22.

Kihda Sawas en Anahn en Paliwar oh Kakehlailihla palien Uhtohr

22.0

Kapehse

Memper kan en Mwomwohdiso kin inoukihda en “iang toutouki ahn emen emen arail toutou kan, … mwahiei rehn me kin mwahiei kan … , oh koaloalamwahuih irail kan me anahne koaloalamwahu” (Mosiah 18:8–9).

Memper kan en Mwomwohdiso pil kin ale kaweidpen kakehlaka pein arail uhtohr sang ni kesempwalki doadoahk oh sang ni sawas en Kauno. Uhtohrda iei ahniki koahiek, ngoang, oh doadoahk pwehn apwalih pali ngehn oh paliwar soahng kan me anahn ong mour ong pein emenemen oh peneinei.

---

NGOANG EN EMEN EMEN OH PENEINEI

---

22.1

Kakehlailihala Palien Uhtohr

Sang ni sawas sang Kauno, memper kan kin kakehlailihala arail palien uhtohr sang ni ahl pwukat:

• Kalaudehla kakehlepen palingehn, paliwar, oh pepehm.

• Kalaudehla palien sukuhl oh doadoahk.

• Kamwahuihala duwen kounopadahn paliwar.

22.1.4

Kaunopadahn Paliwar

Pwuhk sarawi kan padahngki duwen kesempwalpen kaunopada (kilang Esekiel 38:7; Doctrine and Covenants 38:30). Memper kan alehdier kaweid en kaunopadahr pwe irail en kak apwalih pein irail, arail peneinei kan, oh mehteikan nan ansoun anahn akan.

Memper kan kin kalaudehla duwen kaunopadahn pali en mwohni sang:

• Pwapwain meiroang en eisek kis ehu oh sawas teikan (kilang Malakai 3:8–12).

• Kasohrehla oh kainapwihdi pweipwand ni uwen omw kak.

• Kaunopada oh momouriki koasoandihn budget.

• Nekidala ong ansou me pahn kohdo.

• Alehdi sukuhl mwahu pwe en sewese irail en apwalih pein irail oh arail peneinei kan (kilang 22.3.3).

Koukounop pil kin iangahki en wiahda koasoandi ehu ong duwen apwalih anahn akan ong ni ansou karuwaru. Memper kan pil alehier kangoang en nahkpene mwenge, pihl, oh soahng kesempwal teikan ong ansou-mwotomwot oh ansou-reirei kan.

22.2

Papah Irail akan me Anahne sawas ong Paliwar oh palien Pepehm

Sapwelimen Kauno werek ko padahngkier en “limpoakpene … oh euhpene nanpwungamwail” oh pil “sewese irail akan me kin anahne … sawas” (Mosaia 4:15–16). Memper kan kin nantihong kilang mehteikan nin duwen Sounkomour o ah kin ketin mahsanih irail, wehwehki arail kehlail akan oh anahn akan. Anahn pwukat kak iangahki mwenge, likou, ihmw, sukuhl, doadoahk, roson mwahu en paliwar, oh roson en pepehm.

22.2.1

Sapwellimen Kauno Imwen Nahk

Soangen sawas tohto kin kohda sang Mwomwhodiso pwe en sewese irail akan me anahn kahdaneki sapwellimen Kauno imwen nahk (kilang Doctrine and Covenants 82:18–19). Mepwukat iangahki en memper kan arail meiroang en ansou, koahiek kan, limpoak, dipwisou kan, oh sawas en mwohni ong irail akan me kin anahne.

Sapwellimen Kauno imwen nahk kin mie nan ward oh steik kan koaros. Sounkaweid akan kin ekei pak sewese emen emen oh peneinei kan en kak kilangada sawasepen arail anahn akan sang ni arail kin padahkiong irail marain, koahiek kan, oh sawas akan me kin kohsang rehn memper kan nan ward oh steik.

22.2.2

Kosonned en Kaisihsol oh Meiroang en Kaisihsol kan

Kauno koasoanehdier kosonned en kaisihsol oh meiroang en kaisihsol pwe en kapaiahki Sapwellime aramas oh ketin wiahda ahl ehu ong irail en kak papah irail me anahne kan. Memper kan kin karanihla Kauno oh kalaudehla arail kehl en palingehn ni arail kin momouriki kosonned en kaisihsol. (Kilang Aiseia 58:6–12; Malakai 3:8–12.)

