yangfala gel wetem wota blasta

20.

Ol Aktiviti

20.1

Ol Stamba Tingting

Ol aktiviti blong Jos oli tekem ol memba blong Jos mo ol narafala man oli kam tugeta olsem “[oli] gat raet insaed long ples blong God, olsem ol narafala man blong God nomo” (Efesas 2:19). Olsem ol stamba tingting blong ol aktiviti, i save gat olgeta ia:

• Bildimap fet long Jisas Kraes.

• Givim wan taem blong gat gud taem mo blong bildimap yuniti.

• Givim ol janis blong wanwan i save groap.

• Mekem wanwan man, woman, mo famli i kam strong moa.

• Helpem ol memba blong oli tekpat long wok ia blong fasin blong sevem man, mo fasin blong kam olsem wan god (luk long 1.2).

20.2

Mekem Plan blong Ol Aktiviti

Taem oli stap mekem plan blong ol aktiviti, ol lida oli lukluk long ol nid blong ol memba long saed blong spirit mo long saed blong laef long wol ia. Ol lida oli lukaotem blong Tabu Spirit i lidim olgeta taem oli stap disaed wanem kaen aktiviti nao bae i help blong lukluk long olgeta nid ia.

20.2.1

Responsabiliti blong Mekem Plan blong Ol Aktiviti

Oli mekem plan blong ol wod aktiviti long eniwan long ol wei ia, folem ol lokol nid.

• Wod kaonsel i save lukluk ova long planing.

• Wod kaonsel i save givim wok long ol spesifik oganaesesen blong help blong mekem plan blong wan, o moa long wan long ol aktiviti.

• Taem we i nid, mo long ol ples we i gat inaf memba, bisoprik i save oganaesem wan wod aktiviti komiti.

Blong gat moa infomesen abaot fasin blong mekem plan blong ol wod yut aktiviti, luk long 10.2.1.3 mo 11.2.1.3.

20.2.2

Stap Invaetem Evriwan blong Tekpat

Olgeta we oli mekem plan blong ol aktiviti ia oli mas toktok i go long evriwan, speseli ol niu memba, ol lesaktiv memba, ol yut, ol singgel adalt, ol pipol wetem disabiliti, mo ol pipol blong ol nara fet.

Ol aktiviti oli no mas stap olsem ol hevi trabol long ol lida mo ol memba.

20.2.3

Ol Standet

Ol aktiviti blong Jos oli mas leftemap save mo tokbaot bigwan ol samting “we i klin, i luk naes, o i gudfala mo i nambawan tru” (Ol Toktok blong Bilif 1:13). Insaed long ol aktiviti, i no save gat eni samting we i agensem ol tijing blong Jos.

20.2.6

Mane blong Mekem Ol Aktiviti

Plante long ol aktiviti, oli mas ol simpolwan mo oli gat smol mane nomo, o nogat mane blong spendem. Eni mane blong spendem, bae bisoprik, o stek presiden nao i apruvum bifo aktiviti i tekem ples.

Ol memba oli no stap pem blong save tekpat long ol aktiviti. Blong luk ol polisi mo ol gaedlaen blong stap pem samting blong ol aktiviti, luk long 20.6.

20.4

Yut Konfrens

Long stat long Jenuware long yia we bae oli gat 14 yia, oli stap invaetem ol yang man, mo ol yang woman blong tekpat tugeta long wan yut konfrens. Ol yut konfrens ia, plante taem, oli holem olgeta wan taem long wan yia long wod o stek level. Oli save holem long maltistek o eria level. Long wan yia we oli givim wok long ol yut blong go long wan FSY konfrens, ol stek mo ol wod oli no sapos blong holem ol yut konfrens.

Ol wod yut konfrens, bae wod yut kaonsel nao i mekem plan mo i kareaot konfrens ia anda long daereksen blong bisoprik (luk long 29.2.6). Bisoprik i kasem raet blong stek presidensi blong mekem ol plan blong gat wan wod yut konfrens.

Taem we ol lida mo ol yut oli mekem plan blong gat wan yut konfrens, oli sapos blong folem ol polisi we oli stap insaed long japta ia mo olgeta gaedlaen ia:

• Stamba toktok blong yia blong ol yut, oli save yusum olsem stamba toktok blong yut konfrens.

• Mekem plan blong gat ol aktiviti we oli go wetem stamba toktok ia.

• Kasem apruvol blong bisoprik o stek presidensi long saed blong evri spika mo aktiviti.

• Meksua se i gat inaf adalt blong supavaes long evri taem (luk long 20.7.1

20.5

Ol Polisi mo Gaedlaen blong Jusum mo Mekem Plan blong Ol Aktiviti

20.5.1

Ol Aktiviti blong Winim Mane o Ol Politik Aktiviti

Ol aktiviti we bae i blong salem eni samting, o blong eni politik aktiviti, bae oli no save givim raet from (luk long 35.5.2).

