4

Bulombodi ne Bipangu mu Ekelezia wa Yezu Kilisto

4.0

Tshibangilu

Wewa bu mulombodi mu Ekelezia, udi mubikidibua ku lungenyi lua nyuma kupitshila ku basadidi ba Mukalenga banyishibua. Udi ne mushindu wa kuambuluisha mu mudimu wa Tatu wa mu Diûlu wa kukumbaja mudimu wenda wa kubenga kufua ne moyo wa tshiendelela wa muntu” (Mose 1:39).

4.2

Nshidamenu ya Bulombodi mu Ekelezia

Mu tshikondu tshia mudimu wenda pa muboba, Mupandishi wakaleja tshilejilu tshia bulombodi bua Ekelezia wenda. Kipatshila kenda kanena, kavua ka kuenza disua dia Tatuenda wa mu Diûlu ne kuambuluisha bakuabu bua kumvua ne kuteka mu tshienzedi lumu luimpa luenda (tangila Yone 5:30; Mosiya 15:7).

Keba diambuluisha dia buludiki bua Mukalenga bua ulonga ne ukumbaja majitu a dibikila dieba.

4.2.1

Kudilongolola mu Nyuma

Yezu wakadilongolola mu nyuma bua bukenji buenda pa buloba (tangila Luka 4:1–2). Wewa peba udi mua kudilongolola mu nyuma mu kusemena pabuipi ne Tatu wa mu Diûlu kupitshila ku disambila, kulonga kua mifundu, ne ditumikila ku mikenji yenda.

Keba dibuluila bua kumvua majinga a bantu bawudi ulombola ne kumanya mushindu wa kukumbaja mudimu udi Nzambi mukubikidila.

Mukalenga wakalaya kabidi bua kufila mapa a nyuma pa mutu pa aba ba’akeba (tangila Dilongesha ne Bipungidi 46:8).

4.2.2

Kukuba Bana Bonsu ba Nzambi

Nanga bantu bawudi usadila bu muvua Yezu muenza. Sambila “ne makanda onsu a mutshima” bua uwujibua ne dinanga dienda (Moloni 7:48).

Ambuluisha bantu bua bashidimuija dikudimuna moyo diabu ne bakankamika ditabuija diabu mu Tatu wa mu Diûlu ne mu Yezu Kilisto. Bambuluisha bua badilongolola bua kuenza bipungidi padibu bangata mululu udi ulonda. Bakankamika bua kulama bipungidi bidibu benza ne bangata mabenesha a dikudimuna dia mutshima.

4.2.3

Kulongesha Lumu Luimpa lua Yezu Kilisto

Balombodi bonsu mbalongeshi. Dienzeja bua kulonda tshilejilu tshia Mupandishi pawudi ulongesha (tangila shapita 17; Kulongesha mu Ngikadilu wa Mupandishi). Kupitshila ku mêyi ne bienzedi bieba, yisha dilongesha dia Yezu Kilisto ne malongesha a lumu luimpa luenda (tangila 3 Nefi 11:32–33; Dilongesha ne Bipungidi 42:12–14).

Longesha kupitshila ku mifundu ne mêyi a bambi ba matuku a ndekelu (tangila Dilongesha ne Bipungidi 52:9).

Wewa mubikidibua anyi mutumibua bua kuimanyina tshisangilu anyi tshibilu tshia Ekelezia, jadika bua ne malongesha adi akankamika ne mmajalama (tangila Dilongesha ne Bipungidi 50:21–23).

4.2.4

Kulombola mu Buakuana

Mulombodi mukulu yonsu udi usadila ku bulombodi bua udi ne nsapi ya buakuidi (tangila 3.4.1). Ngikadilu ewu udi ufila bulongama ne mulongu wa bujitu mutoka ne difila dia mulubu mu kuenza kua mudimu wa Mukalenga.

Mulombodi mukulu udi mua kutuma muntu mukuabu bua tshitupa tshîpi bua imanyina tshisangilu.

Mulombodi udi wimanyina ndongoluelu, tshisangilu, anyi tshibilu tshia Ekelezia, udi ne bua kujadika ne tuipatshila tua Mukalenga ntukumpajibua. Mu kuenza nanku, mulombodi udi ulonda malongesha a lumu luimpa, ngenzelu ya Ekelezia, ne buludiki bua Nyuma wa Tshijila.

Dibikila anyi ditumika bua kuimanyina, kadiena dienza muntu udi udipeta ne mushinga wa bungi anyi muakanyibua kupita bakuabu to (tangila Dilongesha ne Bipungidi 84:109–10).

Kabiena bimpa kuikala ne dijinga dia kulombola mu ndongoluelu wa mu Ekelezia wa Mukalenga to (tangila Dilongesha ne Bipungidi 121:34–37).

4.2.5

Kutuma Bujitu ne Kubulondesha

Mupandishi wakapesha bayidi benda matumika ne majitu manena (tangila Luka 10:1). Wakabapesha kabidi mushindu wa kuenza mulubu bua mudimu udibu bapeta bua kuenza (tangila Luka 9:10).

Bu mulombodi, udi mua kuambuluisha bakuabu bua batanta mu kubatuma mu matumika. Dienzeja bua kutuma bidimba bionsu mu dienza dia mudimu wa Nzambi.

Dituma ne dienza disadila dieba dimpa bikola. Keba buludiki bua Nyuma pa biwudi mua kutuma bua ujalamija meji pa bidi ne mushinga wa bungi.