Kaisihsol kak wiawi nan ansou koaros. Ahpw, memper kan kin kalapw kawawih ni tepin Rahn Sarawi en sounpwong o. Rahn en kaisihsol kin iangahki mepwukat:

• Wie Kapakap

• Sohte ale mwenge de pihl nan erein awa-24 (ma paliwar kak)

• Wiahda meiroang en kaisihsol laud

Meiroang en kaisihsol wia mehn sawas ehu ong irail akan me kin anahne. Ansou me memper kan kin kaisihsol, irail kin wia arail meiroang me pahn pahrekiong wen pweinen mwenge me irail sohte kang ko.

Memper kan kak kiheng arail meiroang en kaisihsol oh Ehu Kisin Likoun Meiroang me audaudah rehn pisop de emen nah sounsawas akan. Nan ekei wasa, irail kak wiahda arail sawas online.

---

NGOANG EN KAUN AKAN

---

22.3

Wiepen Kakehlailihala palien-Uhtohr oh Sewese Irail akan Me Anahne Sawas

22.3.1

Rapahki Irail Akan Me Anahne Sawas

Pisopo ahniki pwukoah sarawi en rapahkihla oh apwalihla me semwehmwe kan (kilang Doctrine and Covenants 84:112). Ekei me ahneki pwukoah kesempwal ong ni sewese pisop ong ah pwukoah kan iangahki:

• Soun Papah ohl oh lih akan.

• Presedensi en Pwihn en Sawas en Lih oh Kuohrumw en elder kan.

• Sounsawas akan ong pisop.

• Ekei tohn ward kaunsel.

22.3.2

Sewese Memper kan en Tehk oh Apwalihala Anahn en Ansou-Mwotomwot kan

Memper kan kin nantiong alehdi arail anahn akan sang arail pahn pein rapahki oh pil sang rehn arail peneinei laud kan. Ansou me e sohte pahn itar, memper kan kak alehdi sawas sang ni pali teikan me iangahki:

• Koapworment oh sawas akan en Kousoan kan (kilang 22.12).

• Sawas en Mwomwohdiso.

Sawas en Mwomwohdiso kak iangahki sawas en ansou-mwotomwot me iangahki mwenge, mehn kamwakel akan, likou, ihmw, oh pil mehteikan. Pisop kan kak doadoahngki meiroang en kaisihsol pwe en sewese irail akan me anahne sawas. Wasa kan me en pisop oaht akan kin mie, pisop akan kin doadoahngki pwe en kak kihda mwenge oh soahng tohto mwahu teikan (kilang “Bishops’ Orders and Referrals” nan Leader and Clerk Resources [LCR]).

22.3.3

Sewese Memper kan en Kakehlailihala Palien-Uhtohr ong Ansou-Reirei

Memper kan kak anahne sawas poatoapoat pwehn apwalih kahpwal en ansou-reirei kan. Sukuhl, kaiahn en doadoahngki peh, oh sawas teikan kak sewese irail en kakehlailihala palien-uhtohr oh sewese arail anahn en ansou-reirei kan.

Palien Plahn en Palien-Uhtohr kin sewese memper kan en diarada arail kehlail oh anahn akan. E pil kin sewese irail en diarada mehn sawas kaselel kan. Pilahn wet anahne wiawi ansou koaros me sawas en Mwomwohdiso kin doadoahk ie.

22.3.4

Sewese Irail akan me Ahneki Anahn en Pepehm kan.

Memper tohto kin alehdi kahpwal en pepehm kan. Ohl oh Lih me wia soun papah kan oh sounkaweid kan nan ward inenen kesempwal ong sawasepen memper kan me ahniki soangen kahpwal pwukat.

22.4

Kosonned akan ong ni Kihwei Sawas en Mwomwohdiso

Sang ni sawas en Kauno, memper kan kin rapahki sawasepen pein irail oh arail peneinei kan.

Sawas en Mwomwohdiso wiawihda pwe en sewese memper kan en koahiekla, ah kaidehn soakoahiekla. Sawas ehu me kin kohda anahne kakehlailihla memper kan nan arail ngoang en palien uhtohr.

22.4.1

Koangoangehki Emen Emen oh Peneinei arail Pwukoah kan

Sounkaweid akan kin padahngki me emen emen oh peneinei kan ahneki pwukoah kesempwal ong pein arail anahn en paliwar, pepehm, oh kehlail en palingehn.

Mwohn kihda sawas en Mwomwohdiso, pisop o (de emen sounkaweid de emen meh idiada en weliandi) pahn koasoaiong memper men ong soangen sawas kan me irail wie doadoahngki en kak sewese arail anahn akan.

