tamaitai talavou i fafo

11.

Tamaitai Talavou

11.1

Faamoemoega ma le Faatulagaga

11.1.1

Faamoemoega

O le faalapotopotoga o Tamaitai Talavou e fesoasoani i tamaitai talavou e osia ma tausia feagaiga paia ma faalolotoina lo latou liua ia Iesu Keriso ma Lana talalelei.

11.1.2

Autu a Tamaitai Talavou

“O a’u o se afafine faapelepele a ni matua faalelagi, e i ai se natura paia ma se taunuuga e faavavau.

“I le avea ai ma se so’o o Iesu Keriso, ou te tauivi ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.

“O le a ou tu e avea ma se molimau a le Atua i taimi uma ma i mea uma ma i nofoaga uma.

“A o ou taumafai malosi ia agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi. I le faatuatua, o le a ou faamalosia ai lo’u aiga ma le auaiga, osia ma tausia feagaiga paia, ma maua ia sauniga ma faamanuiaga o le malumalu paia.”

11.1.3

Vasega

E avea tamaitai talavou ma sui auai o se vasega a Tamaitai Talavou e amata ia Ianuari o le tausaga e atoa i ai lo latou ta’i 12.

O au epikopo ma taitai matutua o Tamaitai Talavou e faia ma le agaga tatalo faai’uga pe faapefea ona faatulaga ia vasega e tusa ai ma tausaga. O vasega taitasi tusa po o le a le toatele, e tatau ona i ai se peresitene ma, i nofoaga e mafai ai, e toatasi pe toalua ni fesoasoani ma se failautusi.

11.2

Auai i le Faatinoina o le Galuega a le Atua mo le Faaolataga ma le Faaeaga

11.2.1

Ola i le Talalelei a Iesu Keriso

11.2.1.2

A’oa’oina o le Talalelei

O fonotaga a vasega e faia i Aso Sa lona lua ma le lona fa o le masina. E 50 minute le umi. O se tasi o le au peresitene o le vasega e taitai. Na te taitaia le vasega i le taulotoina o le autu ma fefautuaai faatasi e uiga i tofiga ma isi mataupu.

Ona taitai lea e se tagata o le vasega po o se taitai matua le a’oa’oga o le talalelei.

11.2.1.3

Auaunaga ma Gaoioiga

O auaunaga ma gaoioiga e tatau ona fausia ai molimau, faamalolosia ai aiga, faafaileleina ai le lotogatasi o le vasega, ma maua ai avanoa e faamanuia ai isi.

O nisi o auaunaga ma gaoioiga e tatau ona faaaofia ai alii talavou ma tamaitai talavou, aemaise mo talavou matutua atu.

Gaoioiga Faaletausaga. E faaopoopo i gaoioiga fai so’o a le autalavou, e mafai foi ona auai ia tamaitai talavou i mea nei i tausaga taitasi:

• O se tolauapiga a Tamaitai Talavou (tagai i le Taiala mo Tolauapiga a Tamaitai Talavou

• O se konafesi a le autalavou a le uarota po o le siteki po o se konafesi a le Mo Le Malosi o le Autalavou (MMA).

11.2.1.4

Atinaega Faaletagata Lava Ia

I a latou taumafaiga ia avea atili e faapei o le Faaola, e valaaulia le autalavou e faatutu ni sini ia tuputupu ae faaleagaga, faaleagafesootai, faaletino, ma le faaleatamai (tagai i le Luka 2:52).

Mo nisi faamatalaga, tagai i le ChildrenandYouth.ChurchofJesusChrist.org.

11.2.2

Tausiga o i Latou e Lē Tagolima

E tatau i tamaitai talavou ona maua avanoa masani e auauna atu ai i isi i totonu ma faatasi ai ma o latou aiga, i taimi o gaoioiga a le autalavou, ma i o latou lava taimi.

11.2.2.1

Auaunaga

O tamaitai talavou e mafai ona maua o latou tofiga mo auaunaga e amata ia Ianuari o le tausaga e atoa i ai lo latou ta’i 14. Mo nisi faamatalaga, tagai i le mataupu 21.

11.2.3

Valaaulia Tagata Uma e Talia le Talalelei

E valaaulia e tamaitai talavou tagata uma ia talia le talalelei a o latou “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9).

E mafai e matua ma taitai ona fesoasoani i tamaitai talavou e sauniuni e faasoa atu le talalelei i o latou olaga atoa.

11.2.4

Tuufaatasia o Aiga mo le Faavavau

E mafai e tamaitai talavou ona fesoasoani e tuufaatasia aiga mo le faavavau i le tele o auala.

• Ia āva i o latou matua ma faia se faataitaiga lelei o le ola e faapei o Keriso i totonu o o latou aiga.

• Saunia mo le mauaina o sauniga o le malumalu, e aofia ai le faaipoipoga e faavavau.

• Faailoa tuaa e manaomia sauniga o le malumalu (tagai i le FamilySearch.org).

• Auai i le faatinoga o papatisoga ma faamauga mo ē ua maliliu i le tele e mafai e tulaga o i ai ona faatagaina.

