15.

Ol Seminari mo Ol Institiut blong Relijin

15.0

Fas Toktok

Ol Seminari mo Ol Institiut blong Relijin (S&I) oli helpem ol papa mo mama mo ol lida blong Jos blong stap helpem ol yut mo ol yang adalt blong kam antap long fet blong olgeta long Jisas Kraes mo long gospel blong Hem we i kambak.

Oli givim wok long wan ripresentativ blong S&I insaed long wanwan stek blong helpem ol lida blong mekem ol program blong S&I oli gohed gud.

15.1

Seminari

Seminari i wan program blong fo yia, we insaed long hem, ol yut oli stap stadi long gospel blong Jisas Kraes olsem we i stap insaed long ol skripja mo insaed long ol tijing blong ol lata-dei profet. Plante taem, ol seminari studen oli gat 14–18 yia.

Bisoprik, ol lida blong yut, mo ol presidensi blong kworom mo klas oli leftemap tingting blong evri yut blong tekpat fulwan long seminari.

15.1.1

Ol Tija

Ol tija blong seminari, oli mas ol memba blong Jos we oli gat fet long Lod Jisas Kraes, mo oli gat wan testemoni abaot gospel blong Hem we i kambak. Oli mas laef folem ol prinsipol we oli stap tijim mo oli wok gud wetem ol yut. Taem i posibol, ol tija oli sapos blong gat wan tempol rekomen we i laef i stap.

Wan memba blong stek presidensi, o wan hae kaonsela we i kasem wok ia, i singaotem, i setem apat, mo i rilisim ol tija blong seminari mo ol stek supavaesa

Blong protektem ol tija mo ol studen, tu adalt oli mas stap insaed long bilding o insaed long hom we seminari klas i stap hapen long hem.

15.1.2

Ol Defren Wei blong Holem Seminari

Seminari i save help bigwan taem we ol studen oli save mit wetem wan tija evri dei blong wik. Be, maet bae hemia i no posibol from ol poen blong sefti, travel, ples we i longwe, mo ol nara samting moa.

Ol lida blong Jos oli sapos blong kaonsel wetem S&I ripresentativ blong olgeta blong disaed wijwan wei o joes bae i:

• Helpem ol studen long bes wei blong oli lanem gospel mo groap long saed blong spirit.

• Kipim ol studen oli sef.

• No givim tumas hevi samting long ol famli, we i no nid.

Ol klas, oli no save holem long Sandei.

15.1.3

Ol Bilding, Ol Tul blong Wok, mo Ol Buk

Ol lida blong stek mo wod oli meksua se ol ples olsem ol mitinghaos, o hom blong ol memba oli open i stap blong oli save holem ol klas blong seminari.

Ripresentativ blong S&I i givim ol buk blong ol tija mo ol studen blong wanwan klas. Ol studen oli mas tekem ol skripja blong olgetawan i kam; ol skripja ia, i save hemia we oli printim, o i dijitol.

15.1.5

Kredit mo Graduesen

Ol seminari studen oli save lan moa gud mo mekem jenis long laef blong olgeta i moa tru, sapos oli kam long klas oltaem, tekpat, mo stadi long ol skripja aotsaed long taem blong klas. Taem oli stap mekem olgeta samting ia, oli stap winim sam seminari kredit evri yia, mo oli save graduet long seminari.

Blong wan studen i graduet long seminari, hem i mas winim fo yia kredit, mo i mas kasem wan eklesiastik endosmen we i kam long wan memba blong bisoprik.

15.2

Institiut

Institiut i givim janis blong gat ol klas long dei blong wik blong stadi long gospel; ol klas ia oli save mekem fet mo testemoni long Jisas Kraes mo gospel blong Hem we i kambak, i kam strong moa. Evri yang singgel adalt we oli gat 18 kasem 30 yia, oli sapos blong kam long institiut klas, i nomata se oli stap long skul o nogat.

15.3

Ol Jos Skul mo Jos Edukesen Sistem

Blong kasem infomesen long saed blong ol praemeri mo sekendri skul blong Jos, BYU-Pathway Worldwide, mo ol ples blong kasem moa hae edukesen, luk long CES.ChurchofJesusChrist.org. Infomesen blong stap finisim ol eklesiastik endosmen blong go long ol skul ia, i stap long ples ia tu.

Antap long hemia, infomesen abaot eklesiastik kliarens blong wok tru long CES Ecclesiastical Clearance Office,yu save faenem long help.ChurchofJesusChrist.org.