litrato sang pamilya

2.

Pagsuporta sang mga Indibidwal kag mga Pamilya sa Buluhaton sang Kaluwasan kag Pangkahitaasan

2.0

Introduksyon

Bilang lider sa Simbahan ni Jesucristo, ginasuportahan mo ang mga indibidwal kag mga pamilya sa pagtuman sang buluhaton sang kaluwasan kag pangkahitaasan sang Dios (tan-awa sa 1.2). Ang pinakamataas nga katuyuan sining buluhaton amo nga buligan ang tanan nga mga anak sang Dios nga mabaton ang mga bugay sang wala katapusan nga kabuhi kag sang kabug-osan sang kalipay.

Kalabanan sang buluhaton sang kaluwasan kag pangkahitaasan matuman paagi sa pamilya. Para sa tanan nga miyembro sang Simbahan, ini nga buluhaton nasentro sa puluy-an.

2.1

Ang Papel sang Pamilya sa Plano sang Dios

Bilang parte sang Iya plano, ginpahamtang sang Amay nga Langitnon ang mga pamilya sa duta. Tuyo Niya nga ang pamilya magadala sa aton sang kalipayan. Ang mga pamilya nagahatag sang mga oportunidad nga magtuon, magtubo, magserbisyo, maghinulsol, kag magpatawad. Makabulig ang mga ini sa aton nga maghanda para sa kabuhi nga wala katapusan.

Dala sa promisa sang Dios nga kabuhi nga wala katapusan ang wala katapusan nga pag-asawahay, mga kabataan, kag sang tanan nga iban pa nga mga bugay sang wala katapusan nga pamilya. Ini nga promisa para man sa mga indi pa kasado ukon wala sang pamilya sa Simbahan.

2.1.1

Wala Katapusan nga mga Pamilya

Ang wala katapusan nga mga pamilya ginaporma kon ang mga miyembro sang Simbahan nagahimo sang mga kasugtanan sa ila pagbaton sang mga ordinansa sang pagselyo sa templo. Ang mga bugay sang wala katapusan nga pamilya matigayon kon ang mga miyembro nagatuman sadtong mga kasugtanan kag nagahinulsol kon indi nila ini mahimo. Ginabuligan sang mga lider sang Simbahan ang mga miyembro nga maghanda sa pagbaton sining mga ordinansa kag tumanon ang ila mga kasugtanan.

Isa ka dugang nga aspeto sa pagpahamtang sang wala katapusan nga mga pamilya amo ang paghikot sang mga ordinansa sa templo nga nagatugot sa mga miyembro nga maselyohan sa ila napatay na nga katigulangan.

2.1.2

Bana kag Asawa

Ang pag-asawahay sa tunga sang lalaki kag babayi gin-ordin sang Dios (tan-awa sa Doktrina kag mga Kasugtanan 49:15). Ang bana kag asawa gintuyo nga magprogreso sing magkaupod padulong sa kabuhi nga wala katapusan (tan-awa sa 1 Mga Taga-Corinto 11:11).

Isa sa mga rekisitos sa pagbaton sang wala katapusan nga kabuhi amo nga ang lalaki kag babayi magsulod sa kasugtanan sang selestiyal nga pag-asawahay (tan-awa sa Doktrina kag mga Kasugtanan 131:1–4). Ang mag-asawa nagahimo sining kasugtanan samtang ginabaton nila ang ordinansa sang pagselyo sang kasal sa templo. Ini nga kasugtanan amo ang pundasyon sang wala katapusan nga pamilya. Kon ginatuman ini sing matutom, ginabuligan sini ang ila pag-asawahay nga magpadayon sa katubtuban.

Ang pisikal nga relasyon sa tunga sang bana kag asawa gintuyo nga mangin matahum kag sagrado. Gin-ordin ini sang Dios para sa pagtuga sang kabataan kag sa pagpahayag sang pagpalangga sa tunga sang bana kag asawa. Pagkamapinalanggaon kag respeto—indi pagkamaiyaiyahon—ang dapat maggiya sa ila pisikal nga relasyon.

Ang Dios nagsugo nga ang sekswal nga relasyon ginareserba sa pag-asawahay sa tunga sang lalaki kag babayi.

