tamaitai talavou ma se palasa vai

20.

Gaoioiga

20.1

Faamoemoega

O gaoioiga a le Ekalesia e aumaia ai faatasi tagata o le Ekalesia ma isi o “nuu faatasi ma le au paia” (Efeso 2:19). O faamoemoega mo gaoioiga e mafai ona aofia ai mea nei:

• Fausia ai le faatuatua ia Iesu Keriso.

• E maua ai mea e fiafia ai ma atia’e ai le lotogatasi.

• E maua ai avanoa mo le tuputupu a’e faaletagata lava ia.

• Faamalolosia ai tagata taitoatasi ma aiga.

• Fesoasoani ai i tagata o le ekalesia e auai i le faatinoina o le galuega o le faaolataga ma le faaeaga (tagai i le 1.2).

20.2

Fuafuaina o Gaoioiga

A o le’i fuafuaina se gaoioiga, e iloiloina e taitai manaoga faaleagaga ma le faaletino o tagata o le au paia. E sailia e taitai le taitaiga a le Agaga pe a faia se tonu pe o le a le ituaiga o gaoioiga e ono fesoasoani e taulima ai na manaoga.

20.2.1

Tiutetauave mo le Fuafuaina o Gaoioiga

O gaoioiga faaleuarota e mafai ona fuafua i soo se tasi o auala nei, e faavae i luga o manaoga i le lotoifale:

• E mafai e le aufono a le uarota ona vaaia le fuafuaina.

• E mafai e le aufono a le uarota ona totofi ni faalapotopotoga patino e fesoasoani e fuafua se gaoioiga se tasi pe sili atu foi.

• Pe a manaomia ma i le mea e lava ai tagata o le au paia, e mafai e le au epikopo ona faatulaga se komiti mo gaoioiga a le uarota.

Mo faamatalaga e uiga i le fuafuaina o gaoioiga a le autalavou o le uarota, tagai i le 10.2.1.3 ma le 11.2.1.3.

20.2.2

Valaauliaina o Tagata Uma e Auai

O i latou e fuafuaina ia gaoioiga, e tatau ona aapa atu i tagata uma, aemaise o tagata fou o le ekalesia, o tagata ua le toaaga mai, autalavou, au matutua nofofua, o i latou e i ai manaoga faapitoa, ma tagata o isi faatuatuaga.

E le tatau ona avea gaoioiga ma mea e tuu atu ai ni avega e le tatau ai i luga o taitai ma tagata o le au paia.

20.2.3

Tulaga faatonuina

O gaoioiga a le Ekalesia e tatau ona faagaeetia ma faamamafa ai mea e “mama, matagofie, pe logoleleia, pe tauleleia” (Mataupu Faavae o le Faatuatua 1:13). E le tatau ona aofia i gaoioiga se mea e feteenai ma aoaoga a le Ekalesia.

20.2.6

Faatupeina o Gaoioiga

O le tele o gaoioiga e tatau ona faigofie ma ia laitiiti le tupe pe leai foi se tupe e alu ai. E ao ona vave faamaonia e le au epikopo po o le au peresitene o le siteki soo se tupe faaalu.

E le tatau ona masani ona totogi e tagata o le au paia se tupe ina ia auai ai i gaoioiga. Mo aiaiga faavae ma taiala e uiga i le faatupeina o gaoioiga, tagai i le 20.6.

20.4

Konafesi a le Autalavou

E amata atu ia Ianuari o le tausaga e atoa ai lo latou ta’i 14 tausaga, e valaaulia ai alii talavou ma tamaitai talavou e auai faatasi i se konafesi a le autalavou. O konafesi a le autalavou e masani ona faia ta’itasi i le tausaga i le tulaga faaleuarota po o le faalesiteki. E mafai foi ona faia i se tulaga o ni siteki tuufaatasi po o le eria. I se tausaga e atofa ai le autalavou e auai i se konafesi a le MMA, e le tatau ona faia ai ni konafesi a siteki ma uarota mo autalavou.