22.4.2

Kihda Sawas en Ansou ong Anahn Kesempwal akan.

Koasoandihn Sawas en Mwomwohdiso iei sawas en lepin ansou ehu ni memperko arail nannantiheng pein-uhtorala.

Pisop kan anahne doadoahngki tenek mwahu oh ale kaweid en ngehn sarawi ni ansou me e pahn kin medewe ia uhwe oh reirei en ansoun sawas wet ah pahn kohda. Irail anahne poakehng oh kadekehng ah kaidehn kakairada anahn.

22.4.3

Kihda mehn Doadoahk Teikan de Mehn Sawas Teikan Sang Mwohni

Ma kak, pisop o pahn nantiong sohte kihla mwohni. Palahsang, e kak doadoahngki meiroang en kaisihsol de en pisop oaht pwe en kak sewese memper kan ong mwenge oh sawas teikan. Memper kan kak doadoahngki pein neirail mwohni oh pwain anahn teikan.

Ansou me e sohte itar, pisop o kak sawas sang ni doadoahngki meiroang en kaisihsol ong pwainla pweipwand anahn kan{(kilang 22.5.2).

22.4.4

Kiheng Doadoahk de Ansou Mwahu kan en Papah

Pisop kan kin luke irail akan me kin ale sawas en doadoahk de kin sawas ni wen me re kak. Sawas wet kin sewese memper kan en kin ahneki pepehm en wahu. E pil kin kalaudehla arail koahiek en pein-uhtohrala.

22.4.5

Kolokol Oaretikpen Sawas Akan en Mwomwohdiso kin Rir

Pisop oh irail sounkaweid teikan koaros kin kolokol ni rir oaretik en memper kan me kin anahne sawas en Mwomwohdiso. Met kin nekinekid en memper kan praipesi oh wahu.

22.5

Kosonned akan oh Kihda Sawas en Mwomwohdiso

Sounkaweid kan en Mwomwohdiso anahne idawehn kosonned akan me mih nan pali wet ansoun kihda sawas sang meiroang en kaisihsol de en pisop oaht akan ong mwenge oh soahng teikan.

22.5.1

Kosonned Akan Me Pid Irail akan me kin ale Sawas en Mwomwohdiso

22.5.1.1

Sawas ong Memper en Ward kan

Ni oralap, memper kan me kin ale sawas en Mwomwohdiso anahne mih nan lain en ward oh neirail memper rekohd mihmi nan ward o. Sawas kak kohda mendahte ma memper o sohte kin kalapw iang Sarawi de idawehn koasoandi kan en Mwomwohdiso.

22.5.1.2

Sawas ong Pisop akan oh Steik Preseden kan

Steik preseden pahn anahne intingihda ni mweimwei me pisop o kak doadoahngki meironag en kaisihsol de mweidada en pisop oaht ong pein ih de ong ah peneinei.

22.5.1.4

Sawas ong Aramas Akan Me Sohte Wia Memper en Mwomwohdiso

Aramas akan me sohte wia tohn Mwomwohdiso kin pekederlahng wasahn sawas akan en nan kousoan kan. Ekei pak, sang ni kaweid en Ngehno, pisop o pahn kak sewesehkin irail meiroang en kaisihsol de en pisop oaht en mwengehkan.

22.5.2

Kosonned akan ong Doadoahngki Meiroang en Kaisihsol kan

22.5.2.1

Palien roson de Mehn Sawas teikan ong Roson Mwahu

Ehu ehu ehria nan Mwomwohdiso wiadahr wen itait ehu ong ni doadoahngki meiroang en kaisihsol pwe en pwain palien roson, pali en ngih, de pweipweikan ong pali en roson mwahu en madamadau.

Ong wen mwohni oh kaweid kan, kilang “Doadoahngki Meirong en Kaisihsol ong ansou en Pweipwei kan ong Palien Roson.”

22.5.2.3

Kapwungalahn Meiroang en Kaisihsol

Memper kan sohte anahne kapwungala sawas en meiroang en kaisihsol me irail alehdi sang Mwomwohdiso.

22.5.2.3

Wen Mwohni sang Meiroang en Kaisihsol me kin Netila

Pisop kan sohte kak irehdi sawas en meiroang-en kaisihsol ong memper kan ong wen sawas en mwohni me alahldi nan ward.

22.5.3

Kosonned akan ong Wiahda Pweipweikan

Ma kak, pweipwei kan anahne wiawihda inenlahngete pesnes kan me kin wiahda dipwisou kan de sawas akan.