11.3

Taitaiga o Tamaitai Talavou i le Uarota

11.3.1

Au Epikopo

O le tiutetauave aupito taua o le epikopo o le taunapa i tamaitai talavou ma alii talavou o lana uarota. E iloa e ia ma ona fesoasoani o latou igoa ma malamalama i o latou tulaga i le fale. Latou te feiloai ma tamaitai talavou taitasi a itiiti o le faalua i le tausaga (tagai i le 31.3.1).

Ua i ai i le epikopo le tiutetauave mo le faalapotopotoga a Tamaitai Talavou o le uarota. E fono e le aunoa o ia ma le peresitene o Tamaitai Talavou.

O le epikopo ma ona fesoasoani e auai e le aunoa i fonotaga/sauniga, auaunaga, ma gaoioiga a Tamaitai Talavou.

11.3.2

Au Peresitene Matutua o Tamaitai Talavou

E valaau ma vaetofia e le epikopo se tamaitai matua e avea ma peresitene o Tamaitai Talavou. Afai e lava le telē o le iunite, e fautua atu e le [peresitene] se tamaitai matua se toatasi pe toalua ina ia valaauina e avea ma ona fesoasoani (tagai i le mataupu 30

I se iunite laitiiti, e mafai ona valaauina na o le peresitene o Tamaitai Talavou e avea ma taitai matua i le faalapotopotoga a Tamaitai Talavou. I lenei tulaga, e galue faatasi o ia ma matua e faatulaga ia a’oa’oga ma gaoioiga mo tamaitai talavou.

Afai e leai se peresitene o Tamaitai Talavou i se paranesi, e mafai e le peresitene o le Aualofa ona faatulagaina ia aoaoga mo tamaitai talavou seia oo ina valaauina se peresitene o Tamaitai Talavou.

Ua i ai i le peresitene o Tamaitai Talavou tiutetauave nei. E lagolago atu ona fesoasoani ia te ia.

• E auauna atu o ia i le aufono a le uarota.

• E auauna o se sui o le aufono a le autalavou o le uarota (tagai i le 29.2.6).

• Auauna atu i tamaitai talavou taitoatasi.

• Aoao atu isi taitai o Tamaitai Talavou ma au peresitene o vasega i o latou tiutetauave.

• E fefautuaai ma tamaitai talavou e uiga i luitau e le manaomia ai le epikopo pe aofia ai sauaga (tagai i le 32.3, 31.3.1, ma le 38.6.2).

11.3.4

Au Peresitene o le Vasega ma le Failautusi

11.3.4.1

Valaauina, Lagolagoina, ma le Vaetofiaina

E tatau ona tofu le vasega o Tamaitai Talavou ma se au peresitene o le vasega.

O se tasi o le au epikopo e valaauina se tamaitai talavou e fai ma peresitene o se vasega. Pe a lava tamaitai talavou e galulue auauna atu, e mafaufau o ia ma le agaga tatalo i tagata o le vasega e fautuaina atu e avea ma fesoasoani ma se failautusi.

A uma ona tuuina atu nei valaauga, o se uso o le au epikopo e faailoa atua tamaitai talavou i a latou vasega mo le lagolagoina. O le epikopo po o se fesoasoani e tofia na te vaetofiaina ia tamaitai talavou.

11.3.4.2

O Tiutetauave

O peresitene o vasega e i ai i le aufono a le autalavou o le uarota (tagai i le 11.3.4.4). O au peresitene o vasega ua i ai foi tiutetauave nei:

• Taitaia taumafaiga a le vasega e auai i le faatinoina o le galuega a le Atua mo le faaolataga ma le faaeaga (tagai i le mataupu 1).

• Ia iloa ma auauna atu i tamaitai talavou taitasi, e aofia ai i latou e le auai mai i fonotaga/sauniga a le vasega.

• Fuafua ma taitai i fonotaga/sauniga a le vasega i Aso Sa (tagai i le 11.2.1.2).

• Fuafua ma faatino auaunaga ma gaoioiga a le vasega (tagai i le 11.2.1.3).

11.3.4.3

Fonotaga a le Au Peresitene o le Vasega

E fono e le aunoa ia au peresitene o vasega a Tamaitai Talavou. O le peresitene o le vasega e taitaia nei fonotaga/sauniga. E auai foi taitai matutua o Tamaitai Talavou ua tofia e lagolagosua i le au peresitene o le vasega.

11.3.4.4

Aufono a le Autalavou o le Uarota

Tagai i le 29.2.6mo nisi faamatalaga e uiga i le aufono a le autalavou o le uarota.

11.6

Taiala ma Aiaiga Faavae Faaopoopo

11.6.1

Malupuipuia o le Autalavou

Pe a fegalegaleai ia tagata matutua ma le autalavou i faatulagaga faale-Ekalesia, ia le itiiti ifo ma le toalua tagata matutua faatuatuaina e tatau ona i ai. E ono tatau ona tuufaatasia vasega ina ia mafai ai lenei mea.

O tagata matutua uma e galulue ma le autalavou e tatau ona faamaeaina le aoaoga faamasani o le puipuiga o tamaiti ma le autalavou i totonu o le masina e tasi talu ona lagolagoina (ProtectingChildren.ChurchofJesusChrist.org).