20.5.2

Ol Danis mo Miusik

Insaed long evri danis aktiviti, bae fasin blong dresap, fasin blong mekem yuwan, laet, stael blong danis, ol toktok blong singsing, mo miusik oli mas mekem se i gat wan ples we Spirit blong Lod i save stap long hem.

20.5.3

Ol Mandei Naet

Oli leftemap tingting blong ol memba blong holem ol famli aktiviti naet long Mandei, o long sam nara taem. I no mas gat eni Jos aktiviti, miting, ol seves blong baptaes, we i tekples afta long 6 klok naet long ol Mandei.

20.5.5

Ol Aktiviti we Oli Go Kasem Delaet

Ol Jos aktiviti we oli go ovanaet, o go kasem delaet blong ol kombaen grup blong ol yang man mo ol yang woman, bisop mo stek presiden i mas apruvum. Hemia i tru semmak blong ol aktiviti blong ol memba we oli ol man, mo ol woman we oli singgel.

Oli no apruvum ol ovanaet aktiviti long ol mitinghaos blong Jos o long graon o yad blong ol mitinghaos.

20.5.8

Kipim Sabat Dei I Tabu

I no mas gat ol Jos kamp, ol spot taem, o pleiplei taem we oli putum blong i hapen long Sandei. Mo tu, ol yut grup mo ol narawan oli no mas travel, i go mo i aot, long ol kamp ples, o yut konfrens ples long ol Sandei.

20.5.10

Ol Tempol Visit

Ol tempol visit, oli stap oganaesem olgeta long level blong wod, o stek insaed long tempol distrik we oli stap anda long hem.

20.6

Ol Polisi mo Gaedlaen blong Pem Ol Aktiviti

20.6.1

Ol Aktiviti we Oli Pem wetem Bajet Mane blong Wod o Stek

Ol mane blong wod o long stek oli mas yusum olgeta blong pem spending blong evri aktiviti—mo samfala eksepsen we oli stap long 20.6.2.

20.6.2

Ol Mane blong Ol Yut Kamp

Sapos bajet blong wod o stek i no gat inaf mane blong pem ol aktiviti andanit ia, ol lida oli save askem olgeta we oli tekpat blong pem wan smol pat o evriwan.

• Wan yia kamp blong Aronik Prishud, we i longwan, o wan semmak aktiviti.

• Wan yia kamp we i longwan blong Ol Yang Woman, o wan semmak aktiviti.

Mane blong pem ol samting blong yia kamp, o travel i no mas antap tumas. Semtaem, i no from se wan memba i no gat mane, nao bae hem i no save tekpat.

20.6.3

Mane blong FSY (BYKS ) Konfrens

Oli save askem ol yut blong givim smol mane blong go long ol konfrens Blong Ol Yut Oli Kam Strong (BYS o FSY). Sapos mane bae i stopem wan yut blong tekpat, bisop i save yusum mane blong bajet blong wod blong pem evri fi o sam pat blong fi ia. Luk long FSY.ChurchofJesusChrist.org.

20.6.5

Ol Taem blong Mekem Fanresing

Plante taem, mane blong yusum long ol aktiviti blong stek mo wod, oli kamaot long mane blong bajet. Be, wan stek presiden o wan bisop i save givim raet blong holem wan fanresing evri yia, blong ol samting ia:

• Blong help blong pem mane blong spendem long ol aktiviti, olsem oli putum long 20.6.2 mo 20.6.3.

• Blong help blong pem ol tul blong yunit i yusum blong yia kamp.

20.7

Ol Sefti Polisi mo Gaedlaen blong Ol Aktiviti

20.7.1

Adalt we i Supavaes

I mas gat tu (2) adalt we oli mas stap long evri aktiviti blong Jos we i gat ol yut mo ol pikinini i tekpat long hem. Maet bae i nid blong gat sam moa adalt, folem saes blong grup, ol skil we i nidim blong aktiviti, mo ol nara samting moa. Oli leftemap tingting blong ol papa mo mama blong save help.

Evriwan we i wok wetem ol pikinini mo ol yut oli mas komplitim proteksen trening blong ol pikinini mo ol yut. luk long ProtectingChildren.ChurchofJesusChrist.org.

20.7.2

Ol Samting we Wan I Mas Gat Folem Yia blong Wanwan blong Save Tekpat long Ol Yut Aktiviti

Wetem raet blong papa mo mama blong olgeta, ol yut oli save go long wan ovanaet kamp; hemia stat long Jenuware blong yia ia we oli kasem 12 yia. Oli save go long ol danis, ol yut konfrens, mo ol BYS konfrens, hemia stat long manis Jenuware blong yia ia we oli kasem 14 yia.