O konafesi a le autalavou a le uarota e fuafuaina ma faatino e le aufono a le autalavou o le uarota, i lalo o le taitaiga a le au epikopo (tagai i le 29.2.6). E maua mai e le au epikopo le faamaoniga mai le au peresitene o le siteki mo fuafuaga o se konafesi a le autalavou a le uarota.

A o fuafuaina e taitai ma le autalavou se konafesi a le autalavou, e tatau ona latou usitaia ia aiaiga o i le mataupu lenei ma mulimuli i taiala nei:

• E mafai ona faaaoga le autu faaletausaga a le Ekalesia mo le autalavou e fai ma autu o le konafesi.

• Ia fuafua ni gaoioiga e ogatusa ma le autu.

• Ia maua se faamaoniga mai le au epikopo po o le au peresitene o le siteki mo le au failauga uma ma gaoioiga.

• Ia mautinoa e lava le vaavaaiga a le au matutua i taimi uma (tagai i le 20.7.1

20.5

O Aiaiga Faavae ma Taiala mo le Filifilia ma le Fuafuaina o Gaoioiga

20.5.1

Gaoioiga Faapisinisi pe Faaupufai

E le faatagaina ni gaoioiga e faia mo soo se faamoemoega faapisinisi pe faaupufai (tagai i le 35.5.2).

20.5.2

Siva ma Musika

I siva uma lava, o laei, teuga, moli, ituaiga siva, upu o pese, ma musika e tatau ona saofagā i se siosiomaga e mafai ona afio ai le Agaga o le Alii.

20.5.3

Po o Aso Gafua

E fautuaina tagata o le au paia ia faia gaoioiga faaleaiga i le Aso Gafua po o i isi taimi. E leai ni gaoioiga a le Ekalesia, fonotaga, po o sauniga o papatisoga e tatau ona faia pe a te’a le 6:00 i afiafi o Aso Gafua.

20.5.5

Gaoioiga e Faasoloatoa ma le Po

O gaoioiga a le Ekalesia e faasoloatoa ma le po mo vaega tuufaatasi o alii talavou ma tamaitai talavou e tatau ona faamaonia e le epikopo ma le peresitene o le siteki. E moni foi lena mea mo gaoioiga mo alii ma tamaitai nofofua o le au paia.

E le faatagaina ni gaoioiga e faasoloatoa ma le po i falelotu o le Ekalesia po o lotoa e i ai falelotu.

20.5.8

Tausia o le Aso Sapati

E leai ni tolauapiga, taaloga, po o ni gaoioiga faafiafia e faatulagaina i le Aso Sa. E le tatau foi i vaega o autalavou ma isi ona faimalaga atu pe faimalaga mai i tolauapiga po o konafesi a le autalavou i Aso Sa.

20.5.10

Asiasiga i le Malumalu

O asiasiga i le malumalu e faatulagaina i le tulaga faaleuarota po o le faalesiteki i totonu o le itulagi ua atofa i ai le malumalu.

20.6

O Aiaiga Faavae ma Taiala mo le Faatupeina o Gaoioiga

20.6.1

O Gaoioiga e Totogi i Tupe o Paketi a le Uarota po o le Siteki

O tupe o paketi a le uarota ma le siteki e tatau ona faaaoga e totogi ai gaoioiga uma---ma tuusaunoaga nei e ono i ai o loo lisi atu i le 20.6.2.

20.6.2

Faatupeina o Tolauapiga a le Autalavou

Afai e le lava tupe o le paketi a le uarota po o le siteki e totogi ai gaoioiga ua lisiina atu i lalo, e mafai ona fai atu taitai i e auai e totogi se vaega po o mea uma:

• Se tolauapiga se tasi faaletausaga a le au Perisitua Arona po o se gaoioiga faapena.

• Se tolauapiga se tasi faaletausaga a Tamaitai Talavou po o se gaoioiga faapena.

