lalaki nga nagatrabaho

22.

Paghatag sang Temporal nga mga Kinahanglanon kag Pagpatubo sang Self-Reliance

22.0

Introduksyon

Ang mga miyembro sang Simbahan nangako nga “magpas-an sang palas-anon sang isa kag isa, … magpangasubo upod sadtong mga nagapangasubo … , kag magpaumpaw sadtong mga nagakinahanglan sang kaumpawan” (Mosias 18:8–9).

Ginalaygayan ang mga miyembro sang Simbahan nga pabakuron ang ila kaugalingon nga self-reliance paagi sa matutom nga pagtrabaho kag upod sang bulig sang Ginuo. Ang self-reliance amo ang ikasarang, pangako, kag pagpaninguha nga ihatag ang espirituhanon kag temporal nga mga kinahanglanon sang kabuhi para sa kaugalingon kag sang pamilya.

---

MGA PAGPANINGUHA SANG INDIBIDWAL KAG PAMILYA

---

22.1

Magpatubo sang Self-Reliance

Upod ang bulig sang Ginuo, ang mga miyembro nagapatubo sang self-reliance sa masunod nga mga paagi:

• Pagpauswag sang espiritwal, pisikal, kag emosyunal nga kabakod.

• Pag-angkon sang edukasyon kag trabaho.

• Pagpauswag sang temporal nga kahanda.

22.1.4

Temporal nga Kahanda

Ang balaan nga mga kasulatan nagatudlo sang importansya sang pagkahanda (tan-awa sa Ezequiel 38:7; Doktrina kag mga Kasugtanan 38:30). Ang mga miyembro ginalaygayan nga mangin preparado para maatipanan nila ang ila kaugalingon, ang ila mga pamilya, kag ang iban sa oras sang panginahanglan.

Ginapabakod sang mga miyembro ang ila pinansyal nga kahanda paagi sa:

• Pagbayad sang ikapulo kag mga halad (tan-awa sa Malaquias 3:8–12).

• Pagdula kag paglikaw sa utang kutob sa masarangan.

• Paghimo kag paggasto sa sulod sang ginpahamtang nga badyet.

• Pagsupot para sa palaabuton.

• Pagkuha sang nagakabagay nga edukasyon para mabuligan sila nga magtigana para sa ila mga kaugalingon kag sa ila mga pamilya (tan-awa sa 22.3.3).

Dalan man sa pagpanghanda ang pagplastar sang plano kon paano atendiron ang panguna nga mga kinahanglanon sa tiyempo sang emerhensya. Ang mga miyembro ginapaisog nga magsupot sang suplay sang pagkaon, tubig, kag iban pa nga kinahanglanon para makasustiner sang pareho malip-ot kag malawig nga panginahanglan.

22.2

Magminister sa mga may Temporal kag Emosyunal nga Panginahanglan

Ang mga disipulo sang Ginuo ginatudloan sa “pagpalangga … kag sa pag-alagad sa isa kag isa” kag sa “[pag]tabang sadtong mga nagakinahanglan sang … panabang” (Mosias 4:15–16). Ginatinguhaan sang mga miyembro nga tulukon ang iban pareho sang panan-aw sang Manluluwas sa ila, nga ginaintiendi ang ila pinasahi nga mga kusog kag panginahanglan. Mahimo nga dala sining mga panginahanglan ang pagkaon, bayo, balay, edukasyon, trabaho, pisikal nga ikaayong-lawas, kag emosyunal nga ikaayo.

22.2.1

Ang Storehouse sang Ginuo

Ang tanan nga ikasarang (resources) nga ara sa Simbahan para mabuligan ang may mga temporal nga panginahanglan ginatawag nga storehouse sang Ginuo (tan-awa sa Doktrina kag mga Kasugtanan 82:18–19). Dala diri ang ginhalad nga oras, talento, kaluoy, materyales, kag pinansyal nga bulig sang miyembro para mabuligan ang mga nagakinahanglan.

May ara sang storehouse sang Ginuo sa kada ward kag stake. Ang mga lider masami nga nagabulig sa mga indibidwal kag mga pamilya nga makakita sang solusyon sa ila mga problema paagi sa paggamit sang ihibalo, ikasarang, kag serbisyo nga ginatanyag sang mga miyembro sa ward kag stake.

22.2.2

Ang Layi sang Puasa kag mga Fast Offering

Ginpahamtang sang Ginuo ang layi sang puasa kag fast offering para bugayan ang Iya katawhan kag magpatigayon sang paagi nga maalagaran nila ang mga nagakinahanglan. Mas nagalapit ang mga miyembro sa Ginuo kag nagadako ang espirituhanon nga kusog samtang ginapangabuhi nila ang layi sang puasa. (Tan-awa sa Isaias 58:6–12; Malaquias 3:8–12.)