4.2.6

Kulongolola Bakuabu bua Kuikala Balombodi ne Balongeshi

Sambila pawudi utangila udi mua kusadila mu mabikila anyi matumika a Ekelezia. Uvuluka bua ne Mukalenga udi ujadika badiye ubikila. Tshidi ne mushinga wa bungi, tshidi disua diabu dia kusadila, nebakeba mu didipuekesha diambuluisha dia Mukalenga, ne nebadienzeja bua kuikala bakumbana.

4.2.7

Kulongolola Bisangilu, Malongesha, ne Bibilu ne Tuipatshila Tuimpa

Keba buludiki bua Nyuma pawudi ulongolola bisangilu, malongesha, ne bibilu bidi ne tuipatshila tutoka. Tuipatshila etu tudi ne bua kukankamika bantu ne mêku, kubasemeja kudi Kilisto, ne kuambuluisha bua kukumbaja mudimu wa Nzambi wa lupandu ne dizanjikibua (tangila shapita 1 ne 2).

4.2.8

Kupima Mudimu Weba

Ku musangu, tangilula majitu ne ditanta dia mu nyuma bu mulombodi. Tangila kabidi kutanta kua aba bawudi ulombola.

Dilubuluka dieba bu mulombodi, didi dipimibua kubangila ku didiambika bua kuambuluisha bana ba Nzambi bua bikala bayidi ba lulamatu kudi Yezu Kilisto. Udi mua kumanya ne, Mukalenga udi usanka ne mudimu weba pawudi umvua Nyuma wenza mudimu munda mueba.

4.3

Bipangu mu Ekelezia

Mukalenga wakalongesha balombodi ba Ekelezia wenda bua babelangana pamua mu kuenza kua mudimu wenda (tangila Dilongesha ne Bipungidi 41:2–3). Bipangu bidi bifila mishindu ya kuyukila ne bidimba bua kupeta dibuluila padibu bakeba bua kumvua majinga a bana ba Nzambi ne balongolola mushindu wa kubambuluisha.

4.4

Nshidamenu ya Bipangu Bimpa

4.4.1

Tuipatshila tua Bipangu

Bipangu bidi bifila malu masunguluka bua kuambuluisha bidimba bua kupeta milulu ne kulama bipungidi biayi.

4.4.2

Dilongolola dia Bisangilu bia Bipangu

Mbilombibua bua bulombodi bukulu ne bipangu bikala bienzeka ku musangu ne ku musangu. Balombodi aba badi bakeba buludiki bua Mukalenga mu kulongolola bisangilu bia tshipangu. Badi kabidi bakeba bia kuenza mu tshipangu mu dipangadika tshia kuyukila.

Balombodi badi bamanyisha bidimba bia tshipangu malu a kuyukila kumpala. Bidimba bia tshipangu bidi bidilongolola bua kufila ngenyi pa malu â.

4.4.3

Dilejangana ne Mapangadika

Munkatshi mua tshisangilu tshia tshipangu, mulombodi (anyi muntu udi mulombodi mutuma) udi umvuija bualu budi ne bua kutangidibua. Nanku mulombodi udi ulomba dilejangana munkatshi mua bidimba bia tshipangu, mu kuela nkonku ne kukeba ngenyi.

Bidimba bidi bifila ngenyi ne bitelejangana mu kanemu. Padibu bakeba bua kumanya disua dia Mukalenga, nyuma wa ngenyi ne bobumua udi mua kutamba.

Mu tshipangu tshidi ne bantu baluma ne bakaji, mulombodi udi ulomba ngenyi kudi bonsu. Bantu baluma ne bakaji batu pa tshibidilu ne muenenu mishilangana idi ilomba tshipimu tshimpa.

Mulombodi udi ulombola dilejangana dia tshipangu. Kadi, udi ne bua kuteleja bikola pa mutu pa kuakula.

Panyima pa dilejangana, mulombodi udi mua kupangadika tshia kuenza anyi kutuma dipangadika dituku dikuabu bua kukeba mamanyisha makuabu ne buludiki.

4.4.4

Bobumua

Bidimba bia tshipangu bidi ne bua kukeba bua kuikala tshintu tshimua mu dijinga ne mu kipatshila kamua ne Tatu wa mu Diûlu ne Yezu Kilisto. Badi badienzeja bua kuikala mu bobumua mu miyuki ya dilejangana ne mapangadika.

4.4.5

Dipangadika ne Dienza dia Mulubu

Bidimba bia tshipangu bidi bienza tshitupa tshinena tshia mudimu wabi kumpala ne panyima pa bisangilu bia tshipangu. Mu bisangilu, bidi bikeba lungenyi lua nyuma mu kuenza kua malongolola bua kushintakaja ngenyi. Mulombodi wa tshipangu udi ubikila bidimba bua kukumbaja matumika ku malongolola â.

bidimba bia tshipangu bidi bienza mulubu wa matumika abu. Ditungunuka didi dilomba ntema mikuatshisha ne dilondolola dia matumika.

4.4.6

Disokoka dia Malu

Balombodi badi ne bua kulama mu musokoku malu padibu baleja malu a nkaya mu tshipangu. Badi ne bua kulomba dianyisha dia tshidimba kumpala kua kuamba malu.

Bidimba bia tshipangu kabiena ne bua kuamba malu a nkaya pambelu pa tshipangu to, anu pikalabu balombibua bua kukumbaja ditumika dia mulombodi wa tshipangu.

Amua malu adi ne ngumvuilu mutua bua kutuala mu tshipangu tshijima.