dalagita nga may inugtiro-tiro sang tubig

20.

Aktibidades

20.1

Mga Katuyuan

Ang mga aktibidades sa Simbahan nagatipon sang mga miyembro sang Simbahan kag iban pa bilang mga “kasimanwa sang mga tumuluo” (Mga Taga-Efeso 2:19). Ang mga katuyuan sang aktibidades pwede nga magsakop sang masunod:

• Magpatubo sang pagtuo kay Jesucristo.

• Maghatag kalingawan kag magpabakod sang paghiliusa.

• Maghatag sang mga oportunidad para sa personal nga pagtubo.

• Magpabakod sang mga indibidwal kag mga pamilya.

• Magbulig sa mga miyembro nga magpartisipar sa buluhaton sang kaluwasan kag pangkahitaasan (tan-awa sa 1.2).

20.2

Pagplano sang mga Aktibidades

Antes magplano sang aktibidades, ginabinagbinag sang mga lider ang espirituhanon kag temporal nga mga panginahanglan sang mga miyembro. Nagapangayo ang mga lider sang giya sang Espiritu sa pagdesisyon kon ano nga klase sang aktibidades ang makasabat sina nga mga panginahanglan.

20.2.1

Responsibilidad sa Pagplano sang Aktibidades

Pwede nga planuhon ang aktibidades sa ward sa masunod nga mga paagi, base sa lokal nga mga panginahanglan:

• Ang ward council ang nagadumala sang pagplano.

• Pwede mag-asayn ang ward council sa partikular nga mga organisasyon sa pagbulig plano sang isa ukon madamo pa nga aktibidades.

• Kon kinahanglan kag kon madamo ang mga miyembro, pwede nga mag-organisar ang bishopric sang ward activities committee.

Para sa impormasyon parte sa pagplano sang aktibidades para sa mga lamharon sa ward, tan-awa sa 10.2.1.3 kag 11.2.1.3.

20.2.2

Pag-agda sang Tanan nga Magpartisipar

Ang mga nagaplano sang aktibidades dapat nga maghagad sang tanan, labi na gid ang bag-o nga mga miyembro, indi-gawa aktibo nga mga miyembro, mga lamharon, mga single adult, may mga kasablagan sa lawas, kag mga tawo nga lain ang relihiyon.

Ang mga aktibidades indi dapat nga mangin huol sa mga lider kag mga miyembro.

20.2.3

Mga Pagsulundan

Ang mga aktibidades sang Simbahan dapat nga makapabakod kag maghatag importansya sa “matarong, matahum, ukon dungganon ukon dalayawon” (Mga Artikulo sang Pagtuo 1:13). Ang mga aktibidades indi pwede nga may bisan ano nga kontra sa mga ginatudlo sang Simbahan.

20.2.6

Pondo para sa Aktibidades

Kalabanan nga mga aktibidades dapat simple lang kag halos wala nagakinahanglan sang gasto. Ang bisan ano nga gasto kinahanglan nga aprubahan anay sang bishopric ukon stake presidency.

Indi dapat magbayad ang mga miyembro para magpartisipar sa mga aktibidades. Para sa mga polisiya kag mga pagsulundan sa pagpondo sang aktibidades, tan-awa sa 20.6.

20.4

Youth Conference

Pagsugod sa Enero sang tuig nga magaedad sila 14 anyos, ang mga young men kag young women ginaagda nga magpartisipar sa youth conference. Ang mga youth conference masami ginahiwat kaisa kada tuig sa lebel sang ward ukon stake. Pwede man ini hiwaton upod sa iban nga mga stake ukon lebel sang area. Sa tuig nga ang lamharon naasayn nga mag-entra sa FSY conference, indi dapat maghiwat ang mga stake kag ward sang mga youth conference.

Ang mga youth conference sa ward ginaplano kag ginapatigayon sang ward youth council, sa idalom sang direksyon sang bishopric (tan-awa sa 29.2.6). Nagapangayo ang bishopric sang pahanugot sang stake presidency sa paghiwat sang ward youth conference.

Sa pagplano sang mga lider kag mga lamharon sang youth conference, dapat nila sundon ang mga polisiya sa sining kapitulo kag ang masunod nga mga pagsulundan:

• Pwede gamiton ang tuigan nga tema sang mga lamharon sa Simbahan bilang tema sang komperensya.

• Magplano sang aktibidades nga nagasunod sa tema.

• Magpangayo sang pahanugot sang bishopric ukon stake presidency nahanungod sa tanan nga manughambal kag aktibidades.

• Siguruhon nga may nagakaigo nga presensya sang hamtong sa tanan nga oras (tan-awa sa 20.7.1).

20.5

Mga Polisiya kag mga Pagsulundan sa Pagpili kag Pagplano sang Aktibidades

20.5.1

Komersyal kag Politikal nga Aktibidades

Ang aktibidades para sa bisan ano nga komersyal ukon politikal nga katuyuan wala ginapahanugotan (tan-awa sa 35.5.2).