Ang bana kag asawa patas sa panulok sang Dios. Wala dapat sang mangibabaw sa duha. Ang ila mga desisyon dapat ginahimo nga may pag-isa kag pagpalangga, nga may lubos nga partisipasyon nila nga duha.

2.1.3

Mga Ginikanan kag Kabataan

Ang mga propeta sa ulihing adlaw nagtudlo nga “ang kasuguan sang Dios para sa Iya mga kabataan sa pagmuad kag pagpuno sa duta nagapabilin gihapon nga may puersa” (“Ang Panimalay: Isa ka Proklamasyon sa Kalibutan”; tan-awa man sa Doktrina kag mga Kasugtanan 49:16–17).

Ang mapinalanggaon nga bana kag asawa magkaupod nga nagahatag sang pinakamaayo nga lugar sa pagpadako kag pag-atipan sang kabataan. Mahimo nga may indibidwal nga mga sirkumstansya nga nagapugong sa mga ginikanan sa pagpadako sang ila kabataan nga magkaupod. Pero, ang Ginuo magabugay sa ila samtang ginapangayo nila ang Iya bulig kag nagatinguha nga tumanon ang ila mga kasugtanan upod sa Iya.

Ang mga ginikanan may importante nga responsibilidad sa pagbulig handa sang ila kabataan sa pagbaton sang mga bugay sang kabuhi nga wala katapusan. Ginatudloan nila ang ila kabataan nga magpalanggaanay kag magserbisyo sa Dios kag sa iban (tan-awa sa Mateo 22:36–40).

“Ang mga amay amo ang magapamuno sa ila mga panimalay sa gugma kag pagkamatarong kag responsable sa pagpanangkap sang mga kinahanglanon sa kabuhi kag pag-amlig sang ila mga panimalay” (“Ang Panimalay: Isa ka Proklamasyon sa Kalibutan”). Kon wala sang bana ukon tatay sa balay, ang nanay amo ang nagapamuno sa pamilya.

Ang pagpamuno sa pamilya amo ang responsibilidad nga buligan giya ang mga miyembro sang pamilya pabalik para mag-estar sa presensya sang Dios. Ginahimo ini paagi sa pagserbisyo kag pagtudlo nga may kalulo, pagpaubos, kag tunay nga pagpalangga, nga ginasunod ang ehemplo ni Jesucristo (tan-awa sa Mateo 20:26–28). Dala sa pagpamuno sang pamilya ang pagpamuno sa mga miyembro sang pamilya sa regular nga pangamuyo, pagtuon sang ebanghelyo, kag iban pa nga aspeto sang pagsimba. Ang mga ginikanan nagaisa sa pagtuman sining mga responsibilidad.

“Ang mga iloy una sa tanan, amo ang responsable sa pagbatiti sang ila mga kabataan” (“Ang Panimalay: Isa ka Proklamasyon sa Kalibutan”). Ang pagbatiti nagakahulugan sang pagpakaon, pagtudlo, kag pagsuporta, nga ginasunod ang ehemplo sang Manluluwas (tan-awa sa 3 Nefi 10:4). Upod sa iya bana, ang nanay nagabulig sa iya pamilya nga magtuon sang mga kamatuoran sang ebanghelyo kag magpatubo sang pagtuo sa Amay nga Langitnon kag kay Jesucristo. Magkaupod sila nga nagapauswag sang pagpalanggaanay sa pamilya.

“Sa sining sagrado nga mga responsibilidad, ang mga amay kag mga iloy obligado sa pagbulig sa isa kag isa bilang palareho nga magkatuwang” (“Ang Panimalay: Isa ka Proklamasyon sa Kalibutan”). Mainampuon sila nga nagakonsulta sa isa kag isa kag sa Ginuo. Magkaupod sila nga nagahimo sang mga desisyon nga may pag-isa kag pagpalangga, nga may lubos nila nga partisipasyon nga duha.

2.2

Ang Buluhaton sang Kaluwasan kag Pangkahitaasan sa Balay

Ang Unang Pangulohan nagsiling, “Ang puluy-an amo ang pundasyon sang matarong nga kabuhi” (Sulat sang Unang Pangulohan, Peb. 11, 1999).

