15.

Semineri kei na Inisitute ni Lotu

15.0

iVakamacala Taumada

Na Semineri kei na Inisitute ni Lotu (S&I) e vukei ira na itubutubu kei na iliuliu ni Lotu ena nodra vukei na itabagone kei na itabagone qase cake me vakalevutaki nodra vakabauti Jisu Karisito kei na Nona kosipeli vakalesui mai.

E dua na mata ni S&I ena lesi ki na iteki yadua me vukei ira na iliuliu ena cicivaki ni parokaramu ni S&I.

15.1

Semineri

Na semineri e dua na parokaramu yabaki va ka ra vulica kina na itabagone na kosipeli i Jisu Karisito me vaka e kunei ena ivolanikalou kei na nodra ivakavuvuli na parofita ni gauna oqo. O ira na gonevuli ni semineri, vakararaba, o ira na yabaki 14–18.

Sa nodratou itavi na matabisopi, iliuliu ni itabagone, kei na mataveiliutaki ni kuoramu kei na kalasi me ra dau veivakayaloqaqataki vei ira yadua na itabagone me ra vakaitavi vakavinaka ena semineri.

15.1.1

Qasenivuli

O ira na qasenivuli ni Semineri e dodonu me ra lewe ni Lotu era vakabauta na Turaga o Jisu Karisito ka vakadinadinataka na Nona kosipeli vakalesui mai. E dodonu mera bulataka na ivakavuvuli era vakavulica ka rawa ni cakacaka vakavinaka kei ira na itabagone. Kevaka e rawa, e dodonu me tiko na nodra ivolatara vakabau ni valetabu na qasenivuli.

E dua na lewe ni mataveiliutaki ni iteki se dua ena matabose e cake sa lesi, ena kaciva, vakatikora, ka vagalalataka na qasenivuli ni semineri ena iteki kei na supavaisa ni iteki

Me ra taqomaki kina na qasenivuli kei na gonevuli, sa dodonu me rau dau tiko e rua na uabula ena vale se itikotiko e vakavulici tiko kina na kalasi.

15.1.2

Madigi Eso ni Semineri

Ena veivuke sara vakalevu na semineri kevaka e rawa ni ra sota vata kei qasenivuli ena veisiga e loma ni macawa o ira na gonevuli. Ia, ena sega beka ni rawa ena vuku ni tataqomaki, yawa ni vanua me lakovi, kei na veika tale eso.

Era na veitalanoa vata kei na mata ni S&I o ira na iliuliu ni Lotu me lewai se digidigi cava ena:

• Veivuke vakavinaka duadua vei ira na gonevuli me ra vulica na kosipeli ka tubu vakayalo.

• Taqomaki ira na gonevuli.

• Sega ni ra vakaogai kina vakasakasaka na matavuvale.

Me kakua ni vakayacori na kalasi ena Sigatabu.

15.1.3

Veivale, iYaya, kei na iYaragi

Me ra raica na iliuliu ni iteki kei na tabanalevu ni tu na veivanua me vaka na valenilotu se nodra vale na lewenilotu me baleta na kalasi ni semineri.

Ena vakarautaka o koya na mata ni S&I na nodra iyaragi na qasenivuli kei na gonevuli me baleta na kalasi yadua. Me ra kauta mai na gonevuli na nodra dui ivolanikalou, ivola se vakalivaliva.

15.1.5

iDole kei na Tuvaitutu

E rawa ni ra vuli vakavinaka sara na gonevuli ni semineri ka vakatitobutaka na nodra saumaki mai kevaka era dau tiko wasoma ena kalasi, vakaitavi ka vulica na ivolanikalou ena taudaku ni kalasi. Ni ra vakayacora na veika oqo, era na rawata na idole ni semineri ena veiyabaki ka rawa ni tauri ivola mai na semineri.

Me tauri ivola mai na semineri, sa dodonu me na rawata e dua na gonevuli na idole ni va na yabaki kei na veitokoni vakalotu mai vua e dua ena matabisopi.

15.2

Inisitute

Na inisitute e vakarautaka na kalasi ni vuli kosipeli ka na vaqaqacotaki kina na vakabauta kei na ivakadinadina kei Jisu Karisito kei na Nona kosipeli vakalesui mai. O ira kece na itabagone qase cake yabaki 18-30 sa dodonu me ra vakayaloqaqataki me ra tiko ena kalasi ni inisitute, se ra vuli tiko se sega.

15.3

Koronivuli ni Lotu kei na iVakarau ni Vuli ni Lotu

Me baleta na itukutuku ni koronivuli ni Lotu ena paraimari kei na sekenidri, Salatu ki BYU e Vuravura Raraba, kei na koronivuli ni vuli torocake, raica na CES.ChurchofJesusChrist.org. Sa vakarautaki tale tu ga kina na veitokoni vakalotu me baleta na curu ki na veikoronivuli oqori.

Me kena ikuri, na itukutuku me baleta na vagalalataki mai na cakacaka vakalotu ena Valenivolavola ni Veivagalalataki mai na Cakacaka Vakalotu ni VVL, ena rawa ni kunei ena help.ChurchofJesusChrist.org.