21.

Auaunaga

21.0

Faatomuaga

O le auaunaga o lona uiga o le auauna atu i isi e faapei ona sa faia e le Faaola (tagai i le Mataio 20:26–28).

E finagalo le Alii i tagata uma o Lana Ekalesia ia maua lena tausiga. Ona o lea mafuaaga, ua tofia ai i latou e umia le perisitua o ni uso o auaunaga mo aiga o tagata taitasi o le au paia. E tofia tuafafine o auaunaga i tuafafine matutua taitasi.

21.1

O Tiutetauave o Tuafafine ma Uso o Auaunaga

O tuafafine ma uso o auaunaga ua i ai tiutetauave nei mo tagata taitoatasi ma aiga e tofi atu ia i latou:

• Fesoasoani ia i latou ia faamalolosia lo latou faatuatua i le Tama Faalelagi ma Iesu Keriso.

• Fesoasoani e saunia i latou e osia ma tausia feagaiga paia ma le Atua a o latou mauaina nei sauniga.

• Ia iloatino mea e manaomia ma tuuina atu le alofa, tausiga, ma le auaunaga FaaKeriso.

• Fesoasoani ia latou ola-tutoatasi faaleagaga ma faaletino.

21.2

Faatulagaina o Auaunaga

21.2.1

O Le Faia o Tofitofiga

E fuafua ma le agaga tatalo e au peresitene o le korama a toeaina ma le Aualofa ia tofitofiga mo uso ma tuafafine o auaunaga. E masani ona latou tofia ni uso se toalua po o ni tuafafine se toalua o ni soa. Latou te sailia le faamaoniga a le epikopo mo soa ma tofitofiga mo le auaunaga.

E mafai ona tofi se ulugalii ua faaipoipo e auauna atu faatasi i se tagata po o se aiga.

O uso ma tuafafine o auaunaga e le valaauina, lagolagoina, pe vaetofiaina.

21.2.2

Tofitofiga Faaleauaunaga mo le Autalavou

E mafai e se tamaitai talavou ona avea ma soa o auaunaga i se tuafafine o le Aualofa pe a naunau le tamaitai talavou ma gafatia. E mafai ona amata auauna atu o ia i le tausaga e atoa ai lona 14.

O se alii talavou e avea ma soa mo auaunaga i se e umia le Perisitua Mekisateko, pe a ua faauuina o ia i le tofi o le a’oa’o po o le ositaulaga.

21.3

Faatalanoaga o Auaunaga

O le peresitene o le korama a toeaina ma ona fesoasoani e faatalanoaina ia uso o auaunaga. O le peresitene o le Aualofa ma ona fesoasoani e faatalanoaina ia tuafafine o auaunaga.

O nei faatalanoaga e faia e le itiiti ifo ma le faa-tasi i kuata taitasi.

O faamoemoega o faatalanoaga ia:

• Fefautuaai e uiga i malosiaga, manaoga, ma luitau o tagata taitasi ma aiga na tofi i ai.

• Talanoaina ni auala e fesoasoani ai i tagata ia saunia ia maua ia sauniga pe a manaomia.

• Mafaufau pe ono mafai faapefea ona fesoasoani le korama a toeaina, Aualofa, aufono a le uarota ma isi.

• A’oa’o atu ma faamalosiau i uso ma tuafafine o auaunaga.

21.4

Faamaopoopoina o Taumafaiga o Auaunaga

E fono faatasi ia au peresitene o le Aualofa ma le korama a toeaina a itiiti e faalekuata. Latou te iloiloina mea sa latou a’oa’oina mai i faatalanoaga o auaunaga (tagai i le 21.3). Latou te faamaopoopoina foi ia tofitofiga mo auaunaga.

I iunite e toalaiti tagata e toaaga, e mafai e au peresitene o le Aualofa ma le korama a toeaina ona fai se faaiuga e aua nei tofia ni tuafafine o auaunaga ma uso o auaunaga i nisi o tagata o le au paia.