20.5.2

Mga Sinaot kag Musika

Ang tanan nga sinaot, bayo, porma, suga, istilo sang pagsaot, mga tinaga sa kanta, kag musika dapat magbulig sa pagpahamtang sang kapalibotan nga sa diin makapabilin ang Espiritu sang Ginuo.

20.5.3

Mga Gab-i sang Lunes

Ginapaisog ang mga miyembro nga maghiwat sang mga aktibidades sa pamilya kon Lunes ukon sa iban pa nga mga adlaw. Wala dapat sang hiwaton nga aktibidades, miting, ukon bunyag sa Simbahan paglampas 6:00 p.m. kon Lunes.

20.5.5

Mga Aktibidades nga Kinahanglan Magpaligad sang Gab-i (Overnight Activities)

Ang mga aktibidades sang Simbahan nga nagakinahanglan magpaligad sang gab-i para sa gintingob nga mga young men kag young women kinahanglan aprubado sang bishop kag stake president. Amo man sa aktibidades sang lalaki kag babayi nga mga miyembro nga single.

Ang aktibidades nga nagakinahanglan magpaligad sang gab-i sa bilding sang Simbahan ukon sa pasilidades sang Simbahan indi aprubado.

20.5.8

Pagsunod sang Adlaw nga Inugpahuway

Wala sang mga camp sang Simbahan, hinampang sa isports, ukon lingaw-lingaw ang hiwaton kon Domingo. Indi man dapat magbiyahe ang mga grupo sang lamharon ukon iban pa pakadto ukon papauli halin sa mga camp ukon youth conference kon Domingo.

20.5.10

Pagbisita sa Templo

Ang pagkadto sa templo ginaorganisar sa lebel sang ward ukon stake sa sulod sang naasayn nga temple district.

20.6

Mga Polisiya kag Pagsulundan sa Pagpondo sang Aktibidades

20.6.1

Aktibidades nga Ginabayaran Gamit ang Pondo sang Ward ukon Stake nga Badyet

Badyet sang ward ukon stake ang dapat gamiton sa pagbayad sang tanan nga aktibidades—magluwas sa pila ka mga butang nga nalista sa 20.6.2.

20.6.2

Pondo para sa mga Youth Camp

Kon kulang ang badyet sang ward ukon stake para sa aktibidades nga nalista sa idalom, pwede nga pangabayon sang mga lider ang mga magapartisipar nga bayaran ang iban ukon ang tanan nga galastuhan:

• Isa ka tuigan nga ginpalawig nga Aaronic Priesthood camp ukon pareho sini nga aktibidades.

• Isa ka tuigan nga ginpalawig nga Young Women camp ukon pareho sini nga aktibidades.

• Isa ka tuigan nga day camp ukon pareho sini nga aktibidades para sa kabataan sang Primary nga nagaedad 8 hasta 11.

Ang gasto ukon biyahe sa tuigan nga camp indi dapat sobra-sobra. Ang kakulang sang personal nga pondo indi dapat magpugong sa miyembro sa pag-entra.

20.6.3

Pondo para sa mga FSY Conference

Ang mga lamharon pwede nga pangabayon nga mag-amot para makaentra sa mga For the Strength of Youth (FSY) conference. Kon ang gasto magapugong sa isa ka lamharon nga mag-entra tungod sa kakulang sang kuwarta, pwede nga gamiton sang bishop ang badyet sang ward para bayran ang kulang ukon tanan nga balayran. Tan-awa sa FSY.ChurchofJesusChrist.org.

20.6.5

Mga Kahiwatan sa Pagtipon sang Pondo (Fundraising Activities)

Ang gasto para sa aktibidades sa stake kag ward masami ginabayran gamit ang pondo sa badyet. Pero, pwede nga pahanugotan sang stake president ukon bishop ang isa ka fundraising kada tuig para lamang sa masunod nga mga katuyuan:

• Para makabulig bayad sa mga aktibidades nga nalista sa 20.6.2.

• Para magbakal sang gamit nga kinahanglan sang yunit para sa tuigan nga mga camp.

20.7

Mga Polisiya kag Pagsulundan para Masiguro nga Malayo sa Aksidente ang mga Aktibidades

20.7.1

Pagbantay sang Hamtong

Kinahanglan nga may duha gid ka hamtong sa tanan nga aktibidades sang Simbahan nga ginaentrahan sang kabataan kag mga lamharon. Pwede nga magdugang sang mga hamtong depende sa kadakuon sang grupo, sa abilidad nga kinahanglan sa aktibidades, ukon iban pa nga mga rason. Ginapapagsik ang mga ginikanan nga magbulig.

Ang tanan nga nagatrabaho upod sa mga kabataan kag lamharon kinahanglan nga makatapos sang children and youth protection training. Tan-awa sa ProtectingChildren.ChurchofJesusChrist.org.