22.5.4

Kosonned akan ong Pweipwei Me Pahn Mwahu ong Pisop de Steik Preseden

Ansou me sawas en meiroang-en kaisihsol kin kohda pwehn sewese memper kan, pisop men sohte kak doadoahngki mwohni ko pwe en pwain dipwisou de sawas ko nan ahl ehu me pein ih pahn paieki.

Ma pweipwei en meiroang-en kaisihsol ong memper men pahn mwahu ong steik preseden de ah pesnes me e ahneki, Presedensi en Ehria anahne mweidada.

22.6

Pwukoah kan en Sounkaweid kan nan Ward

22.6.1

Pisop oh Nah Sounsawas kan

Pisopo ahniki pwukoah sarawi en rapahkihla oh apwalihla me semwehmwe kan (tehk Doctrine and Covenants 84:112. E kin kihong pali lauden doadoahk wet ong presedensi en Pwihn en Sawas en Lih akan oh kuohrumw en elder kan. Ahpw, miehte soangen doadoahk kei me pisop kelehpw kak wia. Ni karasepe, pisop o:

• Kin koasoanehdi soahng da, ia uhwe, oh ia uwen reirei en sawas en paliwar ah pahn kohda.

• Mweidada sawas en meiroang en kaisihsol {(kilang 22.4 oh 22.5) oh en pisop oaht akan ong mwenge oh soahng teikan (kilang 22.13).

• E kin pein kilang en memper kan arail pilahn akan ong palien-uhtohr. E pahn kin kapwukoahki sounkaweid akan en ward en kin tehk pilahnko ansou me anahnepe.

Pisop oh sapwellime sounsawas akan ahneki soangen pwukoah pwukat:

• Kaskuhlki padahk kan oh kapai kan me doke (1) apwalih irail akan me kin ahneki anahn en paliwar oh pali ngehn oh (2) kakehlailih palien-uhtohr (kilang 22.1).

• Kaskuhlki duwen kosonned en kaisihsol oh koangoangehki memper kan en kihda laud arail meiroang en kaisihsol (kilang 22.2.2).

• Pahn kin tetehk duwen alahldi oh wadepen meiroang en kaisihsol (kilang 34.3.2).

22.6.2

Presedensi en Pwihn en Sawas en Lih akan oh Kuohrumw en Elder kan

Sang ni kaweid en pisop, presedensi en Pwihn en Sawas en Lih oh kuohrumw en elder kan ahneki pwukoahn apwalih irail akan me kin ahneki anahn nan ward o (kilang 8.2.2 oh 9.2.2). Kaun pwukat kin padahkiong memper kan nan ward en:

• Sewese irail akan me kin anahne sawas.

• Momouriki kosonned en kaisihsol.

• Kakehlailih palien-uhtohr.

• Kalaudehla pein ahmw kaunopada oh en peneinei.

22.6.3

Ohl oh Lih akan me kin wia Doadoahk en Papah

Sawas en anahn en pali ngehn oh paliwar akan kin tepisang ni atail kin pwarek irail oh sewese riatail akan (kilang 21.1). Irail kin repwohtki irail akan me kin anahne sawas ong presedensi en kuohrumw en elder kan de Pwihn en Sawas en Lih kan mwurin arail kin koasoaiengehr memper kan. Irail kak ehukiheng anahn akan me kin inenen rir ohngete pisop.

22.7

Pwukoah en Ward Kaunsel

Pwukoah kesempwal en kaunsel en ward iei en pilahneda mwomwen apwalih irail akan me anahne oh sewese irail en kak pein-uhtohrala (kilang 4.4). Towe kan en pwihn en kaunsel kin wiahda pilahn akan sang rohng kan me alahldi sang kapeidek kan en doadoahk en papah oh sang ni pein arail kin tuhwong irail akan me anahne sawas. Nan koasoaiepen anahn en memper kan, sounsawas akan kin wauneki anahn en irail akan me peki me re sohte men sansalada.

22.8

Pwukoah en Ward Kaunsel en Me Pwulopwul kan

Ehu kahrepen kaunsel en me pwulopwul nan ward iei en sewese irail me pwulopwul kan en wiahla soun papah en Sises Krais kei (kilang 29.2.6).

Sang ni kaweid en pisop, kaunsel en me pwulopwul kan nan ward kin pilahnehda ahl en papah irail akan me anahne sawas nan ward o de nan wasahn kousoan o.