E le tatau ona soona tele ni tupe faaalu po o ni feoaiga mo se tolauapiga faaletausaga. O le leai o se tupe a le tagata lava ia, e le tatau ona taofia ai se tagata o le au paia mai le auai ai.

20.6.3

Faatupeina o Konafesi a le MMA

E mafai ona talosagaina le autalavou e saofagā se tupe e totogi ina ia auai ai i konafesi a le Mo Le Malosi o le Autalavou (MMA). Afai o le totogi o le a le mafai ai ona auai se talavou, e mafai e le epikopo ona faaaoga tupe o le paketi a le uarota e totogi ai le pili atoa po o se vaega o lena pili. Tagai i le FSY.ChurchofJesusChrist.org.

20.6.5

Gaoioiga Suetupe

O tupe faaalu mo gaoioiga a le siteki ma le uarota, e masani ona totogi i tupe o le paketi. Peitai, e mafai e se peresitene o le siteki po o le epikopo ona faatagaina se gaoioiga suetupe i tausaga taitasi mo na o faamoemoega nei:

• E fesoasoani e totogi ai gaoioiga o loo lisi atu i le 20.6.2 ma le 20.6.3.

• Ina ia fesoasoani e faatau mai ni masini e manaomia e le iunite mo tolauapiga faaletausaga.

20.7

O Aiaiga Faavae ma Taiala mo Gaoioiga

20.7.1

Vaavaaiga a Tagata Matutua

E tatau ona le itiiti ifo ma le toalua ni tagata matutua e i ai i gaoioiga uma a le Ekalesia e auai ai tamaiti ma le autalavou. E ono manaomia ni tagata matutua faaopoopo e fua i le toatele o le vaega, o tomai e moomia mo le gaoioiga, ma isi tulaga e tatau ai. E fautuaina matua e fesoasoani atu.

O i latou uma e galulue faatasi ma tamaiti ma le autalavou, e tatau ona faamae’aina le aoaoga faamasani o le puipuiga o tamaiti ma le autalavou. Tagai i le ProtectingChildren.ChurchofJesusChrist.org.

20.7.2

Tulaga Manaomia o Tausaga mo le Auai Ai i Gaoioiga a le Autalavou

Faatasi ma le faamaoniga a o latou matua, e mafai ai e talavou ona auai i tolauapiga moea e amata ia Ianuari o le tausaga e atoa i ai lo latou ta’i 12. E mafai ona latou auai i siva, konafesi a le autalavou, ma konafesi a le MMA e amata ia Ianuari o le tausaga e atoa i ai lo latou ta’i 14.

20.7.4

Faatagaga a Matua

E le mafai ona auai tamaiti ma le autalavou i se gaoioiga a le Ekalesia e aunoa ma le faatagaga a o latou matua po o i latou e vaaia. Mo gaoioiga a le Ekalesia ia e aofia ai le nonofo i le po, feoa’iga mamao, po o se tulaga lamatia e maualuga atu nai lo le mea masani, e tatau ona i ai se maliega tusitusia.

E tuuina atu e matua ma i latou e vaaia, lenei maliega e ala i le sainia o le fomu o le Faatagaga a Matua Po o Le o Loo Vaaia ma Faamatalaga Faafomai ua Faamatuu Mai

20.7.5

Lipoti o le Sauaina po o le Faatautala

Soo se sauaina po o faiga faatautala e tulai mai i le taimi o se gaoioiga a le Ekalesia e tatau ona lipotia i taitai faalemalo. E tatau ona faafesootai vave le epikopo. O loo maua faatonuga mo tagata o le ekalesia i le 38.6.2.7. O loo maua faatonuga mo epikopo i le 38.6.2.1.

20.7.6

Lapataiga mo le Saogalemu, Tali Atu i Faalavelave, ma le Lipotia o Faalavelave

20.7.6.1

Lapataiga mo le Saogalemu

E iloiloina ma le faaeteete e taitai ma i latou e auai ia gaoioiga ia mautinoa ai le itiiti o se tulaga e ono lamatia ai i ni manu’a po o ni ma’i. O gaoioiga foi e tatau ona itiiti se tulaga e ono lamatia ai le faaleagaina o meatotino. I taimi o gaoioiga, e faia e taitai taumafaiga uma e faamautinoa ai le saogalemu.

