqosoqo ni Yalododonu.

1.3.1

Lewa kei na iDola ni Matabete

Mai na matabete, sa rawata kina na Kalou na Nona cakacaka ni veivakabulai kei na bula vakacerecerei. Sa vakalesui tale mai vua na Parofita o Josefa Simici na lewa ni matabete kei na idola e gadrevi me dusimaki kina na cakacaka ni Kalou e vuravura (raica na Vunau kei na Veiyalayalati 110:11–16; 112:30). Sa tu vei ira na iliuliu ni Lotu ena gauna oqo na idola oqo. O ira na iliuliu oqo era kaciva ka solia na veivakadonui vei ira tale eso mera veivuke ena cakacaka ni Kalou (raica na Vunau kei na Veiyalayalati 107:8, 65–67).

1.3.2

Veiyalayalati kei na Cakacaka Vakalotu

Ena ituvatuva nei Tamada Vakalomalagi, eda sa veiyalayalati ena noda ciqoma na cakacaka vakalotu ni veivakabulai kei na bula vakacerecerei, me vaka na papitaiso (raica na Joni 3:5; se raica talega na wase 18 ena iVoladuisdusi oqo). Sa yaga sara vei keda na veiyalayalati kei na veicakacaka vakalotu oqo me da veiucui vakalevu cake kina kei na Kalou ka lesu tale me da bula ena Nona iserau (raica na Vunau kei na Veiyalayalati 84:19–22).

1.3.3

Veidusimaki Vakaparofita

Mai vei ira na Nona parofita digitaki, sa vakatakila mai na Kalou na dina ka vakarautaka na veituberi veivakauqeti kei na ivakaro eso (raica na Emosi 3:7; Vunau kei na Veiyalayalati 1:4). Na veituberi oqo ena vukei keda ni curu ka tiko ga ena salatu ka na kauti keda ki na bula tawamudu.

1.3.4

iVolanikalou

Ena ruku ni nodra veidusimaki na parofita kei na iapositolo ni Turaga, sa vakarautaka ka maroroya tu na Lotu na vosa ni Kalou me vaka e kunei ena ivolanikalou tabu. Na ivolanikalou e vakadinadinataki Karisito, vakavulica na Nona kosipeli, ka vukei keda meda cakacakataka na noda vakabauti Koya (raica na Jekope 7:10–11; Ilamani 15:7).

1.3.5

Veitokoni ena Vulici kei na Vakavulici ni Kosipeli

E veitokoni na Lotu vei ira na tamata yadua kei na matavuvale ena nodra itavi me ra vulica na dina ni kosipeli ka vakavulica na dina oqo vei ira na lewe ni matavuvale kei ira tale eso (raica na Vunau kei na Veiyalayalati 88:77–78, 118; raica talega na 2.2.3 ena ivoladusidusi oqo).

1.3.6

Veiqaravi kei na Madigi Eso ni Veiliutaki

Ena veikacivi kei na ilesilesi ena Lotu, sa solia kina na Kalou na madigi ni veiqaravi kei na veiliutaki vei ira na lewenilotu. E vakarautaka na Lotu na ituvatuva mera vukei kina na lewenilotu era vakaleqai tu ka solia na veivuke raraba vei ira na tani (raica na Mosaia 18:27–29).

1.3.7

E Dua na iTikotiko ni Yalododonu

Me vaka e dua na itikotiko ni Yalododonu, era dau vakasoqoni wasoma na lewe ni Lotu mera qarava na Kalou ka vakananuma na iVakabula ena nodra vakaivotavota ena sakaramede (raica na Moronai 6:4–6; Vunau kei na Veiyalayalati 20:77). Era na kauwai ka veiqaravi talega vakaiira na lewenilotu (raica na Efeso 2:19).

1.4

Na Nomu iTavi ena Cakacaka ni Kalou

Nio dua na iliuliu ena Lotu, o sa kacivi mo veivakavulici ka tokoni ira o veiqaravi ena vukudra ni ra veivuke ena Nona cakacaka ni veivakabulai kei na bula vakacerecerei na Kalou (raica na 1.2). Ni sa kilai vakamatata na cakacaka ni Kalou, ena ka e sa sureti iko tu mo cakava, kei na inaki ni Nona Lotu ena vukea na rai ni nomu sasaga ni rawa yalo mai vei Karisito.

Vakasaqara ena yalo masumasu mo kila na sala e rawa ni vakayacori kina na inaki ni Kalou ki na nodra bula o qaravi ira. Ena dusimaki iko na Kalou ena veivakauqeti ni Yalo Tabu (raica na 2 Nifai 32:5). Ena kauta mai vei iko na reki levu na nomu cakacaka vata kei na Turaga ena Nona were ni vaini (raica na Jekope 5:70–72