mga lalaki nga nagaalsa sang bato

21.

Ministering

21.0

Introduksyon

Ang ministering amo ang pagserbisyo sa iban pareho sang ginhimo sang Manluluwas (tan-awa sa Mateo 20:26–28).

Gusto sang Ginuo nga mabaton sang tanan nga miyembro sang Iya Simbahan ang amo sini nga pag-atipan. Bangud sini, ang mga nagakapot sang priesthood ginaasayn bilang mga ministering brother sa kada panimalay sang miyembro. Ang mga ministering sister ginaasayn sa kada hamtong nga sister.

21.1

Mga Responsibilidad sang mga Ministering Sister kag Brother

Ang mga ministering sister kag brother may masunod nga mga responsibilidad sa kada indibidwal kag pamilya nga naasayn sa ila:

• Buligan sila nga pabakuron ang ila pagtuo sa Amay nga Langitnon kag kay Jesucristo.

• Buligan sila nga maghanda sa paghimo kag pagtuman sang sagrado nga mga kasugtanan upod sa Dios sa pagbaton nila sang mga ordinansa.

• Hibaluon ang ila mga kinahanglanon kag maghatag sang Cristohanon nga pagpalangga, pag-atipan, kag serbisyo.

• Buligan sila nga makasandig sa kaugalingon sa espirituhanon kag sa temporal.

21.2

Pag-organisar sang Ministering

21.2.1

Paghimo sang mga Asaynment

Ang mga pangulohan sang elders quorum kag Relief Society mainampuon nga nagabinagbinag sang mga asaynment para sa mga ministering brother kag sister. Kasami nagaasayn sila sang duha ka brother kag duha ka sister bilang magkaupod (companionship). Ginapangayo nila ang pahanugot sang bishop sa mga ministering companionship kag asaynment.

Ang mag-asawa pwede nga maasayn nga upod nga magminister sa isa ka tawo ukon pamilya.

Ang mga ministering brother kag sister wala gina-call, sustain, ukon set apart.

21.2.2

Mga Ministering Assignment para sa mga Lamharon

Ang lamharon nga babayi pwede nga mag-alagad bilang ministering companion sang isa ka Relief Society sister kon handa kag makasarang ang young woman. Pwede na sia magsugod sa pag-alagad sa tuig nga magaedad sia 14 anyos.

Ang pamatan-on nagaserbisyo bilang ministering companion sa nagakapot sang Melchizedek Priesthood kon naordin na sia sa palangakuan sang teacher ukon priest.

21.3

Mga Ministering Interview

Ang elders quorum president kag ang iya mga manuglaygay ang nagainterbyu sang mga ministering brother. Ang Relief Society president kag ang iya mga manuglaygay ang nagainterbyu sang mga ministering sister.

Ini nga mga interbyu ginahiwat bisan kaisa kada tatlo ka bulan.

Ang mga katuyuan sini amo ang:

• Hambalan ang mga kusog, panginahanglan, kag mga kabudlayan sang naasayn nga mga indibidwal kag pamilya.

• Hambalan ang mga paagi nga mabuligan ang mga tawo nga maghanda sa pagbaton sang mga ordinansa kon kinahanglan.

• Pamensaron kon paano makabulig ang elders quorum, Relief Society, ward council kag iban pa.

• Tudloan kag pabakuron ang mga ministering brother kag sister.

21.4

Pagpakig-angot sang mga Hinimuan sa Ministering

Ang mga pangulohan sang Relief Society kag elders quorum nagakitaay bisan kaisa kada tatlo ka bulan. Ginarebyu nila ang ila natun-an sa mga ministering interview (tan-awa sa 21.3). Ginapakig-angot man nila ang mga ministering assignment.

Sa mga yunit nga diutay lang ang aktibo nga miyembro, ang mga pangulohan sang Relief Society kag elders quorum pwede magdesisyon nga indi na mag-asayn sang ministering sister kag ministering brother sa pila ka miyembro.