20.7.2

Ginapangayo nga Edad para Makaentra sa Aktibidades sang mga Lamharon

Kon may pahanugot sang ila mga ginikanan, pwede mag-entra ang mga lamharon sa overnight nga mga camp pagsugod sa Enero sang tuig nga magaedad sila sang 12 anyos. Pwede sila mag-entra sa mga sinaot, youth conference, kag mga FSY conference pagsugod sang Enero sang tuig nga magaedad sila sang 14 anyos.

20.7.4

Pahanugot sang Ginikanan

Ang mga kabataan kag lamharon indi pwede nga mag-entra sa aktibidades sang Simbahan kon wala sing pahanugot sang ila mga ginikanan ukon guardian. Sa aktibidades sang Simbahan nga kinahanglan sila mag-overnight, magbiyahe sang malawig, ukon may mas mataas nga risgo, kinahanglan gid ang sinulat nga pahanugot.

Nagahatag sang pahanugot ang mga ginikanan kag guardian paagi sa pagpirma sang Permission and Medical Release form.

20.7.5

Mga Report sang Pagpang-abuso

Ang bisan ano nga pagpang-abuso nga nagakatabo sa sulod sang aktibidades sang Simbahan dapat nga ireport sa sibil nga mga awtoridad. Dapat nga kontakon dayon ang bishop. Ang mga instruksyon para sa mga miyembro ara sa 38.6.2.7. Ang mga instruskyon para sa mga bishop ara sa 38.6.2.1.

20.7.6

Mga Pangandam, Aksyon, kag Pagreport sang Aksidente

20.7.6.1

Mga Pangandam sa Aksidente

Mahinalungon nga ginatsekyar sang mga lider kag partisipante ang mga aktibidades para masiguro nga diutay lang kaayo ang risgo nga may mapilasan ukon magmasakit. Ang aktibidades dapat diutay man ang risgo nga may maguba nga propyedad. Sa oras sang aktibidades, himuon sang mga lider ang tanan para masiguro nga wala sing may mahalitan.

20.7.6.2

Aksyon kon May Maaksidente

Kon may matabo nga aksidente ukon kasakitan sa propyedad sang Simbahan ukon sa oras sang aktibidades sa Simbahan, ginasunod sang mga lider ang masunod nga pagsulundan, kon nagakabagay:

• Maghatag sang first aid. Kon kinahanglan sang tawo sang dugang nga medikal nga pag-atipan, magkontak sa emergency medical services. Kontaka man ang ginikanan, guardian, ukon ang malapit nga himata kag ang bishop ukon stake president.

• Kon may madula ukon mapatay, kontaka insigida ang lokal nga pulis.

• Maghatag sang emosyunal nga suporta.

• Indi magduso ukon magpugong sang legal nga aksyon. Indi maghimo sang mga pangako para sa Simbahan.

• Ilista kag tagoa ang mga ngalan sang mga saksi, ang ila numero, ang panaysayon sang natabo, kag mga litrato.

• Ireport ang aksidente (tan-awa sa 20.7.6.3).

20.7.6.3

Pagreport sang Aksidente

Ang masunod nga mga sitwasyon dapat nga ireport online sa incidents.ChurchofJesusChrist.org.

• Ang aksidente ukon pagkasamad natabo sa propyedad sang Simbahan ukon sa oras nga ginahiwat ang aktibidades sang Simbahan.

• Ang tawo nga nagapartisipar sa aktibidades sang Simbahan nadula.

• May naguba nga propyedad nga pribado, pangpubiko, ukon iya sang Simbahan sa oras sang aktibidades sang Simbahan.

• May nagapamahog ukon ginapaabot nga mag-akusar.

Kon may seryoso nga nasamaran, napatay, ukon nadula sa oras sang aktibidades, ang stake president, bishop, ukon miyembro nga iya gintugyanan insigida nga magapahibalo sa area office.

20.7.6.4

Insurance kag mga Pamangkot

Kon ang aksidente natabo sa tion nga ginahiwat ang aktibidades sang Simbahan, ginahibalo sang mga lider kon magamit ang Church Activity Medical Insurance program.

Sa pila ka mga kaso, mahimo nga may mga pamangkot ang stake president ukon bishop parte sa mga isyu sang seguridad ukon mga magpabayad sa Simbahan. Ang stake president (ukon ang bishop sa idalom sang iya direksyon) nagapakig-angot sining mga pamangkot sa Risk Management Division ukon sa area office.

20.7.7

Pagbiyahe

Ang mga pagbiyahe para sa aktibidades sang Simbahan dapat nga aprubado sang bishop ukon stake president. Ini nga biyahe indi dapat mangin pabug-at sa mga miyembro. Ang malawig nga biyahe para sa aktibidades wala ginapahanugotan.

Kon mahimo, ang mga grupo sa Simbahan dapat nga maggamit sang pangpubliko nga transportasyon para sa malawig nga biyahe. Dapat nga lisensyado ini kag may liability insurance.

Kon ang mga grupo sa Simbahan nagabiyahe sa pribado nga mga salakyan, ang kada salakyan kinahanglan maayo gid ang kondisyon. Ang kada tawo dapat nga maggamit sang seat belt. Ang kada drayber dapat lisensyado, responsable nga hamtong.