Pwede nga himuon bisan san-o ang pagpuasa. Pero, ang mga miyembro masami nagaobserbar sang una nga Adlaw nga Inugpahuway sang bulan bilang adlaw sang pagpuasa. Ang adlaw sang pagpuasa kinaandan may ari sining masunod:

• Pagpangamuyo

• Indi pagkaon kag pag-inom sa sulod sang 24-oras (kon masarangan sang lawas)

• Paghatag sang maalwan nga fast offering

Ang fast offering isa ka donasyon para mabuligan ang mga nagakinahanglan. Kon magpuasa ang mga miyembro, ginaagda sila nga maghatag sang halad nga sa pinakanubo, pareho sa balor sang pagkaon nga ginlaktawan.

Pwede nga ihatag sang mga miyembro ang ila fast offering kag nakumpleto nga Tithing and Other Offerings nga pormas sa bishop ukon sa isa sang iya mga manuglaygay. Sa iban nga mga lugar, pwede man sila maghatag sang ila donasyon online.

---

MGA PAGPANINGUHA SANG MGA LIDER

---

22.3

Sulundan sa Pagpatubo sang Self-Reliance kag Pagminister sa mga Nagakinahanglan

22.3.1

Pangitaa ang mga Nagakinahanglan

Ang bishop may sagrado nga responsibilidad sa pagpangita kag pag-atipan sang mga nagakinahanglan (tan-awa sa Doktrina kag mga Kasugtanan 84:112). Ang iban nga may importante nga papel sa pagbulig sa bishop sa sining responsibilidad nagasakop sang:

• Mga ministering brother kag sister.

• Mga pangulohan sang Relief Society kag elders quorum.

• Mga manuglaygay sang bishop.

• Iban pa nga mga miyembro sang ward council.

22.3.2

Buligan ang mga Miyembro nga Hibaluon kag Pun-an ang Temporaryo nga mga Panginahanglan

Ang mga miyembro nagatinguha nga masabat ang ila panguna nga mga kinahanglanon paagi sa ila kaugalingon nga pagpaninguha kag sa bulig sang ila pamilya. Kon kulang ini, mahimo nga magakinahanglan ang mga miyembro sang iban pa nga bulig pareho sang:

• Bulig sang gobyerno kag komunidad (tan-awa sa 22.12).

• Bulig sang Simbahan.

Ang bulig sang Simbahan pwede nga dala ang bulig sa temporaryo nga mga kinahanglanon pareho sang pagkaon, inugtinlo sa lawas, bayo, balay, kag iban pa nga panguna nga kinahanglanon. Pwede nga gamiton sang mga bishop ang mga fast offering sa pagsabat sining mga panginahanglan. Kon may ara sang bishops’ orders, masami ini ginagamit sang mga bishop sa paghatag sang pagkaon kag iban pa nga panguna nga mga kinahanglanon (tan-awa sa “Bishops’ Orders and Referrals” sa Leader and Clerk Resources [LCR]).

22.3.3

Buligan ang mga Miyembro nga Magpatubo sang Pangmalawig nga Self-Reliance

Mahimo nga kinahanglan sang mga miyembro sang sige-sige nga suporta para masabat ang pang-malawig nga mga kabudlayan. Ang edukasyon, bokasyunal nga paghanas, ukon iban pa nga mga bulig mahimo nga makabulig sa ila nga magpabakod sang self-reliance kag magpanigana para sa ila pang-malawig nga panginahanglan.

Ang Self-Reliance Plan makabulig sa mga miyembro nga mahibal-an ang ila mga kusog kag mga kinahanglan. Mabuligan man sila sini nga mahibal-an ang mapuslanon nga mga bulig. Ini nga plano dapat nga gamiton tagsa nga mamensar nga maghatag sang bulig sang Simbahan.

22.3.4

Magminister sa mga May Emosyunal nga Panginahanglan

Madamo nga mga miyembro ang nagaeksperiyensya sang emosyunal nga mga kabudlayan. Ang mga ministering brother kag sister kag mga lider sang ward pwede nga mangin mga instrumento sa pagbulig sang mga miyembro nga may amo sini nga mga kabudlayan.

22.4

Mga Prinsipyo sa Paghatag sang Bulig sang Simbahan

Upod sa bulig sang Ginuo, ang mga miyembro nagatinguha sa pagtigana para sa ila mga kaugalingon kag sa ila mga pamilya.

Ang bulig sang Simbahan gintuyo para buligan ang mga miyembro nga magpatubo sang ikasarang nga magtindog sa ila kaugalingon, indi para magsalig. Ang bisan ano nga bulig nga ginahatag dapat magpabakod sang mga miyembro sa ila pagpaninguha nga mangin self-reliant.

