14.

Bidimba Bidi Nkaya

14.0

Tshibangilu

Bantu baluma ne bakaji badi kabayi baselangana anyi badi bashipa dibaka anyi bafuisha mubaki, badi benza tshitupa tshia mushinga tshia buikadi bua tshidimba mu Ekelezia. Bidi ne mushinga bua bonsu bapeta ditekemena kupitshila ku Bupikudi bua Yezu Kilisto (tangila Etele 12:4). Malelela adi alonda adi mua kuambuluisha bua kutantshisha ditekemena edi:

• Mifundu ne bambi ba matuku a ndekelu badi bajadika ne, muntu yonsu udi ne lulamatu mu kulama kua bipungidi bia lumu luimpa, yeya neapeta mushindu wa kuzanjikibua.

• Diba ne mushindu bikumbana udi mabenesha a dizanjikibua bifidibua, kabiena bianji kubuluibua to. Kadi bijadikibua bulelela (tangila Mosiya 2:41).

• Kutekemena mu Mukalenga kudi kulomba ditumikila ditungunuka ne dilubuluka kudiye (tangila Yeshaya 64:4).

• Nzambi udi ufila moyo wa tshiendelela kudi bana benda bonsu. Bonsu badi badikumbaja bua dipa dia ngâsa dia dibuikidila ne batumikila mikenji yenda, bobu nebapeta moyo wa tshiendelela. (Tangila Mosiya 26:30; Moloni 6:8.)

• Dieyemena mu majadiki â didi difuma ku ditabuija mu Yezu Kilisto. Ku ngâsa wenda, bintu bionsu bidi bikala bia tshifuaka, bidi bitekibua bimpa (tangila Alama 7:11–13).

Mukalenga udi ujinga bua bidimba bionsu biambuluisha mu mudimu wa lupandu mu bikongu biabu ne mu makunji abu (tangila 1 Kolinto 12:12–27). Ku buludiki bua Nyuma, bidimba bidi nkaya bidi bibikidibua mu mabikila a bulombodi ne bulongeshi.

Mu shapita ewu:

• “Bidimba bidi nkaya” bidimba bionsu bikulumpa bia Ekelezia bidi kabiyi biselangana mpindiewu to.

• “Bansonga bakulumpa badi nkaya” bantu bonsu badi ne bidimu 18–30.

• “Bakulumpa badi nkaya” bantu badi ne bidimu 31 anyi bipita.

14.1

Bidimba Bidi Nkaya mu Bisumbu bia Bitupa bia Bulaba

14.1.1

Bulombodi bua Dikunji

14.1.1.2

Nsangilu ya Bansonga Bakulumpa Badi Nkaya ne Bakulumpa Badi Nkaya

Bulombodi bukulu bua dikunji budi buenza nsangilu wa bansonga bakulumpa badi nkaya.

Bulombodi bukulu bua dikunji budi kabidi buenza nsangilu wa bakulumpa badi nkaya.

Nsangilu idi ikuatshisha bidimba kupitshila ku malunda ne mishindu kudibuinka mu mudimu wa lupandu ne dizanjikibua (tangila 14.2).

14.1.2

Bulombodi bua Tshikongu

14.1.2.1

Buepiskopo

Buepiskopo budi nsapi ya kusaka bidimba bidi nkaya mu mudimu wa lupandu ne dizanjikibua. Badi benza mudimu pamua ne tshipangu tshia tshikongu bua kumona mabikila ne matumika a mushinga bua bidimba bidi nkaya. Badi bamanya ne badienzeja bua kuandamuna ku majinga a baledi badi nkaya.

• Tshidimba tshia mu buepiskopo tshidi tshimonangana ne nsonga mukulumpa udi nkaya yonsu nansha musangu umua ku tshidimu.

• Buepiskopo budi mua kulongolola nsangilu wa bansonga bakulumpa badi nkaya mu tshikongu.

14.1.2.2

Bidimba bia mu Bulombodi Bukulu bua Mpuilu wa Bakulu ne Nsangilu wa Diambuluisha Bitumibua mu Bansonga Bakulumpa Badi Nkaya

Mulombodi mukulu wa mpuilu wa bakulu ne wa Nsangilu wa Diambuluisha, badi mua kutuma tshidimba tshia mu bulombodi bukulu buabu bua kukuatshisha bansonga bakulumpa badi nkaya. Bidimba bia mu bulombodi bukulu ebu, bidi bilonga dikankamana dia bansonga bakulumpa badi nkaya ne bandamuna ku majinga abu.

Mulombodi mukulu wa mpuilu wa bakulu ne wa Nsangilu wa Diambuluisha, badi mua kufila mulubu wa mudimu ewu mu tshisangilu tshia tshipangu tshia tshikongu.

14.1.2.3

Balombodi ba Bakulumpa Badi Nkaya

Mu tshikongu mudi ne bansonga bakulumpa badi nkaya ba bungi, buepiskopo budi mua kubikila nsonga mukulumpa udi nkaya ne mamu, bu balombodi ba bakulumpa badi nkaya. Majitu abu adi ne:

• Kuambuluisha bansonga bakulumpa badi nkaya bua kudibuinka mu mudimu wa lupandu ne dizanjikibua (tangila 14.2).

• Kusadila mu nsangilu wa dikunji wa bansonga bakulumpa badi nkaya.

• Kulombola nsangilu wa tshikongu wa bansonga bakulumpa badi nkaya, pikalayi muenjibua.

• Kumunangana ku misangu ne bulombodi bukulu bua mpuilu wa bakulu ne bua Nsangilu wa Diambuluisha. Mu bisangilu ebi, badi bayukila bua dikankamana dia bansonga bakulumpa badi nkaya ne mishindu ya kuandamuna ku majinga abu. Badi kabidi bakula pa dikuba dia bansonga bakulumpa badi nkaya.

14.2

Dibuela mu Mudimu wa Lupandu ne wa Dizanjikibua

14.2.1

Kuteka Lumu Luimpa lua Yezu Kilisto mu Tshienzedi

14.2.1.1

Dilolo dia mu Dîku ne Kulonga kua Lumu Luimpa

Balombodi ne bidimba bidi bisua kubuela, badi ne bua kulongolola tshisumbu tshimua anyi bibidi bia dilolo dia mu dîku bua bakulumpa badi nkaya ne bisumbu bikuabu bua bansonga bakulumpa badi nkaya.

14.2.1.3

Bibilu

Ku buludiki bua balombodi ba tshikongu anyi dikunji, bansonga bakulumpa badi nkaya badi mua kulongolola bua kubuela mu bibilu bisunguluka buabu. Bilejilu bidi mua kuikala ne:

• Kukumbula kua ntempelo.

• Mudimu wa muyuki wa dîku.

• Kutangalaja lumu luimpa.

• Nsangilu wa disadila.

• Misambu ne bibilu bia manaya.

• Manaya a dipepeja dia mubidi.

Ku buludiki bua balombodi ba dikunji, bakulumpa badi nkaya badi mua kulongolola bibilu bia momumua mu tshipidia tshia dikunji.