20.7.6.2

Tali Atu i Faalavelave

Afai e tulai mai se faalavelave po o se manu’a i totonu o lotoa ma fale o le Ekalesia po o le taimi o se gaoioiga a le Ekalesia, ia usitaia e taitai ia taiala nei, e pei ona faatatau i ai:

• Tuuina atu i ai le fesoasoani muamua. Afai e manaomia e se tagata se tausiga faafomai faaopoopo, faafesootai ia auaunaga faafomai mo faalavelave faafuasei. Ia faafesootai foi matua, tagata o loo tausia, po o isi tauaiga e sosoo ai, ma le epikopo po o le peresitene o le siteki.

• Afai e misi se tagata pe maliu, ia vave loa lava ona faafesootai le ofisa o leoleo i le lotoifale.

• Tuuina atu le lagolago faalelagona.

• Aua nei faamalosiauina pe le fautuaina foi se gaoioiga faaletulafono. Aua nei faia ni tautinoga mo le Ekalesia.

• Ia ao mai ma teu ni igoa o ni molimau, o latou faamatalaga e faafesootai ai, tala o le mea na tupu, ma ni atapu’e.

• Lipoti le faalavelave (tagai i le 20.7.6.3).

20.7.6.3

Lipotiina o Faalavelave

O le tulaga nei e tatau ona lipoti atu i luga o upega tafailagi i le incidents.ChurchofJesusChrist.org.

• O se faalavelave po o se manu’a e tulai mai i nofoaga o le Ekalesia po o le taimi foi o se gaoioiga a le Ekalesia.

• O se tagata sa auai i se gaoioiga a le Ekalesia ua misi.

• Ua faaleagaina se meatotino a se tagata, meatotino faitele, po o le Ekalesia i le taimi o se gaoioiga.

• Ua taufaamata’u pe ua faamoemoe mo se faatinoga faaletulafono.

Afai e taunuu se gaoioiga i se manu’aga tuga, oti, po o se tagata ua leiloa, ia vave loa ona faia e le peresitene o le siteki, epikopo, po o se tagata na ia tofia ona faailoa atu i le ofisa o le eria.

20.7.6.4

Inisiua ma Fesili

Afai e tulai mai se manu’a i le taimi o se gaoioiga a le Ekalesia, e filima’oti e taitai pe faaaoga le polokalama o le Fesoasoani Faafomai mo Gaoioiga a le Ekalesia.

I nisi tulaga, atonu e i ai ni fesili a le peresitene o le siteki po o le epikopo e uiga i mataupu tau i le saogalemu po o tagi faasaga i le Ekalesia. O le peresitene o le siteki (po o se epikopo i lalo o lana faatonuga) e auina atu fesili faapena i le Vaega o le Pulega o Faalavelave po o le ofisa o le eria.

20.7.7

Femalagaaiga

O femalagaaiga mo gaoioiga a le Ekalesia e tatau ona faamaonia e le epikopo po o le peresitene o le siteki. O nei femalagaaiga e le tatau ona tuu ai se avega e le talafeagai i tagata o le au paia. E le fautuaina ni femalagaaiga mamao mo gaoioiga.

A mafai, e tatau i vaega a le Ekalesia ona faaaoga taavale la’u pasese ua laiseneina mo femalagaa’iga mamao. E tatau ona laiseneina ma ia puipuia e se inisiua mo faalavelave e ono tupu mai.

A feoa’i vaega o le Ekalesia i taavale la’u pasese e tatau ona saogalemu le tulaga o taavale taitasi. E tatau i tagata taitoatasi ona faaaoga se fusipa’u. O avetaavale taitasi e tatau o se tagata matua faautauta, ma ua i ai se laisene.