20.7.4

Raet blong Papa mo Mama

Ol pikinini mo ol yut oli no save tekpat long wan aktiviti blong Jos, sapos oli no gat raet blong papa mo mama o gadien blong olgeta. Blong ol aktiviti blong Jos we i gat wan ovanaet, longfala travel, o plante denja, bae i nid blong oli saenem wan agrimen long raeting.

Ol papa, mama mo olgeta we oli gat wok blong lukaot long ol pikinini mo yut, oli givim raet ia taem oli saenem fom ia, Raet blong Papa mo Mama o Man blong Lukaot long Pikinini mo Medikol Rilis

20.7.5

Ol Ripot blong Abius

Sapos i gat eni abius we i hapen long taem blong wan aktiviti blong Jos, oli mas ripotem i go long ol sivil atoriti. Oli mas kontaktem bisop kwiktaem. Ol instraksen blong ol memba oli stap long 38.6.2.7. Ol instraksen blong ol Bisop oli stap long 38.6.2.1.

20.7.6

Sefti Rul mo Fesem Taem blong Aksiden mo Mekem Aksiden Ripot

20.7.6.1

Ol Sefti Rul

Ol lida mo olgeta we oli tekpat, oli luklukgud blong skelem ol aktiviti blong mekemsua se denja i smol, mo man i no sik. Ol aktiviti oli no mas gat denja blong damejem propeti. Long taem blong ol aktiviti, ol lida oli mekem bes blong meksua se i gat sefti.

20.7.6.2

Wanem blong Mekem Taem I Gat Aksiden

Sapos wan aksiden o kil i hapen long propeti blong Jos, o long taem blong wan Jos aktiviti, ol lida oli mas folem olgeta gaedlaen ia, taem i posibol:

• Givim fas help. Sapos wan i nid blong oli givim sam moa medikol kea, kontak imejensi medikol seves. Mo tu, kontaktem papa o mama, gadien, o ol nara famli, mo bisop o stek presiden.

• Sapos wan i go lus, o i ded, kwiktaem kontaktem ol ofisa we oli mekem man i folem lokol loa.

• Givim sapot long saed blong filing mo tingting.

• No leftemap tingting mo no daonem tingting blong lukaotem aksen folem loa. No mekem komitmen long bihaf blong Jos.

• Karem, mo kipim ol nem blong ol witnes, ol kontak blong olgeta, ol stori blong wanem i bin hapen, mo ol foto.

• Ripotem aksiden ia (luk long 20.7.6.3).

20.7.6.3

Ripotem Aksiden

Olgeta situesen ia, oli mas ripotem onlaen long incidents.ChurchofJesusChrist.org.

• Wan i kasem wan aksiden, o kil long propeti blong Jos, o long taem blong wan aktiviti blong Jos.

• Wan we i bin tekpat long wan aktiviti blong Jos, i go lus.

• Wan i damejem propeti blong wan praevet, blong pablik o blong Jos long taem blong wan aktiviti blong Jos.

• Wan i talem se bae i tekem aksen folem loa.

Sapos i gat wan samting we i mekem se i gat bigfala kil, wan i ded, o wan i go lus, stek presiden, bisop, o memba we hem i jusum, kwiktaem i letem eria ofis i save.

20.7.6.4

Insurens mo Ol Kwestin

Sapos wan aksiden o kil i hapen long taem blong wan samting blong Jos, ol lida oli disaed sapos i nidim Jos Aktiviti Medikol Help Program.

Long samfala kes, stek presiden o bisop i save gat sam kwestin abaot ol sefti problem o klem agensem Jos. Stek presiden (o wan bisop anda long daereksen blong stek presiden) i sendem ol kwestin olsem i go long Denja Manejmen Dipatmen, o i go long eria ofis.

20.7.7

Travel

Travel blong ol aktiviti blong Jos, bisop o stek presiden i mas apruvum. Ol travel blong ol aktiviti i no mas givim hevi wok long ol memba. Ol travel we oli mas travel longwe blong gat aktiviti, oli no letem tumas.

Taem we i posibol, ol grup blong Jos oli mas yusum ol stret pablik transpot we oli gat laesens, mo oli gat insurens blong travel longwe. Oli mas save gud tu long saed blong insurens blong wan we i kasem kil.

Taem we ol grup blong Jos oli travel long ol praevet trak, wanwan trak ia i mas stap long gudfala kondisen, i sef. Wanwan i mas gat wan strap long jea. Wanwan draeva i mas gat wan laesens, mo i mas wan adalt we i responsibol.