22.4.1

Magpabakod sang Responsibilidad sa Kaugalingon kag sa Pamilya

Ang mga lider nagatudlo nga ang mga indibidwal kag mga pamilya may mayor nga responsibilidad sa ila kaugalingon nga temporal, emosyunal, kag espiritwal nga ikaayo.

Antes maghatag sang bulig sang Simbahan, ginarebyu sang bishop (ukon sang isa pa ka lider ukon miyembro nga iya gin-asayn) upod sa mga miyembro kon ano nga mga bulig ang ila ginagamit para masabat ang ila kaugalingon nga mga kinahanglanon.

22.4.2

Maghatag sang Temporaryo nga Bulig para sa Panguna nga mga Kinahanglanon

Ang tuyo sang bulig sang Simbahan amo nga sabton anay ang panguna nga mga kinahanglanon samtang nagatinguha ang mga miyembro nga mangin self-reliant.

Ang mga bishop dapat nga maggamit sang kaalam kag magpangayo sang espirituhanon nga giya sa pagbinagbinag sang kantidad kag kalawigon sang bulig nga ginahatag. Dapat sila nga mangin maluluy-on kag maalwan pero wala nagatuga sang pagsalig na lang.

22.4.3

Maghatag sang Bulig kag Serbisyo Imbes nga Kuwarta

Kon mahimo, dapat nga likawan sang bishop ang maghatag sang kuwarta. Sa baylo, dapat niya gamiton ang fast offering ukon ang bishop’s order para hatagan ang mga miyembro sang grocery ukon serbisyo. Pwede dayon gamiton sang mga miyembro ang ila kaugalingon nga kuwarta sa pagbakal sang iban pa nga kinahanglanon.

Kon kulang ini, pwede ang bishop magbulig gamit ang fast offering para temporaryo nga bayaran ang kinahanglanon nga mga balayran (tan-awa sa 22.5.2).

22.4.4

Magtanyag sang Trabaho ukon mga Oportunidad nga Magserbisyo

Ginaagda sang mga bishop ang mga nakabaton sang bulig nga magtrabaho ukon maghatag sang serbisyo suno sa ila masarangan. Nagabulig ini sa mga miyembro nga mamentinar ang ila dignidad. Ginapadako man sini ang ila ikasarang nga mangin self-reliant.

22.4.5

Pagtipig nga Pribado sang Impormasyon parte sa Bulig sang Simbahanan

Ginatipigan sang bishop kag sang iban nga mga lider sang ward nga pribado ang bisan ano nga impormasyon parte sa mga miyembro nga magakinahanglan sang bulig sang Simbahan. Ginaprotektahan sini ang pribasiya kag dignidad sang mga miyembro.

22.5

Mga Polisiya sa Paghatag sang Bulig sang Simbahan

Dapat nga sundon sang mga lider sang Simbahan ang mga polisiya nga nasulat sa sining seksyon kon maghatag sang bulig paagi sa fast offering ukon bishop’s order para sa pagkaon kag iban pa nga panguna nga mga balaklon.

22.5.1

Mga Polisiya Parte sa mga Makabaton sang Bulig sang Simbahan

22.5.1.1

Bulig sa mga Miyembro sang Ward

Sa kabilogan, ang mga miyembro nga nagabaton sang bulig sang Simbahan dapat nagaestar sa sulod sang nasakpan sang ward kag ara ang ila membership record sa ward. Ang bulig pwede nga mahatag wala sapayan kon bala regular nga nagasimba ang miyembro ukon nagasunod sa mga pagsulundan sang Simbahan.

22.5.1.2

Bulig sa mga Bishop kag Stake President

Nagakinahanglan sang sinulat nga pahanugot sang stake president antes maggamit ang bishop sang fast offering ukon mag-apruba sang bishop’s order para sa iya kaugalingon ukon sa iya pamilya.

22.5.1.4

Bulig sa mga Tawo nga Indi Miyembro sang Simbahan

Ang mga tawo nga indi miyembro sang Simbahan masami ginatudlo sa lokal nga mga ahensya sa komunidad. Sa panalagsa, suno sa giya sang Espiritu, pwede ang bishop magbulig sa ila paagi sa fast offering ukon bishop’s order.

22.5.2

Mga Polisiya sa Paggamit sang Fast Offering

22.5.2.1

Medikal ukon Iban Pa nga Kinahanglanon sa Ikaayong-Lawas

Ang kada area sang Simbahan may napahamtang nga mga limitasyon sa pag-aproba sang paggamit sang fast offering agud bayaran ang mga balayran sa medikal, dental, ukon mental nga ikaayo.

Para sa kantidad nga pwede aprubahan kag mga pagsulundan, tan-awa sa “Use of Fast Offerings for Medical Expenses.”

22.5.2.3

Pagbayad sang mga Fast Offering

Wala ginabayran sang mga miyembro ang bulig halin sa fast offering nga ila mabaton halin sa Simbahan.