Para suportahan ang mga miyembro sa paghimo sang buluhaton sang kaluwasan kag pangkahitaasan sa balay, ang mga lider sang Simbahan nagapaisog sa ila nga magpundar sang puluy-an kon sa diin ara ang Espiritu. Ginapaisog man nila ang mga miyembro nga tahuron ang Adlaw nga Inugpahuway, nga tun-an kag hibaluon ang ebanghelyo sa balay, kag maghiwat sang semanal nga home evening.

2.2.3

Pagtuon sang Ebanghelyo kag Pagtuon sa Balay

Ang pagtudlo kag pagtuon sang ebanghelyo nasentro sa balay kag ginasuportahan sang Simbahan. Ginapaisog sang mga lider sang Simbahan ang tanan nga mga miyembro nga tun-an ang ebanghelyo sa balay sa Adlaw nga Inugpahuway kag sa bilog nga semana.

Ang pagtuon sang balaan nga mga kasulatan suno sa naplastar sa Dali, Magsunod sa Akon—Para sa Mga Indibidwal kag Mga Pamilya amo ang ginapanugyan nga programa sa pagtuon sang ebanghelyo sa balay.

2.2.4

Home Evening kag Iban Pa nga Aktibidades

Ang mga propeta sa ulihing mga adlaw naglaygay sa mga miyembro sang Simbahan nga maghiwat sang semanal nga home evening. Isa ini ka sagrado nga oras para sa mga indibidwal kag mga pamilya nga matun-an ang ebanghelyo, mapabakod ang mga testimonya, mapatubo ang paghiliusa kag magkalipay sa tagsa-tagsa.

Ang home evening pwede mabagay sa mga sirkumstansya sang mga miyembro. Pwede ini hiwaton sa Adlaw nga Inugpahuway ukon sa iban nga adlaw kag oras. Mahimo nga dala sini ang:

• Pagtuon kag pagtudlo sang ebanghelyo (ang manwal nga Dali, Magsunod sa Akon pwede gamiton kon gusto nila).

• Pagserbisyo sa iban.

• Pagkanta ukon pagtukar sang mga himno kag mga kanta sang Primary (tan-awa sa kapitulo 19).

• Pagsuporta sa mga miyembro sang pamilya sa pagpauswag sang Kabataan kag Lamharon.

• Paghiwat sang konseho sang pamilya para maghimo sang mga lalab-uton, magresolba sang mga problema, kag magsanto sang mga iskedyul.

• Aktibidades sa paglingaw-lingaw.

Ang solo nga mga miyembro kag iban pa pwede nga magtipon sa mga grupo sa gwa sang kinaandan nga programa sa pagsimba kon Domingo para magpartisipar sa home evening kag pabakuron ang kada isa paagi sa pagtuon sang ebanghelyo.

2.2.5

Pagsuporta sang mga Indibidwal

Ang mga lider sang Simbahan nagabulig sa mga miyembro nga kulang sa suporta sang pamilya.

Ginabuligan sang mga lider ining mga miyembro kag ang ila mga pamilya nga makaangkon sang oportunidad sa pagpakig-abyan, matinlo nga sosyal nga mga eksperiyensya, kag espirituhanon nga pagtubo.

2.3

Ang Relasyon sang Balay kag Simbahan

Ang buluhaton sang kaluwasan kag pangkahitaasan nasentro sa balay kag ginasuportahan sang Simbahan. Ang masunod nga mga prinsipyo magamit sa kaangtanan sang balay kag Simbahan.

• Ang mga lider kag mga titser nagatahod sa papel sang mga ginikanan kag nagabulig sa ila.

• Ang pila ka mga miting sa Simbahan kinahanglanon sa kada ward ukon branch. Dala diri ang miting sang sakramento kag ang mga klase kag miting sang korum nga ginahiwat sa Adlaw nga Inugpahuway. Ang madamo sa iban pa nga mga miting, aktibidades, kag programa indi kinahanglanon.

• Ang pagserbisyo kag pagpartisipar sa Simbahan nagapangayo sang sakripisyo. Bugayan sang Ginuo ang mga miyembro samtang nagaserbisyo sila kag nagasakripisyo sa Iya Simbahan. Pero, ang oras nga ginahatag sa pagserbisyo sa Simbahan indi dapat nga magsablag sa ikasarang sang mga miyembro nga tumanon ang ila mga responsibilidad sa balay, sa trabaho, kag sa bisan diin.