22.5.2.4

Kantidad sang Gastuhon halin sa Fast-Offering sang Ward

Indi kinahanglan nga limitahan sang mga bishop ang bulig sa mga miyembro sang ward sa kantidad sang donasyon sa fast-offering nga nakolekta sa ward.

22.5.3

Mga Polisiya sa Pagbayad

Kon mahimo, ang mga bayad dapat nga irekta sa mga negosyo nga nagahatag sang mga kinahanglanon kag serbisyo.

22.5.4

Mga Polisiya sa mga Bayad nga Magabenepisyo sang Bishop ukon Stake President

Sa paghatag sang bulig sa mga miyembro gamit ang fast-offering, indi pwede nga gamiton sang bishop ang pondo sa pagbayad sang mga butang ukon serbisyo nga makabenepisyo sa iya sing personal.

Kon ang pagbayad sang fast-offering para sa miyembro magabenepisyo sa stake president ukon sa ginapanag-iyahan niya nga negosyo, kinahanglan sang pahanugot sang Area Presidency.

22.6

Mga Papel sang mga Lider sa Ward

22.6.1

Bishop kag ang Iya mga Manuglaygay

Ang bishop may diosnon nga mandato nga pangitaon kag atipanon ang mga may temporal nga panginahanglan (tan-awa sa Doktrina kag mga Kasugtanan 84:112). Ginatugyan niya ang kalabanan sining buluhaton sa mga pangulohan sang Relief Society kag elders quorum. Pero, may pila ka mga tulumanon nga ang bishop lang gid ang makahimo. Halimbawa, ang bishop:

• Ang nagahibalo sang klase, kantidad, kag kalawigon sang bisan ano nga temporal nga bulig nga ginahatag.

• Nagaapruba sang bulig halin sa fast-offering (tan-awa sa 22.4 kag 22.5) kag sang mga bishops’ order sa pagkaon kag iban pa nga panguna nga mga kinahanglanon (tan-awa sa 22.13).

• Personal nga nagarebyu sang mga self-reliance plan sang mga miyembro. Nagaasayn sang iban pa nga mga lider sa pag-follow up sadtong mga plano kon kinahanglan.

Ang bishop kag ang iya mga manuglaygay may masunod nga mga responsibilidad:

• Magtudlo sang mga prinsipyo kag mga bugay nahanungod sa (1) pag-atipan sang mga may temporal kag emosyunal nga mga panginahanglan kag (2) pagpatubo sang self-reliance (tan-awa sa 22.1).

• Magtudlo sang layi sang puasa kag paisugon ang mga miyembro nga maghatag sang maalwan nga fast offering (tan-awa sa 22.2.2).

• Magdumala sang pagtipon kag pagrekord sang mga fast offering (tan-awa sa 34.3.2).

22.6.2

Mga Presidency sang Relief Society kag Elders Quorum

Sa direksyon sang bishop, ang mga pangulohan sang Relief Society kag elders quorum may yabi sa pag-atipan sang mga nagakinahanglan sa ward (tan-awa sa 8.2.2 kag 9.2.2). Ini nga mga lider nagatudlo sa mga miyembro sang ward nga:

• Magminister sa mga nagakinahanglan.

• Ipangabuhi ang layi sang pagpuasa.

• Magpatubo sang self-reliance.

• Magpauswag sang kahanda sa personal kag sa pamilya.

22.6.3

Mga Ministering Brother ukon Sister

Ang pagbulig sa espirituhanon kag temporal nga panginahanglan masami nagasugod sa mga ministering brother kag sister (tan-awa sa 21.1). Ginareport nila ang mga panginahanglan sang ila mga ginaserbisyohan sa ila mga pangulohan sang elders quorum ukon Relief Society sa mga ministering interbyu kag sa iban pa nga kahigayunan. Pwede man nila ihambal ang mga panginahanglan nga pribado direkta sa bishop.

22.7

Papel sang Ward Council

Ang importante nga papel sang ward council amo ang magplano kon paano atipanon ang mga nagakinahanglan kag buligan sila nga mangin self-reliant (tan-awa sa 4.4). Ginabase sang mga miyembro sang konseho ining mga plano sa impormasyon halin sa mga interbyu sa ministering kag halin sa ila mismo personal nga pagpakig-angot sa mga nagakinahanglan. Sa paghinambalanay sang mga panginahanglan sang mga miyembro, ginarespeto sang konseho ang pangabay sadtong mga nagapangayo sang pribasiya.

22.8

Papel sang Ward Youth Council

Isa ka katuyuan sang ward youth council amo ang buligan ang mga lamharon nga mangin dedikado nga mga sumulunod ni Jesucristo (tan-awa sa 29.2.6).

Sa giya sang bishopric, ang ward youth council nagaplano sang mga paagi nga magserbisyo sa mga nagakinahanglan sa ila ward ukon komunidad.